رد: سِلسِلة { أَعِيدُوا إِلينا أخلاقَنا وإسلآمنا }
السلام عليكم
بارك الله فيك أختي الكريمة على الموضوع
لكن لا أوافقك الرأي في تشكيكك في إسلام المصلين والصائمين وأنت واحدة منهم
وكدا كلامك هذا الدي بالغتي في فتواه وكأنك مفتية الديار من أنت حتى تحكمي عليهم هنا :
وبلا ما نذكرو المسلمين لي يروحو للحرام لأنو هادو ماراهم مسلمين لا ظاهرا ولا باطنا.
وكما أنك هنا خالفتي النصوص العقائدية والقواعد الفقهية و كأنك أنت المشرع هنا :
على عكس الدول الأجنبية ظاهرهم كفار بصح باطنهم ومعاملتهم معاملة الإسلام
وكأنك كي تروح لدولة مسلمة تلقى المسلمين وماتلقاش الإسلام
وفي بلد أجنبي ما تلقاش المسلمين بصح تلقى الإسلام
هنا مارانيش نفتح في مجال باه نتبعو الكفار / * واش خليتي من مجال لقد فتحتي لهم بوابة التزكية على مصراعيها* واش عندهم الكفار خير منا باش نزكوهم على أهل العقيدة*
ليس كل من يكتب موضوع يسترسل في كلماته وعباراته ذون مراعات الحدود
موضوعك جميل ويستحق التزكية في محتواه لكن مضمونه يخالف العقيدة
أنا والله تعجبني مواضعك حقا تعالج قضايا المجتمع و في اسلوب طرحك الراقي
أرجوا أن تتفهمي كلامي
تقبلوا تحياتي
أهلا بسيدي الكريم يشرفني مرورك :regards01:
وكلامك و انتقادك والله على راسي وراني هنا فاتحة مجال باه نتعلمو من بعضنا البعض
كيما قادرة نجيب حاجة صحيحة كيما قادرة نغلط وكل انسان خطاء
لكن فقط اسمحلي ربما نعبر عن وجهة نظري اذا سمحت
أولا قبل ما نبدا كلامي انا وضعت ملاحظة ولي هي كالآتي :
ملاحظة: أي كلمة تذكر خلال هذه السلسلة ليست للتعميم , فدائما هناك نصف كأس مملوء ونصف كأس فارغ, وكل كلمة موجودة في الموضوع هي لإحياء أخلاق الإسلام الميتة بداخلنا فقط وليست لمعاتبة أي أحد
يعني نقصد بيها المجتمع فيه المليح والحايرة وماش كامل الناس كيف كيف
هادا من جهة
من جهة أخرى ما شككتش في اسلام المصلين و الصائمين,
انا قلت بلي راهم مسلمين بالفم فقط ,ينطقو الشهادة ويروحو للمساجد ويصليو ومن بعد يقطعو الرحم و يآذيو والديهم ويمثلو اكبر صورة لعقوق الوالدين ,يقتلو لولاد الابرياء , ومن بعد يكون الاول في صفوف المصلين , معليش ربي يغفر, بصح وين راح دور الإسلام في تحسين اخلاقك؟؟ الصلاة تنهي عن الفحشاء والمنكر بصح هوما راهم عداو الفحشاء والمنكر يا سيدي الكريم , يسما هنا نحسو انو صلاتهم مظاهر فقط
وبالنسبة للصوم, تلقاه زعما صايم ويؤدي في ركن من أركان الإسلام وفي هاداك الشهر الفضيل, بصح هو كلامو فاحش وتقول مزبلة حاشاك , يدخل بكلام فاحش في حق الله تعالى ويخرج بكلام فاحش, ومن بعد يقولك صائم, واينة صيام هادا؟ استغفر الله لا نحاسب الناس وربي كاين
انا ما قلتش ماراهمش مسلمين قلت نروحو نصليو ونصومو بصح معاملتنا مع الناس سيئة وما تمد للإسلام بأي صلة والدين معاملة سيدي الكريم, إذا أركان الغسلام ما حسنوش من صفات واش لي يعدلك مالا؟؟
نوليو لكلامي لي عطيتني فيه رايك:
وبلا ما نذكرو المسلمين لي يروحو للحرام لأنو هادو ماراهم مسلمين لا ظاهرا ولا باطنا.
في بداية الأمر وفي بداية موضوعي ذكرت لي يصلي بصح معاملتو سيئة, وقلت عليه مسلم ظاهرا وباطنا لالا, اما في كلامي هادا نقصد للناس لي تروح للحرام جهرا
شخص نقولو عليه مسلم وهو يشرب الخمر يدير الفواحش والعياد بالله , يكفر على ربي سبحانو , لما تذكرلو الرسول عليه الصلاة والسّلام مايستعرفش بيه بصح عندو لقب مسلم
درك هادا مسلم ؟؟ هادا ما مسلم لا ظاهرا ولا باطنا يعني قدام ربي وعبادو يخالف في الإسلام "وهادو الناس والله شفتهم قدامي"
أما فيما يخص كلامي هذا:
على عكس الدول الأجنبية ظاهرهم كفار بصح باطنهم ومعاملتهم معاملة الإسلام
وكأنك كي تروح لدولة مسلمة تلقى المسلمين وماتلقاش الإسلام
وفي بلد أجنبي ما تلقاش المسلمين بصح تلقى الإسلام
هنا قلت في كلامي الأجانب ظاهرهم كفار ومعاملتهم معاملة إسلام , تلقى اجنبي مسيحي ( الظاهر كافر ) بصح يخلص في العمل, يعطف على الحيوان , يحافظ على نظافة البيئة , يهمو جارو قبل نفسو ( هادي ماش اخلاق الإسلام ؟) ماقلتش انا بلي راهو مسلم قلت اخلاقو اخلاق اسلام مع انو كافر
أما بالنسبة لهاد الجملة:
وكأنك كي تروح لدولة مسلمة تلقى المسلمين وماتلقاش الإسلام
وفي بلد أجنبي ما تلقاش المسلمين بصح تلقى الإسلام
والله راهي من المخلفات القديمة لي نشفالها لما كنت صغيرة وقالها احد رجال الدين سيدي الكريم , مانذكرش شكون هو بالضبط لكن كن نتفكرو نجيب الإسم تاعو
أمابالنسبة لكلامك :
واش خليتي من مجال لقد فتحتي لهم بوابة التزكية على مصراعيها* واش عندهم الكفار خير منا باش نزكوهم على أهل العقيدة*
على جملتك الأخيرة لي فتحت الموضوع, واش فيهم الكفار خير منا , واخلاقهم لي رانا نشكرو فيها راهي تاعنا وقال عليها الإسلام قبل ما يمارسوها هوما
و من وجهة نظري ما توقعتش انو موضوعي مخالف للعقيدة, لوكان نذكر حصة معروفة وهي خواطر وبأجزائها ال 11 , كانت تعالج قضايا المجتمع بالمقارنة بما وصل إليه الغرب وبأخلاق الغرب لي سرقوها منا وهي من اهم ماخلاه فينا الحبيب المصطفى صلى الله عليه وسلم
اسمحلي بزاف اخي على الإطالة ويشرفني النقد تاعك ومنك نستفيد, والهدف من الموضوع والله واضح, واذا فيه صح مخالفة للعقيدة وحاجة خارجة الدين يمكن للإدارة يحذفوه إذا شافو فيه شيء خطأ
انا ماراني غير انسان كيفي كيفكم ونغلط
تحياتي الخالصة
