بين البارح واليوم بين جداتنا وونحن اليوم

السلام عليكم
جيت نحكي اليوم على جداتي
متخافوش منيش راح نمنشر فيها
نحبها لتيتة ونموت عليها
*****************************
جداتي
كيما كامل الجدات تاعكم
تحب الشطارة ولفحالة وتكره التفنيين
بصّح كاين مشكل
لي هو
أنو شطارة زمان راحت مع الجيل تاعنا
وماكنلاه تقولولي مازالت بكلّها
(يعني نقصت )
باسكو حنا جيل منقولوش لاعلاقة
مي نقولو عندو علاقة بصّح علاقتو أكثر مع الأناقة
:p
نحكي على جيلي أما جيل الستيل إيمو والأنانيش لي جاي ربي يستر منو
هادوك صح نقولو عليهم لاعلاقة
************************
جداتنا بكري كانو يهنبرو بزاف
حتى كي تحكيلي جداتي تطيحلي النشعة
كانو يسردو القمح باه يخدمو منو دقيق ويخبزو الكسرة
مي دركا حنا كلش ساهل
وديجا بعد شكون لي متعجنش بالpيتران باه يجيها كلّش ساهل
ولي تعجبني أنهم كانو يمسلو الطواجن
ويفتلو الكسكسي بالشكاير
هادو لحراير تاع زمان
أماّ دركا :
نلقاو الكنّة تخدم بغرضها
نعرف وحدة اتزوجت جديدة متعرفش تخبز الكسرة
وراجلها يشري الخبز كل يوم
وكي يسخف على الكسرة يروح لأمّو بصحانية لوجه يقولها :
رانا سخفنا على الكسرة :s
مالا علاه تزوجتي ولا ديتي gارنuتuر
تزين بيه الدّار
مسكينة ديك لعجوز تخبزلهم وتطيبلهم مالذ وطاب على سعدها تقول باه غير مايبقاش ولدي هاكداك لمكسرة اليدين ترهجو
والمشكل لكبير كي تجي تهدر ترجع معندهاش حق
خخخخ والبقية تعرفوها تنوض حرب أهلية
ويبقى الزوج بين طرفي الصّراع هل يُّرضي أمّه أم زوجته
**********************
للشباب : واش رايكم في نساء اليوم ؟
أنت أيها الرّجل نهار تخطب هل تركّز على جانب الكوزينة وخدمة الدار مع مرتك أو تقوللها كيما يقولو أغلب الرجال اليوم :
كلش من يد حنونتي عسل خخخخ ؟ومباعد بعد الزواج يتشوكا في عمرو مسكين كي يلقاهاهي والكوزينة ضراير،بلامانحيكو على الاتيكيت والرذخات هادوك.
وأنتي أيّتها الفتاة : بكل صراحة واش حوالك مع الكوزينة ؟
تعرفي تطيبي كلش ؟ او انتي من النوع اللي يليكيدي برك ؟
أو أنتي من النوع لي لاعلاقة بالكوزينة وأشغال المنزل ؟


ملاحظة هامّة:
البنت قبل الزواج :نقبل نعيش معاك ولوكان تحت gنطرة وحدة ميهمنيش المهم نكون معاك ناكلو حتى ا لكسرة والما
الرجل :أرجوكِ قلبي الصّغير لايتحمل ويروح يخطبها ومباعد
مسكين ترجعلو فرعون
على قولة إحدى العجائز : خسارة صوارد ولدي فيها خخخ
(درك يزعفو مني لبنات خخخ مي راني نقول في الحقيقة لي شفتها بين عينيا دارت جدّي علّمتني الكثير )

تحياتي

​

أهلا بيك شوشو
يعطيك الصحة على مواضيعك الباهيين
هادا بلاصتو يتثبت ولكن مازال ماوالفوش الأعضاء يرفعو ريسانهم للمواضيع المثبتة ...
راني يومين مارقدتش الموضوع راني نشوف فيه ابيبري برك هههههه
كيما قلتي جيل بكري جيل وحدو
خويا لكبير يسخف ياكل الشخشوخة في دارو ههههه
أما واحد اخر تزوجها من واحد القرية رحمة ربي متهليا فيه شخاشخ برابش حالة ههه
يعني كاين نقاط لازم نحكيو عليهم
وهي الفرق بين بنت الدوار والقرية وبين بنت لمدينة ولبلاد
صح مام بنات الدوار وتفرعنو ووصلتهم الحضارة ولكن ديما ديما خير من بنت لمدينة في الكوزينة
وهكداك المرأة ألي ماقراتش وحكمت الدار خير ملي قرات وحياتها كامل وهيا زعما تقرا وتتسيتت هههه
طبعا ماشي كامل ولكن الأغلبية ...
---
أما انا بربي مانسكنش مع الوالدة باش نستر على مرتي لعزيزة هههههه
لأنو الراجل ألي يسكن مع يماه راح يلقى مشاكل كبار والأم ديما مشكلها في الدنيا مرت ولدها ...
وأكيد الطفلة ألي تعرف اطيب واطيب كلش مليحة ، والراجل ياكل ويشوف الطابلة مزوقة برك ههههه
ان شاء الله مقصودي وصل شوشو
تستاهلي تقييم
​

وعليكم السلام ورحمة الله تعالى وبركاته

الحديث في موضوعك أختي يطول ويطول ياسر
وكل طفلة تمد رأي وكل راجل يمد رأي وكل انسان
يحب حاجة بصح الواقع يفرض أنوا لكل انسان عقلية
ولكل انسان مبدأ يمشي بيه وكل عائلة كيفاه تربت
_____
كاين بنات من صغرهم يحبوا يطيبوا ويحبوا يعاونوا
يعني في مصطلح جداتنا بنات قافزات :d وشاطرات
وعليهم الكلمة هكا هوما يقولوا وكاين بنات خاصة الي
قروا ودخلوا للجامعة ومن بعد للشغل ديما دير الوقت
سبب ماتعرفش اطيب ماتعرفش تغسل مانيش عارف
_____
باش نكونوا متفاهمين هو كل انسان يحب مرته
تكون تعرف كلش تعرف تغسل تعرف اطيب تعرف تعجن
بصح على حسب البلاصة وعلى حسب الظروف كاين
في بعض الاماكن والولايات ماعندهم حاجة في المراة
ديما اطيب هكا الكسكس وطيب الخبز والرخساس والحوايج
هذه ويكونوا مهملين لجانب الاكل يعني ماعندوش حاجة
الراجل في الاكل بصفة كبيرة يعني الي طاب مرحبا بيه
______
اما كاين رجالة تحب تتشرط وتحب ديما هي الي تطلب الماكلة
مثلا يحب ديما الكسرة تكون يوميا ولا في الجمعة والخميس
ديما طعام اي كسكس وكل واحد وكيفاه هو كاين عايلات
نعرفهم يوميا يطيبوا الخبز وكاين ناس بلاك نسوه طول
الي يحب ياكل يجيب مراة قافزة والي مايحبش يجيبها فنيانة
ههه وهو في الاصل لازم كل طفلة تولي تعرف اطيب
الا ماتعرفش معليش تحاول بالعقل بالعقل حتى الطفلة الجامعية
ولا الي تقرا عندها فرصة باش تتعلم في الصيف ولا العطل
وكاين بنات يتعلموا حتى كي يكونوا في الجامعة
_____
التطياب حاجة مفروغة منها اما الحوايج تاع الكسرة والعجين ووو
بالعقل بالعقل تتعلم المرة الاولى تبدأ تشوف والمرة ثانية
تشارك في التطياب حتى وين تهز الخبرة وتولي هي طيب وحدها

اما طفلة تقولك مانتعلمش وماندخلش للكوزينة ووو مش منطق
وبالنسبة الي يشروا الكسكسي ويكسكسوه نقولوا عندنا
مابقاتش كي بكري ومابقاش القمح ومانعرف واش
خاطر كلش ولى يتباع في السوق حاضر غير اشري
وطيب وانت وعلى ذراعك الا تعرفي,,,

هوما الامهات والجدات عندهم الحق ياسر كي ينصحوا بناتهم
والامر هذا مايتعلقش بالطفلة كونها جامعية ولا في الدار
الي تحب اطيب وتخدم زوجها واطيبله الي يحب ادير المستحيل
وفي المنطق ثاني حتى الزوج مش رايح يكون يتشرط
ولا يتعب مرته يوميا خاطر الحوايج هذه مش ساهلة لهذه الدرجة
باش كل يوم المراة اطيب وبكري كانت المعاونة ووو
يكونوا بنات ونساء ياسر في الدار يتعاونوا اما كي تكون هي وزوجها
مش عيب باش تتعلم وتولي اطيب واش قاعدة دير تتفرج في المسلسل ههه :p

_____

انا بالنسبة لرأيي مش راح نبقى نفرز في الطفلة على جال كوزينة
وحوايج كيما هكا اما الطفلة المليحة تكون مليحة فكلش وتعرف كلش ههه والا ماتعرفش مش عيب تتعلم وبالعقل بالعقل تولي تعرف
حتى الا جات من دار اهلها ماتعرفش بالعقل وتتعلم عادي مانشوفوش
نظرة تاع اول عام وثاني عام والا هي فيها طبع تاع تفنيين
اكيد راح تبقى ماتعرف والو والا ماحبتش تتعلم ثاني
ماعليهم الا ان يشتروا طعاما جاهزا من المطعم كل يوم وتنتهي القصة
:down:
الرجال الكل حسب مانعرف يحبوا نساهم يكونوا يطيبوا ويعرفوا ووو

شكرا على الموضوع,,,
​

يعطيك آآلصحة سوجي في آآلقمة
مي لوكآآن نقولك بلي آآلجيل هدآآ نتآآع الآيمو
مآآيعرفوش حتى يزغرتو
خلي يآآ تروح ترحي آآلقمح هههه
​

ههه راه مازال كاين الخير حنا عندنا بصح في القرى الطفلة لازم تتعلم الفتيل من صغرها والبنات الصغار ديما يروحو لوحد لمرايتعلمو النسيج والخياطة ولكروشي.....
انا ماتعلمت فتيل ماتعلمت نسيج
بصح على طياب شخاشخ وبرابش كيما قال الاخ مكانش ههه وخياطة راني ندير وكاين شحال من بلاصة مزال كاين الخير مع اني عايشة في مدينة
ومش مليح تعمو على البنات كامل​

والله يا شوشو غير قستيها عندك الحق في كلش بكري راح يكري صح هوما كانو شاطرات في كلش مالـgـري يتزوجو صغار مي تلقايهم فاحلات في كوزينة بارسكو يتعلمو من صغرهم مايخرجوش مايقراوش مايخدموش ماكانوش عندهم لي موايان لي يـpـاسيو بيها الوقت ملي ينودو وهوما في كوزينة وشغل ولغسيل ولفتيل هدو لي يجوزو بيهم حياتهم بسيف يتعلموهم مي دوكة كاين لي موايان لي تنساي روحك فيهم ماتقعديش غير للكوزينة ولاو لبنات يخدمو على هداك راحت الـgـانا تاع طياب كلش واجد حتى لي فريت مقطعين امالا لمرا ماعليها تجبد تحط في لافريتوس ولاو يعجزو ع طياب حنا معيشة سون سوفرانس مي مايعنيش ماطيب والو امالا واش ياكلو لحجر pـوغ موا نعرف نطيب دي pـلا مي خاطيني خبر دار ومانفتلش خليت لاماشين تفتل يجيني واجد
يطيك الصحة خيتو عجبني بزاف سـuـجي حنون كي مولاتو ​

هههههههه وشنو هادا يا بابا قتلتينا يت بنتي بالقدر ...

مي عندك الحق هاذا هو الزمان دوار ..
​

ياااا مكاااااااااانش لازم نكومونتي على هدرتك
وهي الفرق بين بنت الدوار والقرية وبين بنت لمدينة ولبلاد
صح مام بنات الدوار وتفرعنو ووصلتهم الحضارة ولكن ديما ديما خير من بنت لمدينة في الكوزينة
وهكداك المرأة ألي ماقراتش وحكمت الدار خير ملي قرات وحياتها كامل وهيا زعما تقرا وتتسيتت هههه
طبعا ماشي كامل ولكن الأغلبية ...
ايه نتوما مدابيكم تدوهة جاهلة باش ديرو عليها دراع بارسكو قارية تخرج فيكم وعارفة قوالبكم شايفة دنيا مي بنت حوش تحشيولها حطوها غير في كوزينة وبرا انت دير رايك :p
---
أما انا بربي مانسكنش مع الوالدة باش نستر على مرتي لعزيزة هههههه
ههههههههه انت عندك تناقض في رايك:very_mad: فوق تشكر لي تعرف طيب ودوك درت وحاب تستر عليها مي يجي نهار وين تكره ماكلة تاع ليكيدي يالوكان تكون ميت عليها
لأنو الراجل ألي يسكن مع يماه راح يلقى مشاكل كبار والأم ديما مشكلها في الدنيا مرت ولدها ...
هدي راني معاك شوف قدما ترضي يماك قدما تقول قليل خليها تبقى عزيزة عند مرتك وماتسكنهاش معاها حير مايكترو على راسك لي بروبلام
وأكيد الطفلة ألي تعرف اطيب واطيب كلش مليحة ، والراجل ياكل ويشوف الطابلة مزوقة برك ههههه
كي يكون راجل جيعان ماينتبهش للطياب ادا بنين :p​

وعليگم السلآم هــآ شوشو
واش هآد موضوع إنه فآضح ههه
جدآتگ والي گيفهآ الله يرحم يآمآتهم
أمــآ انا نقولگ نگره الگوزينةة موآلفة نليگيدي برگ
مي دگ رآني تهديت ورآني ندخل نطيب وو مي گسرة نوووو ههه مانديرهاش
هيا يامصيبة صحيتي ع الموضوع خخ (فضحتينا)
سلاموو
​

سـلام
خخخخ جيل الاييمو وش تستناي منو خخخخ​

أهـــلآ بشبش وليت كي نشوف اسم نعرفو هنا نفرح
وأهــلا بماكانش مدة ما شفتوش الحمد لله كي راه بخـــير
...
واش نقول في موضوعك والله يا شوشو الموضوع هذا والقضية هذي ديما
نتقابض مع ماما في سبتها ... ياك تعرفي بلي جداتنا ولا ماماتنا تقدري تقولي
راهم كيف كيف صح أمهاتنا ضيعوا حوايج مي خفاف واحنا ضيعنا تقريب كلش
أنا صراحة نعرف نطيب كلش من غير الأطباق الثقيلة ,,, تاع شخشوخة ولا
فتات ولا هذو نونو ... مي بصراحة أكثر أمقت الكوزينة وكان طيبت نطيب
حاجة خفيفة ... أمقت الكوزينة وكون نصيب ما ندخلهاش مي ديفوا تحتم عليا
ماما نخبـــز ... نحكيو على الرزواج والخدمة تاع الدار أنا لي يحسب روحو
رايح يديني خدامة لدارو ويشوفلي واش نعرف نطيب ويركز عالجانب هذا
نقولو روح خوك راه في السوق وما يضرنيش أني ما نتزوجش ... أنا حياتي
قانعة بلي مش مأطرة في دار نخبز ونطيب ونسيق رانا في 2012 زمان
التطور والعلــم ,,, يعني ما بقاتش تاع لمرا تفني عمرها في الدار تربي وتطيب
وكيما نقول ديما لماما أنا ما خلقنيش ربي للخدمة هذي ...
بكري يا شوشو كانو دايرين الدار هي الدنيا وهي لحياة ألوغ كو أنا نشوف
الدار جزء من الدنيا وجزء من حياتي وماهيش من أولوياتي ... علاش
تاع الهارج متقدمين علينا مع أنو مرا ما تقعد في الدار مي ديارهم يسخــفو
واحنا نهار طول وهي تندب وتسود في الدار وتبقى كي تاع لهزارش ,,,
وكل وحدة وكيفاش تربات ,,, أنا تربيت كلش نلقاه عند يدي ما نمدش يدي
وقليل وين يطلبوني نعاون ... نفضل كلمة خايبة على كلمة تدمر مليح
تجيني إهانة كي يقولوا تعرف تخدم ,,, شغل نعرف ندمــــر ,,,
مغسي عالموضوع خليتيني نعبر عن شعوري لي ديما نعبر عليه مع
ماما وتولي تاكل فيا ... وعلى فكرة لي تحسب بلي الدار هي كلش وهذيك
هي الدنيا وتقضي على صحتها فيها وتأطر حياتها على هذا الأساس
نقوللها عمرك راح خسارة اخـــتي كاينة حياة تقدري تعيشيها وتتهلاي
في دارك ونوغمال ,,, تاع بكري حرموا رواحهم من المتــعة ,,, حتى
صحتهم كاحت بغير وقــت ,,, ســـلآمو بشبش
​

مرحبا بيكم
درك نرد عليكم واحد واحد

​

موضوع رائع رائع و في القمة و الله جبتيها في الصميم يا اختي واش نقولك يا حسراه على جيل بكري و جيل دركا حنا جيل الجاج تاع تريسيتي
​