مازالت عندكم ولا جامي كانت ؟

[Hakan]

السلام عليكم

موضوعي اليوم رايح نحكي فيه على خلق الحشمة عند الجيل القديم وعقلية الابناء مع اباىهم كي نقول الجيل القديم يعني لي ولدوا بين 1970 الى 1989 ،مواليد التسعينات شافوا وعاشو هاذ الحشمة وانا واحد منهم واول حشمة ولا ما نعرف كي تسموها مثلا حنا عندنا من الحياء أنو الكنة ما تدخلش على أب الزوج نتاعها اذا كان الزوج نتاعها معاه يعني انا مثلا قاعد مع الوالد تاعي من الحياء أنو الزوجة نتاعي ،ما تجيش تجمع وتريح معانا كي شغل يروح القدر في الصحراء هههه ، ديري حسابك مرتي .
من الحشمة عندنا ولي شفتها بعيني وعايشتها انو الطفلة ما ترفدش الولد نتاعها قدام باباها وهذي قصة صراتلي خالاتي كانو كي يكونو في دار العيال لي هي غرفة مخصصة للتجمع نتاع العايلة ويكونوا رافدين اولادهم الرضع كل وحدة طيش وليدها لختها حتى صرى تبادل نتاع الاولاد بيناتهم ههههههه .
من الحشمة ثاني الولد ما يلعبش مع وليدوا في حضور باباه لي هو الجد غير يشوف الوالد نتاعه يطيش وليدوا لعماموا ولا لختو ولا لامو المهم ما يقربش منو .
انا نطاغي عمي @فريد أبو فيصل هو لي يفهمني .
ملاحظة ضركي القدر راح طول ههههه والله لا علابالهم .

 

[أستاذ الفلسفة]

السلام عليكم موضوعي اليوم رايح نحكي فيه على خلق الحشمة عند الجيل القديم وعقلية الابناء مع اباىهم كي نقول الجيل القديم يعني لي ولدوا بين 1970 الى 1989 ،مواليد التسعينات شافوا وعاشو هاذ الحشمة وانا واحد منهم واول حشمة ولا ما نعرف كي تسموها مثلا حنا عندنا من الحياء أنو الكنة ما تدخلش على أب الزوج نتاعها اذا كان الزوج نتاعها معاه يعني انا مثلا قاعد مع الوالد تاعي من الحياء أنو الزوجة نتاعي ،ما تجيش تجمع وتريح معانا كي شغل يروح القدر في الصحراء هههه ، ديري حسابك مرتي .
من الحشمة عندنا ولي شفتها بعيني وعايشتها انو الطفلة ما ترفدش الولد نتاعها قدام باباها وهذي قصة صراتلي خالاتي كانو كي يكونو في دار العيال لي هي غرفة مخصصة للتجمع نتاع العايلة ويكونوا رافدين اولادهم الرضع كل وحدة طيش وليدها لختها حتى صرى تبادل نتاع الاولاد بيناتهم ههههههه .
من الحشمة ثاني الولد ما يلعبش مع وليدوا في حضور باباه لي هو الجد غير يشوف الوالد نتاعه يطيش وليدوا لعماموا ولا لختو ولا لامو المهم ما يقربش منو .
انا نطاغي عمي @فريد أبو فيصل هو لي يفهمني .
ملاحظة ضركي القدر راح طول ههههه والله لا علابالهم .

هههههه
كي نتزوج نخبرك
مي حاليا كل ماذكرته مكانش
الا نقطة واحدة
الكنة ماتدخلش على اب زوجها الا كان زوجها معاه

 

[السلطانة]

وعليكم السلام ورحمة الله وبركاته
وانا نكتب في هاذ الرد طاح وحد المطر الله يبارك
🌧🌧🌧🌧🌧🌧ربي يرزقك الخير ياخويا حكيم وييسرلك امور

حنا هاذي معندناش ههههه تسمى لقدر راح من زمان

حنا لي مازال انو الكنة في حضور سلافها تتحجب وتسقم قعدتها
اذا كانت راقدة تسمع سلفها جاي تنوض
اذا كنت نتوضى فالدوش وسمعت سلفي جاي نسكر الباب حتان نكمل ونلبس حجابي

معنديش شيخي الله يرحمو كون راني لاحظت وخبرتكم

 

[أبو عاتكة]

الحمد لله على نعمة الحياء والقدر اللي عيشونا بيه والدينا والمقربين لينا حتى منهم جيران ورانا مكملين بيها للممات وان شاء الله يترباو عليها اولادنا رغم صعوبة الامر في هذا الزمن.

أما الفضح والجرأة وقلة الحياء والاستهتار والعبثية والداب راكب مولاه اللي راها مكتسحة الساحة مقدرناهاش والله العظيم. وانا من الناس منتقبلهاش والله يالوكان تصبح مرسوم رئاسي.

العقدة انتاعنا ونتشرفو بيها الحمد لله أنو لما نصادفوا موقف ما في اي مكان نفيقوا وننتبهوا بسرعة لمثل هاذ الامور نتاع قلة الحياء و قلة القدر ربما البعض لاينتبه ويشوفها نورمال كيما يقولو بصح مع جيلنا والجيل اللي سبقنا والله ماتفوت لانستطيع تحملها وتقبلها وهذا اللي يجعلنا متوترين ومقلقين وحدنا وحدنا ولا واحد يحس بينا خاطر نقيسوها بميزان الحشمة والاخلاق والتربية اللي معادتش مقياس في هذا الوقت.

ذكرت حكاية الاولاد كان والدي في أيام حياة والديه كما تحكي الوالدة ربي يرحمها مستحيل يرفع ابنو من الارض قدام والديهم او يلاعبو ويضحك معاه وأنا كنت لا استطيع فعل ذلك أمامها حتى توفيت ، الوالد توفى قبل زواجي اتذكر لما زاد عندي ولد و كذلك البنت ولما تكون الزوجة في النفاس نحشم ندخل ليها والوالدة جالسة معاها وكنت استغل بعض الاوقات لغيابها فقط لرؤية المولود الجديد ونخرج بسرعة كالذيب ههه.

كاين في وقتنا الحالي بعض الحالات والعادات وكل انسان واش ورث من التربية والاخلاق والصفات كاين اللي بدل جلدوا بجلد الرومي ودخل عليها مايبان عربي مايبان يهودي وكاين اللي مزال على العهد صنديد يعاني ويجاهد في الوقت هذا.
هاذي منحة وعطاء من المولى عزوجل ويزيد يعطيك بنت الحلال الفوتوكوبي نتاعك نتاع حشمة وقدر والله وتعيش في كهف وتاكل الحشيش ماتتبدل ما تميل.

نقسم بالله لو نحكي على بعض عجائب الحياء والحشمة والادب والقدر ممكن البعض يعتبرها مبالغة ومن قصص السلف لكن مزال كاين المجاهدين والمجاهدات ربي يبارك فيهم . واختتم بقصة حصلت معي يوم كنت نمشي في شارع رايح للعمل بالصدفة كانت امراة بلباس المنزل فاتحة بابها وتسيق ولا تكنس مانيش شافي لاني هبطت راسي وليت نشوف فلو انا حشمت وهي الحمارة والو وشايفتني جاي والو ونكحكح ونخبط في صباطي وليت حصان والو البغلة ههه نورمال عندها ،،، المهم في نفس الشارع كانت نازلة واحد العجوز ياحصراه ظهرها حديبي من الكبر والهرم والله ياحكيم خويا حست بيا برك خاطر اكيد الشوفة نتاعها ناقصة واش تعمل؟ تغلق على وجها بالملحفة وتدير بوعوينة وتزيد تتلض تلسق للحيط حتى غاضتني المسكينة انا خفت عجوزة يا سبحان الله وبالملحفة وحشمت والله تعرف كنت راح نسلملها على راس ق خفت تنوض تعيط اجرو ليا احرو ليا هههه وليت زدت بعدت على طريقها ولسقت انا ثاني في الحيط.

ايا بالعافية كثرت ويعطيك الصحة.

 

[{مُدَلَّلَتُهُ}]

السلام عليكم

صح حنا في تيارت مازالت كاينة في بعض البلايص كيما وين متزوجة اختي ما تلقاش شيخها و راجلها قاعد و راجلها ما يلعبش مع ولدو قدام باباه .. بصح في دارنا مع بابا عادي ما عندوش هاذي خاطر جدي الله يرحمو ثاني كان ما عندوش هاذ العادة يبغي ولادو و ولادهم و نساهم كامل يتلايمو على الطابلة قدامو .. لي راني عندهم انا ثاني ماكانش هاذ العادة بصح كاين الحيا في حوايج وحدوخرين ..

ربي يزينا بتاج الحياء لأنه من خلق دينا

 

[إلياس]

قال رسول الله صلى الله عليه وسلم
الحياء شعبة من شعب الايمان
بارك الله فيك أخي على الموضوع الرائع جعله الله في ميزان حسناتك يا رب العالمين اجمعين

 

[وۣۗهۣۗہۣۗم]

منور خويا حكيم
الله يبارك عادات وتقاليد بلادنااا ولانوقولوو الحشمة والتربية الزينة
بصراحة حناا معندناش هادووو العادات اللى ذكرتهم فالموضوع ديالك بصح اهم شورط هو الحجاب قدام الشيخ والسلاف ولاد العم والخال وامور تاع تسلام مكانش على الجنس الاخر الا الاخت والاخ والام والاب الخالة والخال العم والعمة والشيخ على راسووو وحسب اما يعنى صراحة كناا نحشوموو 200℅ ولينا نحشمووو 20℅في طريق الانقراض
وربي يجيب الخير​

 

["viola"]

يا حكيم يهديك ربي هههه

 

[بسمة القلوب]

هههه حنا معندناش هادو كامل واسمحلي مع كل احترامي هادو معندهم حتى علاقة مع الحشمة الحياء انو المرأة تكون متربية وتتكلم بأدب في حضور اب الزوج او اخ الزوج و تكون مستورة اما انو متدخلش عليهم و الزوج ميرفدش وليدو هذا معندوش لساس لا راس لا علاقة بالحياء وكل واحد و عاداتو و على واش تربى

 

[اسماعيل22]

الحشمة باقية في ولاد و بنات الاصل مهما اختلفت العادات و الشروط في المجتمع..لاني بصراحة ارى بعض الاشياء كتبتها مبالغ فيها نوعا ما..ونفس الشيء لو تجي لعندنا راح بالاك تبالك حاجة ماش مليحة تقول كيفاه هادو عايشين هاك..في كل النقاط اللي طرحتهم يا السي حكيم نتفق انو اصل الحياء ان يحافظ كل طرف على شرفه.اما الباقي فهو على حسب نمط عيش كل عائلة..يعني لو تأخذ مثال بسيط فرق بين عائلة عائشة في قرية و عائلة تعيش في جبل..ماحبيتش نقول المدينة باش ما تكون حساسية..كل ما تخالط اكثر العقلية تتبدل و كل ما تكون بعيد على الناس تكون منطوي.. ان شاء الله فكرة تكون وصلت
شكرا على الموضوع خيي

 

[أشــواق 19]

سلام..موضوع باهيي يعطيك الصحة..
للأسف الشديد راحت الحشمة في وقتنا هذا..بكري صح تحكينا ماما كانت الحشمة والقدر ماشي كي دك..كانت المراة كي يتقدم واحد يخطبها متسمعش قاااع حتا يفروها رجال مع بعض..ودك ولات طفلة لي تجيب لخطاب وتزيد تصحح وجها يا هذاك يا منزوجش وخلي وخليييي لبير بغطاه
مام بكري كانت الكنة تحشم من سلافها ومتجمعهمش معاااهم بصح دك والله تلقاها تجمع وتشايخ وتضحك اون ديري راه خوها لي جابتولها يماها وهذي تاع دير لخمار قداام سلافهاا مكانش يديروها غير السلفياات..
تبدلللل زمااات اخوياأ حكيم فييي كلشش انا نشفاا حتا ككنا نقراو كنا نحشمو ونقادرو الاستاذ بصح الجيل دك كي يلقا استاذ برا شغل صاحبو متحسش بلي بقات الهيبة هذيك للأستاذ..
وبزااااف حوايج في الحشمة تبدلو على بكري..وربي يجيييب الخيرررر

 

[امحمد خوجة]

الامور هذه من التقاليد والاعراف ورغم ما فيها من حشمة وخجل ووقار للغير الا انها تتجاوز ما سمح به الدين الى التشدد قليلا لكن لو تم مقارنتها بين عصرها وعصرنا حتما سيكون العصر الذهبي هو الاجمل

 

[razan roza]

موضوع قيم اخي ولكن حنا في باتنة معندناش هاذ العادات اللي حكيت عليهم
صح الحشمة مليحة ولكن حمل الابن قدام جدو معندهاش دخل فالحشمة