البوعريفو في واش يغيبلو

[أبو عاتكة]

السلام عليكم الجميع ان شاء الله تكونو بخير وقاضيين صوالحكم نتاع رمضان وكل شي متوفر والشهرية كافية بالفاضل والامور هانية



المهم



معروفين احنا الجزائيريين بمعرفة كل شيء ونفهموا كل صغيرة وكبيرة قادر نتبدلك من شخص عادي ناض بعد العصر الى طبيب وممكن حتى جراح ونوووورمال وبعد تلقاني وزير تجارة اون مامتون كومارصون بعد ساعة انوطرينور غدوة تلقاني جينيرال


الفايدة من القصة الطويلة هاذي كيما تعرفو ههه هي انو اكيد كل واحد قد ما يعرف قد ما تتلفلو في حوايج بزاف وقد ما كسر راسوا يحاول يفهمهم او يتعلمهم او يستوعبهم والو في الاخير يبقى هذا الشيء هو السوجي الوحيد اللي ممكن لا يحدث فيه تحول من عبد يعرف حوايج فقط الى عبد متعدد المعارف وهكاذاك ومانعرف ممكن تلقاني نخلط في مجالات ونلعبها فهيم

انتوما واش هي الحاجة اللي قد ما درتوا باه تتعلموها او تفهوما مصلحتش الله غالب محبتش تدخل دماغكم
مثال عليا التريسيتي ( الدارة الكهرائية ) نحكي على تركيب صتالاصيون مثلا نتاع غرفة او كولوار والو منفرز لا فاز لا ناتر لاجد مواليهم
مع اني خدايم اخرى ثم ثم نهزها في راسي ونتعلمها بالخف الا هاذ الموصيبة قعدتلي عقدة
لهذا سيداتي سادتي اعترف اني لا استوعب تركيب الصتالاصيون نتاع التريسيتي وحتى وتقعد للعام الجاي وانت تفهم فيا
نعتبرها ماكلة متفوتش للمعدة الله غالب
وكاشما نتفكر حاجة خلاف راني نخبركم نظن نعرف كل شي الا هاذ الفكرة ههه

انتوما اذا حبيتوا تعترفوا بحاجة في مجال مرحبا بيكم اذا حبيتو تبقاو جزايريين هاذا الموضوع خاطيكم
متحشموش كيما يقول المثل الشعبي مول التاج ومايعرفش واش يحتاج

 

[ذكريات]

الجزايريين ينطبق عليهم المثل نتاع (سبع صنايع وزهرو ضايع) يفهمو في كامل أمور الحياة ومتعددو المواهب بصح عند التطبيق يبان مول الدراع ومول اللسان، أنا تاني نعرف بزاف حوايج نخدمهم من الطياب لإعادة التدوير وكنت نصنع ألعاب لأبنائي والخياطة والدتي ربي يرحمها كانت خياطة نعرف نخيط حوايج خفاف والبلوزة مادخلتليش للراس تبالي حاجة كبيرة ومانقدرلهاش، ربما في المستقبل نتعلمها كي تخفاف مسؤولية الأولاد إن كان في العمر بقية إن شاء الله.

 

[إلياس]

لي عوده باذن الله إن شاء الله

 

[aljentel]

هههه عقدتك تركيب الصتالاصيون احسن يمكن في الامر خير مو بالضروره تعرف كل شيء ..
عندنا كثير حاجات تعقدنا لكن خلها على الله ..

 

[جمــآنــة]

أعترف أنني فاشلة في طياب القاطو ههههههههههه ما يصلحليش خلاااااص قد ما ندير لا قاطو لا موسكوتشو لا كيكات عييت نجرب، مع أنني نطيب الأطباق الأخرى (الموالح والمرقة والمعجنات) إلا القاطو مزية ما نحبش بزاف الحلويات (بالاك هذي السبة لي خلاتني ما نعرفش نطيبهم).

 

[أم عبد الله]

ايي الله غالب ملي كنت صغيرة نحب ندخل راسي نخدم كلش خدمة رجال وخدمتي ك مرأة والحاجة ل تغلبني هههه لبارح لعبتها قافزة وماقدرت نصبغ الكولوار هههه وهنا بأن بلي نتفلسف برك الحمد لله المسيو فراها ربي يحفظو
ومن هذا المنبر نعترف بلي نعرف نخنتش برك والخدمة ع ربي ع قولة زوجي اخدمي خدمتك وخلي خدمة الناس

 

[ام أمينة]

السلام عليكم
حنا الجزائريين ماشاء الله نحبو نكتشفو و نحبو نكونو وين يحطونا
انا عندي عقدة من واحد القاطو قد ما حبيت نتعلم الشكل تاعو ما ينجحليش لي هو العرايش تالمون سييت فيه سنوات خلاص كرهتو
و كذلك تمتم نكره من الحاجة نحب نتعلم بزاف امور مثلا اشغال يدوية .خياطة بصح تلقاني بمجرد نجربها خلاص يروحلي حب الاكتشاف هذاك
مشكور على الموضوع
واصل تميزك

 

[وۣۗهۣۗہۣۗم]

هياا سيدي مرحباا بياا عندكم .....
حتى انا نحب نمووووت وندخل روحى في كلشي ومبعد نلقي روحى .......

حاجة برك مهما حاولت وحاولت ومهما درتها منذ سنوات وبشهادة عدد كبير من المحاولات وبكامل قواياا العقلية نعترف بلي منعرفش ندير خبز الطاجين اي المطلوع ....

 

[الامين محمد]

ههههههه هو في الحقيقة نادرا ان تجد جزايري يعترف انه
لا يعرف او لا يفقه في امر
الجزايرين 40 مليون كلهم مدربين و اطباء و فلكيين و مهندسين و لاعبين
و خبراء و بياطرة و علماء يعني كلش نفهموا فيه هههههه
و هته الايام رانا كامل خبراء سيارات ههههههه

المهم انا ما نعرفش نسوق السيارة لاني و لا مرة سقتها
و الله اتمنى تجي فرصة اتعلم و استخرج رخصة السياقة

 

[أستاذ الفلسفة]

الجزائري كائن مركب متعدد الأقطاب