ان شاء الله تكونو بخير برك وتكون حاكمة مليح على خاطر نعرف الشعب الجزائري ديما قلقان ومديgوثي:thumbdown:
أيا واش حبّيت نحكيلكم اليوم،اليوم حبيت نحكي على الناس هذوك لي زعمة يلعبوها فور ويهدرو بالفرونسي وهوما لا علاقة بيها يديرو في وحد الغلطات سواء في النطق ولاّ أصلا يكون عندهم مفهوم غالط للكلمة،يعني "فرونسي كاسي مال pلاسي"
هيا سيبالابان نطول بزّاف في الهدرة وندخل في صلب الموضوع
- مالا يا سيدي هنا في سكيكدة ما عندهمش مدّة كبيرة من لي طلقو التيليفيريك،والتيليفيريك هذا ياما ضحكت بسبتو،مرة أنا كنت راكبة في الترونسبور رايحة للدار نسمع في وحد لمرة تحكي ومتأكدة من روحها وتلعب فيها فور بزّاف أيا واش قاعدة تحكي:قالتلهم ما فهمتش وعلاش الغاشي بزّاف في الجهة تاعنا تحير،أيا من بعد قالت:خلّي بالاك درك كي يطلقولنا الـnumérique :scared
تحكي على التيليفيريك) بالاك تتحل الأزمة شويّة،ههههههههههه والله حكمت الضحكة برك كنت وحدي ولقيت الناس ضربت السكتة ما حبّيتش نضحك.- ومرة كنت فايتة لقيت وحدة مع صاحبها،قالتلو ركبت البارح في التيليفيري:glare:،ههههه اختصرتها،وعندي صاحبتي تقولّو تيليفيليك، وكاين ناس يقولولو تريفيريك واللخرة لي سمعتها الـtéléfiring :confused1: هههههه ضربة والله ضربة.
- مرة في مجمع قاعدين نحكيو على الفوت،قلت اتخيلو برك كون ندّيو لاكوب دي موند وعلابالي بلّي جامي تصرا قلتلهم اتخيلو برك كون نديوها واش يصرا في الشعب الجزايري؟ قالتلي وحدة أأأأو كامل يدخلو للـcommon :crying: (تحكي على لـcoma)
- وهذي وحدة صاحبتي مرة قلتلها:أو ما تفاهمتش مع ماما ليوم ولدرك ما نحكيش معاها،قالتلي واش بيك نور malgré tt il reste sa maman :thumbdown
علاه رحتي لحاجة خاطيك) درك هي معامن تحكي ولاّ عليمن تحكي حتّى تقولّي il وتزيد تقولّي sa ضربة والله ضربة، ومرة تحيلي على وحدة قالتلي عندها طاي مايكا (قصدها taille mannequin) ضربة خلاف.- وهذي وحدة تحكي قالتلنا أو أنا في اللبسة تاع لعراس ما نحبش اللبسة لي فيها الـdorer نحب لي فيها l'argentrer :scared::scared: نندب في وجّي علاه علاه آآآآآآآآآآآآآآآآآآآآآآآآآآآآآآآآآآآآآآآآ
- هذا واحد قاعد نورمال وحَبْ يدير التبهديل لروحو راح يظلم في وحدة صاحبتي قالها:أسماء واش بيه شعرك طلع زيّك ما جبتيش la parapluie:glare: قالتلو ما نقولوش la نقولو le قالها لا كيما قلتها صحيحة،قالتلو ما تغاننيش،راح عند لبروف سقساوها قالتلهم نقولو la parapluie
hmy::crying: (نندب نندب هذي لي زعمة بروف)،ولاّت صاحبتي عيطت لأمها في التيليفون(بروف تاع فرونسي) وسقساتها،قاتلها يعطيك ضربة كان هذي غلطوك فيها قالتلها كيما قلتيها انت صحيحة، وهاذاك عيّط لولد عمّو قالّو كيما قالتلك هي الصحيحة،هكذاك و ما أمنش حتى راح للدار وشاف في الديكسيونار لقاها N.M ساعتها سع أمّن،وواش خصو كون بقى في قشورو وما لعبهاش محلّب:confused1:- كاينة بلاصة في سكيكدة نسمّوها l'église هيا واحد لاعب روحو ماكانش لي كيفو خلاص،ديك الحطّة وديك التبييشة، اللرض ما يشوفهاش تيلمو طالع للسماء بزاف وما حاطش رجليه في اللرض،هيا زيّو صاحبو قالو وين نتلاقاو،قالّو روح برك أَوْ تلقاني في الـ réglise :crying::thumbdown:،،، آآآآآآآآآآآآآآآآآآآآآآآآآآ
كون حَب قالّو نتلاقاو مان الساعة كان يعرف بلّي يحكي على لبلاصة هذيك الحمد لله لبلاصة هذيك عندها أسامي بزّاف:glare:
- وحدة تحكي معانا على مذكرة التخرج تاعها قلتلنا أأأووو أنا أو عييت مع la mémoire تاعي مالقيت كيفاش نكملها ماعندي aucun idée :thumbdown: كون حبّت قالت ما عندي حتى فكرة خير من التبهديلة هذي، بلا نحكيو على la mémoire هذي لي تحكي عليها أنا نعرفها في الراس لي في الكراس le mémoire على حساب معلوماتي .
- ومرة واحد من بعد ما فوتنا لي كونترول في الوقت لي بداو يعلقولنا النقاط قال لصاحبو والله يبهدلو النقاط تاعنا تقول بعد نروح نقطّع l'affichement :crying:
بالاك تقولو واش بيها هذي تضحك على الناس تلعب في روحها تعرف الفرونسي ؟؟؟ أنا نقولكم مش قاعدة نضحك على الناس هوما لي قالولي اضحك علينا،حبيت برك نقول بلّي حاجة خاطيك تعييك ولي يعييك غير طيّش عليك،أنا راني نضحك على الناس لي زعمة تجيبلك رولو بالفرونسي وهوما 0000 والله ما فاهمين فيها برة،أنا والله كلمة مش متأكدة منها ما نهدرهاش كون تخرج روحي،الحمد لله كاينة العربية نعرفولها الكلمات كامل تاعها يعني سيبالابان نلعبها نتفرنس من بعد يضحكو عليّا.
درك مادا بيكم كل واحد يمر على الموضوع يكتبلنا هكذا غلطات سمعهم من عند ناس في الطريق ولاّ من عند صحابو،احنا أو نضحكو وفي نفس الوقت نصلحو المفاهيم تاعنا،..هيا لبنات أنا نعرف البنات هوما تاع المواقف هذو،لبنات هوما لي يلعبوها يهدرو بالفرونسي يعني البنات سير يكونو سمعو بزّاف غلطات كيما هذو،....
هيا درك أنا نبقّيكم على خير وا شاء الله ما نكونش طوّلت عليكم،وان شاء يعجبكم الموضوع،وآخر الكلام سلام
...
آخر تعديل:
