حكــآيتي مــع فتح خطــوبتي ~ حصرية للمة~

[sofia_elak]

رد: حكــآيتي مــع فتح خطــوبتي ~ حصرية للمة~

سلام ختي
بالفعل قصدتكي منتشرة بكترة وخصوصا في زماننا هدا
يعني مش غير نتي لي صرالك واش صرا
عندي صديقة ليا صرالها نفس مشكلتكي بالتحديد وفسخت الخطوبة وراها نورمال
بالفعل هي خطوة واعرة وجريئة وانو لي ديرها سي سور قلبها صوليد ومش ضعيفة وهاد الشي المليح فالشيرة
وكيما قلتي راه الزواج مكتوب
وراه كان ليك امتحان
وان شاء الله تكوني استفدتي مناه
وربي يجيب لي فيه الخير
​

 

[رقيقة المشاعر]

رد: حكــآيتي مــع فتح خطــوبتي ~ حصرية للمة~

حاجة مليحة انك كانت عندك الجرأة تتخذي هاذ القرار
و ربي يعوضك برجل صالح كيما راكي تتمنايه

 

[حياتي ابداع]

رد: حكــآيتي مــع فتح خطــوبتي ~ حصرية للمة~

ربي يعوضك بزوج أحسن منو .
أسأل الله أن يرزقك زوجا تقيا نقيا و راجل بمعنى الكلمة كيما تحبي انتي.

 

[خالدي]

رد: حكــآيتي مــع فتح خطــوبتي ~ حصرية للمة~

السلام عليكم
كل شيء بالمكتوب ودرك خير من القدام
ربي يجيبلك وليد الحلال

 

[الخليـل]

رد: حكــآيتي مــع فتح خطــوبتي ~ حصرية للمة~

السلام عليكم ورحمة الله تعالى وبركاته
بسم الله الرحمن الرحيم

​

​

حبيت نشارك معاكم لسببين :


الأول : بعض الأشياء و بعض الأسرار تحبس في القلب
ولكن يجي نهار وين تحب تخرجها لناسك و حبابك يشاركوك
حزنك كيما شاركوك فرحك


الثــاني : حبيت نتشارك معاكم حزني كيما تشاركت معاكم فرحي

​

القصة عن فتح خطوبتي


​

ربي كتب و عملت خطوبتي على رجل بالفرح
ودخل بيتنا و تعرفو العائلات على بعضاهم
و أقمنا حفل خطوبة صغير تاع تعارف برك
والحمد لله لي كان حفل صغير برك​

الأمور ماشية لاباس كل حاجة راهي بخير
صح كان بيناتنا حب و احترام وخطبتنا ماكانتش تقليدية بزاف
و العقليات بدينا نتعارفو عليها و نجبدوا الخبايا تاعها

بدات الأوامر تتطور كل يوم ديري هاكا
وماتعاوديش هذي وعلاش درتي هذي
والمندبة لكبيرة ماهيش هنا

يعني مايش فيه هو وخلاص


عندو أربع أخوات ماهمش متزوجات

رجع يقولي أختي قاتلي لازم تديري هاكا

و الأخرى تاني قاتلي لازم تقولها تدير هاكا



يعني أمــور نعتذر عن عدم ذكرها لكم
و لكم أن تتخيلوا واش كاين



​

حسيت روحي مخنوقة و مانيش حرة

كل حاجة نحسبلها حساب و كل يوم نخمم
في حاجة جديدة كانت أمي برك لي نشكيلها
و هي تصبرني ماعليش بلاك برك راه يزير فيك
بلاك برك راه يشرلك باش تبعي كلمتو
بصح تعبت و أي حاجة نتغاضى عليها تخرج وحدة جديدة




وجا نهار وين تعمر قلبي و قررت نفتح الخطبة

كان يوم أسود عليا الصراحة تعذبت بزاف و خفت
لا نندم ولا نتسرع بصح كان الحل الوحيد
باش نرجع كيما كنت ونرجع الابتسامة والسعادة
كاينة عائلتي ربي يحفظها وقفت معاها و ناس غاليين
وقفوا معايا ربي يخليهم
الانسان لازملوا برك شوية شجاعة و صبر و ايمان
بقدر ربي


​

الانسان يقول نتزوج باش نستقر و نسعد في حياتي
مايش باش يحزن و كل يخمم و هموم الدنيا الكل رافدها


صح مريت بأيام صعيبة و جاني كلشي صعيب
بصح الحمد لله اليوم خير من غدوة

الخطبة خير من الزواج

ربي ماهوش مكتب هذا الزواج

و عطاني تجربة باش يختبرني والحمد لله
راضية بمكتوب ربي

أول حاجة أمنت بربي و بالمكتوب
ثاني حاجة قلت في نفسي هذي خطبة
وهاكا بعد الزواج كيفاش
ثالث حاجة قلت مايش غير أنا صرات فيا هاكا
كاين ناس راهي فاتت بحوايج أكثر و صبروا و جازاهم ربي
و الانسان لازم يكون شجاع في اتخاذ قراراتو
و هاكا فاتت عليا الأزمة هذي ان شاء الله


جرحي مازالو جديد شوي بصح ارتحت بزاف بزاف


و ربي يجيب الخير للجميع

​

​

​

 

[بنت الصحراء08]

رد: حكــآيتي مــع فتح خطــوبتي ~ حصرية للمة~

عسى ان تكرهي شيئا وهو خير لك
ربي يجيبلك ساعة الفرج
​

 

[مهدي الثعالبي]

رد: حكــآيتي مــع فتح خطــوبتي ~ حصرية للمة~

عوضك الله باحسن منه ان شاء الله

 

[*Prinçesse*]

رد: حكــآيتي مــع فتح خطــوبتي ~ حصرية للمة~

السلام عليكم يا اختي كلش بالمكتوب اللي مكتوب على الجبين مايمحوه اليدين المهم كلش يفوت و ربي ماياخذ منك حاجة حتى يعوضك باحسن منها بزاااف بزاااف ربي معاك اختي سلام