مشكلتي حالنا تاعب ياسر

[مشكلتي]

انا امرأة متزوجة و عندي اولاد ذكور و اناث ربي يديمهم و يديم عليهم الصحة و العافية
و ربي يخلي زوجي و اب اولادي
قبل مدة طويلة كنت كتبت في هذا القسم موضوع الحمد لله لقيت كل النصايح
او بالأقل لقيت وين نتكلم و نهدر
غلاء الدنيا زاد فوق الحد و رجال راها حايرة خصوصا اللي مدخوله قليل و عنده اولاد يقراو
انا عايلتي فيها اولاد يقراو ذكور و اناث ابوهم تاعب ما قدرش يلحق
ما قدرش يلحق الاكل و الشرب و الدوا و الدين و الغاز و الترسيتي
عيينا من التفكير و مكاش حل خلاص كل باب ندقوه مكاش حل
الله يشهد انا عملنا اكثر من اي مجهود ممكن يعمله اي حد في بلاصتنا
خايف زوجي يطرطق ليه عرق لانه يمر بمشاكل كبيرة مع خاوتو و خواتاتو و اولادهم
ضاغطين عليه زيادة و بيناتهم مشاكل كبيرة ما نقدرش نقولها حاول يلقى مصروف زيادة
راني نفكر في حل او بالحق هو الحل الوحيد
لازم نوقفوا الكبار من القراية باش الصغار يقراو
الكبار عندهم جامعة و الجامعة ليها مصروف كبير و لباس و دراهم
ما قدرناش على المصروف و ربي يشهد ان الاساسيت رانا محرومين منها خصوصا الاكل
رانا نجوعو و ربي يشهد كي نقول نجوعو الله غالب هذا اللي كاين رانا نجوعو و ساكتين
حبيت نشهدكم امام ربي اني مانيش ظالمة و هو الحل اللي كاين باش يكون
قليل من الراحة المالية

 

[السلطانة]

تبطلو لولاد ماهوش حل آمدام

الحل انك تشوفي مشاريع واخدمي بالفايس بووك

كاين بزاف افكار تقدري تبدايها بمبلغ صغير وتنطلقي

اسهل حاجة اخدمي مطلوع ولاسفنج ولابراج واخدمي اون لاين في ولايتك ولابلديتك اشهار بالفايس بووك وانتي تحكمي طلبات

ربي يقدركم ان شاءالله رانا كامل محتاجين في ظل غلاء المعيشة الشهرية وحدها متكفيش
الله المستعان

 

[secret de coeur]

وعليكم السلام الأخت
ربي يعين
الحالة رجعت صعيبة فالدزاير على المواطن الي قد حالو
قوليلي برك معلباليش اذا تقدري تردي عليا
اولادك الكبار الي راهم فالجامعة اذا متفوقين فالدراسة يقدرو هما يخرجو للخارج يكملو دراستهم وبربي ان شاء الله هما يقريو خواتهم صغار
معلاباليش مستواهم او امكانياتهم دراسية
بصح خممو في حلول قبل ماتوقفوهم
ويلا يقدرو يخدمو ويقراو في نفس الوقت؟ ثاني حل
انا كانو يقراو معايا اولاد ماشاء الله كانو على قد حالهم وجايين من بعيد
يخدمو ويقراو
انا كي نكمل ونروح لدارنا الي يروح يدير فوطوكوبي
والي يروح يخدم في بيتزريا ولا يحمل ( يشارجي عند حوانت)
كاين حلول بزاف الأخت مهم الا قدرتي ردي عليا وان شاء الله فيها خير
( ملاحظة كاين منح مدفوعة للمتوفقين فالدراسة للخارج ماشي نتوما تخلصو عليهم )

 

[إلياس]

والله والله والله كون جاء عندي نعاونك اختي
لكن هناك افكار و مشاريع عبر النت تبحثي عليها تديرها كمدخول لك و لعائلتك إن شاء الله قريت أنها مشاريع و افكار ممتازة تقدر تدخلي مصروف البيت و غيرها
اسف مقدرتش نعاونك والله

 

[Hakan]

السلام عليكم ،اذا تقدري أختي تعطيلنا العمر نتاع أولادك ااذكور مي معليه :
اذا اولادك ااذكور تجاوزو سنوات المرحلة المتوسطة او على الأقل راهم سنة رابعة متوسط ،فلابد ولازم يتعلموا يخدموا وحدهم و يجيبوا مصروفهم ، ملابسهم و ادواتهم المدرسية و كي نقلك لازم يعني بالشيء اللي تقدري عليه وتعرفي كيفاه تنصحيهم والأب ثاني يعرف كيفاه يزيرهم ، كاين سوبيرات يخدموا فيهم كاين السوق نتاع الخضر يرفدوا يهبطوا على الأقل في مواسم العطل و نهاية الأسبوع خميس عشية جمعة سبت ، كي يجيبوا غير ميتين الف ياسر قيس ما يشروا قش الدراسة و شوي مصروف ليهم ،
بالنسبة البنات يهتم بيهم الأب .. يعني من غير المعقول أب يصرف على ابنو حتى الجامعة غدوا يتصدم بعد الجامعة بمرحلة البطالة والله ما يلقى كيفاش يبدا لازم يتعلم ...

وأنت بالنسبة ليك تقدري تعاوني الزوج اذا كنت عايشة وحدك بشوي مصروف خفيف ونقصي الكماليات وقبل هاذ الكلاااام لي قلتولك كاااامل يعني تقدري تخبطيه على الحيط وهي الدعاء وااصدقة أقسم بالله ثلاثا يقينا موقنا انو لوكان تصدقي من الاكل لي يجيبولك زوجك يا لوكان خبزة كسرة تبعثيها لجارتك غير ربي يفرج عليك ويفتح عليك من دون ما تحسي والسلام عليكم.

 

[الامين محمد]

الله المستعان
الله المستعان

 

[حاتم خليفة]

كان من الأفضل أنو ولادك في الصيف يشوفوا خدمة مؤقتة حتى يكون عندهم مدخول يساعدوكم بيه وتقدري تلمي شوي دراهم وأخدمي الڨاطو ويبيعوه للمقاهي والمحلات وراح يشروه الناس، كاين ألف طريقة أما أنو تحبسي ولادك الكبار على القراية هنا أكبر غلطة

 

[أبو عاتكة]

السلام عليكم
لا يا اختي الا مستقبل الاولاد وربما عليه يقع مصير مستقبلك انتِ وزوجك وكل هذا التعب والكد نتاع سنوات يروح هباءا منثورا لعل الفرج في اكمال مشوار اولادك الدراسي وباذن الله تتبدل احوالكم للافضل

هو في الواقع معاناة يتشاركها كثير من العوائل وانظم اليها عوائل جديدة كانت على خط العوز والمعاناة

المشاكل العائلية احيانا همها اكبر من مشاكل المصروف هذا ما يجعل الانسان يتعب ويجن وتفكيروا ينهار

اغلبنا ورانا كامل فيها معتمدين على مدخول وحيد ونعجز عن ايجاد مدخول اظافي لكن لن ينقطع أمل كل من يسعى الى ايجاد فكرة او طريقة المهم انو يسعى اليها وميبقاش مكتوف الايدي غالبو الهم والحزن

ربما لم تطرقي كل الابواب او انك طرقتي الابواب الخطأ ربما لم تفكري في طرق عملية او معندكش الكوراج عليها وعلى القيام بفكرة وتباشريها وتركزي عليها للاخير

لن ينقطع الامل مع الرجاء من المولى عزوجل

قد لا تستطيعين العمل خارج البيت وربما يمكنك ان تقصدي النساء العاملات لمساعدتك في ايجاد فكرة واقصد العاملات بكل فئاتهم لانهم هم الوحيدين اللي يعرفوا مصادر الرزق والكسب لانهم فيها مثل خياطات خبازات نتاع حلويات صالات الافراح يحتاجو ايضا لا ادري الفراملة الاساتذة وغيرهم انتي فقط اعرفي الناس اللي تقصديهم ينفعوك دعكي من الناس اللي يسمعوا منك فقط بدون فائدة
واخرجي من محيط الناس القاعدين الفاشلين وروحي شوفي عند الناس اللي راها تخدم وتكسب ومحتاجة المعاونة واللي مستعدين يصرفوا على اشياء نشوفوها ساهلة لكن هم لا يمكنهم القيام بها

عندما نبحث عن مدخول اظافي لا نجده عند أشباههنا بل نجده عند من لا يشبهونا حياة ومعيشة وتفكير.

وربي يكون معاكم الحالة فعلا صعبت بزاف.

 

[الورد الأحمر]

السلام عليكم ورحمة الله

بصراحة توقيف الأولاد الكبار عن الدراسة لاستكمال مشوار الآخرين يعتبر ظلم وليس حل بل مشكل آخر!

يعني بالدارجة لي في الجماعة راهم وصلوا للبير خلوهم يشربوا منو ويشربوكم معاههم! ما خير تركزوا ع لي قريب يكملوا ويتخرجوا للمجال مهني ولا تحبسوهم كي وصلوا ليها؟ وبأي حق تقرروا تنهوا مشوار دراسي لمجموعة من أولادكم لصالح أولادكم لخرين؟

قلتي عندكم لكبار في الجامعة هذو راهم ديجا من درك يقدروا يعاونوا يعني كبار وفايتين 18 سنة راهم في السن القانوني للعمل، يقدروا يتعلموا صنعة ولا يخدموا في حانوت ولا قهوة ولا أي شي من هذا القبيل والخدمة كاينة للي يحب ما تقولوليش ماكانش. أوك ماكانش للي حايب يخدم في شركات ويكون عندو بيرو خاص ليه مي الخدمة لي تقدر تجيب بيها مصروف يومي كاينة لا نقاش فيها دونك لكبار يشوفوا حل وخدمة يسترزقوا بيها ويتكلفوا بجزء من مصاريفهم والصغار تتكفلوا بيهم انتو.

ماشي باش نزيد عليك مش بصراحة قراركم ما هوش حل وإنما ظلم رح تكرازوا أفراد منكم باش يعيشوا أفراد آخرين. مفروض الحاجة تولد العزيمة والإصرار وينوضوا لكبار يحوسوا هوما يزيدوا يكونو معيلين للأسرة مش يقعدوا مع القاعدين وتكملوا عليهم انتو تحبسو عليهم مصروف الدراسة وبالتالي يبطلوا قراية.

بالنسبة ليا هذا ظلم، والحلول ممكن تتلقى بعيد ع تدمير مشوار أفراد منكم. وربي يساجف حوالكم ويزرقكم من رزقه الواسع.

 

[الروسي]

لا حول ولا قوة الا بالله العلي العظيم
عمر ينام ورب عمر لا ينام.

خلي ولادك يتخرجو ويكملو قرايتهم ربما ربي يكتب ابخير على ايديهم..
ننصحك اعداد الاكلات التقليدية وبيعها عن طريق فتح صفحة خاصة على الفيسبوك فالاقبال عليها من طرف الناس لا بأس بيه، ... والله المستعان

 

[aljentel]

الله يعين
هذه الدنيا كفانا الله شرها احد في نعيم واحد في جحيم …
ربي يفرجها عليكم …