مشكلتي الزواج

[مشكلتي]

السلام عليكم ورحمة الله وبركاته
انا فتاة عمري 22 تقدم لخطبتي شاب عمره 28 عسكري هو ميعرفنيش يعني الوالدة تاعه شافتني وجات للدار انا من قبل كان اي واحد يجي للاب ولا امرأة تجي للأم تاعي زعما باش يجو يديرو رؤية شرعية كنت نرفض الأمر قبل ما يبدا اصلا بحكم اني نقرا ومزال باقيلي باش نكمل ،بصح هذي المرأة ماما ضغطت عليا وقالت شوفيه ومن بعد عاد حكمي ودرتلها خاطرها رغم انو من ضوابط الرؤية الشرعية هو الميل للقبول ..
حنا منعرفوش دارهم بحكم انهم في نفس منطقتنا سقسينا عليهم الناس قاع شكروهم ولكن مكانش لي يعرف الشاب لانه خدام في ولاية اخرى وميجيش بزاف للدار وعاد كي رحلو لهاذ المنطقة ...
قبل الرؤية كانو حاسبين اني راح ندير رؤية شرعية بدون حجاب بحكم اني دخلت عند النساء متزينة ولما جاء الوقت باش نشوفه لبست حجابي الشرعي امه وأخواته استغربوا واصروا انو من حقه يشوفني بدون وهو لي وصاهم وانا طبعا مستحيل نقبل سواء هو ولا اخر حتى كون نعقد يعني حتى بعد العرس هذا هو اقتناعي
وحتى مسألة يجوز بدون حجاب كاين لي فتا بها ولكن ماشي علماء معروفين غير مؤخرا هذي الفتوى راهي في النت
درت الرؤية وانا قبل ما ندخل اصلا كنت منشوعة من هدرتهم...
هو كان حشام بزاف وحتى قبل ما ندخل اهله قالولي يحشم ودخلت معانا اخته
المهم انا اول حاجة قتله بلاك كنت تظن انك راح تشوفني بدون حجاب وفهمته وجهت نظري ومستحيل اني يشوفني بدون هو قال لالا عادي بالحجاب احسن بانتلي غير باسكو حشم باسكو اهله قالو بلي هو أكد معاهم قبل ما يجي ..
سقسيتو على الصلاة اذا يتكيف يعني هذي الأمور
وكانت الام تاعه قالت إنه يسمع الموسيقى ومتمني انو يدير عرسه ويزهى مع صحابه جبتله على الموضوع قال كلشي ساهل من بعد
انا صراحة خاتمة وعايلتنا محافظة وحتى هو عايلته بصح ماشي كيما متمنية يعني على الاقل واحد يكون يحفظ القران ملتزم شويا ..
يعني واحد نكون متفقة معاه فكريا باش نقدر نأسس أسرة ونعرف نربي أولادي، امه قالت مكانش انسان كامل المرأة هي لي تغير في الرجل من بعد ،وانا هذي الفكرة مدخلتليش في راسي بعد الزواج نخمم كيفاش نربي الاولاد ماشي نربي ابوهم قبل
صح لازم نتغاضاو على بعض الأمور بصح كاين أمور ضرورية ،مثلا هو معندهش سكن خاص نقدر نتغاضى شكله اقل من المقبول يعني هذي الأمور نقدر نتغاضى عليها ...
وهو موافق اني نقرا وحتى نخدم بعد ما نكمل
بصح المشكل هو يتنقل وانا منقدرش نغير لولاية على الاقل لثلاث سنوات..
وزيد هو ما سأل حتى سؤال كنت غير انا نسأل هو كان غير يجاوب
ويقول المهم المرأة صالحة،مقدرتش نعرف عقليته
مشكلتي الان بعد الرؤية حسيت قلبي انقبض ومرتحتش ابدا وحتى اهلي كي شافوني قالولي كانت باينة في تعابير وجهك انك ماشي عاجبك الحال وأهله نتبهوا..
انا رافضة بصح اهلي راهم يضغطوا عليا اني نزيد نفكر بحكم اني في كل مرة نرفض ونتحجج بالدراسة وهاذي المرة قبلوا اني نقرا
وقالو الرجل لي راكي باغياته مستحيل يكون موجود
انا صراحة متلاقيت حتى سبب يخليني نقبل ...
وحتى فكرة انه يتنقل مخوفتني هو قال لما نتنقل في ولايات قريبة نكري وندي زوجتي واذا في صحراء تبقى مع والديا
المشكل انا منقدرش نتنقل حاليا ..
يعني صح متلاقيت حتى حاجة مميزة تخليني نقبل ولا نعتبرها فرصة متتعوضش كيما متخيلين اهلي ،هوما قالو مدام مهدرش كيفاش تحكمي عليه ..راني حااايرة
حتى راني خايفة نصلي استخارة ..خايفة نقنع روحي ونندم ..
انا راح نصلي استخارة ..فما خاب من استخار
وما ندم من استشار ..من خلال تجاربكم ونظرتكم واش رأيكم
واعذروني طولت بزاف..

 

[secret de coeur]

انا في امور زواج مانحب نشاور حتى على واحد
لاخاطر انا مانحبش الي يشاور عليا
قضية شخصية وبزاف
اسألي الله عز وجل و قلبك ونفسك.
ربي يوفقك اختي

 

[saho souhila]

استخيري ختي وربي يسهلك
والا كان حسيتي روحك مور الاستخارة مزالكي مرتاحيتيش وقلبك مقبوض متوافقيش مش بسيف
مكتوبك مكانش لي رح يقلعهلك سواء كان مواصفات لي باغيتهم نتي ولالا

 

[إلياس]

استخيري الله و ادعي الله يا رب العالمين اجمعين أن شاء الله فيها خير

 

[السلطانة]

وعليكم السلام ورحمة الله وبركاته
نقدر نقولك اصبري واقبلي
كيما يقول البعض لكن راح ننصحك عن تجربة
اخطيك مكيش مقتنعة بيه انتي وياه ماش كيف كيف مكانش توازن مكانش توافق متقبليش الراي رايك وانتي حرة
اول حاجة معجبتنيش انو انتي خاتمة وملتزمة وهو لا.
عندك احلام تحققيها السيد يتنقل وهذا الشي راح يعرقلك
الزواج توافق فكري ونفسي قبل كل شي
انا هاذي نصيحتي ليك حسب المعطيات لي حطيتي
خير من مباعد تندمي

 

[سارة ملاني]

شوفي اختي
اولا بالنسبة لعمرك مازلتي صغيرة, يعني مازال عندك شويا وقت وهذا يعني مالازمك تتقلقي
ثانيا وبصراحة الراجل مافيه حتى عيب اذا عاد متربي وخدام ومن نفس دينك وماشي شرط يكون خاتم ووو.. (يعني عادي ناخذو الامور على بساطتها بلا تعقيدات)
ومسألة السكنة ألي وحدك او مع العايلة هاديك قاناعات شخصية وكل وحدة وكيفاش تشوف فيها

اما انو يخدم بعيد وتتنقلو للسكن في الولايات ألي يخدم فيها, هادي لازمك تحطيها في بالك مليح وانك في الغالب تروحي معاه. ولازمك تعرفي انو مام تحوسي تقعدي في دارهم كل مرة حتى يروح ويرجع راك ماتقدريش وصعيبة, على حساب واش شفت ناس من قبل

ربي يوفقك

 

[أبو عاتكة]

السلام عليكم
الحاجة الوحيدة المهمة اختي وكذلك جميع الاخوات في الحياة الزوجية هي اخلاقه ودينه يعني قدما نطلعو ونهبطو ندورو ندورو ونجرعو الى هذه الامور ونلقاوها اسباب طاغية على الخلافات الزوجية وكل المشاكل مرتبطة بالزوج سيء الخلق والمعاملة والمضيع لدينه وعبادته ولا يفقه لا في الحلال ولا الحرام وماشي بهوى نفسه ومن اضاع دينه اضاع حياته وحياة من ترافقه.
ساعتبرك اختي ولو كنت اخاك او ابوك ساتفق معك على هاذين المعيارين المهمين للقبول لكي مستقبلا (الخلق والدين) ونسقسي على هذا العسكري مليح ولما نرتاحوا ليه من هذا الجانب سيبقى عليك الاتفاق معه على امور السكن الملائمة لطبيعة عمله والملائمة لكي لتستقري معه.
الامور المادية كلها غير مستقرة والمستقبل لايدريه اي انسان لانه متغير اما الاخلاق والالتزام بالدين متجذرة لا تتغير بتغير الامور الباقية.
اذا لم ترتاحي له في هذا الحدث اعني الرؤية يمكنك الاستفسار والتيقن اكثر واذا كانت لك معايير تحتفظي بها لنفسك فلا احد يرغمك لانها حياتك اذا معجبكش في عدة امور لم ترتاحي لها فسيبعث لك الله ما ترجينه بدعائك ونيتك مع الله.
وربي يسهلك القرار الاخير.

 

[خديجة ph]

السلام عليكم
اول شيء الله يبارك ماشاء الله لا قوة الا بالله طلعتينا النيفو كيما نقولو
بارك الله فيك و بارك الله في والديك على هذي التربية السليمة الصالحة غرت الصراحة يا ربي بنياتي يكونو صالحين مثلك
واش نقولولك راكي في الطريق الصحيح 100% والديك عرفوا يربوك و النتيجة فتاة تعرف كفاش تختار و على اي اساس ماشاء الله كل افكارك صحيحة نعم اتبعي ما فكرتي فيه بعقلك و بقلبك كل ما قلتيه صحيح و ضغط والديك راكي استجبتي ليه بقبولك رؤية العريس و النتيجة راكي وصلتي ليها و عن قناعة انك لم تجدي في هذا العريس ما يشجعك على القبول فلا تقبلي و زيدي صلي استخارة
ما عندي حتى ملاحظة
فقط شيء بسيط حسيته من خلال كلامك هو استعدادك للقبول بشاب لا يملك سكن يعني قلتي معليش و شكله غير مقبول و قلتي معليش و قلتي وراءها ما دامه قابل اني نكمل دراستي
لا لا اختي لا تضعي دراستك كانه عيب ينقص منك و يجبرك على قبول نقص في زوجك
لان دراستك ستنتهي و عيوبه تبقى انتبهي
كذلك قولك انه يستمع للاغاني و انك اخبرتيه عن هذي الامور هذه تفاصيل محال تعرفيها منا و جاي اقصد لما يخطبوك مرة ثانية اسئلي عن المصدر مثلا اي المشايخ تستمع له و اسأليه عن رأيه في المشايخ الذين تستمعين لهم هكذا تعرفي رأيه في كل تفاصيل دينه بدون ما تضطري تناقشيه في سبب سماعه للغناء او لماذا يريد رؤيتك بدون حجاب او اي شيء آخر هكذا تظهري كأنك انسانة محاسبية و توقفيلو على الكلمة فاستمعي ولا تناقشي بل اسئلي عن المصدر
ثالث شيء و هذا نعتبرو عادي بالنسبة لعمرك لكن لابد تتحكمي فيه منا و جاي في هذه الحالات هو اظهار ما في نفسك حاولي تكون الابتسامة على محياك و وجهك منشرح سواء قبلتي ام رفضتي عادي نشكروهم انهم شافو فيك انسانة لائقة و محترمة و تقدمو لمنزلكم بما يرضي الله فدائما كوني بشوشة و مسرورة لاي واحد يتقدملك حتى و لو رفضتيه و اياكي تظني انك احسن من اي انسان يتقدملك فربما هو عند الله احسن منك لكن مادام لم يكن هناك ارتياح نفسي ولا قبول فكري فربي ينوب عليه بمن هي احسن منك و ينوب عليك بمن هو احسن منه
اما موضوع العمر فهو راجع للمعروف في منطقتكم اذا في منطقتكم سن الزواج هو سنك فعادي يجوك الخطابة و تختاري منهم اما اذا كان السن في منطقتكم بنات عمك بنات اخوالك جيرانكم تخطبوا في سن اكبر فتريثي لان كثرة استقبال الخطاب و رفضهم راح تشيع عليك بانك متكبرة و ترفضي الخطاب
ربي يكملك بعقلك و يباركلك في القرآن العظيم و يجعله لك ضياء
سلام

 

[بسمة القلوب]

حبيبتي انتي راكي رافضة قلبا و قالبا و معندكش حتى محاولة للقبول او قناعة بيه .ارفضي و ريحي راسك

 

[fadila_alger]

اذا جاتك فرصة لا بأس فيها ورفضتيها . قد تندمين عليها .
ربي يوفقك

 

[Hakan]

انا ننصحوا ما يتزوجش بيك والسلام .

 

[امير الصحراءdz]

وعليكم السلام ورحمة الله تعالى وبركاته
عليكي بمداومة على صلاةالاستخارة وكثرة الصلاة على النبي
وربي يسهلك ان شاء الله

 

[Andy_Delort]

سلام عليكم
لعلي جئت متأخرا وكثيرا بسبب غيابي فترة لي فاتت
المهم نظن لاحظت رد من عند الاخوات التي اقدرهن كثيرا هنا في هذا الصرح الجميل وكان نوعا ما ظالم في حق السيد
كي قالت متقبليش خصوصا كي انتي ملتزمة وهو مش ملتزم؟؟؟!!!!
الالتزام هل يصرح به؟ يعني انا كي نريح نديؤ شوفة الشرعية نقولها الاخت انا فري ملتزم منيش حافظ كناب الله ولكني جد ملتزم واسعى لحفظه مذبيك ديري ستار وجلباب وهكذا

لالالا امر لايكون هكذا مطلقا السيد مدام حشم باين بلي انسان ذو اصل طيب او نستبسر فيه الطيبة
ثم النبي عليه الصلاة والسلام قال من ترضون دينه وخلقه... يعني الرضاا بتلدين والخلق كيفاش يكون لما تسقسي فلحومة عليه وعلى دارهم مدام عندهم سمعى كيبة فأكيد هم ذو خلق تبقى مسألة الدين ملهاش علاقة تماما بواش يهدر الطفل انا نعرف شحال من واحد متدين ولكن في عقليتو كومبليكي متقدريش تتعايشي معاه ونعرف الكثير منهم يبان في وجهو غير ملتحي غير متدين معندوش العلامات لي تبين ولكن في عقليتو العكس تماما هاذس من ناحية كير ركزتي على التدين
من الناحية الثانية عسكري او اي كان الراجل يخدم في الحلال ويسترزق لا حرج في ذالك
الثالث في الامر
مدام درتي استخارة راه يبان الامر من خلال قلبك...
وربي يرزقك بالزوج الصالح

 

[فاتن سيلين]

اختي في امر الزواج واحد ما يقدر يشور عليك مثلا هنا اراؤنا كلها مختلفة هل لما نقولولك اقبلي تبعي راينا؟
انا نقلك الاستخارة وتبعي قلبك مادام قلبك مقبوض اخطيك وربي يرزقك الي تتمنيه الناس الي تقلك ماكانش لا لا كاين ربي الي يوزع لرزاق مش الناس وربي كيكتب يجيك راجل كيف ما تتمنيه يجي فعليك بالدعاء.وهذا الخاطب حاليا تبعي قلبك مادام مش مرتاحة اخطيك انت من كلامك مترددة ومش عاجبك لانه مالقيتيش فيه حتى حاجة على الاقل متوافقة معاك امر اخر تقدري تطلبي اعادة الرؤية الشرعية ولو 3 مرات وما تحشميش قوليلو انت تاني تقولي واش حاب واش شروطك نعرف رايك في كذا وكذا وتاع يقلك بعد كلش ساهل احذري يا اختي الشروط من اول مرة قبل الزواج مش من بعد الزواج مثلا على الموسيقى لازم من الاول توضحي موقفك له ولاهله وكيقلك من بعد ساهل راهو يغم فيك من بعد نهار عرسك يديرو رايهم وانت اضربي راسك على حيط والراجل الرزين يقول رايه بصراحة واضحة مش كل حاجة من بعد ساهل من بعد ساهل تاع يليكيدي فيك يحوسك تقبلي وبعد يا يقنعك بافكاره يا يجبرك عليها في الزواج ماكنش لاامي لا ابي قالي وغصبني رايك قوليه بصراحة من بعد انت الي تعاني مش هم وما تغركش راهو حشام ساكت علاش رجال ضرك يحشمو؟راه نساء وما يحشموش ويسقسو في هذا الامر المصيري الرؤية الشرعية بش تهدرو في زوج وتبينو شروطكم في زوج...نعرف وحدة مسكينة نفس حكايتك اخته قالت ليها حشام وهو ضارب السكتة في ليلة العرس عرفت بلي مريض بالاعصاب ويتكلما غير بالدواء ...الا عاجبك مبدئيا عاودي اطلبي رؤية شرعية يجي وحده راه حقك الشرعي وقوليلو لازم تهدر