السلام عليكم و رحمة الله و بركاته
مانيش موالف نكتب مواضيع ياسر في الركن العام ... لكن حبيت هذي المرة برك نجرب نكتب و نشوف ...
بسم الله ....
حنا عادة ننتقدو التصرفات تاع الناس و نحاولو نحطو الظواهر " المدرحة " تحت المجهر و نشوفو الآراء و المداخالات المختلفة حول هذا الشي ...
لكن اليوم حبيت ندير العكس ... قلت نشوف كاش ظاهرة زينة و حميدة ... و نحاول نسلط عليه الضوء و نشوفو اذا نتوما ثاني لاحظتوها ولا لا ...
كاين نوع من العباد ... أقل ما يقال عنهم ... أنهم ناس متحضرين و راقيين و الله يبارك
مثلا ... يهدر معاك في المعقول ... يقسر معاك و يضحك معاك بصح في حدود ...
ما يحاولش يسقسيك على حاجة أنت ماكش حاب تحكي فيها ....
مثلا عندما يطرح معاك موضوع ... و يشوف ما عندكش القابلية باع تدي معاه و تجيب في هذاك الموضوع .. يبدل و يشوف وجهة اخرى
كي توريلو كاش صورة في تلفونك و تقولو " شوف هذي " ... يشوف هذيك الصورة برك ... و ما يروحش يقلب و يشوف الصور الاخرى
كي يصوني تلفونك و هو في يدو ... ما يشوفش شكون الي يكلم فيك ... يعطيك ديراكت التلفون
و كي تهدر في التلفون ... ما يسقسيكش مع من هدرت و لا وش قالولك
...
يعني هذا النوع من العباد ... ناس راقية و فاهمة و عارفة حودوها
و اذا عندكم ناس تعرفوهم فيهم هذي الصفات ... حافظوا عليهم لأنهم من النادر تلقاوهم
و السلام عليكم
آخر تعديل:
