لانش بوكس أو صندوق الغذاء

[Hakan]

السلام عليكم كي مسيتو ان شاء الله راكم بخير وعافية المهم عشية عشوة وانا قلت ندير موضوع خفيف وظريف كيما العنوان ولي يتكلم على اللانش بوكس أو صندوق الاكل لي يديوه معاهم للعمل او الجامعة و دراسة بصفة عامة ،هذا الأيام منين نتصفح مواقع التواصل ،نشوف انو بزاف ناس ولاو ينشرو ثقافة اللمجة ماشي الذراري الصغار ولكن الكبار و الناس لي تخدم ولا لي تقرى وما فهمتش واش السر في انتشار هذي الثقافة يعني كاين نوعية بزاف نتاع ناس ما تروحش من دار حتان تدي معاها ماكلة نتاعها الجامعة ولا للعمل و خاصة بالنسبة للفتيات لي راهم يبدعوا صراحة مع هاذ التحضيرات ،كي كنت نقرى في جامعة كي شغل عندي سنوات من تخرجت هههه ما كنتش نشوف في هاذ الظاهرة كنت مع صحابي كي نموتوا بالجوع نروحو نشريو بيتزا كاري نتاع الفين للحبة تضرب 3 كي شغل تغديت ونرجعوا نقراو وحاليا مع الخدمة عادي منين نخرج نروح نتغدى في الدار ،مي كاين شي ناس يديو ماكلة نتاعهم للعمل ،وعجبتني فكرة مليحة فيها أنو استحفظ على دراهمك و ثاني حاجة عندك أكل صحي لكن أنتم كأعضاء سواء جامعيين او عمال اسكو تديو معاكم الاكل او راكم من جماعتي تصبرو حتان تتغداو في دياركم او تشريو برا سوندويشات تكملوا بيهم اليوم سلام.

 

[dahman kz]

العمال المهنيين والحرفيين عندنا عادي ... كي نكون نخدم في بلاصة بعيدة ندي معايا الماكلة يوميا ..انا نطول في الخدمه ونبقى حتى للخمسه ولا السته تاع لعشية في لخدمه ونتعب فلخدمه ولازمني ناكل شوي باش ننشط.. وباش نفطر في المطاعم يوميا ياسر .. نفطر بماكلة الدار خيرلي و للي نوفرها نشريها حاجه لبنياتي و لا للدار خير وناكل ماكلة داري خيرلي من ماكلة البرا
بالنسبة ليا نا وخدمتي والمجال تاعي هاذي حاجه عادية

 

[الامين محمد]

اواه خويا حكيم هاذي تاع هن
و ليس تاع هم هههههه
كي تتقدر كرانطيطا او براس او كرام و حبة مليفاي

 

[ذكريات]

الي ما يصبرش للجوع ياخذ من المنزل أحسن، من جهة يظمن نظافة الوجبة ومن ناحية أخرى يوفر مصروف اللمجة، الدوام واعر واللمجة أصبحت عادة في بلادنا كما قلت حتى للكبار بكري كنا ندو حبة فاكهة أو خبز بالجبن في شكارة وخلاص، درك جعلولهم علب خاصة وتفننو فيهم العلبة الخاصة بولدي نحير واسم نحطله فيها يوميا، شكرا أخي على الموضوع

 

[أبو عاتكة]

كلما تغيرت الحالة المادية ومستوى المعيشة للانسان وللمجتمع عموما راح تتبدل فيه عدة طباع تظهر عادات وطرق جديدة وترجع عادات كانت قديمة.
وفي دزاير تغيرت وراح تزيد تتغير مستوى المعيشة وتضياق شوية على الناس على حساب مانشوفو وراح نشوفو طبايع وافكار واساليب منها قديمة وعاودت ولات ومنها جديدة كنا نشوفوها الا في بعض البلدان.

بدات الناس تحس لبعض الامور كان مقدور عليها في سنوات سابقة لكن الان ولات صعيبة وتتكلف لهذا لازم شوية ضبط الميزانية والمصاريف الزايدة. فعوض اني نتغدى كل يوم في المطعم هذاك المبلغ راح نوزعو على امور اخرى نقص بيها التكاليف .

وزيد مع الامراض والتسممات والخداع اللي راه صاير الان الانسان ياكل في دارو او يدي معاه ماكلتو طايبة كيما موالف بيها بنة وطريقة ومحتوى.

العادة اللي تتحدث عليها في الموضوع اخي حكيم عاودت ولات من جديد وكانت شايعة في الشونطيات وهي ثقافة عالمية وصحية ومساعدة اقتصاديا لاي عامل او موظف.

راني نشوف في عدة تغييرات على مجتمعنا من الناحية الاقتصادية وهذا العالم كلو مشترك فيه.

 

[Hakan]

كلما تغيرت الحالة المادية ومستوى المعيشة للانسان وللمجتمع عموما راح تتبدل فيه عدة طباع تظهر عادات وطرق جديدة وترجع عادات كانت قديمة.
وفي دزاير تغيرت وراح تزيد تتغير مستوى المعيشة وتضياق شوية على الناس على حساب مانشوفو وراح نشوفو طبايع وافكار واساليب منها قديمة وعاودت ولات ومنها جديدة كنا نشوفوها الا في بعض البلدان.

بدات الناس تحس لبعض الامور كان مقدور عليها في سنوات سابقة لكن الان ولات صعيبة وتتكلف لهذا لازم شوية ضبط الميزانية والمصاريف الزايدة. فعوض اني نتغدى كل يوم في المطعم هذاك المبلغ راح نوزعو على امور اخرى نقص بيها التكاليف .

وزيد مع الامراض والتسممات والخداع اللي راه صاير الان الانسان ياكل في دارو او يدي معاه ماكلتو طايبة كيما موالف بيها بنة وطريقة ومحتوى.

العادة اللي تتحدث عليها في الموضوع اخي حكيم عاودت ولات من جديد وكانت شايعة في الشونطيات وهي ثقافة عالمية وصحية ومساعدة اقتصاديا لاي عامل او موظف.

راني نشوف في عدة تغييرات على مجتمعنا من الناحية الاقتصادية وهذا العالم كلو مشترك فيه.

خدمت في الشونطيات بكري كنا ساعة على ساعة واحد يجيب حماية قهوة و الخبز وناكلو نورمال ،بصح كي شغل جاتني غريبة مع انتشار المطاعم ،مي هي من ناحية صح تستحفظ على مصروفك و تاكل ماكلة بنينة ،بصح ياخويا انا راني خاصني نتزوج ونتوما ما تفهموش

 

[Hakan]

اواه خويا حكيم هاذي تاع هن
و ليس تاع هم هههههه
كي تتقدر كرانطيطا او براس او كرام و حبة مليفاي

والخبز لاه حشمت بيه تبانة خبز معاها شكارة لبن تغدي شونطي كامل هههه

 

[Hakan]

الي ما يصبرش للجوع ياخذ من المنزل أحسن، من جهة يظمن نظافة الوجبة ومن ناحية أخرى يوفر مصروف اللمجة، الدوام واعر واللمجة أصبحت عادة في بلادنا كما قلت حتى للكبار بكري كنا ندو حبة فاكهة أو خبز بالجبن في شكارة وخلاص، درك جعلولهم علب خاصة وتفننو فيهم العلبة الخاصة بولدي نحير واسم نحطله فيها يوميا، شكرا أخي على الموضوع

ايه ختي الصغار راهم باينين لازملهم الاكل ومع المطاعم متوفرة ما عادتش مشكل ، بصح الجيل الجديد لي ما يتحملش ما نحكيش على لي يقعد المساء راني على انسان يكمل على 2 مساءا ما يقدرش يتحمل الجوع حاليا والله اعلم شكرا على المداخلة .

 

[Hakan]

العمال المهنيين والحرفيين عندنا عادي ... كي نكون نخدم في بلاصة بعيدة ندي معايا الماكلة يوميا ..انا نطول في الخدمه ونبقى حتى للخمسه ولا السته تاع لعشية في لخدمه ونتعب فلخدمه ولازمني ناكل شوي باش ننشط.. وباش نفطر في المطاعم يوميا ياسر .. نفطر بماكلة الدار خيرلي و للي نوفرها نشريها حاجه لبنياتي و لا للدار خير وناكل ماكلة داري خيرلي من ماكلة البرا
بالنسبة ليا نا وخدمتي والمجال تاعي هاذي حاجه عادية

خويا دحمان الوحيد اللي يفرحني في امور الزواج ربي يخليك بناتك ،كيما قلت فيها فائدة توفير وتجنب الاطعمة السريعة ،ومن جهة توفر مصروف مهم برك ما يبعثوكش مع زوج حبات فرماج وخبزة مطلوع ناخوك رايح للخدمة مش للمجاعة هههه ربي يرزق خويا الحلال الطيب .

 

[السلطانة]

انا لو حيت نخدم في هاذ الوقت كنت نحضر الأكل في المنزل نقتصد شويا
الواحد مرات يكسر الروتين بالبيتزا ولا سندويتش

وعجبتني فكرة النساء لي يخدمو طلبات اكل البيت يعني كل يوم تحب تكوموندي مطلوعة وشوي مرقة لوبيا ولاشربة ولا زيتون معاها شوي سلاطة وتكون بعيد عالدار تنفعك بزاف
انتشرت هاذ الثقافة وهي حاجة ايجابية في المجتمع تاعنا يقدر الواحد يطبقها حسب ظروفو وهو متهني
ربي يعاون كل واحد يخدم
صحيت اخي.

 

[آمِيْرَتُه]

السلام عليكم
من وقت الجامعة كنت ندي معايا من أجل الاقتصاد وتاني حتى العبد يتجنب أضرار الأكل السريع وحتى لدرك نخدم ندي معايا مرات خاصة كي نخدم نهار كامل

 

[Oktavio_hinda]

انا لاحظت هذه العادة في أخذ الاكل من المنزل
في وقت انتشار وباء كورونا كانو الناس مايثيقوش في نظافة الاكل وتعقيم الأواني فمعظم الناس الغني والفقير ياخذو اكلهم من الدار ومن ذلك الوقت صارت عادة وانا شخصيا صرت أخذ اكلي معي
إذا بقى من العشاء أخذه للغداء واذا مابقاش نحضر الصباح اكل خفيف نسد بيه جوع الظهيرة حتى ارجع للبيت ومنها لاحظت أنني أوفر الكثير من المال كنت نشري بيه اكل او حلويات ومشروبات تظر بالصحة
على العموم أراها فكرة مليحة وكل واحد يعمل طول النهار لازم تكون عنده حقيبة اكل

موضوع جميل واختيار أجمل

تحياتي لك ولكل من مر من هنا​

 

[sana barhoumi]

صراحة صرنا نسمع بعديد الأمراض في صفوف الأطفال من المأكولات التي في الشارع معناها ينجم يحط خضرة فاسدة في الأكل أو يستعمل خبز عندو جمعة أو يقلي شهر كامل في نفس الزيت بما معناه أمراض وتسمم قد يصيب الأطفال أو البالغين لأن من يفتح مطعم أخر همه صحة الزبائن هو يريد مصاري ومرابيح مع الضغط على كلفة الإنتاج فصار ال-launch box ضرورية الحياة.

 

[ليليا مرام]

السلام عليكم .
سي حكيم جعت واقيل ..والله شفت بزاف ينشرو ففيديوات على لانش بوكس عن نفسي لو نقرا أو خدامة محال ناكل أكل بارد انا من ناس من فورنو لفمي ما ناكلش اكل بارد وما يعجبنيش مسخن لازم حامي يحرق ممكن اخرين هي من ناحية توفير مال واكل صحي ماكلة الدار افضل مي باينة صباح فالدار تدي اكل صابح وتسخنو والا تديه بارد وتزيد توصل 1 باه تتغدى وبلا ثلاجة وين راه الصحي هنا انا ضدو لو كنت خدامة او نقرا يا نفطر برا يا نستنى نرجع للدار وناكل

 

[ليليا مرام]

اواه خويا حكيم هاذي تاع هن
و ليس تاع هم هههههه
كي تتقدر كرانطيطا او براس او كرام و حبة مليفاي

يا يمى ولش خليت براس وكرام وحبة ملفاي ما تروحش تخدم يرحم باباك غير اقعد