قالو ناس بكري

[Oktavio_hinda]

جبتلكم بعض الامثلة الجزائرية القديمة

اتمنى ان تنال اعجابكم


اعمل الخير ورميه في بحر جاري
إذا ضاع عند العبد مايضيعش عند الباري



إذا شفت العزري علاج
اعرف خاصو الزواج


ماتتكبرش كون ماتكون
اليوم تمشي غدوة مدفون


الجرح يبرىويصير ملموم
وكلام العيب يبقى فالقلب مرسوم


الي اصلوا تفاح عمرو مايتلاح
والي اصلوا دفلة عمرو مايحلى
يالوكان تحطو في جبح النحلة


نكارة العشرة ماتكلمو
خلي الزمان يعلمو


يتبع.../...
​

 

[إلياس]

سلمت يداك على الطرح الرائع والمميز جعلها الله في ميزان حسناتك يارب العالمين اجمعين

 

[أم عبد الله]

اييه ع الكلامة الموزونة والمعاني المتقونة
ناس زمان ماخلاو حاجة غير حطولها مثال
نمشو بيه جبال وجيال

 

[أم عبد الله]

قآلو ناس زمان
لي حبك مابنالك قصر ول كرهك ماحفرلك قبر

وقالو
الدنيا دوارة والبڨرة عثارة وياسعدو فاعل الخير

وقالو

دير الشر وتفكرو ودير الخير ونساه
نهار تفرح بطلتو وانهار للباري دواه

 

[Oktavio_hinda]

سلمت يداك على الطرح الرائع والمميز جعلها الله في ميزان حسناتك يارب العالمين اجمعين

الله يسلمك أخي إلياس الأروع هو مرورك من هنا

تسلم اخي​

 

[Oktavio_hinda]

اييه ع الكلامة الموزونة والمعاني المتقونة
ناس زمان ماخلاو حاجة غير حطولها مثال
نمشو بيه جبال وجيال

منورة اختي
أجل كلام موزون ويجي في بلاتو كي الرصاصة كل كلمة بمعنى ​

 

[Oktavio_hinda]

قآلو ناس زمان​

لي حبك مابنالك قصر ول كرهك ماحفرلك قبر

وقالو
الدنيا دوارة والبڨرة عثارة وياسعدو فاعل الخير

وقالو

دير الشر وتفكرو ودير الخير ونساه
نهار تفرح بطلتو وانهار للباري دواه

شكرا عزيزتي على الإضافة الجميلة
منورة الصفحات​

 

[Oktavio_hinda]

الدنيا غدارة وناسها دوارة
الفم فيه الضحكة والقلب فيه مرارة
عشرتنا مليانة وماتربيناش على يد جيعانة
آخرتها زوج
ميترا قماش وبلاصة فلجبانة
......
احصي راسك من النسا إذا تكلمت
ومن الخيل إذا تلجمت

........
مايفوح بخور بلا جمر
ولا ينبت زرع بلا مطر
ولا دوم محبة بلا قدر

........

يالي ماتعرفش تشعل الكانون وتغسل الدوارة
ماخذتها في وليد الناس خسارة
........
السكات ذهب غالي
والهدرة نحاس بالي
......
لا تسرج حتى تلجم واعقد عقدة صحيحة
لا تتكلم حتى تخمم لا تعودلك فضيحة

​

 

[جليلوس]

ها الهدرة سطر والمعنى بحر
يعطيك الصحة انا من هواة جمع الامثال
في المتابعة وربي يوفقك

 

[Oktavio_hinda]

ها الهدرة سطر والمعنى بحر
يعطيك الصحة انا من هواة جمع الامثال
في المتابعة وربي يوفقك

الله يسلمك أخي اهلا بك نورت الصفحات
تقديري​

 

[Oktavio_hinda]

لي راح من اعمر راح
محال ترجع الأمور
والي طاح من العين طاح
وماعاد يعلى مقامو
.......
كل غلطة توريك وتعرفك ساسك من راسك
وكل طيحة اتقويك وتعرفك شكون هوما ناسك
.......
إذا كتب علينا لفراق
نتفارق خوت كيف تلاقينا
نخليو الفرقة زوينة
مانشفيو العديان فينا
........
ماينفعك فضيق غير ذراعك
ومايوكلك لحلو غير صباعك
​

 

[جليلوس]

قالو ناس بكري
كي تهبط للبير طوّل حبالك
و كي تقعد مع حكيم شد هبالك
و كي تهدر مع البهيم وسع بالك و كي تريح مع البياع شد لسانك.قالوا ناس بكري
ما تخافش من الشبعان لي تربى فالعزّ والعزّ قديم عليه ...
خاف من الجيعان لي تربّى فالدل والعزّ جديد عليه.
قالو ناس زمان
ماتخافش من الشبعان اذا جاع خاف من الجيعان اذا شبع ... الشبعان يشم يدو يشبع اما الجيعان بمال الدنيا ما يقتنع ....​

 

[جليلوس]

ناس زمان قالوا :
يا شاري الرجال ما تساومش شحال..ويا قاصد الاصل مايهمكش المال
ما تقولش فلان حبيب حتى تعرف الخصال..ما يغركش الزين حتى تشوف لفعال
الوقت اذا فات ما يشدوه حبال..والريح اذا جا مايصدوه لجبال
قلب الانسان اصبح بدال .. يصبح معاك بحال ويمسي معاك بحال
مايسلك من غر الدنيا غير لي شبع منها ونال
ناس بكري يقولو الرجلة بحر والعوامة قلال
عيب الارض في قلت لمطر وعيب الراجل في سكاتو
ولي يحمل الذل موتو خير من حياتو....​

 

[جليلوس]

قالوا ناس زمان
ولد السبع ما يجي مشحاح
والدفلة ما تجيب تفاح

أسمع أخويا واش ڨالوا ناس زمان على هذ الزمان
يولي الخير مشتت
والراي مفركت
والحي يغير من لميت
يولي الخير ياسر
ومول العلم حاصل
ومول المال واصل
يمشي زمان ويجي زمان متخالف
يولي الخو من خوه خايف
هذا محلوف هذا حالف
وكل هذا من قلت الإيمان يالعارف
يقل الإيمان
وتكثر لفتان
وتعلى البنيان
يولي الراجل هايم
والنسا بلا كمايم
مابقالك في دنيا ما تلايم
يولي الشيخ بلا عمامة
ولمرا بلا كمامة
وا رووووووحي ياالدنيا بالسلامة
يكثرو التجار
ويقل لحيا من الصغار
ولمرا ماتشد الدار
تكثر النسا
وتغلا اللبسة
ولقلوب على بعضاها تقسى
يمشي زمان
ويجي زمان معكوس
يسكت الشحرور
وينطق الخنفوس
يولي الوقت مزروب
والغالب يرجع مغلوب
ويكثر البهتان ولكذوب
ولحق يولي على وجهه مكبوب
جيل يعيش بالسيف
وجيل يعيش باللهيف
وجيل منو ياحفيظ ويالطيف

الحاصول الله لا يورينا هاد الجيل.

 

[Oktavio_hinda]

الدنيا طويلة والايام تخافي
ولي يعملك الشر يرجعلو وافي

قالو ناس بكري

السترة يا مبهاها
ومايطيح ذبان في برمة بغطاها

....

همومك ديرهم في شبكة
شي يطيح وشي يبقى​

 

[جليلوس]

ناس زمان قالوا:
الغدار غدار يالوكان بالعسل عاجنينو
والحر يبقى حر يا لوكان بالمر خابزينو
الي باعك بيعو لا تسال عليه
والي شراك اشريه بالغالي لا تفرط فيه
في الدنيا هاذي افرز وقلل باه تعيش مدلل
لمحبة عندها ناسها ،وناسها كبار
الي قلك نحبك وخان ،ما يكون غير خداع وغدار
الي قلبو نظيف وعينو مليانة
ما تشوف منو لا غدرة ولا خيانة
عايشين وراضيين وربي الي عالم بينا
اذا ضاقت بينا ندعو العالي يحن علينا
الي عطاني يديه وقت المحنة
نقولو تزيان ليام ونعطيك عينيا
يا خوتي العشرة ماشي كلام
العشرة توريهالك ليام
ناس كبرو وناس تكبرو وناس علينا تجبرو
ناس كيما الشجرة وناس كيما الحجرة
وناس ما تشوف منهم غير الغدرة
بكلامهم يجرحوك و بأفعالهم يقتلوك
وكي تجبد عليهم تسمى نكار العشرة.​

 

[زوجي رفيق دربي]

ناس بكري قالو
مايعجبك نوار الدفلة وهو داير ظلايل..... مايعجبك زين الطفلة حتى تشوف لخصايل....

 

[زوجي رفيق دربي]

ناس بكري قالو
الي يحب لهراج يكثر النساء والدجاج
ههههه

 

[Oktavio_hinda]

قالو ناس بكري

البير التجربة منو ماترميش فيح لحجر
والي تحب تعاشر ماطيحش معاه لقدر

........


الزيت من الزيتونة
والعاقل يفهم لغة الطير
والي ماتخرج كلمته موزونة
يخليها عندو خير

وقالو ناس بكري

كل شي في وقتو زين
الي يزرب على خبزتو ياكلها عجين


........

كلمة من عند الرئيس ماتزعزع ماتقيس
ومن عند الغالي تسهرك الليالي
ضربة بدمها ولا كلمة بسمها​

 

[زوجي رفيق دربي]

قالو ناس بكري
شوف زمان شوف لحمير ترعى...والخيل تشوف