وتوتات على الرابعة صباحا

[أبو عاتكة]

الموقع : إحدى البيوتات الجزائرية
المناسبة: عرس مهولل
جايبين ولا مادين ؟ جايبين عروس

المهم

صيف 2022
الزمن : 04:00 الرابعة صباحا

خخخخ شششش خخخخخ شششش




قبلها بساعة 03:00

غنية ،،،سليمة جيبيلنا ناكلو جعنا
عيطي لسليمة خير هي المكرمة لوخرى مشحاحة
سليييييمة ،،،، حنونتي،، ارواحي نڨلك
زاوية ثانية:
الحاجة وين نفرشلك في الحوش ولا في البيت لا لا بنيتي فرشيلي عند الباب نبات رايحة جاية
،،، شكون الحاجة نورية شيخها جا يديها وراه يخبط في الباب بعكازتو
زاوية اخرى:
خديجة وليدك طاح على راسو اجري اجري وقيلا طيحاتو بنت سلفتك
،،، سمية علاش طفيتو البوست مزلت مشطحتش كنت نغسل في المواعن
موالساعد ارواحي تڨصري معانا
حيزية راجلك راه يعيط عند الباب ڨالك اخرجي ولا ندخل ليك ،،، أخاه علاه جا هاذ السامط
زاوية من جهة اخرى:
يابنات أرواحو هزو معايا الفرشة عاونوني من الصباح وانا وحدي
عيطي لبنتك راها متحزمة تشطح من الصباح محبستش
روقية تباتي ولا تروحي؟ والله منروحها حتى السمانة الجاية راجلي راح للنيجر وولادي عند جداهم راني اونليبارتي
،،،، طخ طرڨ بوم
نوضو نوضو رايحين نفرشو ارواحي انتي منا،، روحي انتي لهيه ،، اوقفي شوية،، هزي كابتك،، اجبدي وليدك ،،، هاكي ڨاطوك طاحلك
الذراري العياط الجري الملاوحة الدوش معمر الكوزينة تخبط وتڨلب

بعدها بنصف بنصف ساعة 03:30


طفو الضو علينا
وشششتتتت ( الوتوتة والهمس)
شفتي أم العروس كيفاش تشنف موش عاجبها الحال
وتوتوتتتتتت
معجبنيش العشا والله متعشيت قلت لسليمة ديريلي كسكروط وديري فيه شوية لحم برك وهاتيلي قرعة عصير واذا بقات الشربة جيبيلي شوية والسلاطة وشوية عنب وتفاح هاذا برك ماتعشيت والله

واع،،واع،،اواااااع
اششش ارڨد وليدي نني نني ارڨد راك كرهتلي جد حياتي انت وبابك

هاااااا( التثائب عامل حالة )
محكيتلكش على شهرزاد
وينا شهرزاد
سلفتك الصغيرة كي دخل خو العريس
وتتتتييت وتوتوت سيسيسي
وتتتتتتتتت
زاوية اخرى:
العريس قالو تعرف عليها في واش يقولولو
الفيسبوك
ايه صحيتي البيسبوك

هااااا ( النداء الاخير للتثائب )
ايا تصبحي على خير غدوة نكملك

الحاجة: وين راها القفلة نتاع الضو ماني شايفة والو يعطيلهم عما
الحاجة وين رايحة؟
رايحة بصوالحي وشدخلك انتي ارقدي يرقد حسك.




،،،،،
ياجماعة هاذي فقط ڨصرة وهاذي عوايدنا واعراسنا وزيتنا في دقيقنا واحد مايسالنا

 

[ذكريات]

والله غي بصح، هادو عراسنا وناسنا الي ماتحلى اللمة غير بيهم وبصياحهم وعفايسهم، يزهو القعدة وما يرقدو ما يريحو، نقولو عليهم كاليين تراب النملوماتنساش الي مايباتوش ويروحو لديارهم يقلبو الحومة ويفيقو النايمين. إخراج القصة ذكرني بناس دار السبيطار في مسلسل الحريق، للرائع مصطفى بديع، نص جزائري مئة بالمئة

 

[خديجة ph]

تبدلت بزاف حوايج جات الانترنيت هول الديار و عقول الكبار و الصغار الا شيء واحد ما تبدل
حلاوة هذو السهرات الوتوتة الليلية ولو ما كنتش تعرف الموضوع او ابطال القصة هههه المهم العبرة هههه تعرفي زهية بنت خالت ولد عم الجارة اللي مقابلة صفية الباب الباب
وانت ترد: هو انا عرفت زهية لما حأعرف صفية ولا جارتها ههههه بس كملي المهم واش صرا هههههه

 

[الورد الأحمر]

يا حسراه في عرس خالي واش عملنا من سهرات في 2004 للصباح واحنا فاطنين مبعد كي يقرب الغاشي ينوض احنا نرقدو. نشفى رقدت في الصالون لقيت روحي في الشومبرة شكون عباني وكيفاش ما حسيت ما والو ثالمون كنت كاو. درك نروحو لي صال كل وحدة مع تيليفونها لاهية ونكملو العرس كل واحد يرجع لدارو ... حتلا جاتني الدمعة وأنا قريت الموضوع في لحظة حساسة خخخخ

 

[إلياس]

راحت السهرات العأئلية عادت كل ناس تقريبا ساهرة على مواقع التواصل الاجتماعي و همها بطونها ينامون عن الفجر

 

[rafid2]

للحظة رجعتنا للزمن الجميل
اليوم عاد العرس مابين الساعة الثانية عشر والرابعة عشر في الصالة تتغدى وتروح
راحت ايامات زمان وين كان العرس بالعشر ايام وواحد مايتضايق القلوب فرحانة والخير عطاه ربي

 

[Tama Aliche]

هههههههههههههههههههه موضوع منظم و عجبني لميت كلش في بعض رااااحت الايام الجميلة ,, كانوا الكل يروحو فرحانين و الكل يرقص بما يملك من مواهب ههههه هيبهوب الوقت هذاك شايع تقلب بالسرة كي يخرجلك راجل هكاك تولي تسمعغاشي غير يصفق فرحان عاجبهم ,, و زيد لها ماكلة العرس مركزين على اللحمة هههههههه و حبة الميلفاي وحداها ههههه مش كما دوكا كلش زعما لوكس واللب ما يسوااش اصلا الفرحة مكانش بنتها
و خلي دراري ضغار حاضرين دوكا ولاو يشرطو الطفل صغير مايجيش مع انهم الحياة و النشوة تحير ههه يقلقو منهم يحبو كلش الاز لكن احيانا بعض الفوضى مليحة و تنسي و تفرح هههههه
كلش كان يشعل زمااان و حكايات الرابعة صباحا فووووووووووووور هههههههههه منحطوش في قلوبنا شغل هدرة بالنية مش بالفساد كلش زين الصفااا لا بلكنا مينذاك مين تلقا عرس تروحله ايا يحظرو الكل فالدار وهذاخلانا نعرفو جوانب جديدة ما نعرفوهاش فالدار على بعض هههههههههههه
انا تفكرت الزمن الجميل اما اليوم ايا انت و قولي روحي لعرس والو ههههههههههه مايشوفونيش حتى فالعراس لافامي مساكن عبارتهم هي انه نهار تزوجي انتيا مانجيوش لعرسك هههه شغل انا دوك نحزن للاسف غاية معنديش دراهم باش نوكل جيش مشنف زيد هههه نريح غاية زيدلها الغنا تاع دوك يرجعك كافر نورمال ههههه متمسخرش تشطح على كباري ولا على كلام تاع مجون هههههه فيف الدنداني ها دانا داني ههههه تغنيها و تشطح عليها و تقعد تتحسب من المسلمين ههههههههههههه وزيد التصاور زمان العينين حمورا بصح نخرجوا شابين ههههه وكامل لمة وحدة اااه فالصميييم الموضوع دوكا اللي تدور ليه بالتلفون صور اووووب ستوري فيسبوك تلقا كل واحد مرمي فالشط عايشين الاحلام و اللحظة ناسيين عليها خلي برك او فكرتني فالدعوة العيانة هههههههههه
موضوع مليح يستحق الباز الذهبي .. صحييييت اخونا فيصل