الدوم كثرو نفاعو وياويح من خانو ذراعو

[منال إدريس]

سلام ..أزول
إن شاء الله تكونو بخير وصحتكم لابأس
شحال من واحد عرفناه في حياتنا ممكن يكون فرد من العايلة أو شخص جمعنا بيه المكتوب وظروف الحياة حكينا معاه وشاركناه حياتنا وديما يقولنا راني هنا كي تحتاجو حاجة عيطولي وفي وقت الصح يختفي دون رجعة أكيد تكونو صادفتو منهم بالزاف سواء كانو قراب لينا وإلا بعاد ..في المواقف الصعبة وفي لحظات المعاناة مانلقاو حتى واحد غير ربي العالمين اللي يسلكنا من عندو ولهذا الإنسان قبل ما يأمن لغيرو يحطو في المواقف وتما يبان المعدن الحقيقي إذا ذهب يلمع وإلا قصدير مصدي ومن بعد نجيبو الغربال اللي نجح يبقى واللي خسر يهبط ويروح في طي النسيان ..في هذه الحالة نتفكر كلام الجدة اللي يقول: الدوم يا الدوم الدوم كثرو نفاعو ..ما يبقى لا خو لا حبيب وياويح من خانو ذراعو ..
ربي يحفظنا أجمعين
ودمتم سالمين
​

 

[الامين محمد]

والله اوافقك تماما اختي
طاحت بينا و لقينا عدد قليل يعد باصابع اليد الواحدة
انا لقيت ناس بعاد و ليسوا من أقاربي ربي يجازيهم عي خير الجزاء
اما اغلب او جل اقاربي لا علاقة او اللي وقفت معاهم او ظنيت فيهم
لم اجدهم ربي يهدينا جميعا

 

[نہوغہ بہركہ]

كلمات من ذهب
والباقي رب العالمين

 

[Hakan]

وعليكم السلام ، من ناحيتي الشخصية نطبق حديث الرسول عليه افضل الصلاة والسلام ( من كان في حاجة اخيه كان الله في حاجته ) يعني اذا عاونت انسان مسلم و جا النهار لي نحتاج لي يعاوني رايح يكون ربي سبحانه في الحاجة نتاعي ويسخرلك لي يعاونك ، الشعارات و الهدرة ما نامنش بيها و مفهم نفسي أنو كل واحد بظروفوا قادر تقول لواحد و تتمنى تعاونوا لكن الله غالب عليك ما تقدرش ل هذا باش الانسان يرتاح نفسيا يحاول ما يعولش بزاف على ناس ،لانو اذا عولت على الناس وطحت في مشكلة رايح يجتمعو عليك زوج هموم هم المشكلة نتاعك وهم انو ما لقيتش من احبابك لي يعاونك.

 

[sana barhoumi]

الغائب حجته معه