مشكلتي [ تعقيب وتوضيح ] لم اجد عنوان لمشكلتي

[مشكلتي]

السلام عليكم اولا شكرا للكل من قرا موضوعي ومن رد عليه اتمنى دعوة في ظهر الغيب
رابط موضوعي الاول مشكلتي - لم أجد عنوان لمشكلتي
حبيت اوضح بعض النقاط لعلي اجد لديكم نصاءح لحالتي لم ارفع قضية وذلك استنادا راي اخي يعني اخي تحملني كتييييير ووقف معاي في مرضي وفي زواجي وفي مشاكل زواجي والان راه صابر معاي في طلاقي والله مقدرت نخرج على طوعو ربي يحفظو وزيد بالزيادة نحن وزوجي او طلقي في نفس المنطقة بصراحة اخاف الشيطان يجبر خاطرو وخوي ولا ابي يرحو يديرو كاش عملة فيه يعني تقريبا كل يوم يتلاقاو انا منخرجش واخي ميحبش يحكيلي واش راه داير براا
وابني محبش يجي وزيد خفت نجيبو بسيف يولي يمرض ولا كاش حاجة تصرالو ديجا انا مرضت بسباب القلق والحزن هذه 12 سنة وانا نداوي رحت لاكتر من 20 طبيب بلا فاءدة ورقيت مكان والو ميظهرض علي اي اعراض كي يسمعو حكايتي يقولو اكيد عاملين لها شيء لكن ليس بي اي شيء واليوم راهم يقولو ابني فيه شيء وكلوه حاجة على خاطر كي يهدرو معاه يولي يبكي ويصرخ ويحبش يجي عند خوتي
صح عمري ولا تخيلت يقدر يطلقني ويصرا بيا هكدا... *في موضوعي الاول اخت قالت ما سبب ابن خالي من زواجي بي مع اني شبه صماء* صح راني تقريبا شبه صماء وحتى افضل سماعة مخلتنيش نعيش على اساس سمع طبيعي وحتى زراعة القوقعة الاطباء كاين اللي يقول ديريها في الجهة اليمى وكاين اللي يقول لالا لازم في اليسرى ... المهم هو كان يعرف بحالتي بالتفصيل وانا مرضت قبل زواجي بحوالي اربع سنين هو قالي باللي يحبني والله راني نكتب فيها وانا حايرة في روحي *يحبني* انا عن نفسي لاانكر اني صح حبيتو حب الهباااال كان اول شخص حبيتو واخر شخص حبيتو وانا طفلة صغيرة غير بيني وبين نفسي ومن بعد العاءلة ولاو يعرفو باللي انا نحبو مي في هدا الحد وبس يعني مكانش بيناتنا علاقة
* ثانيا ما هو السبب الحقيقي للطلاق في رأيك محال يكون بسبب مرضك الذي يعرفه زوجك
ممكن بسبب دخول ابيك للسجن؟ * لالا ماشي على جال بابا الحمد لله بابا دخل للسجن ظلم نتيجة شهادة زور جميع من في المنطقة يشهدون له بذلك اظن انه احد اسباب طلاقي هو عصبيتي انا لما اتعصب واكون منرفزة تظهر على في وجهي الحمد لله لم اتلفظ بكلمة سوء لا لابن خالي ولا اهله
*ثالثا لماذا هذا التخوف من زوجك بعد ان رفع دعوى الطلاق ؟* خايفة تصرا مشكلة بينه وبين اخي
*رابعا علاااااش رديتوله الطفل كان عندك بين يديك و زوجك مصر يطلقك لماذا خليتيه يديلك ولدك علاااش شكون قالك تعملي هاك اكيد كنت تعرفي مش راح يرجعهولك * والله رديتلو الطفل رغما عني لما جا فاتو نهارات كان مليح ايا ولا غير شوية يروح يقول لبابا * يقول هكدا بابا راه ماجي ويديني انا وماما ...* بابا مقدرش يصبر ولا يبكي ...........
انا وليت عصبية لدرجة لاتحتمل وديما مشاكل مع امي حتى هي مسكينة مراهاش قادرة علي انا كي نكون وحدي نقول لازم نصبر ونبدل معاملتي لها مي كي نكون معاها نولي نتفكر حوايج قباح قالتهملي في صغري ومعاملة سيءة ودعاوي السيءة اللي قالتهملي .... في احد الايام قوتلا علاش كنت تثولي هكداك قاتلي كنت جاهلة وبحكم انا الاولى عندها يعني مكانتش تعرف تربي من ناحية راني عذراتها ومن ناحية اخرى مقدرتش ننسى يعني كترو علي المشاكل نتاع الحاضر والماضي وتلفت
مرات كي نتعصب بزاااف نقولها كاش نهار نخرج من الدار ومنعرف وين نروح ولا نرمي روحي من السطح ولا نجيف روحي
نتمنى نتاع الصح نتبدل وحياتي تتسقم ويولي ليا ولدي ونبرا ومراات تاني نتمنى نولي لراجلي
لكن حياتي من تعسير لتعسير اكبر منه بانتظار نصاءحكم بارك الله فيكم

 

[أبو عاتكة]

السلام عليكم
الله يكون في عونك
هذا هو حال الدنيا تتقلب في لحظة لا نعرف ما يأتي في المستقبل
لكن على الانسان ان يكون هادئا حكيما ولا يقنط من رحمة الله والاهم لا ييأس من حياته ونفسه ومن حوله لانو هذا لا يجدي نفعا ولا يحل مشكلة بل بالعكس راح تتدهور عدة أمور تبعدنا عن المشكل الحقيقي.
الزواج والطلاق من سنن الحياة وقادر اي انسان يجد نفسه في حالة منهما دون تخطيط ولا تدبير ولا تتوقف عندهما الحياة اكيد
قد يكون الاولاد العائق الوحيد او المشكل المحتوم لا نستطيع فعل شيء حيالهم في وقت مابعد الطلاق والامور تكون فوضوية وعصبية واحيانا انتقامية
لكن مع وجود ناس عقلاء ويفكرون بهدوء وحكمة مثل اخوك ربي يبارك فيه انا متأكد من أنه يرى الامور بحكمة وتعقل ويعمل لصالحك ولصالح الجميع حتى تمر الامور دون تعقيد الامور اكثر.
الولد طال الزمن او قصر سيكون بين احضانك ادعيلو فقط ان يكون صالح ومفيد

قد يكون الدافع الى الطلاق ضغوطات قديمة ومتكررة بقوة يعيشها الزوج تدفعه للتطليق و شجعه لذلك ممكن عدم انتباهك لتحولات العلاقة بينك وبينه ممكن كما ذكرتي جو الانفعال حرك كل شيء لأسوء القرارات الا أنو لا ندري لعل الله يعيد المياه الى مجاريها لانعلم

ابقي في طوع أخوك و في نفس الوقت حاولي تتمالكي نفسك وتعيدي ترتيب حياتك وابتعدي عن الصدامات والاهم اخلقي جو من الاطمئنان والهدوء لطفلك واجعليه يشعر بالراحة معك
الاطفال خاصة الذكور من الطبيعي يميلون للأباء لانها فطرة وتناغم لا دخل للسحور والشعوذة بالامر فرؤية الامور من هذه الزاوية فقط تدخلنا في متاهات الشك وتدفعنا الى صراع نفسي لا ينتهي.

وربي يصلح احوالك ويهدي بالك.

 

[خديجة ph]

السلام عليكم اختي الغالية
اشكرك كثيرا على هذا التعقيب و على اجابتك على الاسئلة اعتقد انك وضحتيلنا الكثير من الامور اهمها
انه شبه مستحيل ترفعي دعوى ضد ابن خالتك لان ذلك سيؤدي لمشاكل بين العائلتين قد تنتهي بدخول احد الافراد الى السجن لا سمح الله
ثانيا انك انسانة مغلوب على امرها جدا في هذا الموضوع و مسكينة جدا ما لك غير رب العالمين دائما كرري قوله تعالى "ربي اني مغلوب فانتصر"
ثالثا ان لا احد يستطيع يساعدك اكثر كونك ضعيفة جدا يعني من يتقدم لمساعدتك يحير من اين يبدأ من مرضك طلاقك ابنك ظلم زوجك مكوثك في البيت
يعني صدقتي في عنوان موضوعك لم اجد عنوان لمشاكلك
الآن هذا المشكل و عرفناه ما هو الحل
اول شيء لازم تكلمي محامية مختصة في امور الاسرة عالاقل عالاقل تقولك اذا كاين حلول بدون رفع دعوى قضائية يعني مثلا تشوفي ابنك تعطيك نفقة ما تقدريش تعرفي القانون فيه ثغرات كبيرة
ثانيا ما نعرفش حالتك المادية لكن لازمك مصروف ديري دوسي تاع مطلقة بالاك يعطوك مناب الاعاقة تاعك تاني ممكن تستفادي من منحة باه تقدري تعالجي نفسك عالاقل
ثالثا لازمك تخممي في مستقبلك تنساي الماضي شوفي عقلك وين خذاك رجعتي حتى لايام الصغر و واش كانت تقولك يماك عقلك يحوس على اي انسان يرمي عليه مشاكله و خلاص لكن ما يتحملهاش هو لا اختي لازم تشغلي نفسك اذا عندك ديبلوم اخدمي اذا لا اتعلمي صناعة حلويات خياطة طرز المهم تشغلي نفسك بشيء تحبيه و تنجحي فيه مهما كان اهتمام اهلك بيك راح يجي يوم تلقاي فيه نفسك وحدك لازم تهتمي بمصاريفك وحدك و ربما طليقك يعاود الزواج و يرجعلك ابنك لازم تستعدي باه تصرفي عليه
ايضا تكلمتي حول عصبيتك لم افهم جيدا اذا كنت لما تتعصبي لم تأذي زوجك او اهله لا بالفعل لا بالكلام فكيف تقولي راكي عصبية هل تقصدي بعصبية انك تحزني بسرعة و تبقاي تبكي و تكتئبي هل تقصدين انك كئيبة جدا وان هذه الكآبة اصبحت مرض بالنسبة لك و اظن انها سبب عزوف ابنك منك فالاطفال يملون من الانسان الكئيب هنا واش نقول لأختي هناك شيئان لابد منهما ليذهب هذا الحزن الشديد اول شيء هو العلاج هناك ادوية تساعد لرفع المعنويات لكن لابد عدم الاكثار منها و الامر الثاني و هو الاهم هو القرب من الله عز و جل حاولي تشوفي مسجد قريب ليكم انظمي لحلقات حفظ القرآن راح تتغير حياتك
خلاصة الموضوع طلاقك مش نهاية العالم وقوفك في مكانك تندبين حظك و تتهجمين على من حولك هو نهاية العالم بالنسبة ليك اما بالنسبة للباقي فسيكملون حياتهم بشكل عادي
ربي يعينك اختي و اذا شفتي اني لم افهم بعد مشكلتك اعملي تعقيب ثاني و باذن الله رانا معاك حتى تلقاي حل يناسبك
سلام

 

[بسمة القلوب]

ربي يفرج عليك و ييسر لكي امورك