مخالطة الجيران بين العرف و الحذر

[الامين محمد]

بسم الله
حياكم الله احبتي ايها الاكارم في اللمة الطيبة

يحكي احد معارفي
كانت بنيتي بريئة و طيبة و مجتهدة
معدلاتها فوق 15 في الغالب

عندي جيران
كعادة كل الجزايرين علاقتنا طيبة
و اولادهم الصغار
يدخلوا حتى المطبخ
و النسوة يتزاوروا في المناسبات
علاقة طيبة و احترام متبادل بين الرجال
و ادا احتاجوا حاجة ياخذوها
و اذا احتجنا حاجة نستلف عليهم

يقول الاب
بنت جاري بدات تجي عندنا بشكل ملفت
لاحظت أن العلاقة بينهما اي بين بنتي و بنت جاري
تطورت بسرعة و اصبحوا اصدقاء

يقول ما هزيتش في الامر
و قلت طبيعي بنتين جارتان تكون بينهما صداقة

تمر السنوات
لاحظت ان البنت بدات تتغير و معدلاتهما نزلت الى العشرة

قال
تكلمت مع بنتي و نبهتها عدة مرات
ان الدراسة امر مهم بالنسبة لي

قال
غيرت الطريقة مع بنتي و هددتها بالعقوبات في حال استمر تفريطها في الدراسة

وقال
حتى عقلية بنتي تغيرت
عادة تغيس و تخمم

قال
تكلمنا معاها انا وة امها
و عطيناها الامان بأن تحكي واش خاصها
او اذا عندها مشكلة او امر
و خبرناها اننا راح نوقف معاها و ما تخافش

قالت ما في اي شي
الامر كله الدراسة اصبحت صعبة عليها

توالت الفترات و بقي الحال على حاله
و باءت كل المحاولات لفهمها بالفشل

قال
دخلنا خالتها في الامر بما انها قريبة ليها في السن و حتى في الصداقة

نفس الشي و نفس الردود

يقول الوالد
لاحظت انها تهز الهاتف في الفترة الاخيرة بشكل كبير
قال نبهتها عدة مرات

و قال لما افتش الهاتف لا اجد فيه اي حاجة تخليني اغضب منها
تصفح لمواقع الدراسة و القصص فقط

يقول
نسيت هاتفي مرة في البيت و كانت لوحدها زوجتي كانت مسافرة
حاولت اتصل من عند اصدقائي و كل مرة اجده مشغول

شكيت للحظات
لكن اقسمت انها كانت تتكلم مع صديقتها

قال صدقتها لأنها عمرها ما كذبت علي

تمر الايام و الاشهر على نفس الحال بلا تغيير

في احدى الليالي يقول الاب
فطنت في الليل في وقت غير معتاد
ما شغلتش الاضواء
و دخلت المطبخ
لقيت بنتي هاز الهاتف و كأنها خافت

يقول تظاهرت اني ابتسم و خليتها تتطمن اني ما لا حظت حتى حاجة


و بشكل مفاجيء و من دون سابق انذار خطفت الهاتف من يدها

لقيتها تتراسل مع رقم جديد
و لقيت اخر رسالة فيها
بابا دخل عمل حالك صديقتي

قال سألتها شكون هذا
قالت هاذي صديقتي فلانة

قال سألتها صديقتك و ليش خفتي و ليش راكي توصي فيها انها تقول كذا و كذا

قال فهمت انها كانت ترسل الرسايل و تمحيها ما تتركهاش
تمحي كلش
يقول لحقت على اخر الرسايل
فيها
ما تخافيش راح نوقف معاك
ما تخافيش راح نكون كيما تحبي
ما تتقلقيش
قريب تسلكي منهم
المهم رسايل على هذا الشكل

قال صرخت و ضربتها بكفوف
قلت ليها هاذي مساجات تاع شاب و ليس صديقتك بالمنطق
قال هربت الطفلة عند امها
قال انا احاول نوصلها باش تعترف و تفهمني و هي تبكي و تصرخ
هي صاحبتي هي صاحبتي ما تفهمنيش بالغلط

قال امها وبختها و ضربتها و قالت ليها فهمينا واش كاين و شكون هذا
يقول الوالد ضربتها بلكمة للوجه حتى طاحت جات امها بيني و بينها
هداتني قالت بالعقل بالعقل لفهم الامر

المهم البنت هربت لغرفتها و غلقت الباب
و انا بقيت مع زوجتي نحاول نفهم الرقم من صاحبه هل صديقتها ام شاب
تأكدنا انها رسايل تاع شاب

قال كتب رسالة
افتح راح نحكي معاك
اتصلت بالرقم ففتح و قال واش كاين ،،،،،، ذكر اسم البنت
قال الوالد تجمدت و حسيت ان السما طاحت علي
قال بقيت ساكت و هو يتكلم من خلال كلامه عرفته
قلت ليه انت فلان كنت حاطك ولدي طلعت ذيب
قال مباشرة قفل الهاتف

الشاب كبير على بنتي بعشر سنوات و هو قريب لجاري و يجي عنده بشكل كبير

واجهت بنتي فاعترفت انه هو و نيته يتزوج و الحلال و و و و
قال للحظات فكرت اني نخنقها او نذبحهها
و نروح للشاب اذبحه ذبح الشياه

بعدين لعنت بليس و تمالك نفسي
و قلت لبنتي عيب عليك انا اللي ظهري تكسر عليك
عيب عليك انا حطيت فيك ثقتي

اما زوجتي فدخلت في هيستيريا بكاء و صراخ و ضربتها
و شدتها من الشعر و مسحت بيها لرض

اما انا فغادرت البيت و خرجت الى الشارع
اخذت سجارة و بديت نفكر و نرجع في الشريط
يقول فهت ان مرسول الشاب كان بنت جاري

يعني بنت جاري هي من سحبت بنتي و بربط الاحداث تأكدت من الامر

المهم في اليوم الموالي قطعت العلاقة بيني و بين جاري
و قلت للبنت ما تزيديش تجي لبيتي

قررت اني نعاقب بنتي ما نحكيش معاها و ما نحطهاش محل ثقة
و نشوفش في وجهها و ما ناكلش معاها و ما نجلسش معاها على نفس الطاولة
و ما نتركهاش وحدها في البيت و ما تخرجش وحدها
و معدلها لا يرجع مثل زمان وجوبا

اما الشاب فبعث ابوه يخطب
يخطب بنت عندها 17 سنة مازالت تدرس و عقلها صغير و حتى جسمها تاع طفلة صغيرة
لشاب عنده 27 سنة من عايلة معروف انهم و مشهورين انهم
يحطوا المرأة اقل من البقرة و المعزة

ـ انا شخصيا نعرفهم هاذ الناس والله صح و صدقا ان المرأة
عندهم اقل قيمة من المواشي معروفين باضطهاد المرا’ و البنت ـ

قال ما حكيتش معاه بزاف قلت ليه ما عندناش بنت قد الزواج البنت طفلة صغيرة مازالت تلعب بالعرايس
حابها تدرس و تجوز البكالوريا و تربح و تروح الى الجامعة و تتخرج و تخدم

قال رد علي اب الشاب و قاله لالا خطيك البنت في الاخير ترجع للمطبخ و الطبيخ

قال حمرت فيه عيني و قلت ليه انا بنتي تقرا و تربح الباك و تتخرج و تخدم
و زواجها بعد الثلاثين و ماكمش انتوما اللي تدوها

قال و بعثت للشاب و قلت ليه الخطوة القادمة في ناحيتي راح نخليت تتمنى الموت

قال اقسم و قال والله ماراح اقترب منك او من بنتك

انتهت القصة
ـــــــــــــــــــــــــــــــــــــــــــــــــ
الاخ يبكي و يشكي قال ما تتركش جيرانك بحرية في بيتك
و ما تثيقش فيهم ثقة عميا

و انتم ما رأيكم احبتي

 

[secret de coeur]

جيران واعرين
اقل شي يديروه يبغيو يعرفو كلش عليك.
فمابالك كي يوليو ساكنين معاك
الجارة قادرة تدي حتى مول الدار الا عولت. البنت صغيرة كانت طعم سهل.
فهاد الحالة اللوم يرجع لعيلة الجيران ككل الي هاد بنادم امنهم على بنتو كي تروح عندهم. وكان قادر نفس الشي يصرا مع افراد من عيلتها.
بصح الجار مفيهش لامان. كيفو كي لافامي
فالدنيا هادي بنادم شحال ما ولى قريب اكثر يولي اخطر.
البعد البعد

 

[إلياس]

قال رسول الله صلى الله عليه وسلم من كان يؤمن بالله واليوم الآخر فلحسن إلى جاره
علينا صبر على جيران مهما واعرين
مازلت لي عودة من جديد لهذا الموضوع أن شاء الله

 

[خديجة ph]

السلام عليكم اخي الامين
حكاية مرعبة و ما يحس بهذا الرعب الا لللي عنده اولاد يعني لما يكون الواحد عازب ولا اولاده صغار يعتقد ان هذه المواضيع سهلة و يقنع نفسه انها اذا وقعت في منزله فسيتعامل بالحكمة و بدون عنف و سيتفهم احاسيس المراهقة التي مر عليها
لكن كي يلحق الوقت طل هذا الكلام سيبدو تاااافها و ريح في شباك ربي يعافي اولادنا و اولاد اولادنا الى يوم الدين
ليست قصة جيران بل كل المعارف الاقارب الاصدقاء في المدرسة الشارع الاصدقاء على النت اثناء اللعب بائع المحل الاصدقاء في الرياضة و النشاطات الاضافية و حتى في بعض الاحيان اذا كان احد الاخوة فاسد فيقدر ياخذ معاه احد اخوته او حتى كلهم ففي رأيي وضع الحدود على حسب تفرغك لاولادك اذا قادر تفتح الحدود عليك بالمراقبة اليومية الدقيقة تقعد معاهم في الغرفة ممنوع غلق الابواب اسئلة بعد ذهاب الجارة عن ماذا تكلمتوا و ماذا قالت و هكذا و كذلك الذكور و اذا ما عندكش الوقت لهذه المراقبة المهتمة لا لطرح الاسئلة لا عندك وقت لتتبع ماذا حصل عن موضوع البارحة و قبل البارحة فالحدود هي حلك الوحيد ربي يقدرنا جميعا
الكلام سهل انك راح تحميهم الفعل صعب صعب صعب ربي يجيب الخير
المهم المراقبة المستمرة لااازم اذا شكيت ان شيء مش طبيعي لازم تفهم عس صباح عشية في الليل في النهار المهم تلقى الخطأ
اما عن ردة الفعل اذا لقيته فالله المستعان كل واحد و كيف يتعامل مع اولاده و كل واحد يعرف مفتاح اولاده
يعني كاين بنات من الاحسن يتزوجو و لو صغيرات 19 _20 سنة مناسب جدا لهن تلقاهم واعيات و فاهمات و عادة تلقاهم ما عندهم حتى ميل للدراسة و تفكيرهم كله في الزواج الاولاد تلقاها تجيد الطبخ و تعين امها من صغرها هذه من الظلم اتهامها بصغر العقل
و كاين بنات لا يفهمن شيء فترة مراهقة صعبة تظن ان هذا الرجل سيطير بها الى جزر الباهاماس ليعيشو على الخبز و الماء و الحب هذي عادة لا تفقه عن الامر شيء منزوية على نفسها لا تخدم حتى نفسها لا تهتم باخوانها تائهة في ملكوت الله هذي ممنوع منعا باتا تمشي وراء هذه النزوات لاااااازم حرصها بعناية اعادة برمجتها لترجع الى فترة الطفولة و من ثم تعمل لها انطلاقة جديدة و نظيفة لمرحلة المراهقة و من ثم تشوف اذا نحات هذي المواضيع من بالها مؤقتا فتكمل عادي اما اذا بقيت مهتمة بالزواج و صارت مهتمة بالطبخ و اخوانها و فهمت معنى المسؤولية و في نفس الوقت ابتعدت عن الدراسة فزواجها احسن حل

 

[أبو عاتكة]

السلام عليكم
والله في هذا الوقت تعس داخل بيتك وبين الجيران وفي الخارج وفي كل مكان ومانعرف لولا لطف الله وعنايته تستطيع حماية اولادك من انفسهم ومن مثل هؤلاء وربي يستر على وليداتنا ويحفظهم مما يحاك لهم في كل حين وفي كل مكان.
الامر ليس سهل وليس هين ويحتاج لجهد واهتمام وعدم التساهل بالمقابل يحتاج الى توعية وتربية ومرافقة في كل المراحل العمرية للاولاد والاهم هو الحماية والمراقبة وابعاد المخاطر حتى قبل الاقتراب منها لانو لا تكفي التربية امام المغريات والملهيات لازم تربي وتحمي في نفس الوقت وياربي.

يوجد انفلات سببه الاهمال والاستخفاف في وقت يحصل اغراق كثيف لعقول وافكار بنات صغار بامور العلاقات سواء شرعية او غير شرعية عبر الهواتف والتلفاز والتجمعات غير المراقبة لدرجة انو طفلة صغيرة تجدها منغمسة في هاذ الحكايات وتفكر في الزواج والارتباط وعارفة وفاهمة كل شيء لانها مشبعة بالقصص والروايات المنتشرة في كل مكان بشكل عبثي وممكن حتى من وسط البيت وخاصة تكرار جملة البنت لما تتزوج ونهار يخطبوها،،،الخ الاهل يدخلوا بناتهم في حكاية يحسبوها قصرة وتفوت بينما الفتاة تبقى تتخايل ومنها تبدى تبحث في هاذ الامور وتلتفت الى الذكور وقد تختار مسبقا وتقع في فخ الحب والارتباط ،،،

بنات صغار بالتزيين واللباس اكبر من سنهم والحركات والايحاءات والاغاني الماجنة في مواقع التواصل البعض من الاولياء على علم واخرون دون علم او لا يكترثون او يشجعونهم في ذلك والجميع يتبع بعضاه

كاين بالفعل بنات يجرّو صاحباتهم وجيرانهم الى هذه الامور ويربطوا بيناتهم وبين ذكور حتى كهول اصحاب محلات وملابس ومغريات يقومون بجذبهم واستغلالهم بالمغريات لتجد البنت نفسها في مأزق بين التهديد وبين الفضيحة وسط شباب مخدر ومسلح لا يهتم بأي احد.

المشكل انهم صغار وسهل التلاعب بهم وعلى كل واحد لديه بنات انو يحاول ابعاد هذه النوعية المتهورة من الصديقات وبنات الجيران وقطع الاوصال قبل ان يزرعوا فيهم افكار متقدمة وساعتها يكون الفاس وقع عالراس.

فيها فيها جهد وتعب وعمل كبير يقع على عاتق الاولياء ملازمش التهاون والتراخي في مثل هذه الامور وايضا التحكم في قضية الهاتف والانترنت.

في السابق تلقى بنت من عشرات البنات معروفة ومكشوفة بالتلاعبات وميولاتها اما الان انا خوك في كل مكان تلقاهم والمشكلة لا يهنئ لهم بال حتى يفسدوا بقية صديقاتهم ويدخلوهم معاهم في هذا الوسط وكانه شغلهم الشاغل.
ربي يبعدهم علينا و يستر ويلطف بينا.

 

[أبو عاتكة]

يعني كاين بنات من الاحسن يتزوجو و لو صغيرات 19 _20 سنة مناسب جدا لهن تلقاهم واعيات و فاهمات و عادة تلقاهم ما عندهم حتى ميل للدراسة و تفكيرهم كله في الزواج الاولاد تلقاها تجيد الطبخ و تعين امها من صغرها هذه من الظلم اتهامها بصغر العقل

أشاطرك الرأي سيدتي بل انه من الخطر عليهن والظلم والتضييق عليهن القول انهم صغار مبلغوش سن الزواج، من الاجدر استباقهم بالزواج اذا تم التوافق.
كاين بنت مولات 17 سنة سيتم عقد قرانها قريبا نفس ما ذكرتي نفس الاوصاف نفس التمكن في امور البيت والضيافة حتى افكارها واهتماماتها منصبة حول الزواج والبيت لما تم خطبتها والديها فوجئوا بالطلب وقالو صغيرة لكن لاحظوا ان البنت لم تتفاجئ وكانها واجدة لهذا الحدث العظيم وكانها مولات 25 او اكثر سبحان الله كانها خلقت للزواج الجميع ظج الا هي.
في الحقيقة لما شاوروني وقالولي فلانة لانها قريبة جدا قلتلهم مدوها ومتخافوش خاصة كي عرفت النسب ولما تكلمت مع ابوها عرفت انو فاهم بلي هذا وقتها للزواج لانو عارف بنتوا اكثر من غيروا بقات امها بين الاخذ والرد والعواطف ولكن في الاخير تمت الخطبة وراهم في سوق العرس.
بعد خطبتها بعض الاقارب والاهل كانو في صدمة كيفاش راحتلنا في هاذ الطفلة ومخطبناهاش لولادنا لانهم عارفين ان علامات الزواج ظاهرة فيها وانها ماشاء الله تربية وقفازة وفهامة وهدرة وكل شيء فقط هم بقاو يستناو انها تكبر في السن او كاين شيء في نيتهم الله اعلم المهم البعض حتى انو تقلق حتى وهي حاجة متخصوش اصلا والبعض قالهم بطلوا وانا جيبلكم خير منو واخر زوجوها لخويا واخرى اعطوها لابني المهم ناضت زوبعة. المهم سقطت نظرية الطفلة مزالها صغيرة لما تجرأ واحد منهم على التقدم وخطبتها.
ملاحظة في محلها اختي خديجة ورانا فيها بارك الله فيك

 

[فادي محمد]

بارك الله فيك اخي الكريم على هذا الموضوع المميز والمفيد