روح تائهة ضيفة العدد الثالث من عادات وأجواء رمضانية

[السلطانة]

السلام
عليكم ورحمة الله وبركاته

وعليكم السلام ورحمة و الاكرام

بمناسبة شهر رمضان المبارك نحييكِ أختي @روحٌـ👀ـتائهةـ والعائلة الكريمة
كل عام وانتم بخير بمناسبة حلول شهر رمضان المبارك
أعاده الله عليكم وعلينا بالخير واليمن والبركات وتقبل منا صالح الأعمال

ا

امين ياربي
ربي يتقبل مناا ومنكم الصيام والقيام وسائر الاعمال

كما نعلم جميعا أن شهر رمضان ذو نكهة خاصة هو شهر للعبادة،لصلة الرحم،لفعل الخير والتوبة والمغفرة فإلى جانب روحانياته وعظم أجر صيامه و قيامه، نجد مميزات خاصة له و مظاهر تتميز بها العائلات الجزائرية فدعونا نتعرف اليوم على عادات ولاية تيبازة من خلال استضافتنا لضيفة العدد الثالث : @روحٌـ👀ـتائهةـ

مرحباا بيكم ....

الأسئلة:


هذه بعض الأسئلة التي تفضلت بها لافتتاح العدد وهي أسئلة بسيطة ارسلتها للضيفة، لأترك لكم المجال لطرح أسئلة أخرى)

*كيف تجهزين نفسكِ لقضاء شهر رمضان؟

الحمد لله ربي
شوفي خيتى احناا مناش من العائلات اللى يدخرووو لرمضان ويخزنووو وكذاا رغم هذاا شريت شوي ماعن والحاجات اللى ميفسدوش بالاكثر امور تاع التحليات و تاع حلويات السهرة ....

*هل لديكم أجواء خاصة للتحضير لهذا الشهر المبارك في عائلتكم وولاية تيبازة؟

كيما كامل العائلات الجزائرية بنتها فالميناج ههههه هادى سمانة وحناا من مكان لمكان مع الميناج وبعض التعديلات

كاين حاجة خاصة شوى الاسبوع الاخير قبل رمضان الجدة تفتل طعام لهو الكسكس للسحور في رمضان اذا قدرنا ربي سبحانوووا

*ماهي التوابل التي تحضرونها في مطبخكم التيبازي لاستعمالها في رمضان؟

التوابل غير صبح شريتهم هههههه تقول طليتى علياا
انا والوالدة نحبوو تاع مستغانم نجيبهم على وحد السيدة ماشاء جبت راس الحانوت وفلفل اسود فلفل احمر وزنجبيل مع زعيترة مع توابل الدجاج وتابل خاص بالزيتون والسمك كذالك ...

*بما ان تيبازة ولاية ساحلية معروفة بانواع الاسماك هل تطهون أطباق بحرية في رمضان؟

اى راه النار و الكوااا والحمد لله حتى السردين وولى بشانووو
شوى في رمضان الحوت وكذاا مراات وين نطيبوه فالفرن يكون طايب مليح وصوص عاقدة وشابة

عندك فواكه البحر اللى يجووو ملاح في رمضان كطبق جانبي

*مظاهر دينية وروحانية موجودة خلال الشهر الفضيل تتميز بها ولاية تيبازة؟

الطراويح بالطبع شعائر دينية فريدة من نوعها ربي يقدرنا واياكم ان شاء الله وتانى الاطفال كى يروحوو للمسجد بعد صلاة الهصر وتسمعى صوتهم وهم يرتلون القران الكريم ماشاء الله .....

*لو ممكن صور لأطباق التيبازيين التي توضع على مائدة الافطار من الكسرة الى الاطباق الرئيسية والجانبية واطباق السهرة والسحور.. كل صورة مع اسمها لو ممكن (صور من غوغل ان لم تكن عندك صور خاصة).

الأطباق في التعليقات


شوربة فريك

مكتوبة 30 يوم هههه






الطبق الرئيسي لاول يوم رمضان





سلاطة




لحلم لحلو

أخيرا اشكرك لقبول الدعوة

العفو مرحباا بيك

قحا فطورك وصحا صحورك ربي يتقبل منكم ومنا صالح الاعمال ان شاءالله

مناا ومنكم صالح الاعمال ان شاء الله

في انتظار اسئلة اخرى من طرف الاعضاء

نتمنى لكم سهرة ممتعة.

في الانتظار

 

[السلطانة]

نهاركم مبارك صحا فطوركم وصحا صحوركم
لقد تم عرض الحلقة
اختي @روحٌـ👀ـتائهةـ
لنتعرف أكثر على عادات وأجواء رمضان في ولاية تيبازة

في انتظار اسئلة الاعضاء

@الامين محمد
@فريد أبوفيصل
@Adem4dz
@جليلوس
@Hakan
@سعد606
@روحٌـ👀ـتائهةـ
@*amani*
@إلياس
@هند
@صمتي حكاية
@Rochdi.dz
@razan roza
@أم يوســـف
@Soumia hadj mohammed
@ريحـان
@dahman kz
@aljentel @حفياد آدم
@أم عبد الله
@هدى النور
@طاعة الوالدين

والدعوة مفتوحة لجميع الاعضاء. المذكورة اسماؤهم وغير مذكورة

 

[وۣۗهۣۗہۣۗم]

​

في المتابعة باذن​

منورين
☺☺

يشاهد هذا الموضوع: 7 (الأعضاء: 2، الزوار: 5)​

• روحٌـ👀ـتائهةـ
• أم يوســـف

 

[زوجي رفيق دربي]

السلام عليكم
واااااي جيت انا اولى ههههه
ضرك نهبلك بالأسئلة ههه
كم عمرك؟
واش اسمك؟
واش ديري في حياتك؟
لونك المفضل؟
طبقك المفضل؟
وين وصلتي في قراءة القران؟
كم مرة تختمين قران في شهر رمضان
تلبسي حجاب ولا جلباب؟
وش درتو فطوركم البارح؟ هههه
تخدمي في كوزينة في رمضان؟ ولا غير رقاد وبيع لبلاد هههه
كاش نهار جربتي حاجة وخسرتلك في رمضان؟
واش تعنيلك اللمة؟
كي نجيك تيبازة وش طيبلي وين تديني نحوس واسكو ترقديني بحذا شارجور وتبرطاجيلي ويفي؟ ههههه
مزالو اسئلة في راسي من بعد نولي ان شاء الله
سلااام

 

[وۣۗهۣۗہۣۗم]

السلام عليكم

وعليكم السلام ورحمة الله وبركاته

واااااي جيت انا اولى ههههه

مرحباا مرحبااا جيبلنا معاك المطلوع برك رانى عاجزة اليوم نديرووو ههههه

ضرك نهبلك بالأسئلة ههه

اياااا اخلاياااا اصلا رانى مود افيون غير ابيبري برك

كم عمرك؟

سر تحت الاربعين وخلاص ههههه

واش اسمك؟

اخلايااا
تبعي برك دووك تعرفي

واش ديري في حياتك؟

ناكل نشرب ونتفاتن ونتقلق ونزعف ونمووت على الرقاد .....

هههه نخدم الحمد لله

لونك المفضل؟

اممم الاسود

طبقك المفضل؟

العصبااااااااااان

وين وصلتي في قراءة القران؟

الحمد لله سورة الفرقان ربي يقدرنا واياكم ان شاء الله

كم مرة تختمين قران في شهر رمضان

الحمد لله هاد العام الثانى عشر ولله الحمد

تلبسي حجاب ولا جلباب؟

حجاب برك

وش درتو فطوركم البارح؟ هههه

البارح طاجين الجبن مع الشوربة والبوراك بالسمك ولحم لحوو طبعاا

تخدمي في كوزينة في رمضان؟ ولا غير رقاد وبيع لبلاد هههه

دوزيام بلا و كل ما يخص مائدة السهرة وتحليات والسلاطة والمملحات انا والشربة تخصص تاع الوالدة

كاش نهار جربتي حاجة وخسرتلك في رمضان؟

هيه ههههههه المطلوع تاع تاجين مينجحش موحال

واش تعنيلك اللمة؟

العائلة الثانية الراحة الهدوء الجو المريح

كي نجيك تيبازة وش طيبلي وين تديني نحوس واسكو ترقديني بحذا شارجور وتبرطاجيلي ويفي؟ ههههه

هههههههههههههههه نطيبلك ارواحي برك اللى تبغي عليها
تحبي الحوت

خسار عليك ههههه بحذا شارجور والويفي كيما يبغي القلب

مزالو اسئلة في راسي من بعد نولي ان شاء الله
سلااام

ولي نسناك هههههههه

كنت راح نهرب هههههههههههههههه ندخل في سبات حتى العصر لحتى فالوقت البدل الضائع


مرحباا بيك خيتووو

 

[وۣۗهۣۗہۣۗم]

يشاهد هذا الموضوع: 8 (الأعضاء: 2، الزوار: 6)​

• روحٌـ👀ـتائهةـ
• أم يوســـف

 

[Hakan]

يا بي انا راني جيتكم في حديقة التسالي :
الأخت لي نتابعها وما نعرف عليها والو قديمة بصح مازالها جديدة عندي ديما هههه :

واش تحبي تاكلي في رمضان ؟ ،و ڨازوز ولا عصير ؟

المثوم العاصمي نورمالمون تعريفلوا هاتي شوي وصفة ؟

تخرجوا في الليل برا ولا تحبي تريحي في بيتك .

 

[وۣۗهۣۗہۣۗم]

يا بي انا راني جيتكم في حديقة التسالي :

مرحبااا حكيم ان شاء الله تكون جبت في يدك حاجة برك ههههههههههه

الأخت لي نتابعها وما نعرف عليها والو قديمة بصح مازالها جديدة عندي ديما هههه :

ههههه منور اخى
ورمضان مبارك تجوزوه بالصحة والهناء ان شاء الله

واش تحبي تاكلي في رمضان ؟

البوراك خمسة ست حبات نورمال

،و ڨازوز ولا عصير ؟

باينة ڨازوز العصائر بغير الشاربات منعرفش ذوقهم طووول

المثوم العاصمي نورمالمون تعريفلوا هاتي شوي وصفة ؟

ايمااا نموت عليه
حبة بصل فالقدرة طبعاا مع طراف لحم غنمى الافضل يتقلي مليح مليح نحطلووو ثووم و نحط حفنة لوووز وحفنة حميصة قرفة وفلفل ابيض ونقلي مليح ونمرق بالماء ساخن نغطى ونخلى يطيب ونوجد كرات اللحم كى يطيب اللحم نحطهم معاه يطيبوو تانى بالبنة يا البنة

تخرجوا في الليل برا ولا تحبي تريحي في بيتك .

اوااااه نونونونو سهرة خفيفة والى النوم ياخوياا يسهروو اللى ينوضوا على 10 للفوق انا خاطى ههه


منور اخى وصحة فطورك

 

[إلياس]

لي عوده باذن الله إن شاء الله

 

[Adem4dz]

ههههههههه
مرحبا بيك اختي صحا فطورك
علاش روح تائهة .. يا درا وين تاهت روحك هههههه
- تديري الفطور وحد ولا عندك المساعدين.. قولي الصح ! ههههه
- الطبق المفضل لكِ في رمضان .
- الديسير المفضل؟
-علابالك القازوز مظر بالصحة علاه تشربيه هههههه

هذا واش جا في بالي راني ديخان بعد الفطور ممكن رجعة فيما بعد لمزيد من التمرميد إن شاء الله هههههه

 

[وۣۗهۣۗہۣۗم]

لي عوده باذن الله إن شاء الله

ان شاء الله

 

[وۣۗهۣۗہۣۗم]

ههههههههه

مرحبا بيك اختي صحا فطورك،

الله يسلمك وانت زادااا

علاش روح تائهة .. يا درا وين تاهت روحك هههههه

تودرت الله غالب هههههه

- تديري الفطور وحد ولا عندك المساعدين.. قولي الصح ! ههههه

راح نقول الصح الوالدة الشربة تخصص تاعها الباقي انا

- الطبق المفضل لكِ في رمضان .

شوى الاطباق مي نحب العصبان مي بما انوو مش كل يووم في رمضان مش كيفاه كلش عادى مي نحب البوراك بكل انواعه

- الديسير المفضل؟

حالياا ظاربنى الحال على الفراولة راهى تشهي

-علابالك القازوز مظر بالصحة علاه تشربيه هههههه

اي هذا صح الطبق المفضل تاعي ههههههه يظر نو ميظرش كي منشربوش اللي ننظر ههههه خلى برك ☺☺

هذا واش جا في بالي راني ديخان بعد الفطور

كثرت على حساب الشوفة

ممكن رجعة فيما بعد لمزيد من التمرميد إن شاء الله هههههه

اي لالا تمرميد منحبوش هههههه


منور اخى
بون سهرة ☺

 

[ذكريات]

مساء الأنوار أختي، صح فطورك وصح رمضانك، إن شاء الله تكوني بخير.
مانكترش عليك الليل وراني عارفا تكوني عيانة
هل تشاهدين قنوات الطبخ؟ وهل تجربين الوصفات المقدمة فيها؟
هل تحبين الحيوانات الأليفة وأيها تفظلين؟
ماهي هوايتك؟
سهرة ممتعة وصح سحورك

 

[وۣۗهۣۗہۣۗم]

مساء الأنوار أختي، صح فطورك وصح رمضانك، إن شاء الله تكوني بخير.

مساء النور حبيبتى منورة خيتوو
وصحة فطورك انتى تانى

مانكترش عليك الليل وراني عارفا تكوني عيانة

عادى خودى راحتك

هل تشاهدين قنوات الطبخ؟ وهل تجربين الوصفات المقدمة فيها؟

نشاهد طبعاا اليوتوب طوول نقلبووو
نجرب بزااف بزااف ههه

هل تحبين الحيوانات الأليفة وأيها تفظلين؟

والووو خاطى طوول لزوج

ماهي هوايتك؟

الحلويات

سهرة ممتعة وصح سحورك

ربي يحفظك خيتووو

 

[السلطانة]

-اكتبيلنا دعاء نؤجر عليه؟
-برنامج مفيد تتبعيه في رمضان؟
-قارئ او شيخ للقرآن تحبين سماعه؟

 

[وۣۗهۣۗہۣۗم]

اهلا وسهلا ....

-اكتبيلنا دعاء نؤجر عليه؟

‏اللهُّم إني أسالك حُسن الصيام وحُسن الختام ولا تجعلنا يا ربنا من الخاسرين في رمضان اللهم اجعلنا ممن غفرت لهم ورحمتهم وأعتقت رقابهم من النار

-برنامج مفيد تتبعيه في رمضان؟

والا برنامج للاسف مكاش الوقت

-قارئ او شيخ للقرآن تحبين سماعه؟

الشيخ عبد الباسط عبد الصمد طبعاا


منورة حبيبتى وصحة فطوركم ...

 

[زوجي رفيق دربي]

هاااااني وليت
شريتي قش العيد ولا مزال؟
كاش نهار جرا موراك مهبول قولي صح هههه؟
كي تعودي تخدمي في بوراك تعمري حبة تاعك فرماج ودريلها علامة باش تعرفيها؟ هههه
هل عندك صديقة تحسيها صح نصفك الاخر وتوأم روحك؟
كل يوم تغسلي لماعن وحدك؟
وش هو شعورك كي متفطنيش لسحور؟ هههه
حاجة مليحة صراتلك في رمضان قعدت في راسك وش هي زعما؟ ههه
المهم خلطتلك اسئلة شرق غرب هههه

 

[الامين محمد]

يااه اختي الغالية راهي ضيفة و انا لا خبر
بصح اختي @أم يوســـف راهي قايمة بالواجب معاك ههههههه

أختي الغالية زرتي الغرب الجزايري ولا لالا
واش تعرفي على تيارت قولي الصح ههههههه
تعرفي تطيبي الزلابية
تعرفي تطيبي الكسكس
وقتاش نقولوا انه رمضان غالبك الصباح ام قبل الآذان
اختي الغالية انت ناس ملاح و عاقلة او قبيحة و مهبولة هههههه قولي الصح
شكون القريب ليك الوالد ام الوالدة
كي تروحي للسوق تشري بالعقل ام اللي في الجيب تخليه
اختي الغالية متى زفافك
اذا قدرتي تروحي عمرة و قالك لازم تختاري مرافق من اللمة شكون تختاريها
اذا لقيتي مليار واش تعملي بيه ههههههه اكيد هاذاك المليار تاعي ههههههه

بلاك نرجع اختي الغالية اذا ما كترناش عليك

 

[وۣۗهۣۗہۣۗم]

هاااااني وليت

مرحبااا مرحبااا
هياا رانى مع تاي تفضلي ......

شريتي قش العيد ولا مزال؟

الحقيقة شريت السمانة اللى طافت مي كى جيت لدار معجبونيش بدلت رايي الاحد اذا حيانا ربي نبدل

كاش نهار جرا موراك مهبول قولي صح هههه؟

اي هههههههههههههههه كل احد في بلدية خلاف اللى ساكنين فيها نلق نلقي واحد المهبولة مسكينة تسنى على طوول هادي عامين بصح متضربش ولا تحوس تجرى وراياا وهي اصلا متهدرش تحوس تحوس تقول حاجة مي لليوم مزال مفهمتهاش وكى منلقاهاش صبح على ثناعش ولا ربعة نلقها الهم قبل مامرجع لدار سبحان الله

كي تعودي تخدمي في بوراك تعمري حبة تاعك فرماج ودريلها علامة باش تعرفيها؟ هههه

هههههههههههههههه لالا والله منحب الفرامج وهاد العفايس منغشش فالبوراك فالحشو نغش فالعدد هههههه

هل عندك صديقة تحسيها صح نصفك الاخر وتوأم روحك؟

مكانش انا صديقة نفسي وتوام روحى هي ختى وغير هاك كلهم اصدقاء عادييين يا زملاء يا ربطتنا علاقة دراسة وخلاص

كل يوم تغسلي لماعن وحدك؟

لالا عندى ختى نتعاونوو هادى السنة الاولى خلاف هاك كنت وحدى

وش هو شعورك كي متفطنيش لسحور؟

هههههههههههههههه عادى نصبح مكرفسة برك تقول بايتة ندابز

حاجة مليحة صراتلك في رمضان قعدت في راسك وش هي زعما؟ ههه

هههههههه مكانش حاجة سبيسيال هههه

المهم خلطتلك اسئلة شرق غرب هههه

هههههههههههههههه اصلا بنادم راه مخلط من صبح ههههه نورتى زينة

 

[وۣۗهۣۗہۣۗم]

يااه اختي الغالية راهي ضيفة و انا لا خبر

مرحباا مرحبااا اخى نورت
صحة فطورك وان شاء الله تكون بخير انت ومل العائلة الكريمة

بصح اختي @أم يوســـف راهي قايمة بالواجب معاك ههههههه

ههههه راها جايبتها من الجيهة اللى ملهيه خلى برك هههه

أختي الغالية زرتي الغرب الجزايري ولا لالا

ولا مرة مى راها في خاطرى

واش تعرفي على تيارت قولي الصح ههههههه

الصح والووووو والوووو غير المعلومات العامة برك ههههه للاسف

تعرفي تطيبي الزلابية

نونونوونووووو

تعرفي تطيبي الكسكس

يس يس

وقتاش نقولوا انه رمضان غالبك الصباح ام قبل الآذان

صباااااح قهوة الصبح تاثر عليااا

اختي الغالية انت ناس ملاح و عاقلة او قبيحة و مهبولة هههههه قولي الصح

هههههههههههههههه ايااا اخلاياا هادا السؤال خطير ههه
هى انا الحق ناس ملاح وعاقلة يخرب فياا بنادم ندوور نتحول 180° الحقيقة هادى هههه

شكون القريب ليك الوالد ام الوالدة

الوالدة طبعاا

كي تروحي للسوق تشري بالعقل ام اللي في الجيب تخليه

لدوروو تالى مى ندي قيس قيس كشي حساب

اختي الغالية متى زفافك

كي يكتب ربي ويبان سعيد الحظ مش تعيس اكيد سعيد هههههههههه

اذا قدرتي تروحي عمرة

ياربي ياربي راها في خاطري ان شاء الله

و قالك لازم تختاري مرافق من اللمة شكون تختاريها

بنت منعرفش بزااف بنات فاللمة للاسف علاقتى معاهم رد برد فقط راح نختار السطانة

اذا لقيتي مليار واش تعملي بيه ههههههه

هههههههههههههههه
بزااااف عفايس قبلهم كل نروح عمرة
1 _ نشري طونوبيل ملكية خاصة
2_ندخل في معهد ذو تكوين عالى تاع الحلويات
3_ نحل متجر ومع الوقت نديروو الفروع في ربوع الوطن ان شاء الله
بممم وليت للواقع حتى نلقي المليار هههههههههههههههه

اكيد هاذاك المليار تاعي ههههههه

احى خليتنى ياخوياا نحلم وبعد قتلي تاعي

بلاك نرجع اختي الغالية اذا ما كترناش عليك

مرحباا مرحباا اخى اكيد تنور