ملتقى الاشراف -- لا يوافق عليه --

[Skor m@k]

بسم الله الرحمن الرحيم
السلام عليكم


أهلا بكل مشرفي القسم الرمضاني وكل ادارة المنتدى
ان شاء الله في هذا الموضوع نتفاهمو على مشاريع الركن
والمسابقة

دعوة الى جميع المشرفين والاداريين والمراقبين لطرح افكار لتنشيط القسم

​

​

​

@yaso ياسمين
@جيهان جوجو
@الورد الأحمر​

@أم ياسمينdz
​

​

 

[Skor m@k]

هاهو موضوع مسابقة التي وضعناها العام الماضي

مسابقة يَوْميَــآتْ مهْبُولْ وَ مهْبوْلَـــةُ

هذي المرة نخلو اسمها كيما كان برك نزيدو الموسم 2

مي نبدلو مضمونها وطريقة المشاركة فيها

فكرة المسابقة هي
نحطو كل 4 ايام ولا 5 ولا نخيرو كيما حبيتو انتم المشرفين مقدمة لقصة فكاهية
والاعضاء يكملوها كل واحد على حسب افكارو
وهكذا ومعليش يديرها طويلة الى حب كل عضو القصة يكتبها في موضوعين او ثلاثة
هكذا باش يتوسع فالفكرة بزاف

اياو زيدو الى عجبتكم نخدموها وزيدو كاش افكار

 

[Skor m@k]

زيدو شوفو كاش تغييرات فيها

يسر لنا كمشرفين على منتدى سكاتشات اللمة (إستراحة صائم) ان نضع بين أيديكم هذه المسابقة
الخفيفة والمسلية

و كما عودناكم ففي شهر رمضان تكون هناك مفاجات جديدة و متنوعة
و من النشاطات أكملنا سلسلة مسابقة مهبول ومهبولة في موسمها الثاني
مع بعض التغييرات لتجديد المسابقة




●
●
●
●

فكرة المسابقة :

سنقوم بوضع بداية او مقدمة لقصة فكاهية ومضحكة
والمطلوب منك أن تقوم بتكملة هذه
القصة من تأليفك ومن خيالك

●
●
●
●

قوانين المسابقة :

أن تكون التكملة مسلية ومضحكة وان لا تخرج عن مفهوم البداية
مسموح لكل عضو بمشاركة واحدة فقط
في كل قصة
والفائز يستطيع المشاركة مرة أخرى لكن شرفية



*ملاحظة :
اي مشاركة تخل بالقوانين يتم استقصائها .


مدة المسابقة :

المسابقة تطرح كل 4 أيام
ومن ثم نختار الفائز

●
●
●
●

الجوائــــز ..! :

في الختام ارجوا منكم الإلتزام بالقوانين
وعدم الخروج عن محتوى المسابقة
واتمنى لكم التوفيـــق .

​

 

[Skor m@k]

السلام عليكم
@الورد الأحمر
ختي نور ان شاء الله الامور كامل بخير
حبيت برك نقولك الى نخلو الوسام هذا لي مديناه العام الماضي ولا نغيروه
وتانيت قولينا شحال نقدرو نمدو النقاط الشرفية للأعضاء المشاركين والفائزين
وايضا الى كي نحطو كل 4 ايام قصة يكون عندنا 7 فائزين
الى نقدرو نمدولهم لل 7 فائزين الوسام ولالا
ولا مانقدروش نمدولهم كامل
نخلو للقصة السابعة 7 ونكتبولهم قصة يشاركو فيها غير 6 فائزين وهناك نمدولهم نقاط شرفية ولا كاش شهادة شرفية تصمميها

 

[الورد الأحمر]

اااه يا السي سكر علاه تعطلت بالمسابقة هذي لدرك

علابالك كاينة مرشحة للاشراف اقترحت فكرة كيما هذي بعد مي أدبية هي تكتب قصص قصيرة مالا قالتلي نكتب اربع قصص ونطرح جزء من كل قصة كل أسبوع والاعضاء يتوقعو تكملة القصة والطفلة اي بدات توجد ديجا تكتب كيفاه نديرو درك

حشمانة منك نقولك فكرة المسابقة رانا اعتمدناها ديجا للأدبي وما نقدرش تاني نقوللها ألغي تحضيراتك رح نكملو الموسم 2 تاع مهبول ومهبولة

الكل اقترحو مسابقاتهم من قبل ظنينا أنو خلص فضو الاقتراحات مالا اعتمدنا لي ذكرناهم في الموضوع

والله تخربطتلي

 

[Skor m@k]

هههههه والله يا ختي ما ريح بالخدمة قلت نكمل قبل رمضان والله ديما اللمة فالبال
هذيك النهار كتبتلك الرسالة ونسيت باش نبعثهالك هاكي تعرفي الواحد كي يتعب يرح التخمام من بالو

انا من عندي ماعليش نقدرو نبدلوها ولا نلغيوها
خاطرش انا ماحضرت حتى قصة هههههههههههه :p:p:p
ولا مانقدروش نديروها حنا اصلا الاسم مش كيف كيف وايضا حنا تاعنا تاع ضحك وقصص خيالية
علبالك علاه بعثتلك مقبيل قلتلك غلطتي ههههههه فالاسم خاطرش هذا لي خيراتو
انا كنت كتبتو ومزالو في منتدى النكت والطرائف ههههه ممبعد ماحطيتش المسابقة هناك خخخخخخخ
انا قلت كي شفتيه قلتي هذيك هي الاسم
المهم معليش الى نلغيوها هذي المسابقة الى مانقدروش نديوها بين زوج

 

[Skor m@k]

السلام عليكم
صباح الخير عليكم
خلاص ختي نور راني كي جيت نرقد جاوني افكار جهنمية هههههههههه
نقدرو نبدلو المسابقة الى معليش
نخلو الاسم كيف كيف برك نبدلو المضمون تاعها
نحطو كل 4 ايام موضوع ونحددو فيه العنوان تاع القصة
زعما .....تخيل نفسك رئيس واحكينا كيفاه تسير البلاد
تخيل نفسك ....
المهم فيها التخيل وكل عضو يكتب قصة ماتخرجش على مضمون العنوان

تانيت لقيت فكرة أخرى بصح نخلوها للعام الجاي ان شاء الله الى بقينا حيين ههههه
الله غالب ماتوالمش ضرك رانا روطار هههه

الى عجباتك الفكرة برك قولينا الى نمدولهم 7 فائزين كامل وسام
ولا نخلو حتى يوصلو للقصة 6 ونخلو الفائزين يكتبو قصة اخرى ونختارو الفائز
وتانيت شحال نمدو للمشاركين نقاط شرفية
وايضا الوسام الى تقدري تبدليهونا الى معليش خاطرش هذا نشوفو نديقوتي كامل هههههه
والى عجزت خليه ماتبدليهش

 

[الورد الأحمر]

هههههه ضحكتني ...

اوك مالا دير الثانية تاع التخيلات ههه ونشوفو تراه هات يتفاعلو الاعضاء على خاطر المرة هذي بزاف مسابقات من جهة حاجة مليحة كل واحد يلقى اهتمامو من كثر ما منوعين ومن جهة خايفة يبقاو ع وجوهنا هههه

ان شاء الله أخي نغير الوسام لحد الساعة عندي وسامين للتصميم نبدا باللول ونرجع لهذا الثاني

وجد الموضوع الله يحفظك باه نعرف واش نضيف لموضوع التلخيص تاع المسابقات

جمعة مباركة أخي ورمضان كريم

 

[Skor m@k]

ههههه اواه المسابقة تاعي هي لي تدي التفاعل كامل ههههه
مصاب مايحشمونيش برك هههه
ايه خلاص ضرك نكتب الموضوع بصح حبيت نشوف رأي المشرفين لي معايا بصح مادخلوش
خفت يقولك خططت وحدك خخخخخخخخ
نحصل فيك انت لي زربتيني بالموضوع ههههههههه

 

[Skor m@k]

يسر لنا كمشرفين على منتدى سكاتشات اللمة (إستراحة صائم) ان نضع بين أيديكم هذه المسابقة
الخفيفة والمسلية

و كما عودناكم ففي شهر رمضان تكون هناك مفاجات جديدة و متنوعة
و من النشاطات أكملنا سلسلة مسابقة مهبول ومهبولة في موسمها الثاني
مع بعض التغييرات لتجديد المسابقة

المسابقة هي عبارة عن تخيلات لعنوان فكاهي هزلي
وتتوسع في كتابة قصة
نحن بدورنا نعطيكم عنوان لموضوع وانتم تتخيلون قصة لأنفسكم في ذلك الموضوع
كل أربعة (4) ايام نضع عنوان للقصة المراد كتابتها
في هذا الشهر المبارك نحصل على ستة (6) فائزين في كل موضوع فائز واحد
في الاخير نضع عنوان لقصة يتنافس فيها الستة (6) الفائزين على عنوان واحد
ويكون لنا فائز بالوسام

أن تكون القصة مسلية وهزلية وان لا تخرج عن مفهوم العنوان
يجب ان تكون حصرية ومن قلمك الخاص
على الاعضاء فتح موضوع جديد
كتابة العنوان .... - مسابقة مهبول وهبولة 2 -
مسموح لكل عضو بمشاركة واحدة فقط في كل قصة
والفائز يستطيع المشاركة مرة أخرى لكن شرفية

الفائز الاول يتحصل على وسام
+ 500 نقاط شرفية

الفائزين الخمسة (5) يتحصلون على
+ 350 نقاط شرفية

وكما عودناكم ليس فينا خاسر
كل الاعضاء المشاركين يتحصلون على
+ 100 نقطة شرفية

Skor m@k
yaso ياسمين
جيهان جوجو

​

 

[Skor m@k]

@الورد الأحمر

اياي ختي نور شوفي الى عجباتك قولينا شحال نقدرو نمدو للفائزين نقاط
خخخخ وقوليلي على التصاميم الى ملاح اول مرة نخدم بالفوتوشوب هاهاه

 

[الورد الأحمر]

السلام عليكم

راني حطيت النقاط لي تتوزع في بلاصة النقاط المتقطعة لي حطيت .

الوسام درك نشوف وسام من لمركبين إذا يصلح يتمد سي نو نصمم واحد ومادام يتزوع في اخر رمضان رح يكون عندي وقت يعني مممن تخليه بلي يربح وسام بلا تحط صورتو حتى نصممو نضيفو .

التصاميم لاباس خويا بالنسبة لواحد اول مرة يصمم ههه شوف برك للدروس وطبقهم بزاف وتاني زيد الإضافات للفوتوشوي زيد الفراشي والبترنات والستايلات والأشكال والخطوط باه تطلع بنتيجة مليحة وطلع السكربز تاني باه تعمل بيهم تزيين للتصاميم ورح يكون عندك خيار كبير في التصاميم وقتها.

يعطيك الصحة أخي

 

[Skor m@k]

خلاص مالا ضرك نحط الموضوع

 

[Skor m@k]

يا المشرفين لي معايا خليتوني وحدي نقاوم كلش هههههههههه
وين راكم ياو
النجداااااااااااااااااااااااااااااااااااااااااااااااااااااااااا

 

[ريحـان]

السلام عليكم
اسفة اخي اطلعت على الموضوع مؤخرا
رجعت كل ما طرحته في الموضوع
وكل شي جميل و فكرة المسابقة الرئعة
ادا كاش منقدر نساعدك قولي ؟

 

[جيهان جوجو]

@Skor m@k
السلام عليكم
اسمحلي اخي
هذا ويين شفت النداء والنجدة تاعك ععع
مكانتش الانترنيت وهذا وييين خخخ
اسفة

بخصوص المسابقة عجبتني ههه ماشاءالله عندك خيال واسع بارك الله فيك ^^
ان شاءالله تلقى التفاعل المطلووب

 

[Skor m@k]

السلام عليكم
اسفة اخي اطلعت على الموضوع مؤخرا
رجعت كل ما طرحته في الموضوع
وكل شي جميل و فكرة المسابقة الرئعة
ادا كاش منقدر نساعدك قولي ؟

وعليكم السلام
ياحاوجي خليتوني حاصل وحدي هههههههههه
مالقيتش شكون نشاور كامل هههه
مع لي خلطونا لبروغرام تلفتلي كامل خخخخخخ
معليش شوفي ضرك خلاص أطلعتي على المسابقة
مزال نخيرو عناوين للمواضيع القادمة
ونهار الثلثاء لازم علينا نخيرو أحسن قصة

 

[جيهان جوجو]

حقا
منتدى سكاتشات اللمة
حسيت كاين مواضيع فيه نورمالوا تجي في منتدى النكت
وكاين مواضيع معندهاش هدف معين !
مثل هذا في لمة

 

[Skor m@k]

@Skor m@k
السلام عليكم
اسمحلي اخي
هذا ويين شفت النداء والنجدة تاعك ععع
مكانتش الانترنيت وهذا وييين خخخ
اسفة

بخصوص المسابقة عجبتني ههه ماشاءالله عندك خيال واسع بارك الله فيك ^^
ان شاءالله تلقى التفاعل المطلووب

وعليكم السلام
ياو حلوقي تبحبحو من لعياط تاع النجدة ههههههههههه
تلخرتلي كتبت 3 مواضيع في نصف ساعة واع واع واع
ضرك ندي كونجي كملو انتم وحدكم هههههههه
ماعنداك نتمسخر هههههههههه

المهم راني درت رد للخت ياسمينو باش نتفاهمو على عناوين الخمسة المتبقية

 

[Skor m@k]

حقا
منتدى سكاتشات اللمة
حسيت كاين مواضيع فيه نورمالوا تجي في منتدى النكت
وكاين مواضيع معندهاش هدف معين !
مثل هذا في لمة

ايه انت راكي مشرفة تقدري تغلقي ولا تحذفي لي مخالف للقوانين
انا حتى لضرك باش دخلت كنت خدام ليوم ماكفانيش الوقت باش نراقب المواضيع
شوفي لي مايوالموش أغلقيهم بلا ماتشاوري