الأنوثة خصها الاسم برك

[لاجودان شاف]

السلام عليكم ورحمة الله وبركاته

​

أهلا بكل رواد منتدى وش راك تهدر​

وندخل مباشرة في الموضوع​

البارحة وحنا قاعدين في جنازة ...مجمع تاع رجالة قاعدين في قاراج​

واذا بالدار لي مقابلتنا يتحل الباب وتخرج منها بنت كبيرة ​

وبدات تعيط​

آصوفيااااااااااااااااا .....عيطي لميليساااااااااااااااااااااا​

كي سمعتها دخت وعييت نفهم وش راهو صاري في الجزاير​

تغمض عينيك وتسمع تحس روحك في القصر تاع زعما حريم السلطان هذاك​

وعلاه ديرو هك يا أهل الجزائر ​

قلو الأسامي حتى تسميو صوفيا وميليسا وتيريزا وقاريرو .....​

سمي جملية ...سعيدة .....فتيحة .....نعيمة ....ساندريلا​

المهم اي سم محلي تاع بلادنا​

يعني جات غير في الأسماء ​

صعب جدا اسمك صوفيا وميليسا ونتي تشرب الحليب تاع 2500 تاع الشكارة​

صعب جدا اسمك صوفيا وميليلسا وساكن في F في طلعة في كدية ​

اسمك صوفيا وميليسا وتاكلي فلاش ......وين صرات​

اسمك صوفيا ومليليسا وتسخفي لى الكريPوني ....يعني علاه ​

اسمك صوفيا وميليسا والصباح تاكلي برمة طياب وفي الليل مقلة زيت ولي هونش ​

قدالسودان​

اسمك صوفيا وميليسا وماعندكش ليزينيتي .....علاه يعني ​

رانا عايشين في الجزاير خليونا في سعيدة وبهية وسوسن ونوارة​

.وشكرا​

 

[السلطانة]

رد: الأنوثة خصها الاسم برك

وعليكم السلام

هههه فكرتني في وحدة فامي تاعنا مسمية بناتها :هيفاء ،ايهاب،نور

وهوما في حالة ربي

اسماء مغنيين !!

راني نشوف في اسم ميليسا هاذا شاع بزاف

ناس جاهلة ويتخلعو من واش يتفرجو ولا يسمعو

ميروحوش يحوسو على معنى الاسم هل يجوز التسمية بيه اولا يسميو برك

وحدة تاني سماوها إرَم
وينطقوه إيراااااااام شغل حسبوه تركي !! ولاتقول جامي قراو القرآن

شكرا

 

[نجيب]

رد: الأنوثة خصها الاسم برك

و الله يا خويا راني نقرا فالموضوع و نضحك

زمان كانوا يسمو كريمة ربي كان يكرمهم

اليوم راهم يسموا فاتي هههه نتا الواي واي

الله يجيب الخير خويا و الله بزاااف صوالح رانا ندفعوا الثمن نتاعهم بسبب أفكارنا

و نزيد نقولك زمان كانو يتفرجوا مسلسلات مصرية عايزة شقة لي وحدي

كي تروح تخطب تقولك الشرط نتاعنا بنتنا تسكن وحدها

اليوم راهم يتفرجوا العشق الممنوع و كي تفتح جريدة الشروق فالصباح تقرا لعجب يا خويا

ربي يهدينا و يجعلنا في طريق المستقيم​

 

[الباندي]

رد: الأنوثة خصها الاسم برك

تـاكل في العدس باسكو فيه الحديد وهيا اسمها .ميليسا ..!! مركبتليش في مخي علابلك

 

[نجيب]

رد: الأنوثة خصها الاسم برك

تـاكل في العدس باسكو فيه الحديد وهيا اسمها .ميليسا ..!! مركبتليش في مخي علابلك

علاش يا لباندي راني نضحك بالدموع ان شاء الله برك ميزعفوش منا بنتات اللمة

الى كان بينهم اسم ميليسا هههه:bravo01::bravo01:​

 

[Perle Blanche]

رد: الأنوثة خصها الاسم برك

السلام عليكم
الصلاة و السلام عليك حبيبي يا رسول الله
يعني صح الاخ الكريم راك ذكرت حاجة كاينة بزاف و شايعة
الطفل و لا الطفلة ميخيرش اسموو و لا كبر و هو مهند فالدزاير معندو ما يدير مي تاني متنساش بلي هاذ الطفلة و لا الطفل مش غير امو لي تسميه راه الاب مشترك معاهاا يعني
لي تلقاه مسمي ابنو و لا بنتو هاذ الاسامي راهم كيف كيف و راهي غالبة بزاف مش نقص وعي راهي تقليد حتى عند الطبقة المثقفة
​

 

[houssiiine]

رد: الأنوثة خصها الاسم برك

هههههههههههه الله يهدينا

 

[حكاية قمر]

رد: الأنوثة خصها الاسم برك

نقراالموضوع وضحك داير فيا حالة
شا نقولك خويا هدا بحال جيل مسلسلات التركية والأغاني الشرقيةذراحت أسماء تاع الصح وراح معاها الصحاح
شكرا ع الطرح

 

[*Prinçesse*]

رد: الأنوثة خصها الاسم برك

السلام عليكم

يا خويا ماجاتش فالاسماء برك

البروبلام كيفاش تعيط والرجال مقابلينها و في جنازة تاني عيب والله عيب

استري روحك وش هذا

اما الاسماء حنا احفاد خالاتي و اخوالي ههه واحد اسمو جاد و واحد اياد وحدة جوري وحدة ماريسال هههههه


والله مافهمت يسميو برك على الاقل يسميو واحد ولا وحدة برك من البركة نتاع بكري ولا اسم من اسماء النبي ولا زوجاته ولا بناته

بزاف البلاد مانعرف وين راهي رايحة

ربي يستر و فرات​

 

[poli]

رد: الأنوثة خصها الاسم برك

بالنسبة ليا والله حاجة عادية الاسم ماعندو ما راحلو في الحياة المعيشية اللي رانا عايشينها زعما صح لازم وحدة يكون اسمها مليح = تعيش مليح و تكون مدللة وووو لالا اهم حاجة ان يكون لعبد مش متكبر بويسك يسكن في الكدية ولا بال v مش متعلقة باسمه
و ملاحظة برك اسمحلي فيها خويا : هذه مش حاجة باش تحير و تضحك عليها انك تعكي على واحد يشرب حليب تاع 2500 ولا تاع 7000 ماذا بينا مانبقاوش نشوفوا الحياة ماديات
و اذا المشكل في الاسم من الاحسن انه يكون اسم عربي هذه عندك حق فيها الباقي راك غالط​

 

[بنت الـ25]

رد: الأنوثة خصها الاسم برك

هدا هو الشي اللي محيرني في بلاد الديزاد
واحد جارنا سمى بنتو جوري آسينات وجارتنا لوخرا سمات ابنها رستم (باشا)
كي شغل قلو الأسماوات كيما يقولو ، وين راهم أسماء الصحابيات رضي الله عنهن جميعا
وين راهم أسماء الصحابة
دوكا تسمي أنيس، رفيق، وسيم، بلا الأماء المركبة اللي ما عغندها حتى معنى
والطفل ما يجي يتعلم يكتب اسمو بالكامل حتى يلحق السنة الخامسة ابتدائي
بدع بدع بدع هلكتنا أيها الشعب الجزايري فيق يرحم الوالدين
​

 

[آمِيْرَتُه]

رد: الأنوثة خصها الاسم برك

السلام عليك
عندك حق خويا نبيل
أنا شفت وحد الاسامي مواليها الله لا شوفك فيهم حالة كارثة
يعطيك الصحة

 

[red rose]

رد: الأنوثة خصها الاسم برك

المشكل مش هنا كيما قالت برانساس
المشكل تخرج و طعيط علاها قدام رجال خخخخ
الله يهديهم​

 

[جليلوس]

رد: الأنوثة خصها الاسم برك

السلام عليكم
شكرا لك على الموضوع الحساس بارك الله فيك
الكـــــــــــلّ مسؤول بدونـ إستثنــــــــــآء ...
حدثوني مرة قالوا ان امرأة عندما كآنت تضع مولودتهآ
أسمتها هنوف ...؟؟؟؟؟؟
مدخلتش رآسي ...
خآصة أن ذيكـ المرأة من شدة الفقر والميزيرية الي ظآهرة على عينيهآ
تقول منين طآحت بهذآ الــإسم ... لا حول ولا قوة الا بالله
​

 

[لاجودان شاف]

رد: الأنوثة خصها الاسم برك

هيفاء هيه .....وتخرج تلبس 54 في رجلها
راك فاهم ​

وعليكم السلام

هههه فكرتني في وحدة فامي تاعنا مسمية بناتها :هيفاء ،ايهاب،نور

وهوما في حالة ربي

اسماء مغنيين !!

راني نشوف في اسم ميليسا هاذا شاع بزاف

ناس جاهلة ويتخلعو من واش يتفرجو ولا يسمعو

ميروحوش يحوسو على معنى الاسم هل يجوز التسمية بيه اولا يسميو برك

وحدة تاني سماوها إرَم
وينطقوه إيراااااااام شغل حسبوه تركي !! ولاتقول جامي قراو القرآن

شكرا

 

[لاجودان شاف]

رد: الأنوثة خصها الاسم برك

اللهم آميــــــــــــــــــــــن ​

و الله يا خويا راني نقرا فالموضوع و نضحك

زمان كانوا يسمو كريمة ربي كان يكرمهم

اليوم راهم يسموا فاتي هههه نتا الواي واي

الله يجيب الخير خويا و الله بزاااف صوالح رانا ندفعوا الثمن نتاعهم بسبب أفكارنا

و نزيد نقولك زمان كانو يتفرجوا مسلسلات مصرية عايزة شقة لي وحدي

كي تروح تخطب تقولك الشرط نتاعنا بنتنا تسكن وحدها

اليوم راهم يتفرجوا العشق الممنوع و كي تفتح جريدة الشروق فالصباح تقرا لعجب يا خويا

ربي يهدينا و يجعلنا في طريق المستقيم​

 

[@@iLYaSso Madrid@@]

رد: الأنوثة خصها الاسم برك

اسمها ميليسا وهيا تشبه لهواري منار :d:d

 

[maryama louma]

رد: الأنوثة خصها الاسم برك

بدون تعليق

 

[*زهراء*]

رد: الأنوثة خصها الاسم برك

السلام عليكم

والله غير عندك الحق

والشيء هذا كله من المسلسلات لي خربت عقولهم

ويحبوا يتشبهوا بالأوروبيين الكفار

الله يهدي من خلق

شكرا

 

[ماكانش]

رد: الأنوثة خصها الاسم برك

نقول بوليد برك واش كان راح يسمي المخلوقة هههه ...