حشوات بوراك 🤩😋

[Zili Na]

حشوات بوراك
1-بطاطا مفورة طحنيها زيديلها شوية ملح فلفل كحل بصل تكوني مطيبته فالزيت حتى يتكرمل زدي تونة تع الزيت خلطي كل وعمري بوراك
2-طيبي نصف صدر دجاج فالماء ورقة رند وسنة توم وقليل من الملح والزيت فلفل كحل كي يطيب فيه زيديلو بيشمال و الفرماج كريمي و عمري بوراك
3-طيبي ربطة سلق حتى يدبال بعدها حمصيه في شوية زيت ملح فلفل كحل وفليل من الكمون زيديلو زيتون افيلي وحبة بطاطا مطحونة وفرماج كريمي وعمري بوراك
4-طيبي لحم مفروم بالبصل ملح فلفل كحل وزدي عليه حبات بيض وخلطي حتى يطيب وزيدي فرماج حشوة بوراك
5-سكرفجي حبات كورجات و جزر قليهم مع حبة بصل ملح فلفل خليهم يطيبو حتى ينشفو من الماء ضفي فرماج وخلطي كل وعمري بوراك
6-حمصي بصلة حتى تتكرمل ضفي شوية خضر مفورة ومقطعة قطع صغيرة وزدي ملح فلفل كحل وزيدي
طونة تع طماطم و فرماج و معدنوس وخلطي وعمري بوراك
7قلي كبدة تع دجاج فتيها ضفيلها بطاطا مغلية ومطحونة ملح فلفل كحل كمون توم ومعدنوس وفرماج كريمي وعمري بوراك
8-الا كان بقيلك دجاج طايب فتيه وضفيلو بصلة طايبة حتى تتكرمل وزوج بيض يكونو طايبين سكرفجيهم وزدي الفرماج و الحشو البوراك واجد
9ربي حبات جزر طيبيهم زدي دجاج طايب ومطحون و بصلة طايبة حتى تتكرمل وفرماج كريمي

 

[Hakan]

مشاركة طيبة ،يعطيك الصحة

 

[لمعانُ الأحداق]

حبيت الوصفات
كاين منهم لي جربتهم و كاين لي لا
بوركتِ زهرة

 

[السلطانة]

تسلم الايادي اختي

 

[ام أمينة]

مشكورة على الموضوع
اعطيتينا افكار لحشوات البوراك للتغيير

 

[إلياس]

تسلم يداك على الطبق اللذيذ