البَـروك عندنا ،،، وعندكم كيفاش ؟!

[أبو عاتكة]

امس الخير عليكوم وايمحولي هذا جيتكم بلا بروك الحالة مزلوطة

البَرُوك : من لفظ المباركة عادة من عادات المجتمع الجزائري وهي عبارة عن مبلغ مالي غير محدد يخضع للقدرة المادية للشخص الذي يُهديها الى الاخرين في المناسبات والأفراح وحتى الأقراح تعبر عن المودة وتأخذ أبعاد تضامنية وتكافلية.



ايه عندو الحق هذا اليشير يزعف 50 الف باطة حليب ميشريهاش،،



مانعرف واش تسموه في منطقتكم احنا نسموه ( باروك ) باللاتينية يدعى ( barouk ) بالصينية ( منكم بصح ههه
المهم نتحدث عن البروك من الناحية السلبية اللي بدات تأثر على العلاقات بين الناس وولات حتى تعيق أداء واجب الزيارة والمشاركة بسبب أنو تحولت الزيارة الى عيب اذا كان لا تحتوي على بروك مادي وحتى مبلغ مالي محترم.
بعض النساء ورقة وستيلو يسجلو واش جابولهم في الزيارة :

سعدية سلفتي جابت 50 الف
بركاهم بنت مسعودة : 100 الف
سارة الحفافة: 200 الف
جارتنا مرت المعلم : 40 الف صرف
ختي ربي يبارك في رزق راجلها مليون
عجوزتي جات يديها فارغين وزادت تغدات وتعشات

وهكذا باه يرجع الدين نتاع البروك مستقبلا ويتنساش لانو عييييب

بعض الناس ولات تخاف من الاخرين يجيبولهم البروك يكون مبلغ كبير لانو راح يرجعوه بالمثل او أكثر
تذكرت واحد العجوز جاو يباركولها ب500 الف شدت منها 100 ورجعتلهم الباقي قالتلهم هاذي اللي نقدر نرجعهالمم المرة الجاية الباقي ادوه عليا.

وتحول البروك الى دين ومديونية لازم ترجعها للي جابهالك في اقرب مناسبة تجيه سواء ولادة ولا نجاح في القراية ولا جنازة لاقدر الله ولا مرض.

يجي على الناس ظروف عصيبة ميقدروش يقومو بالواجب بسبة امورهم المادية صعبة وكاين حتى اللي يضطر يتسلف على جالها او يضرب النح ويطفي الضو على اي مناسبة يسمعها فيسمح في اداء الواجب في المقابل راح يفتح ميات باب على تأويلات اخرى بيها تقطع الارحام والصلات ويلوموه على الغياب وهو حاشم من حكاية البروك
أو يختار تادية واجب من عشر واجبات ويسمح في البقية شغل يختار اللي تكون ساهلة وفيها معامل كبير كالمقربين جدا.

تكاليف زايدة على اللزوم حالت دون تأدية واجب المشاركة في الافراح او الاقراح وأثرت على العلاقات وحيرت أصحابها لأنها ممكن تتكرر اكثر من مرة في الشهر حسب المناسبات.

بعض المتزوجين حديثا تجيه صدمة بعد اسبوع تفاتحو الزوجة ،، هات كاشما عندك 500 الف ندير بيها الواجب اختي زاد عندها وليد وهنا تبدئ قصته معه المخروج الجديد غير المتوقع ، يحسب الزواج باطل

ربما هي كاينة بكثرة في مناطكق ومدن معينة ام هي شايعة في كل الجزائر ؟ ماذا عنكم ؟ وين راه لاحق مؤشر البورصة عندكم.

 

[Hakan]

ياخويا جيتني على الجرح من أسخف العادات لي تبلينا بيها في مجتمعنا حتى في منطقتنا موجودة و ثقبتلنا جيوبنا حتى في الوفيات لازم تدي معاك حاجة باش تعزي ،عندها بزاف أم مرت عمي توفاة الله يرحمها بعد ما رجعت مرت عمي لبيتها قاتلي الوالدة باش تديني نوقف عليها ولي تعني عندنا نعزيها ، وعطاتلي طلبيات غريبة عجيبة قلتلها يا ميميتي رايحة للعرس و لا وشهي ياخي أمها توفات قاتلي هذي هي العادات و جدك نهار لي مات دارتلها نفس الشيء يعني والله غير واحد رجع يخدم غير على هاذ الواجبات مكانش زيارة للعائلة الا لازم تدي معاك حاجة مستحيل أمي ولا وحدة من لافامي تخرج من دارها فارغة واذا حدث وراحت يا يقاطعوها يا يعايروها ، عكس الرجال يروح نورمال ما يهموش في حاجة النساء نتاعنا برك لي كلبوا وحد المظاهر وحد السخافات والله عجب واحد باش يبني حياتو يقعد غير يخلص في الكريدي نتاع الناس هذا جابلي وهذا ما جابش وهكذا ربي يهدينا للصواب الرسول يقول تهادو تحابوا ضركي رجعت هذه العادة سبب في قطع الرحم و الجوار.

 

[أبو عاتكة]

حكيم راك هدرت الصواب وشرحت وفصلت في اثار هاذ العادة اللي تحولت الى السلبية والمغالاة والابتداع فيها.

جبدتها على الرجال عندها ايام سمعت بواحد كان جارنا بكري مرض بازمة قلبية قريب ودع المسكين قام بعملية جراحية المهم لازم نروحلو بسيارة شوية بعيد تفاهمت مع صديق عندو سيارة كاش نهار نروحو زيارة ليه ونشوفو حالتو.
في عشية من العشوات عيطلي صاحبي ورحنا ديراكت ليه قعدنا عندو شوية طلينا علينا وقصرنا معاه وروحنا.
كي روحت قاتلي المرا واش صاحبكم قلتلها لابس ريح شوية
واش اديتو معاكم و كاشما عطيتوه
اتفكرت بلي صح مدينا معانا والو رحنا بفرايسنا على ربي والدراوش ضحكت وهي قعدت تفتي ،، يا عيبي وعيب كيفاش رايحين بيديكم..الخ
قلتلها شوفي حنا الرجال معندناش هاذ التخمام ضربنا من عندو الڨاطو والأتاي قريب تعشينا عندو ههه قصرنا وضحكنا واتفارقنا بالسلام عليكم ويرحم والديك وتبقى على خير الدنيا ومافيها خليناه زاهي وممنون اللي تفكرناه برك وطلينا عليه ومخليناش الواجبة تفوتنا معاه.

رحنا ليه بنية صافية وروحنا بنية صافية وانتوما النساء اقعدو في عييب عييب ماهو مليح ماهو زين ...

 

[خديجة ph]

جااااامي تفرح بالتباريكة هكا نعيطولها عندنا انه فخ اهرب بسرعة هههههههه
عندنا يا خويا و كرهناها ما تغيضني غير خالتي اللي مش مزوجة تضال تفرني على الزيادات و النجاحات و الزواجات وهي ما كاينة حتى مناسبة تقدر تردهم ليها فيها ربي يعوضها خير
يا نهار رحنا نباركو لبنت خال زوجي وليدها جاب الباك و بنتها التعليم المتوسط البيييام و انا حطيت راجلي هو اللي يعطيني بحكم انها من عايلتو و زدت هزيت معاي 1000 دج قلت نزيدها اذا عطاني قليل و يجي الزوج العزيز بالقميص و نسى دراهمو في البيت هههههه باركتلها ب1000دج عمر عدى بنتها تزوجت ما عرضتنيش و مازالت حاكمتهالي ههههه ربي يهديها و يهدينا اجمعين
عن نفسي ما نحبهاش وما نحسبهاش و اللي يجي بيديه فارغين كيما اللي يجيب مليون بركة و خير كلهم غير يدعولنا برك

 

[السلطانة]

انا نحب لي يفرحلي من قلبو مام معندوش نحس بصدق نيتو. عندنا وحدة فامي معندهاش بصح تجينا مسكينة تفرح معانا عمرنا حاسبناها نحب نديلها مام مترجعليش.
اما لي مام يباركلي وفي قلبو هازلي الغل مكنلاه يجي اصلا.

كاين لي ميجيك ميسقسي بالرغم من انو لاباس بيه. لكن يحبك تقيمو وتباركلو
يحبك انت تباركلو ولولادو لكن فيك انت وفولادك شغل مكانش.
انا متهمنيش المهم تكون النية برك.
وماشية بقاعدة منحقر حتى واحد لكن لي يحقرني تغيضني منو.

 

[Amoona]

بالفعل احنا كمان عنا نفس الشي العادات والتقاليد بتحكم المجتمع كان الله بالعون

 

[aljentel]

هذه العادات اعتقد شامله لكل الوطن العربي وهي عادات محرجه للغايه فالكثير لايحضروا المناسبات لانهم لايستطيعوا تقديم شيء فيحرج ولا يذهب للمناسبه ، نحن بالنسبه للزواجات نسميها عانيه اما اذا كان نازل بيت جديد نسميها نزاله والعانيه والنزاله يكون مبلغ مالي كل على حسب قدرته ..
ويتم التسجيل حتى يعرفوا من قدم ومن لم يحضر ومن يتخلف لايحضروا له في مناسباته هذا بالنسبه للرجال …
اما النساء فعد وخربط
يقدموا هدايا ذهب ومبلغ مالي للعرس للطرفين ام العريس وام العروس وتسمى عانيه
ويقدموا لنزول البيت الجديد طقم اواني او سجاد او دولاب مع مبلغ مالي وتسمى نزاله
ويقدموا هدية مولود للمواليد الجدد وعادة تكون ملابس اطفال مع مبلغ مالي وتسمى هدية مولود
ويقدموا هدايا حلاويات وورود مع مبلغ مالي للخارج من المستشفى ..

والحقيقه بدأت تخف بالنسبه للرجال فالغالبية يكتب بكروت الدعوه ( نعتذر عن قبول العانيه ) وهنا يحق المعتذر ان يأتي ويبارك دون ان يقدم شيء ولا لوم عليه لانه لم يأخذ حتى يعطي …
اما النساء زاد بلاهم بلاء ولاحول ولاقوة الا بالله

شكرا موضوع جميل ….

 

[ذكريات]

عادات متعبة نفسيا، ومرضت قلوب الناس وصلة الرحم راهي على سبة، تنقطع غير بالتفاهات، الله يجيب الخير

 

[السها]

ناس زمان عملوها للمساندة كانوا كامل فقراء و الي تصرا عندو صايبة فرح ولا قرح الغاشي يعاونو بالي يقدر عليه مع الوقت تطورت الى عقلية بالية جاتني و جابت نروح و ندي شغل سلف ولازم عليك ترجعو انا هذي الامور ما نخدمهمش ما نحتاج حتى واحد يجيبلي و كي نحب ندي بلا ما يشرط عليا واحد ندير الواجب فوق الواجب هذي تاع زيدت طهرت راه نجح في الباك و السيزيام و البييام راه خطب راه ادا دار جديده درك زادو خرجو عفسة قالك الي يدخل للسبيطار ما تحيبلوش الزيارة اعطيهملو دراهم تسما الي نلمهم انا في الشهر نوزعهم على الغاشي و نحط يدي على خدي ...الانسان لازم يقلع مفهوم كح حتى يحكمك التوفيس لازم نتعلمو نديرو الواجب عريس او عروسة واجب علينا نعانوهم كل واحد بالي يقدر عليه و نستناش الرد لان الخير تعملو للربي قرح بسلامة ريوسكم بالسيف علينا نعاونو و نساندو واحد مريض محتاج امرأه ولدت محتاجة هذا الي يستدعيه الواجب و عيب الا ما قدمتش للناس هذو يدك و الشي لوخر يرجع هدية عندما تحب انت تقدمها زيادة لحبيبك او حبيبتك في مناسبة معينة للتودد او مشاركة الفرحة ترجع ليك و لامكانيات و مش لازم تكون مشروطة و متكلفة لان كاين ناس الا جبتلهم كادو ما يعحبهمس و يشبعوا عليه حكايات و ضحك هذي النوعية من الناس من عندي يدو الشعر و لبعر والله ما يشوفو برا ....المهم ربي يجيب الخير لازم الناس تقطع العادي هذي ضروووووري هذا يقولولو الشحيت بالاتيكيت ...ربي يجيب الخير

 

[Oktavio_hinda]

هي في الحقيقة اعانات عندما يكون لواحد عندو عرس أو زيادة العائلة تعاونوا بمبلغ مالي غير محدد
لكن هناك أشخاص ليهم ايه وليك لالا
لكن الي يفهم العادة هي إعانة فقط الي يحب يعاون بمبلغ أو أثاث أو أواني منزلية كل واحد ومقدورو والي مايقدرش مرحبا به في كل المناسبات

 

[أبو عاتكة]

يعطيكم الصحة مداخلاتكم تستاهل مني ردود على قد قيمتكم عندي ساعود للرد شكرا لكم على التفاعل والمشاركة في هذا الموضوع.

 

[إلياس]

يفهم العادة هي إعانة فقط الي يحب يعاون بمبلغ معين