يا خاوتي فهموني احنا مع من؟ ولا.......أحنا شكون معانا؟جاوبوني

[سليم المسيلي]

الاخوة باللمة الجزائرية اهلا بلكل وبعد حبيت نفكركم بحكاية قديمة نضن نعرفوها قع لما كنا صغار ونكونو نلعبو لعبة جماعية تستاهل فريقين ينقسمو الفريقين كل فريق وحدو من بعد مثلا يجو زوج من الناس يحبو يلعبو
الاول يقول انا مع من؟...............
اما الثاني يقول انا شكون معايا؟....
في زوج يحبو يلعبو لكن كل واحد كيفاه طرح السؤال نتعاعو لكن لما يدخلو يلعبو ثما نميزو الاختلاف في السؤال
الاول انا مع من ...هذا شيء يدل بلي راه شايف روحو ضعيف حاب يتخبى في نص الفريق
اما الثاني انا شكون معايا ؟..بالنسبة ليه هو عندو ثقة في نفسو لكن حب يعرف شكون معاه باه شوف نفسو صحابو ضعاف او ملاح
...............المهم انا الحكاية هذي ذكرني بيها الشي الى راني نشوف فيه راه يصرا في بلادنا من بعض خاوتنا ""ربي يهديهم""
===ياخاوتي لما نشوف وحد يتصل بحصة مصرية يبدى يحكي مصري نصيب نبكي علاه محشمو بالهدرة نتاعنا
===لما تشوف مسؤول تسالو صحافية تقلو وش معنى كلمة وهران الباهية يجاوبها يعني ""حلوة اوي"" لازم عليك تبكي
===لما تشوف انسان يعيش في الامارات يومين يقلب هدرتو ويولي يهدر باللهجة الخليجية وينسى لهجتو الجزائرية او ربما يحشم بيها.....وش دير
===ربما تقلي حنا اللهجة نتاعنا الجزائرية مش مفهومة اوكي ربما عندك حق معلش نهدر بالفصحة نضن جميع العرب يفهموها
على كل حال الله يهدينا الى طريق الصواب وتقبلو مساهمتي حتى لو كانت خاطئة ""انا من جهتي نتمنى نكون غالط""
لكن هذا ميمنعش بلي مزال كاين رجال ونسا يفخرو بانهم جزائريون وما اكثرهم
تحياتي لكم وانا بانتضار مساهماتكم

 

[مسلم_جزائرية_ة]

السلام عليكم اخي الكريم
لك كل الحق في طرح هذا التساؤل لاننا نشاهده يوميا في اماكن عدة و للاسف هذا من وجهة نظري راجع لضعف شخصية الجزائريين
معندهمش قاعدة قوية واقفين عليها ليتمسكو بمبادئهم
فنلقاهم اي مكان يروحو ينحلو فيه يصبحون ماثر عليهم لا ماثرين
و حتى انه هذه الظاهرة تحدث بين الولايات نلقاو الي راح لجزائر العاصمة بسهولة ممكن يهدر كيفهم و غيرها
و مع الاسف الشديد هذا لغياب هويتنا الجزائرية لانها لم تغرس فيها لم نربى عليها لا في منهاجنا الدراسي و لا في اسرنا
قد يكون هذا لظروف معينة
و لكن لم يفت الاوان بامكان الشباب الجزائري ان يعزز هويته الجزائرية ذاتيا بالاطلاع على تاريخ بلاده بغرس حبها في قلبه
بمعرفة واجباته في هذا البلاد
و من هذا ان يدرك انه مجرد الخروج من حدود بلاده هو سفيرها وعليها ان يمثلها احسن تمثيل
تقبل رايي المتواضع و ارجوا من الاخوة الافاضل ان ياخذو بنصيحتي البسيطة في تعزيز هويتهم الجزائرية

 

[سليم المسيلي]

السلام عليكم اخي الكريم
لك كل الحق في طرح هذا التساؤل لاننا نشاهده يوميا في اماكن عدة و للاسف هذا من وجهة نظري راجع لضعف شخصية الجزائريين
معندهمش قاعدة قوية واقفين عليها ليتمسكو بمبادئهم
فنلقاهم اي مكان يروحو ينحلو فيه يصبحون ماثر عليهم لا ماثرين
و حتى انه هذه الظاهرة تحدث بين الولايات نلقاو الي راح لجزائر العاصمة بسهولة ممكن يهدر كيفهم و غيرها
و مع الاسف الشديد هذا لغياب هويتنا الجزائرية لانها لم تغرس فيها لم نربى عليها لا في منهاجنا الدراسي و لا في اسرنا
قد يكون هذا لظروف معينة
و لكن لم يفت الاوان بامكان الشباب الجزائري ان يعزز هويته الجزائرية ذاتيا بالاطلاع على تاريخ بلاده بغرس حبها في قلبه
بمعرفة واجباته في هذا البلاد
و من هذا ان يدرك انه مجرد الخروج من حدود بلاده هو سفيرها وعليها ان يمثلها احسن تمثيل
تقبل رايي المتواضع و ارجوا من الاخوة الافاضل ان ياخذو بنصيحتي البسيطة في تعزيز هويتهم الجزائرية

اولا اختي الفاضلة نتقبل راك بصد رحب ممكن انتي اني عندك الحق لكن فيه استثناء انو مازال كاين جزائريين يفخرو ببلادهم ونفتخرو احنا ثاني بيهم نتمنى يكونو اكثر

 

[sarah02]

انا وحدة من نااااس شلفية
نروح من وين نروح نشاء الله نطلع للمريخ ونرجع
نبقا نهدر بالشلفية .......
شكرا لطرحك المميز
تحياتي

 

[هاوية المنتديات]

حبيت كرهت أنا دزيرية
بدلت هدرتي بدلت ستيل بدلت واش بدلت أصلي دزيرية
دزيرية وفتخر وين نروح
بنت الجزائر​

 

[بنت العزة]

السلام عليكم
بارك الله فيك أخي الكريم فهذا الموضوع يحيرني منذ فترة طوييييلة،ولقد أصبت بخيبة أمل كبيرة يوم الجمعة اذ كنت أنتظر من الوفد الجزائري المشارك في الألعاب الاولمبية أن يدخل بالزي التقليدي مثلما فعلت أغلبية الوفود لكن للأسف خابت امالي.
ياناس لهجتنا وعاداتنا وتقاليدنا جميلة وهي التي تميزنا فلماذا تتخلون عنها
الحمد لله لأنه لايزال أشخاص مثلكم غيورين على جزائرنا الحبيبة.

 

[سليم المسيلي]

كل الشكر لكم وشكرا على مساهماتكم القيمةالتى اثبتت كما قلت ان مازال كاين لي يفخرو بانهم جزائريين وما اكثرهم

 

[المليار و 700]

كونت نسنا في الجزائريات يدخلو بالقفطان

لقيتهم داخلين ب jupes mini:laugh:

 

[الستار سوسو]

امالا انا وياك رانا كيف كيف
انا تاني نصيب نهبل كي نشوف واحد يهدر بالمصرية ولا باللبنانية حتى مايعرفولها مليح -ازيك ..اوي ...
وماعلاباليش المهم حاجة صح تبكي

وانا الحاجة اللي ناكل روحي كثر كي نشوف المسؤولين تاوعنا غير الفرنسي تخبط تقول مايعرفوش العربية اما الدزايرية ايييه نساوها كامل


ربي يهدي من خلق بصح نقولك ناس كيما هادو مايشرفوناش وانا وحدة نقول لاي واحد كيما هادو

انت ابدا ماتمثلنيش وماتمثلش الجزايرين كامل
بعيد الشر ياخي حالة يخي

قالك بات مع الجاج ليلة صبح يقاقي
ربي يسترنا واش رايحة نقولك

 

[التلمسانية]

sa7
machi ghi fa tèlèvision
hata falmontadayat
wa ljazayria
ana 3liya nhdar blahjati hata loukan nrou7 ......
wchoukran lik 3la lmawdou3​

 

[CONSTANTINOISE]

والله صح متتخيلش شحال تغيضني كي نلقاهم يحكيو مصري

 

[سليم المسيلي]

ربي يهدي الجميع لكن كيما قلناها ديما الجزائر للكل وام الكل وجامي الواحد يسب البلاد لان جزائر 1800هي نفسها 1900 وهي 2000لكن العباد هي الي تتبدل

 

[zolaelmahboula]

واش راح نهدر واش راح نقول
مادام المسؤولين لكبار هوما لي راهم يقتلو في اللغة العربية و حابين يرجعونا قور بالسيف
ابسط مثال مناهج التعليم الجديدة
كلها نسخ طبق الاصل عن المناهج المطبقة في بعض الدول الاوروبية والتي لم تلاقي النجاح
كي تعرف هاد الشي واش باقيلك تزيد تهدر
الطبيب اللي يجيبوه في هاداك الحصة نسيت اسمها يهدر في اسامي الامراض و انواع العلاج بالرومية تقول راهو يهدر مع ناس كما هو و واحد ما يفهم لوكان ما بكونش ميدسان
والله غير عيب نعيطو للحصص منا و منا و نهدرو كما هوما
سي فري لهجتنا صعيبة عليهم بصح تحاول تشرحلهم كلمة ولا زوج مي ماشي تنسلخ عن جلدك و تهدر هدرتهم حتى ما تعرفها بيان
اسمحولي كترت التفلسيف
بصح حالة تغيض

 

[فقير الى رحمته]

تحياتي لكم وانا بانتضار مساهماتكم :blink:
بانتضار ؟؟؟ بانتضار يا سليم ؟؟؟
لاااااااااااااا ، راك تخمم على اللهجة تاعنا ، و ضيعت اللغة الأم .


تقبل تحياتي سليم :thumbup:

 

[سليم المسيلي]

تحياتي لكم وانا بانتضار مساهماتكم :blink:
بانتضار ؟؟؟ بانتضار يا سليم ؟؟؟
لاااااااااااااا ، راك تخمم على اللهجة تاعنا ، و ضيعت اللغة الأم .


تقبل تحياتي سليم :thumbup:

السلام عليكم قبل مانبدا نحكي هبط المسدس نتاعك نتفاهمو بلعقلية هنا حكينا على الدارجة نتاعنا كابسط مثال لكن هذا الشي ربما يعبر على شبه انسلاخ كلي ضركا الي يسمح في هدرتو على جال حصة تافهة وش رح تستنى منو تجاه لغتو العربية او هويتو الاسلامية المهم ربي بهدينا اجمعين وشكرا لمرورك