مشكلتي انصحوني فانا ضائعة في افكاري

[مشكلتي]

السلام عليكم
اعرفكم قليلا بنفسي اختكم في الله اقل من سن الثلاثين متزوجة لم اتم العام بعد و عاملة في مجال دراستي من سنوات ماشاء الله والحمد لله وجئت طالبة يد النصح في ثلاث مسائل قد تبدو للبعض عادية ولكن احيانا الواقع قد يقلب موازين الرزانة والحكمة ونبقى ضائعين في حل ابسط امورنا
الامر الاول تزوجت برجل يقربني في السن له عمل بسيط وطابقنا الاخير بنى فيه صالون مفتوح ومطبخ وغرفة نومنا وغرفة اخرى جعلتها غرضة ضيوف للنساء وسطح كبير بحيث يمكن ان نبني فيه غرفتين اخرتين وبعد زواجنا لم اتقبل داخلي فكرة بيتي الصغير وكنت افكر كيف لي ان اوسعه وصارحته بفكرة ان نجمع المال ونوسع ولكن صدمني وغلق على الفكرة بالرفض وان هدا مستحيل وحزنت جدا ونمت الغيرة داخلي عندما ارى بيوت اخوته ماشاء الله وبيت والديه كلها بيوت واسعة مؤثثة لانهم ماشاء الله كامل لاباس بيهم وبدات احس نفسي اقل منهم خاصة انهم مرات عديدة يشيرون ان بيتي صغير وانو الله يكون معايا وعندما افكر باطفالي الله يرزقني واياكم احزن كيف ستكبر الاسرة فالضيق واعجز عن تقبل الوضع
الامر الثاني اخوات زوجي عاملات ولكن زوجات اخوته غير عاملات لانو رجالهم لاباس بيهم ماديا ماشاء الله لكن رغم هدا يحقدن علي لانه تركني اعمل وكلما حاولت التقرب منهم بالاحسان اجد منهم الجفاء وبالعامية لما نجي نريح معاهم يقولولي كيفاه قدرتي عليه وانت مش قليلة الخ وانا الله اعلم بحالي وام زوجي دائما توحي بالكلام ان المراة العاملة ترمي ولادها الخ حتى دخلت الفكرة في راس زوجي وقالي كي يجي بيبي ان شاء الله تنساي الخدمة وحاليا يديني للعمل بضيق خاطر رغم انو كامل دراهمي ديت جهاز كلو فالقمة ماشاء الله وصالونات وهدايا ثمينة لكل اهلو في كل مناسبة ووالديه كل وقت نشريلهم انا ليس لي مشكلة في ترك العمل لكن اين البديل سنوات وانا مسؤولة عن حياتي المادية في لحظة نترك كلش وهو مش قادر يوفرلي حتى ابسط الاشياء وبيتي ناقصو حجات بزاف كيما بلاكارات موبل الخ علما انو عملي جد محترم اعمل مع النساء فقط
الامر الثالث انا من عائلة محافظة يعني ندير خمار قدام اخوة زوجي ام عائلة زوجي عائلة يصلو ومحترمين الحمد لله لكن مثلا نساء اخوة زوجي ميديروش خمار قدام زوجي وبرا انا نلبس حجاب وزوجي طلب مني نلبس حجاب شرعي فحسيت نفسي رح نولي غريبة عليهم اكتر ويجوني افكار نقول هو يشوف نساء بلا خمار وحتى طبيعة عملو مع النساء يعني نهار كامل يشوفهم اعرف زوجي محترم ماشاء الله والحمد لله ولكن هادي نفس والعمل يقولك لازم نكون بشوش ولازم نجاوب النسا في صفحة البيع على النت فنقول هو مايبدل حتى جهد باه يغير عملو ويلتزم صح وانا متخدميش ماتسوڨيش وحتى داري مش مخليلي راحة نردها كيما تمنيت
لوجه الله انصحوزي كاختكم وابنتكم فتفكيري غير راكز حاليا واريد ان ارتاح ومن يعجز عن نصحي خيرا فليدعوا لي واجركم على الله
اعتدر على الاطالة

 

[Hakan]

يا أختي الكريمة اطلبي من ربي العافية والمعافات في الدنيا والآخرة ،ما تزيديش مشاكل على روحك ،راكي الله يبارك كلش كاين المسكن غيرك من البنات راهم ساكنين في بيت العائلة و من غرفة نومها ما عندهاش الحق في أشياء أخرى .
زوجات إخوة زوجك ماهمش ساكنين معاكم وهذي ثاني نعمة تحسدين عليها .
و العمل نتاعك ما تخسريش بسببوا زوجك و حياتك ، شوفي للناس لي راهم أسفل منك والله ثلاثا غير تبقاي تشوفي وش عند الناس غير تعيشي مهمومة ومغمومة و تضيع حياتك هكاك اولادك ما تخميش عليهم مكيش انت المسؤولة عن بيوتهم ربيهم وكبريهم ومن بعد اذا فتح عليك ربي وتوسع السكن هذي نعمة واذا مكانش كل واحد يروح يسكن في جهة اخرى هذي هي سنة الحياة ،راني نشوف عندك تخوف من المستقبل لي ماجاش أصلا ،هاهو زلزال سوريا وتركيا عطالنا دروس وعبر منها :
عيشي اليوم لي راكي تتنفسي فيه لانو الغد راهو عند ربي ما يدريش الانسان يقعد حي او ميت وربي يفتح عليك ويشرح صدرك.

 

[razan roza]

وعليكم السلام اختي
ما تخليش مقارنتك بينك وبين نساء اخوة زوجك تفسد علاقتك بينك وبين زوجك
ودارك احمدي ربي عندك دار يعني عادي ضيقة ولا واسعة مايهمش يهم انه تكون بيت سعيد وهادئ فقط
اما بالنسبة للعمل خليه حتى يكتب ربي ويرزقك بطفل بالاك راجلك تكبر عليه المسؤولية ويخليك ترجعي لخدمتك انت المهم ما تخلقيش المشكل وتخسري دارك بسبب عمل ولا فكرة توسيع البيت
اما بالنسبة للحجاب عادي يا اختي كلنا نحلم بالحجاب الشرعي وماتحسيش روحك غريبة عليهم وماتعمريش راسك بتفكير الغير ديري اللي يخرج عليك وعلى راجلك ماتخمميش فالناس واش يقولو ولا كيفاش راح يشوفوك

 

[إلياس]

ربي يجيب الخير لي عوده باذن الله إن شاء الله

 

[أبو عاتكة]

الامر الاول تزوجت برجل يقربني في السن له عمل بسيط وطابقنا الاخير بنى فيه صالون مفتوح ومطبخ وغرفة نومنا وغرفة اخرى جعلتها غرضة ضيوف للنساء وسطح كبير بحيث يمكن ان نبني فيه غرفتين اخرتين وبعد زواجنا لم اتقبل داخلي فكرة بيتي الصغير وكنت افكر كيف لي ان اوسعه وصارحته بفكرة ان نجمع المال ونوسع ولكن صدمني وغلق على الفكرة بالرفض وان هدا مستحيل وحزنت جدا ونمت الغيرة داخلي عندما ارى بيوت اخوته ماشاء الله وبيت والديه كلها بيوت واسعة مؤثثة لانهم ماشاء الله كامل لاباس بيهم وبدات احس نفسي اقل منهم خاصة انهم مرات عديدة يشيرون ان بيتي صغير وانو الله يكون معايا وعندما افكر باطفالي الله يرزقني واياكم احزن كيف ستكبر الاسرة فالضيق واعجز عن تقبل الوضع

تفكير مرهق سابق لأوانه
كاين أمور أهم من توسعة البيت بعد عام واحد زواج ربما وقعتي في نمط تفكيرهم حول الحياة وتأثرتي باسلوب تفكيرهم ونظرتهم للامور المهمة والاولويات في هذه الدنيا
تذكري هاذي دنيا دوارة سعدك يافاعل الخير والعاقبة للمتقين
طرحت عدة مشاكل في هذا القسم كان البيت واسع والرزق كثير لكن الزوج معاه مشاكل او السكن مع اهل الزوج او سكن اهله معه وما ينجر عليه
لدي جار كاري شوية منزل فيه غرفة وكوزينة ومرحاض والدوش داخل الكوزينة و فقط الزوج معاق يمشي بالڨيلات مسكين يعمل ماصون صدقو او لا تصدقو نهار يخدم وعشرة عاطل والزوجة صغيرة اضطرت للعمل منذ شهرين عمل شاق من الصباح للمساء فوق هذا لم يرزقو بمولود وعندهم فايت عشر سنين ورغم انو الزوج ساعات يغضب منها بسبب حالتو ينفس غضبو فيها الا انهم احيانا تحسهم اسعد زوجين ويتعاركو مع الدنيا هاك وهاك وصابرين وحامدين ربي. وكرماء للغاية ولطفاء.
في مكان اخر زوجة وزوجها عايشين في بيت واسع لدرجة ان المرأة تشتكي من الوسع مقدرتش تقوم بهذا المنزل فولات تنظف جيهة وتترك الباقي مع كثرتلها الاولاد كثرلها الهم تقول عينوني على داري وقالت تمنيت يكون عندي بيت صغير استطيع التحرك فيه بدون تعب الزوج يعمل ايام خارج المدينة هذا المنزل واسع لكنه شبه مهجور
الخلاصة اختي ما كل ما يتمناه المرء يدركه انتي تمناي كل خير من حقك لكن لا تقنطي ولا تبتئسي لعله فيها خير لك. بيت صغير وزوج قايم بيا وذرية صالحة الدنيا ومافيها.

الامر الثاني اخوات زوجي عاملات ولكن زوجات اخوته غير عاملات لانو رجالهم لاباس بيهم ماديا ماشاء الله لكن رغم هدا يحقدن علي لانه تركني اعمل وكلما حاولت التقرب منهم بالاحسان اجد منهم الجفاء وبالعامية لما نجي نريح معاهم يقولولي كيفاه قدرتي عليه وانت مش قليلة الخ وانا الله اعلم بحالي وام زوجي دائما توحي بالكلام ان المراة العاملة ترمي ولادها الخ حتى دخلت الفكرة في راس زوجي وقالي كي يجي بيبي ان شاء الله تنساي الخدمة وحاليا يديني للعمل بضيق خاطر رغم انو كامل دراهمي ديت جهاز كلو فالقمة ماشاء الله وصالونات وهدايا ثمينة لكل اهلو في كل مناسبة ووالديه كل وقت نشريلهم انا ليس لي مشكلة في ترك العمل لكن اين البديل سنوات وانا مسؤولة عن حياتي المادية في لحظة نترك كلش وهو مش قادر يوفرلي حتى ابسط الاشياء وبيتي ناقصو حجات بزاف كيما بلاكارات موبل الخ علما انو عملي جد محترم اعمل مع النساء فقط

ديري في حسابك لن يرضى عليك انس في الدنيا مهما كنتي او فعلتي لهذا اغتنمي شبابك وصحتك ووسع الرزق لارضاء المولى عزوجل الباقي من الناس والنساء والله يالوكان تفرشيلهم الارض ورد راح يسبوك ويغيرو منك.
العمل لو كنت مكانك مع اول ولد نلتهى بالتربية ونرتاح في داري
حتى ولو بقيتي في العمل كل عمرك لا يغني مدخولك المادي ولو انتي بحاجة اليه عن تربية الاولاد تربية صالحة وكاملة ولد صالح يدعوا لك احسن من مال لايبقى منه الا ما تصدقنا به الباقي حاجة ما تبقى. وعلى العموم كل شخص وحالته الخاصة قد تتوصلون الى اتفاق خاصة مع الحالة الاقتصادية للبلاد ممكن هو يرغمك على البقاء تعملين ما تعرفي الدنيا واش فيها

الامر الثالث انا من عائلة محافظة يعني ندير خمار قدام اخوة زوجي ام عائلة زوجي عائلة يصلو ومحترمين الحمد لله لكن مثلا نساء اخوة زوجي ميديروش خمار قدام زوجي وبرا انا نلبس حجاب وزوجي طلب مني نلبس حجاب شرعي فحسيت نفسي رح نولي غريبة عليهم اكتر ويجوني افكار نقول هو يشوف نساء بلا خمار وحتى طبيعة عملو مع النساء يعني نهار كامل يشوفهم اعرف زوجي محترم ماشاء الله والحمد لله ولكن هادي نفس والعمل يقولك لازم نكون بشوش ولازم نجاوب النسا في صفحة البيع على النت فنقول هو مايبدل حتى جهد باه يغير عملو ويلتزم صح وانا متخدميش ماتسوڨيش وحتى داري مش مخليلي راحة نردها كيما تمنيت

فقط انتبهي لعلاقتك المتينة مع زوجك ولا تكوني ندا له في كل شيء اذا كان ملتزما متزنا منزها عن المعاصي فلا تضيقي عليه وتستفزيه لازلتي في بداية المشوار والثقة تبنى وترتفع على اخلاق الطرفين متساويين. الاخلاق المتأصلة في الانسان هي كل شيء.

ربي يبارك فيكم ويفتح عليكم ويهنيكم
بعض الامور ننصح بها من واقع ما نعيشه و نعايشه واخرى مما بينه ديننا ويبقى الانسان رهين قناعته وظروفه الخاصة الاهم في كل هذا ان يكون الانسان غير ظالم وغير مذنب الباقي كلو يعدي

 

[وۣۗهۣۗہۣۗم]

شوفي خيتى .....
راكى مفونسياا شوي على الاغلب منقدروش نحطوو رواحناا في بلاصتك مى نقدروو نحكمووو من خلال وش قلتى
شوفي ختى راكى تقولى غرفتين وصالة ومطبخ الله يبارك ماشاء الله ها حمدى ربي راكى راسك براسووو تعشي وتتهناي ياختى ارضاي راه كاين ناس تتمنى وتدعى في ربي يرقها غرفة وحدة وكاين ناس عايلة كبيرة ستة سبعة عباد في غرفة وحدة وكلشي في وقتووو حلووو راكى تقولى كاين وين تزيدى وتقدرووو تزيدوووا ياختى بعد سنوات وبعد مايكون عندك اولاد ويكبرووو وتضياق عليكم الحالة صح تم من حقك توسعي حالتك مى تضغطى على راجلك باه توسعي على جال لواسك ولاعجوزتك ديارهم واسعين لا راكى مخطية ياختى شوفي اذا راكى مهنية معاه حوسي توسعي علاقتكم حوسي تهنيه باه يهنيك وهاديك تاع نسا لواسي مانسا لواسي انسي هاد تفاهات راهم لعب ذر انتى ملتزمة تديرى حجاب الله يباركلك ويبارك فيك هوما خاطيك فيهم راجلك قالك جلباب ومانعرف خاداا الامر المفروض تتفاهمو عليه فيما بيناتكم اذا شفتى روحك مقتنعة وقادرة عليه بسم لالا مزال اتناقشووو وقوليلوو مع الوقت برك وما يكون غير خاطرك هادى هى وناحية انك تخلى خدمتك هاداا شئ المفروض تكونووا تفاهمتووا عليه نهار الاول نهار الشرط ياختى لعزيزة لازمك تخممى مليح منقدرش مقولك خلى خدمتك ومنقدرش نقولك لالا انتى وحدك اللى تعرفي ....
الماديات والمنزل الضخم والليتسع ودراهم وسيارات هادووو اكل والووووووو حاجة فيهم ماتجى قدام راحتك وهناك وسعادتك العائلية والزوجية وكلشي مع الوقت يفوت انتى برك ماتقارنيش روحك ودارك وزوجك مع ناس وحدوخرين ربي فالدنيا هادى خلق وفرق سبحانه وتعالى ....

 

[خديجة ph]

السلام عليكم اختي
كلام الاخوة كامل ركز على حاجة وحدة و انا موافقتهم مليار بالمئة راكي مثل الراعي اللي كسب جرة عسل بقى يفكر نبيعها و نشري بيه نعجة كي تولد نشري كبش و من بعد بقرة و من بعد ثور و هذا حليب و لحم و قطعان بقر و غنم و يولي يضرب الخدام بالعصا و قام من النوم لقى روحو ضرب جرة العسل
راكي هذا واين وحدي ربي استمتعي مع زوجك الطاااااعة حتى يتأكد من انك محال تخونيه الطاااعة مع امو ما تديريش مشاكل لا مع سلافاتك لا نساء سلافك الاذن تسمع الفم ساكت اليد تخدم
مشي الامور كل يوم بيومه استنى تحمل اختي و تولد بالصحة و العافية و تفوت النفاس و اشهر عطلة الامومة هذي الامور الكل راها قريب العام و نص و من بعد فكري
راكي تعصري في مخك على امور احتمالاتها لا حد لها محال انك تستعدي ليها كامل
و اذا انت تصرفتي على اساس اسوء احتمال راح تفقدي محبة ناس بزاف اولهم زوجك و الكل راح يوصفوك بالمتسرعة كيما نقولو حنا خفيفة العقل و هذه ابشع صفة يمكن ان توصف بها عروس
كيما نقولو حنا ركحي بالوك اغتنمي هذي السعادة اللي راكي فيها الان مع زوجك الشيء الوحيد الذي عليك التفكير فيه الآن هو كسب قلب زوجك و ثقته بنسبة 100%
ربي يرزقك ما تتمناي في العافية
سلام

 

[Adem4dz]

بصراحة وبدون مجاملة............ راكي غالطة في تفكيرك. (لا تشغلي بالك بالناس + عيشي في بيتك واسعدي نفسك وزوجك _عيشي اليوم وغدوة يرحمها ربي + اقنعي زوجك بأن تواصلي عملك اذا ليس مخالف للشرع..(خايف عليك بهذا التفكير لا تخسري اليوم وغدوة يا اختي) ....!!

ملاحظة: البيت الكبيرة راه يطيح فيها الزلزال وراهم يعانو من تنظيفها...و...و...الخ

الحياة ساهلة و صعيبة .. = كما نحبو حنا !؟

 

[الرومانسي الجاد]

بصراحة النساء تستغل طاقاتهم في التفكير في آخر هموم الرجل..!! سيدتي لك سقف يأويك وهذا أكثر من الكافي.. استذكري شيئا مهما دوما.. انتِ تزوجت رجلا -نحسبه ذا أصل- وليس ب بيت تعيدين تأثيثه كما شئت و وقت ما شئت..!!

من الافكار التي تجعلني و الكثير من شباب اليوم أنفر من فكرة الزواج.. فكري ب جدية.. ربما تكتشفين حجم البلاهة لوحدك..

 

[razan roza]

الامر الثالث انا من عائلة محافظة يعني ندير خمار قدام اخوة زوجي ام عائلة زوجي عائلة يصلو ومحترمين الحمد لله لكن مثلا نساء اخوة زوجي ميديروش خمار قدام زوجي وبرا انا نلبس حجاب وزوجي طلب مني نلبس حجاب شرعي فحسيت نفسي رح نولي غريبة عليهم اكتر ويجوني افكار نقول هو يشوف نساء بلا خمار وحتى طبيعة عملو مع النساء يعني نهار كامل يشوفهم اعرف زوجي محترم ماشاء الله والحمد لله ولكن هادي نفس والعمل يقولك لازم نكون بشوش ولازم نجاوب النسا في صفحة البيع على النت فنقول هو مايبدل حتى جهد باه يغير عملو ويلتزم صح وانا متخدميش ماتسوڨيش وحتى داري مش مخليلي راحة نردها كيما تمنيت
لوجه الله انصحوزي كاختكم وابنتكم فتفكيري غير راكز حاليا واريد ان ارتاح ومن يعجز عن نصحي خيرا فليدعوا لي واجركم على الله
اعتدر على الاطالة

‏من أعظم شواهد الحُبّ غيرة الرجل علىٰ زوجته ورغبته المُلحّة في سترها وحشمتها وأنّه يودّ لو أخفاها عن كلّ النّاس وأخفىٰ اسمها عن مَسامع الجُلاّس!
ومِن تمام عفاف المرأة ألا تغضب من شدّة حرص زوجها علىٰ حشمتها وحجابها ، فالرجال أعلم بنظر الرجال.

 

[ريحـان]

ربي ينور طريقك و يطمئن قلبك

 

[ام أمينة]

السلام عليكم
نصيحتي لكي ان اردتي امرا في حياتك الزوجية عليك بالمناقشة مع الزوج في المعقول و التحدث عن كل ما يقلقكي او يقلقه و محوولة ايجاد حلول مناسبة للطرفين
اما عن الحجاب الشرعي فهو غيور عليك و لابد ان تفرحي بهذا
اما عن كلام الآخرين و معاملتهم حاولي قدر المستطاع تجنبهم و تصرفي امامهم على طبيعتك
اما عن البيت و نقص المستلزمات فيه ليس امرا مهما غير بلعقل و تعمريه المهم تكوني سعيدة و متفاهمة مع زوجك هذا هو الاساس
ربي يسعدك و يكون معاك

 

[أم عبد الله]

الاخوة فادوك وقالو واش حبيت نقول
نحي عليك هاذ الوسواس راح تكرضي روحك برك
ربي يهدي سرك ختي

 

[أم أُنٌَيسة]

وعليكم السلام ورحمة الله وبركاته
احمدي الله على النعمة اللي راكي فيها، كائن ناس معندهمش سقف فوق روسهم اصلا .
سبب مشكلتك انك تمدي عينيك لما متع الله به باقي خلقه .. كل انسان ورزقه.
﴿وَلَا تَمُدَّنَّ عَیۡنَیۡكَ إِلَىٰ مَا مَتَّعۡنَا بِهِۦۤ أَزۡوَ ٰ⁠جࣰا مِّنۡهُمۡ زَهۡرَةَ ٱلۡحَیَوٰةِ ٱلدُّنۡیَا لِنَفۡتِنَهُمۡ فِیهِۚ وَرِزۡقُ رَبِّكَ خَیۡرࣱ وَأَبۡقَىٰ﴾ [طه ١٣١]

أي: لا تمد عينيك معجبا، ولا تكرر النظر مستحسنا إلى أحوال الدنيا والممتعين بها، من المآكل والمشارب اللذيذة، والملابس الفاخرة، والبيوت المزخرفة، والنساء المجملة، فإن ذلك كله زهرة الحياة الدنيا، تبتهج بها نفوس المغترين، وتأخذ إعجابا بأبصار المعرضين، ويتمتع بها - بقطع النظر عن الآخرة - القوم الظالمون، ثم تذهب سريعا، وتمضي جميعا، وتقتل محبيها وعشاقها، فيندمون حيث لا تنفع الندامة، ويعلمون ما هم عليه إذا قدموا في القيامة، وإنما جعلها الله فتنة واختبارا، ليعلم من يقف عندها ويغتر بها، ومن هو أحسن عملا، كما قال تعالى: ﴿إِنَّا جَعَلْنَا مَا عَلَى الْأَرْضِ زِينَةً لَهَا لِنَبْلُوَهُمْ أَيُّهُمْ أَحْسَنُ عَمَلًا* وَإِنَّا لَجَاعِلُونَ مَا عَلَيْهَا صَعِيدًا جُرُزًا﴾﴿وَرِزْقُ رَبِّكَ﴾ العاجل من العلم والإيمان، وحقائق الأعمال الصالحة، والآجل من النعيم المقيم، والعيش السليم في جوار الرب الرحيم ﴿خير﴾ مما متعنا به أزواجا، في ذاته وصفاته ﴿وَأَبْقَى﴾ لكونه لا ينقطع، أكلها دائم وظلها، كما قال تعالى: ﴿بَلْ تُؤْثِرُونَ الْحَيَاةَ الدُّنْيَا وَالْآخِرَةُ خَيْرٌ وَأَبْقَى﴾وفي هذه الآية، إشارة إلى أن العبد إذا رأى من نفسه طموحا إلى زينة الدنيا، وإقبالا عليها، أن يذكرها ما أمامها من رزق ربه، وأن يوازن بين هذا وهذا.

(تفسير السعدي — السعدي (١٣٧٦ هـ))