منتدى واش راك تهدر.نتكلمو بلهجتنا الجزائرية ..عاجل

[*amina*]

السلام عليكم
واش راكم يا خاوتي لاباس
صحا رمضانكم
اليوم طرطقت حبيت نقول كلام
نورمالمو يا خاوتي هذا القسم نتكلمو فيه بلهجتنا الجزائرية و امورنا الاجتماعية
لكن للاسف كاين بعض الاعضاء ينقلو مواضيع من منتديات اخرى اكثرها خليجية و ميغيروش فيها يخلوها باللغة لي لقاوها بيها هي في الحقيقة نفهموها لكن على الاقل نراعو لهجتنا ونراعو قانون نتاع هذا القسم
حبيت تعرف راي الاعضاء في موضوع جبتو من منتدى آخر؟؟؟
حبيت تفيد الاعضاء بموضوع نقلتو؟؟؟؟؟
على الاقل غيرو شوية وخليه يكون بلهجتنا حتى نحسو بلي هدا راه منتدى جزائري محض و نحسو بلهجتنا
ومنحسوش بلي المنتدى راه كوبي كولي
مناش نقولو غيرو الفكرة كامل رانا نقولو غيرو في اللهجة
يعني انت كي راك تنقل موضوع وتخليه باللهجة الخليجية او لهجة اخرى راك تبين بلي راك نقلت الموضوع
انا شحال من مرة نلقى موضوع في منتدى اخر لكن كي نجي نحطو في منتدى اللمة مراحش نحطو الا اذا غيرت في اللهجة و غيرت في المضمون شوية حتى نحسو رواحنا بلي رانا عايلة واحدة ونتناقشو بلهجتنا
انا مرانيش نستهجن في نقل المواضيع لكن على الاقل يا خاوتي خلوها لهجة جزائرية
صحا فطوركم
نتمنى وصلتكم فكرتي​

 

[لينة]

صح كاين ياسر اللي يعرفوا الكوبي كولي برك
و مشكورة على الموضوع
و ان شاء الله توصل فكرتك للجميع

 

[pRiAnCa*mCeE]

صحيتي اختي نينا عندك الحق في واش قلتي...لكن اذا كان موضوع بالفصحة نردوه بلهجتنا ثاني؟

 

[لينة]

و صح فطورك

 

[Moha le sage]

يعطيك الصحة ونا نقلك حاجة جني وجن نلقى كلمة :ابي اشوف ولا تسلمو ولا عايزة ولا فيني ...

حاطين روحهم وصلو يجيبولنا في تاوع الشرقي .. ديجا منكملش حتى الموضوع و نعتبر اللي دارتو مخلوعة و لاعبتها وهي زيرووات


مرسي على موضوعك .. كنت حاب نهدر كثر بصح رمضان رمضان نسكت خير

 

[salah.f]

و الله عندك الحق ختي فكل كلمة قلتيها شكرا على الموضوع

 

[*amina*]

صح كاين ياسر اللي يعرفوا الكوبي كولي برك
و مشكورة على الموضوع
و ان شاء الله توصل فكرتك للجميع

و صح فطورك

يا ختي لينا معليش كوبي كولي كامل المنتديات راهم هاك مي المشكل يا حوجي على الاقل غيرو شوية شاو هذا حطو اللهجة جزائرية هاو تنساو لهجتكم و تروحو للهجات وحدخرين؟؟
ميرسي ختي لينا صحا فطورك انت تاني

 

[*amina*]

صحيتي اختي نينا عندك الحق في واش قلتي...لكن اذا كان موضوع بالفصحة نردوه بلهجتنا ثاني؟

يعطيك الصحة ختى ايه لازم نخلو لهجتنا الجزائرية ماشية
صحا فطورك حبيبتي

 

[*amina*]

يعطيك الصحة ونا نقلك حاجة جني وجن نلقى كلمة :ابي اشوف ولا تسلمو ولا عايزة ولا فيني ...

حاطين روحهم وصلو يجيبولنا في تاوع الشرقي .. ديجا منكملش حتى الموضوع و نعتبر اللي دارتو مخلوعة و لاعبتها وهي زيرووات


مرسي على موضوعك .. كنت حاب نهدر كثر بصح رمضان رمضان نسكت خير

والله يا خويا محمد اسكت برك سيرتو كلمة ابي نكرها و نكره لي نطق بيها
منحبهاش خلاص ولا كلمة وايد
عندك الحق تسكت كون تجي تهدر تعطش
صحا فطورك

 

[*amina*]

و الله عندك الحق ختي فكل كلمة قلتيها شكرا على الموضوع

يعطيك الصحة اخي صالح على المرور لا شكر على واجب

 

[pRiAnCa*mCeE]

يعطيك الصحة ختى ايه لازم نخلو لهجتنا الجزائرية ماشية
صحا فطورك حبيبتي

اوكى من الان نحط بلهجتنا

 

[كلي امال]

السلام عليكم
نقولك الصح انا بديت نكره المنتدى من هاد الحوايج
حاكمينها غير كوبي كولي و لازمك توصلي للصفحة 5 و لا 6 باه تلقاي موضوع مليح و ممكن تستفادي منو
و الله كانوا عندي افكار باه نديرهم مواضيع ماقدرتش علابالي يروحوا بلا مايشوفوهم الاعضاء اللي حابين النقاش و لا الاستفادة
و الله كرهونا
ميرسي على الموضوع و صحا فطورك

 

[ayoub_online]

هاذو صحاب كوبي كولي فنيانين مايشتيوش يكتبو بالكلافي

لازملهم برنامج يترجم من أي لهجة عربية إلى اللهجة تاعنا

يا صحاب كوبي كولي ضك نخدملكم هذا البروقرام و نهنيكم

و مرسي على النصيحة

و صح فطوركم​

 

[maya31]

هاديك هيا نينا يعطيك صحة حبيبتي

مزيا الي هدرتي

و الله هاد اليامات راني نشوف بلي مشي غير اللهجة الخليجية


موضوع يكون في قسم كذا يجيبوه في قسم واش راك تهدر

و الله غير حاجة تحير
تقول الاقسام الاخرى راهي غير مرئية


و سي فري هادي نتع لهجات لخرين كان غير يعاودو يكتبوه باللهجة نتاعنا




صحيتي حبيبتي و صحا فطوورك

فووووور كالعادة
​

 

[beautiful smile]

سللام
ايه صح عندك الحق لازم الدارجة ديالنا و خاصة في هادا القسم
بارك الله فيك​

 

[حفيد هواري بومدين]

بربي نتصداولهم وشما لقيتو نبهوني
لأني ماعنديش غير المنتدى برك
نبهوني شما تلقاو

​

 

[*amina*]

ي عودة باذن الله للرد على ردودكم

 

[Moha le sage]

هاذو صحاب كوبي كولي فنيانين مايشتيوش يكتبو بالكلافي

لازملهم برنامج يترجم من أي لهجة عربية إلى اللهجة تاعنا

يا صحاب كوبي كولي ضك نخدملكم هذا البروقرام و نهنيكم

و مرسي على النصيحة

و صح فطوركم​

والله يعطيك الصحة خويا ايوب ...لازم traducteur كيما systran ولا babylon و يكون يترجم اللهجات سعودي دزيري ... مصري دزيري ... وراك تعرف

التفنيين وزيدها المشكل انها باللهجة الخليجية حتى ما بالعربية الفصحى

كاين مثل بالعربية الفصحى يقول :


أحشفا وسوء كيلة .... يعني التمر العيان و وزيد مش موزون مليح ..

يتقال اللي يجمل زوج خصلات ماشي ملاح كيما نقل المواضيع وزيدها بالخليجية


مرسي ليك و لنينا ..

 

[Moha le sage]

السلام عليكم
نقولك الصح انا بديت نكره المنتدى من هاد الحوايج
حاكمينها غير كوبي كولي و لازمك توصلي للصفحة 5 و لا 6 باه تلقاي موضوع مليح و ممكن تستفادي منو
و الله كانوا عندي افكار باه نديرهم مواضيع ماقدرتش علابالي يروحوا بلا مايشوفوهم الاعضاء اللي حابين النقاش و لا الاستفادة
و الله كرهونا
ميرسي على الموضوع و صحا فطورك

السلام عليكم امال


اذا نتي ماطرحتيش ونزيد انا منطرحش ويزيد اي واحد عندو فكرة تاع نقاش مليحة ما يطرحش وكاينن بزاف كيما كمال ولا عبيدو ولا الباتروس ولا مخطار ..والجماعة لخرين ... واش معناها ؟

يسمى هكذاك راح نخليو القسم مليان غير ب اشلونش و فينكم يا صبايا ...


بالعكس اطرحي مواضيعك وراح تلقاي ان شاء الله الناس لي تناقش واللي يخرج على الموضوع كاين خونا عبدو يحبسو عند حدو ...

ولا راني غالط ؟

 

[killua0555]

عندك الحق ختيتو حتى انا نتخلع نحس روحى رحلونى للمنتدى خليجى و لا انا رانى فى خليج ههههه

و تانى هاديك اللغة جينى شوية صعيبة و كيما علابالك مترجميين دوكا غلاو مع الخضرة رانى نعانى هههههه