كوكب الاعترافات // المشكلة 07 " حماتي رايحة تخرجني من عقلي !!"

[بنت الـ25]

السلام عليكم ورحمة الله تعالى وبركاته

مرحبا بكافة مرتادي منتدانا الكرام مثلما عودناكم في ركن:

° كوكــــب الاعتــــــرافـــات °

​

المشكلة رقم 07 :
" حماتي رايحة تخرجني من عقلي !!"
​

السلام عليكم
شكرا على الموضوع ملقيتش لمن نفرغ قلبي راه معمر وكون نبقى هكذا نرتكب جريمة ونقضيها فالحبس حياتي كاملة
انا تزوجت بطريقة جد تقليدية، مع اني كنت فتاة طموحة قريت فالجامعة وكنت من المتفوقات ودرت البارمي وقريت اللغات والاعلام الآلي يعني ما خليتش حاجة وكانت أحلامي كبيرة بزاف ، وكنت كيما اي طفلة نحلم نتزوج ونأسس عايلة ونتخيل كيفاش رايح يكون زوجي وكيفاش نربي وليداتي
في عامي الثالث جامعي جات لعندنا وحد المرأة فاميلة بابا من بعيد (اللي هي عجوزتي حاليا) وطلبتي لوليدها وقعدت تبوس في أيدي بابا باش يوافق (باستلو يديه صح )
انا منعرفش وليدها وجامي شفتو وهي تان منعرفهاش وأول مرة نشوفها كي قتلها منعرف وليدك جابتلي فوطو وجات توريلي فيه وقاتلي بلي عندو نيفو تارمينال
هنا يما قاتلها هادي مش طريقة تع زواج يلزم يجي ابنك ويشوفها وتشوفو ويقعدو وتما تقرر
نهار جات وجابتو معاها قعدنا وحكينا وانا بصراحة ما ارتحتش للموضوع وقلت لبابا وكنت ناوية نخبرهم يعطيوني وقت نفكر ومبعد نرفض في ليتساع
أمر عادي يصرا ديما
مي هنا بابا (الله يسامحو) عجبو وليدها وضغط عليا نقبل وانا كنت نخاف من بابا نموووت جيت نقول لالا خزر فيا قلت ايه

وتما بدات معاناتي
ظلينا مخطوبين لمدة سنتين ما بين نكمل قرايتي وفي هاد الفترة اكتشفت انو معندوش نيفو تارمينال كيما قاتلي يماه .. ياو البيام ومعندوش
حسيت بالخديعة وبديت كل يوم نتأكد اني انا وهو موحال نتفاهمو وين يا نحلو دار وقلت لبابا باش نفسخ الخطوبة دارلي شرع ...

المهم تزوجنا وخف شعوري بالندم شوية شوية والحمدلله قدرت نتفاهم مع زوجي خصوصا انو يحبني مهما ساعات نتقلق ونهيج مي هو يفهمني ويحتويني... مالـgري يخدم بعيد ومنشوفوش غير بالشهرين والثلاثة ... مي مش هنا المشكل

المشكل انو يماه اللي هي حماتي اللي جات النهار اللول تحاول وتترجى نقبل بولدها انقلبت عليا 180 درجة .. ولات تعايرني وتحوس نخدمها 24/24 ساعة
خصوصا اني انا الكنة الوحيدة اللي عايشة معاها

مررتلي معيشتي لدرجة وليت نشوف النجوم في عز النهار
تعبت نفسيا وجسديا معاها وتحملت غير على خاطر زوجي

حملت وجبت طفل ودوكا في عمرو 3 سنين سوفريت ما جيت نربيه
ونهار دخلت نخدم طلقتهولها تحكمو كي نكون فالخدمة فسدتلو كامل طبايعو

ولما زدت حملت المرة الثانية هااجت سيرتو ملقاتش لي يوقف في وجهها
كل يوم المعايرة والهدرة اللي متخلاصش
يجيو ماليا متحبش تجي تقابلهم
تحوسني نخدم عليها مع اني بالطابق تاعي وحدي
ومع انها علابالها بلي الطبيبة عطاتني مالادي وقاتلي ديري الروpـو سينو تجهضي الجنين

آخر مقالبها معايا اني دخلت مرة فجأة وهي قاعدة فالكوزينة تعها مع ابنها (زوجي) لقيتها تقنع فيه يتزوج عليا
كي جيت نقلها علاه انا ما عمرتلكش عينك قاتلي ايه نجيبلو لالاك
قتلها امالا حابة تخربي دارو وتيتمي ولادو؟ قاتلي ميهمنيش المطلقات راهم بارتو

تصورو كرهتني في معيشتي وتزيد تحوس طلقني من ولدها اللي قبلت بيه بالدراع وباست الايادي حتى رضيت بيه

كي جيت نقلو قالي يما معندي وش نديرلها احملي برك

وهذا الشي راه نقطة في بحر وش راهي دير فيا

أكثر حاجة تحز في قلبي صغري اللي راح خسارة
واحلامي اللي تخليت عليها على جال حياة أفضل منها الموت
رضيت بالبعد على أهلي اللي نشوفهم كل 3 اشهر مرة وديفوا اكثر

مخي تبلوكا وانا نخمم فالحل
شكيت ليما شكيت لبابا مقدرو يديرولي والو
بابا راه يتحلف قالي نجيك ونفرزها

وش ندير لعمري
قالك " رضينا بالهم والهم ما رضاش بينا"

لجأت لهاذا الموضوع قلت لعل وعسى نلقى رأي غاب عن ذهني يخليني نكمل ما تبقى من حياتي بعيدة على المشاكل ونقدر نربي ولادي تربية سليمة صحية

 

[assinat]

ربي يكون معاك ختي
تحملتي 3 سنين زيدي تحملي
لعجوزة يجي وقت وين تلين و تتحابو
حرام عليك تيتمي ولادك
​

 

[secret de coeur]

وعليكم السلام ورحمةة الله وبركآته
أهلآ اختي
ربي يكون فعونك اصبري علاجال دارك وولادك
ومدامو زوجك يحبك كلشي يهووون
عجوزتك دك تفطن لروحها وماتعيى وتولي تبوس الأيآدي كيما جاتك فاللول
نعرف وحدة صاحبت ختي عجوزتها شوفتها المرآآآآآر كي كانت تحكي تان تبكينا
واونفان اي ولاتلها وتقولها غي بنتي
ربي يفرج عليك ..سلامو ​

 

[أم عبد الله]

السلام عليك اختي
والله هذا هو المشكل لي خلاني نتهرب من الزواج وخصوصا المشاكل
شوفي الحل كان يمكن تخرجي تسكني بعيد عليها الا تقدري وموحال تخمي تيتمي ولادك
سيـvري هاذي المعيشة مي ربي ديما يكون معاك
وكلي عليها ربي واكيد ربي يعطيك جقك ماتخافيش
وزوجك اكيد راه معاك وهو الصح
وان شاء الله نسمعوا عليك اخبار طيبة يارب

ربي يفرج عليك
سلامي

 

[السلطانة]

وعليكم السلام

اختي يقولك ماكانش مشكلة دون حلّ

تفاقم المشاكل بين اطراف العائلة الواحدة
نتيجة عدم التحاور

كيما يقولو خبي خبي خبي
حتى توصل للكبيرة

حاولي تحكي للوالدة تاعك والوالد يجيو يحلو المشكل
بالكلمة الطيبة مع عجوزتك وابنها

ربي معاكم وبالتوفيق
​

 

[sahiko hamza]

لا حول ولا قوة إلا بالله
صح كاين كيما هاد ليبوبلام وراها بارتوا

أنصحك بالأخت ام منصف
بلاك تفيدك بنصيحة .
​

 

[داليا]

و الله يا اختي راني حاسة بيك لأني عايشة واش راكي عايشة و يمكن اكثر ربي يكون معاك و معايا و يفرج علينا
و حاولي تصبري و تفوتي علابالي صعيب الحال و ساعات ما تقدريش تفوتي و تنفجري بصح واش رايحين نديرو مادام رجالنا معانا و يحبونا نتحملوا حتى يفرج ربي

 

[meriem28]

سلام اختي حقيقة الحكاية نتاعك مؤثرة جدا mais دائما نسمعوها علابالي لوكان نقولك ماعليش راهي كبيرة ولازم تساعفيها رايحة تضربني لانو خلاصك الصبر علي حساب الحديث نتاعك انا عندي نصيحة واحدة وهي الشكوي لغير الله مدلة وعليه لوكان تواضبي علي الدعاء لربي سبحانه باش خفف عليك محنتك راحت ترتاحي من هدا المشكل بلا ماتحسي وكوني من الكاظمين الغيظ وشغلي فكرك كيفاش تربي ولادك وتحافظي علي زوجك واوقات الفراغ ادكري ربي وادعي لربنا يهدي حماتك التي تظل ام زوجك وربما عدم تقبلك للزواج هو الدي فاقم من المشكلة المهم هدا مجرد راي وسمحيلي ادا زعفتك

 

[nada242008]

قليل وين تلقاي واحدة متزوجة وماعندهاش مشاكل مع اهل الزوج
المرا اذا تزوجت وجابت لولاد ماعندها ماتدير لازم تصبري وتعقبي وخلاص
احقريها كي تبدا تهدر وتحوس على المشاكل ديري روحك ماتسمعيش والله صدقيني كي تشوفك مش تعاندي فيها ممكن يهديها ربي
وبخصوص تحرش في زوجك باش يتزوجك عليك راهي بلعاني باش تقلقك برك باسكو الراجل كي يعود ناوي يعاود الزواج مايسناش امو حتان تولهو
وكلي ربي ونت ديري واجبك معاها وخلاص .. وحتى راجلك كي يشوفك حاكمة فمك يجي في صفك
وكي يشوفك ترجعيلها في الهدرة تغيضو امو
وبالنسبة للخدمة انا من رايي مدام راهو جاي الثاني في الطريق احكمي دارك وربي ولادك حتان يكبرو ويفرج ربي

 

[sami44]

عليكي بالصبر لان الصبر مفتاح الفرج

​

 

[الراجية رضا ربها]

السلام عليكم
أختي ربي يفرج عليك
كيم يقولوا إذا تفاهمت العجوز و الكنة يدخل إبليس للجنة أنا ماشي نحرض فيك علاها لكن لازم عليك تتقبليها كيم هي و تديها على قد عقلها لأنها مرا كبيرة و جاهلة و أمية مشني نطيح فيها لكن أغلب العجايز هكا هذا واقع
أختي حاولي تبدلي طريقتك معاها نت الله يبارك عليك قارية و مثقفة و واعية وهي مرا كبيرة و جاهلة و أمية يعني حاولي كيفاه تكسبيها و تحوليها لصفك رايحة تقوليلي نت هبلتي؟ إيه نعم أنا هبلت خاطر لازم تحافظي على استقرار عايلتكا
أختي يقول الرسول صلى الله عليه و سلم تهادوا تحابوا حاولي تهديلها كادوات هكا باه تحبك و جاولي تعامليها كيم أمك رايحة تقوليلي أمبوسيبل راني عابالي بللي ماكانش كيم الأم بصح أختي كاينة حاجة مهمة ياسر و هي إنك لازم تغيري في نفسك أولا و تكوني مقتنعة أشد الاقتناع بالشئ إلي راكي ديري فيه معاها
و فيما يخص إنها حابة ولدها يعاود الزواج أنا ننصحك إنك أيضا تقلبي زوجك يحبك أكثر و ما يتخلاش عليك بالطرق المشروعة
ابحثي في الانترنت و رايحة تساعدك كثيرا من تغيير داخلي و خارجي يعني تغيري طريقة حديثك يعني تكوني إيجابية على قد ما تقدري و خارجيا بالاعتناء بنفسك و ملابسك و ماكياجك داخل البيت طبعا مش خارجه و صدقيني أختي إذا كان هذا التغيير نابع من القلب رايح يكوم صادق و رايحة تجني ثمارو بصح إذا كان مصطنع رايحة تخسري لا قدر الله و رايحو تندمي بعيد الشر عليك
و أيضا ما تنسايش ولادك ثم ولادك متفركيش فيهم و استحفظي بيهم مليح
هذا ما قدرت نوصلهولك و إن شاء الله ربي يسهل أمورك آه و نسيت حاولي تعفسي على قلبك و تددللي عجوزتك و تفكريها مرة بكسرة سخونة كي طيبيها و مرة طلعيها عندك للعشاءو مرة دوشيها يعني و خرجيها معاك كي تخرجي جربي ماكي رايحة تخسري حتى شئ و زوجك رايح يفرح بيك نت تاني كي يشوفك تهتمي بأمو صدقيني أنا متأكدة إذا استعنت بالله و توكلت عليه رايح يعينك لأنو نيتك صادقة و صافية حاولي تبريها لأنو برك ليها رايح يزيد في حب زوجك ليك و بالتالي ماشي راح يفرط فيك بسهولة هذا ما عندي أحتي يصح حابة نقولك حاجة مهمة الخدمة خارج البيت ممكن تكون السبب الأول في هذا المشاكل إذا قدرت تبطلي الحدمة رايحة تعاونك في التغيير
ربي معاك​

 

[عفاف الجزائرية]

السلام عليكم
شوفي نقوللك اختي
كامل رانا بنات وكامل عندنا خاوة وعندنا امهات
لوكان نقوللك ردي عليه اوما تسكتيلهاش ووو ما عندناش وين نروحو من ربي
مي انتي مادام زوجك واقف معاك ويعني حتى ويسمع لكلام امو وما يديرش بيه يعني راه يطاوع فيها برك
لانو كيما قاتلك ام ندى لوكان الراجل عينو في الزواج ما يستناش امو تولهو
درك انتي عندك وليدات يعني على قد ما تعاملك عجوزتك بالقبيح عامليها بالمليح
اكسريها بحاجة يسموها السياسة والملاحة
لوكان تقوللك يا الخادمة قولليلها انعم كي تردليها هك ماراحش ينقص منك ولا شي العكس بالاك هي تحشم وانتي تكبري في عين راجلك والنقطة نتاع المشكل تبدى تنقص
نزيدنقوللك حاجة يجي نهار وين كل واحد يروح في طريقو وتتفارقو بالموت ولا الحياة
يعني يجي نهار وين انتي بالاك تخرجي بدارك وحدك وما يبقى غير الملاحة
انتي صبرتي ورفدتي 3 سنين قادرة تزيدي تصبري وترفدي اكثر
نزيدك حاجة ديما اشريها بالملاحة
يا لالة قلتي خدامة يعني قادرة تتصرفي بمصروفك
كل ما تدخلي جيبيلها حاجة في يدك يا لوكان صغيرة المهم باه تتريقل الاحوال
والله يا اختي على قد ما يكون الانسان عوج الشخص بنفسو هو اللي يسقمو
على هذا اللي نقولهولك ربي يعطيك صبر على صبر ويهنيك ان شالله
الدور عليك كبري بالك ووسعي خاطرك واشري راحتك بيدك
ربي معاك اختي
​

 

[بنت الـ25]

السلام عليكم ورحمة الله وبركاته
تقول صاحبة المشكلة
​

شكرا لكل من مر من هنا وسمع صرختي
بالنسبة للاخت لي قاتلي الشكوى لغير الله مذلة نقول أنا لوكان ما وصلتش بيا الأمور لحد الضغط الذي يولد الانفجار مكنتش رايحة نلجأ لهنا
عمبالي بلي مكانش دار ما فيهاش المشاكل وانا انسانة مسالمة تربيت في دار بابا فالهدوء
قليل وين يصرا الزقا والعراك فالدار الور كي عشت مع حماتي ليتها انسانة تحب المشاكل والقيل والقال ووالفت كل شي يمشي تحت تصرفها مع اللول كانت نورمال مبعد قلبتلي الفيستا ووراتلي الوجه الآخر
انا قلت عادي أي أم كي تشوف الكنة تيماجينيها رايحة تسرقلها وليدها كنت ندللها كتر من روحي وديفوا نستخسر في عمري حوايج وهي نجيبلها نقول في مقام يما البعيدة عليا
باش تحبني وتغمرني بحنانها وحتى زوجي كي يشوفني نحسن ليماه نبقى في عينو كبيرة
مي هي ما نفعش معاها
الخلاصة انها تغير .. كلما تشوفو جابلي حاجة من لبسة ولا قش الدار تبدا تبكي حتى يجيبلها ليها مالقري دارها معمرة وكاملة من كلشي
كون تسمع بوحدة شكرتني على زيني ولا حاجة اخرى تهبل وتبدا سيربلاص تخرج فيا لعيوب السبعة وديفوا وانا نسمع
ما تحاشي حتى واحد
مين نمشي معاها نقول زعما بالحرمة مبهدلة بيا في كل بلاصة
وآخر خبر سمعتو قاتلي وحدة من عايلتهم تلاقيتها اثناء رجوعي مالخدمة انو فالمنطقة تعهم واحد ما حب يمدلها بنتو غير على سمعتها والناس يعرفو طبايعها الخاسرة مالقري اولادها ما شاء الله
عليها راحت جابتني انا ولعرايس لوخرين من خارج الولاية تعها

ايييييي وش نحكي وش نخلي

عمبالي دوك تقولولي غلقتي البيبان مي ملقيتش الحل

دوكا راني نكتبلكم من دار بابا
عيطلتو من يومين نبكي قتلو ارواح اديني مبقاتليش معيشة مع هاد المرأة
كي سمعت هي بيه جاي هربت راحت عند ختها بارسكو تعرف بابا مليح ميخرجش للعيب مي في موقف كيما هدا جاي ومتحلف
قعد استناها باش يتفاهم معاها بحضور حماي (زوجها) مي هي شمعت الخيط ومرجعتش
انا حكيت مع زوجي فالتلفون قتلو مكانش رجوع لهديك الدار غير بمسكن مستقل

قولولي طلبت حقي ولا لا؟


زوجي قالي انو حاليا منقدرش نخليك تعيشي وحدك وانا بعيد واللخر من الناس يطمع يسرقك

وش ندير؟؟؟ نفسيتي منهارة راني نكتب ونبكي وزيد مع الوحم غير ربي سبحانو لي يعلم بحالتي

سامحوني على الاطالة

 

[♥SaMoù Là MoDèsTe♥]

السلآم عليكم
أختي علآبآلي كي تقرآي بعض النصآئح تقولي مآ يحس بالجمرة غير اللي كوآتو
واحنآ اختي حآسين بيك تآع الصح

نصيحتي ليك أنك تتخلآي على حآجة وسمهـآآ عزة النفس
حآولي تتنآزلي شوية بآش تربحي في التآلي
العجآيز في الحقيقة غير تآع سيآسة ،
مرة اشريلهآ الريحة ومرة ديريلهآ حآجة تبغيهآ و مرة دوشيلهآ وكل مرة وكيفآه
وانتي تعرفي عجوزتك وآش تبغي...
أو واجبديهآ بكلآم حنين ...
هكذآ تكسبيهآ وتكسبي زوجك ...
هآذي هي لآزم كيمآ هآك ،
والمرأة تآع الصح معروفة بالصبر
لأنو أمهآتنآ بآش بنآو الديآر مآشي بالسآهل هومآ تاني عآنآو ...

وحآجة وحدوخرة : عليك بالصمت و حآولي قدر المستطآع أنك مآ ترديلهآش الكلآم
وإذآ سمعتي ديري روحك مآ سمعتيش ،
هكذآ تعيآ تعيآ وتكره وهي تحبس الهدرة وحدهآ
علآ بآلي بلي عندمآ تسمعي شي كلآم من عندهآ تحسي روحك أنك مظلومة
لكن وكلي أمرك لله و مآ تخليش الشيطآن يسيطر عليك ...
وآش نقولك أختي الله يعطيك القوة والصبر والله يفرج عليكـ ...
​

 

[عفاف الجزائرية]

راجعة نرد عليك يا اختي
لا حول ولا قوة الا بالله
​

 

[أم عبد الله]

انا حكيت مع زوجي فالتلفون قتلو مكانش رجوع لهديك الدار غير بمسكن مستقل

قولولي طلبت حقي ولا لا؟


زوجي قالي انو حاليا منقدرش نخليك تعيشي وحدك وانا بعيد واللخر من الناس يطمع يسرقك

وش ندير؟؟؟ نفسيتي منهارة راني نكتب ونبكي وزيد مع الوحم غير ربي سبحانو لي يعلم بحالتي​

​

واش نقولك يااختي
صح مشكل عوييص هذا لي راكي فيه

مع انوا حقك الشرعي تطالبي ببيت مستقل مي سبب العذر ثانيتـ مقبول من الزوج بحجة عمله البعيد
الا يمكنكما ايجاد حل وسط يعني يكون المنزل قريب من بيت عائلته او عائلتك
ليضمن هو انه لايوجد من يزعجك او يسرقك كما علل الامر

اتمنى من الله تعالى ان يـُنزل السكيينه ع قلبك

ربي يجيب لي فيه الخير اختي الكريمة
سلامي واحترامي

 

[ahlam02]

Rabi maak ekhti balaki takherbi darek 3la djal yemah essah fe radjlek ki ykoun mlihe m3ak .sah s3iba hyat m3a nass maykhafouch rabi mais wladek mayelkaw ghir dar babahom testarhom dar elwaldin eda khradjti twali matwelich 3ziza sah darkom meftouha lik mais matelkaych kima darek ou radjlek
ana nkolek essabri hata yahdiha rabi et eda mahdahach raki tedi fel adjr.
Rani hassa bik khater ana manahmelch edholm.
Salam

 

[بنـ MaPa ـت]

جمعة مباركة للجميع
مرحبا بيك اختي

العجوزة ماشي بروبلام الصح في الراجل مادامو مهنيك الدنيا ومافيها
مادام تكلمتي مع اهلك وماقدرو يديرو والو وزوجك قالك ماعندي مانديرلها الحل انك تحاولي تقنعي زوجك باش يهدر معاها ويحنن قلبها شوية من جيهتك مادام هو وليدها وتحبو اكيد تحبلو مرتو وديرها كيما بنتها ماجيبش بنت الناس باش تمرمدها
او انك ماتزيديش تسكتيلها وديريلها قوسطوها في الشي لي ماينجازش طبعا مانيش نحرش فيك ونقولك تعاكسيها مي حاولي باش ماتطلعش فوق راسك وتسكتي واجهيها بالتي هي احسن وحاولي حتى نتي تهدري معاها ماتقوليش كرهتها وماتفهمش ونقولها واش نقولها ماتتبدلش وووو حاولي وعلى ربي ديري النية وخليك عفوية معاها وسيي تبلعطيها تاني ههه فكريها بالنهار لي جات تخطبك فيك وريلها كيفاش لازم تكون العحوزة وعروستها غير بالظرافة والكلمة الحلوة صدقيني ماتعرفي يمكن تكسبيها وتولي تتفاهمي معاها شوفي ماتعجزي على حتى حاجة وسيي معاها كلش واهم حاجة انك تحكميها وتهدري معاها باي طريقة وتحاولي تبدليها من جيهتك وزيدي تاني استعيني بزوجك لانو هو قريب ليها.....وربي يكون في العون

سلآآمي​