مشكلتي اريد الزواج بها ولكن كيف!!

[مشكلتي]

السلام عليكم
انا شاب لدي 30سنة موظف حسن المظهر ذو عاائلة ذات سمعة طيبة تعرفت بفتاة تصغرني ب11 سنة بمعنى ادق عندها حاليا19سنة وهي حاليا تدرس السنة الاولى بالجامعة ومتبقي لها اربع سنوات دراسة المهم تعرفت عليها لغاية الزواج متفاهمين والحمد لله وكل شيء تمام ولكن رانا في حيرة في امر الخطبة انا قتلها نخطبك ونخليك تكملي عام جاي القراية وفي الصيف القادم تاع السنة القادمة نعرسو ويبقاولك ثلاث سنين قراية تكمليهم عندي هي متقبلة الامر ولايوجد مانع انو متزوجة وتقرا لانو اساسا بعد القراية راح تكون تخدم ومتزوجة يعني مكانش فرق بين القراية والعمل تقريبا نفس الضغط هنا مكانش اشكال ومتفاهمين وامورنا واضحة لكن الاشكال تاعنا هو فكيفية اخبار اهلها علما انو هيا تقرا في ولايتي يعني هي من غير ولايتي اصلا... انا قتلها خبري الوالدة تاعك بلي كاين على اساس انسان شافني عجبتو حب يجي يخطب وعطيتو نميرو الوالد وهي قاتلي لالا نعطيك نميروه او نميرو الاخ وكلمو دراكت على اساس شفتني ورحت لولايتي وجبت نميروه وكلمتو لانو هي خايفة لوكان تقول لدارهم عليا يقولوها بلي راكي تحكي معاه وهكذا
المهم انا اصريت على موقفي لانو اذا هي قالت لدارهم بلي بعثلي اختو وهدرت مع اختو وعطيتو رقم تاعكم شغل بالعامية هي وافقت ومدلتكم رقم تستنى في رأيكم فقط (بعني اساسا كون مجباتش متقبلة الفكرة منمدش رقمكم للختو باش يحكي معاكم كون انل رفضت من لول) اما اذا رحت انا درت بطريقتها فخفت باباها فتيلفون يقولي اي تقرا ومزالها صغيرة ويقدر ميشاورهاش فالامر كامل ويسرحني

الحمد لله نيتي هي الحلال معها وهي موافقة على الزواج بعد عام من الان بحيث تكون انهت سنتين من دراستها وبقالها ثلاث سنوات

لكن تبقت المشكلة في كيفية اتمام الأمر وحبيت ندي الاستشارة تاعكم لاني اعتبركم اخوتي وتحبون لي ما تحبون لانفسكم

وثاني لي حبيت نستشيركم فيه: لي هو لنفترض اني تقدمت ووافقو على الخطبة
مسألة زواجي بها نذكرو فلخطبة او بعد الخطبة بأشهر

انا لما استشرت البنت قاتلي الاحسن متذكروش فلخطبة تخلي بعد شهرين او ثلاثة وتقولهم على الامر

ملاحظة: ظروفي المادية مهيئة بالنسبة للزواج

اعطوني رأيكم بكل حيادية ​

 

[الامين محمد]

تمت الموافقة على الموضوع

ننتظر مرور الاخوة
لي عودة ان شاء الله

 

[aljentel]

الله يوفقك ويوفقها
كل الطرق التي فكرت بها سليمه لأن نيتك سليمه وربي يوفقك …
رأيي لا تذكر مسألة الزواج بالخطبة لأنه في البدايه تركز على موافقتهم وكسب رضاهم فلا انصح بالتشرط اثناء الخطبه …

 

[إلياس]

الله يوفقك يا رب العالمين
عليك الاستخارة اخي

 

[الامين محمد]

راح حكي على حساب عقليتنا و تفكيرنا
اذا الطفلة بنت مدينة كبيرة الامر لى حد ما ممكن او على الاقل
حتى ان كن هناك رفض فراح يكون رفض بلا مشاكل على الطفلة

اما ان كانت البنت من قرية صغيرة او بلدية صغيرة مثلنا نحن فرأيي
ان البنت تفاتح امها فقط و تجس نبضها و تقول ليها
لوكان يجي واحد يخطبني من البلاد لي راني نقرا فيها
بناء عى رد الام راح نفكر في اللي بعده
راح اشرح اكثر
البنت تقول لامها لفرض جدلا انه واحد تقدم ليا من المدينة اللي نقرا فيها
واش رايك اذا الام قبلت الفكرة فتصارحها و تقولها تجس نبض الوالد
على اساس فكرة او فرضية اذا الامر جاه عادي يصرحوله بالامر
و اذا رفض يبقى انها فكرة و فقط
لأنه اذا قلناله هناك خاطب و رفض الامر لسبب ما راح يوسوس
و يقول بتي راها تلتقي بشاب و ماهيش تقرا
و ممكن انه يوقفها عن الدراسة او يعمل ليها مشكلة

اذن انا ضد خطبة مباشرة بل مع جس النبض على انها فكرة و فقط
و بعدها اذا جس النبض كان ايجابي نروحو للخطبة

 

[أبو عاتكة]

رانا في حيرة في امر الخطبة انا قتلها نخطبك ونخليك تكملي عام جاي القراية وفي الصيف القادم تاع السنة القادمة نعرسو ويبقاولك ثلاث سنين قراية تكمليهم عندي هي متقبلة الامر ولايوجد مانع انو متزوجة وتقرا لانو اساسا بعد القراية راح تكون تخدم ومتزوجة يعني مكانش فرق بين القراية والعمل تقريبا نفس الضغط هنا مكانش اشكال​

يوجد فرق شاسع أخي بين الدراسة والخدمة
الدراسة والتحضير تستهلك كل الوقت خارج وداخل البيت وراح تلاقو صعوبات خصوصا هي مع واجبات الزوجية والعائلية.
اما العمل فيستهلك وقت العمل المحدد في مكان العمل فقط.
تبانلكم ساهلة بصح في الواقع صعيبة جدا وفيها تأثيرات لاقدر الله.

فخفت باباها فتيلفون يقولي اي تقرا ومزالها صغيرة ويقدر ميشاورهاش فالامر كامل ويسرحني​

٪99 الكلام على الخطبة والزواج في عامها الاول تاع قراية غير وارد لوالديها.
لكن لنبقي الأمل مفتوحا.

الحمد لله نيتي هي الحلال معها وهي موافقة على الزواج بعد عام من الان بحيث تكون انهت سنتين من دراستها وبقالها ثلاث سنوات

لكن تبقت المشكلة في كيفية اتمام الأمر وحبيت ندي الاستشارة تاعكم لاني اعتبركم اخوتي وتحبون لي ما تحبون لانفسكم​

نتمناولك الخير في كل الأحوال.
لكن الأهم أن تدوم نيتك وان تكون حكيما ورزينا في هذه النية وأن تقتنع بأهمية الوضع الأساسي للبنت واللي هو انها ذهبت لولايتك لغرض الدراسة ونيل الشهادة وليس الزواج وهو نفس غرض والديها وخاوتها وربما هو الشغل الشاغل الوحيد بالنسبة لبنتهم في مستهل مشوارها الجامعي.
وأي تصرف خاطئ منكما راح تتشوه النية وينتهي كل شيء. انتبه.

الاخ الامين محمد شار عليك ان تحاول البنت تشوف ردة فعل أمها لأنها مفتاح البداية الصحيحة. وانا معه في هذا.
اذا كان هناك قبول مبدئي بفكرة الخطبة على الاقل فراح تكون خطيت خطوة كبيرة نصف المشوار.

اذا كان هناك اعتراض فعليك التريث ولا تفسد على البنت دراستها وعلى والديها الثقة بوضع بنتهم في الجامعة وتخلق بذرة لمشاكل وشكوك مستقبلية.

وثاني لي حبيت نستشيركم فيه: لي هو لنفترض اني تقدمت ووافقو على الخطبة
مسألة زواجي بها نذكرو فلخطبة او بعد الخطبة بأشهر

انا لما استشرت البنت قاتلي الاحسن متذكروش فلخطبة تخلي بعد شهرين او ثلاثة وتقولهم على الامر​

هذا أول استفسار سيواجهكما من اهلها سواء احترت في ذكر موعد الزواج ام لا تذكره هل تتهيئ انهم يوافقوا على الخطبة فرضا دون ان يشترطوا اكمال دراستها مثلا؟! لازم يستفسروا على وضعيتها الدراسية اللي مزال مشوارها طويل.
تأكد انو اول امر لازم يحسم فيه الجميع خصوصا هم.

فلازم تكون الامور واضحة بالنسبة ليهم.

ربي يعلم الان لانعرف عقلية وتفكير وردة فعل اهلها الا من خلال كما ذكرت استشارة أمها في البداية.

تأكد أن استفسارك حول مسألة الزواج ستجد له جواب من البداية مراحش تخطب وتنصرف هكذا.

ملاحظة: ظروفي المادية مهيئة بالنسبة للزواج

اعطوني رأيكم بكل حيادية ​

لا يعني انك واجد فالاخرون واجدين
في حالة البنت حتى فكرة الخطبة ماهيش واجدة ونهار توجد الفكرة وتلقى القبول ساعتها ممكن يتقبلوا ايضا فكرة الزواج بعد عام او اكثر يبقى الأمر بيد والديها ثم بيدها كاختيار مستقبلي هذا اذا أتيح لها فرصة الاختيار.

الرغبات يجب ان تتجانس مع الحكمة فتشكل حقيقة وواقعا يتشاركه صاحب الرغبة مع الجميع في رضا وأمان.

ربي يسهلك ويسرلك تحقيق نيتك في الزوجة الصالحة والعيشة الهنية.

 

[نبض الحروف]

نظن مارحش يعارضو لانه طالما خلاو الطفلة تقرا في جامعة في ولاية اخرى من ديك تروح وتجي بنتهم تقرا سنوات في ولاية اخرى اذا تزوجت وتسترت يكون احسن في رايي تقوم بمبادرة وتتصل بالعائلة وتقول انك شفت بنتهم وسقسيت عليها وبغيت تتواصل معاهم باها تخطب وتشوف راييهم
تقدر تقول انك رحت للولاية للتعرف وقدرت تجيب النيميرو وتطلب موعد
هم احرار يقبلو ولايرفضو خاصة الطفلة صغيرة والفارق كبير

 

[ام أمينة]

السلام عليكم
بما انك نويت الحلال فربي يسهللكم و ييسر لكم هذا الامر
من رأيي تكلم مع اهلك في الموضوع و بعدها اقصد اهل البنت و اخطبها رسميا و مع مرور الوقت يبان الا تقدرو تديرو العرس او يؤجل
و زيد اتحاور مع البنت الا تقدر توفق بين مسؤولية الزواج و الدراسة هذه اهم نقطة لانها الا ركزت غير فالزواج تهمل دراستها و العكس
مشكور لطرحك مشكلتك
توكل على الله و الله ييسرلكم و يجمعكم فالحلال و لا تنسو الاستعانة بصلاة الاستخارة في مثل هذه الامور

 

[فاتن سيلين]

السلام عليكم ورحمة الله وبركاته
الله يسهلك خويا شوف قصة اختي مشابهة لقصتكم بلاك تستفاد منها بصح اختي لا هدرت معاه لا تعارفو لاننا ضد هذا التعارف قبل الزواج ..اختي كانت تقرا مدسين سنة اولى في مدينة اخرى وهذا زميلها يقرا معاها ومن ولاية اخرى عجباتو ونواها للحلال بلا ما يهدرو ولا يتعارفو هو مرة جا حب يطلب منها عنوان دارنا مازال ما هدرش اختي خلاتو وراحت ماللا بدا رحلة البحث عن معلوماتها عام كامل وهو يحوس حتى عرف وين تسكن وجاب العنوان لانه هو عارف لقبها والمدينة تاعها في عامهم الثاني مباشرة جاب ابوه وجا للمدينة تاعنا وصلو للدار حكى لابي القصة ابي رفض اول الامر من عاداتنا ما نتزوجو خارج مدينتنا ما نجيبو من خارج مدن اخرى ضيفو ابي بالطبع وفهمو في عادتنا انه يحب بنالتو قراب ليه وعلى عينو وتاني قالو المدسين صعيب تركز على قرايتها افضل راح وفي العام الثالث رجع وشوف المكتوب اختي خطبوها بزاف من العائلة وكانت الخطبة ما تمش سبحان الله مكتوبها زميلها هذاك كرجع ابي غير رايو قالو مدلي شهر ولا زوج نسقسو عليك لانه هو من مدينة بعيدة هو حسب ابي يليكيدي فيه بصح ابي سافر عدة مرات لمدينته وسقسا على اصله وفصله وعائلته وكلش وقبل يديرو رؤية شرعية اختي من لول قالت الي يعجب ابي انا يعجبني ودارو رؤية تم القبول ودارو فاتحة وفي عامهم الرابع تزوجو وضرك راهم يخدمو في عيادتهم وعندهم زوج اطفال ومتهنيين الله يبارك

اسمحلي طولت بصح بغيت تستفاد من القصة المشابهة .
ضرك نجو لقصتك اولا اخي لو حاب ربي يبارك ليك في زواجك بعدو على الكذب تاع شفتها اختك وو وانتم في الاصل تحكو مع بعض كل الي نعرفهم تزوجو بالكذب شافتني اخته شافتني امه والله ماهانيين فابدا حياتك بالصدق فعلا جيب اختك وروح للجامعة تهدر معاها بش هكذا ما يسماش كذبتم على والديها مساكن وحبس التواصل معاها بش ربي يبارك ليكم وخلي كديرو الفاتحة وتولي حلالك كملو التواصل
الحاجة الثانية كاختك تروح ليها تمد ليها عنوانها مباشرة انت روح اقصد باب الدار ماتقولش كون ما يقبلوش وو انت دير النية واقصد الرجال احكي معاهم قال بنتكم عجبتني بعثت اختي جابت العنوان وفعلا ابعث اختك هاو ليكم عنواني ارواحو سقسو عليا ووو وباقي الامور ساهلة نتا ما تخممش في امر الزواج الساع حتى تخمم كيفاش تروح لوالديها وتخطبها وبعد كلش سهل..وقبل ذلكدير الاستخارة ما تقولش عارفها وحكينا وعقليتها تعجبني ومتوافقين لا استخير مرة زوج ثلاثة وهي تانيك تستخير اذا ارتحتو كمل الخطوات واذا مارتحتوش راح فيها خير ليكم انتم ماتعرفوشو
والله يسهل الي فيه الخير ليكم في دينكم ودنياكم