°°هيلدا ومعاك يالخضراء في أكبر عمل تترجمه يوميات أعضاء اللمة،، بقلمكم،، شاركونا°°

الحالة
مغلق ولا يسمح بالمزيد من الردود.
اليوم نهاري كامل في الكوزينة من دارنا لدار خالتي منين نظت وانا غير مع العسل والشيكولا واللوز والنيسلي وحوايج القاطو كامل
خدمت مع بنت خالتي ثلاث انواع كل نوع 250 حبة
هاذا وين روحت للدار
فتحت من قبيل عند خالتي جوايه 5 ولا 4 بعثت رسالة لام ندي باع تعيني غوسات
وكان الكونكسيون عندها ثقيلة تقتل
ديقوتيت وقفلت
المهم رايحة نطيح من التعب
غدوا نحكيلكم
نحبكم
​
 
السلام عليكم
انا اليوم مريضة في حالة ،عيطتلي حبوبتي هبة الصباح مت بالفرحة توحشتها بزاااااااااااااااااااااااااااااااااااااااااف
من الصباح داخلة خارجة للمة ههههههه نبان هبلت ،نرقد شوية ونجي نجري نطل عاللمة
وعادل كل دقيقة يعيط ،وكي يلقا الموبيل مشغول يبعث ميساج مع وييييييييييييييييينك اسندس هههه
حكيت مع عايشة وبعثتلها صورتي شوكاتني قالتلي تباني سورية هههههههههه فرحتيني ياشوشو ختي ، حتى انتي ربي يبارك تهبّلي ماشا الله عليكي
بعدها حكيت مع حبوبتي عفاف وللأسف صوتي وصلها وصوتها لم يصلني ههههههه
مبعد حكيت مع نور ونحبك يا الجزاير
وطاطا اسراء وعدتني تبعثلي واحد الحاجة راني نستنى
وتفاهمنا نديرو واحد الطبق الحمد لله ماتحرقش ههههههههههه
اني غدوا ان شا الله نحطو في مطبخ اللمة
حقا نسيت نقولكم راني سجلت فواحد الموقع مافهمت فيه والو هههههههه مزية لقيتكم كامل فيه هههههههه​
 
راني عضوة جديدة و بغيت نقولكم كامل انشاء الله يكونوا ايامكم لي جايين خير من اللي راحوا
 
خصك تعرف الرجال خويا لعزيز

باين بلي ما خالطش الرجال

الله غالب خاطينا خدمة الشيرات

قالي فيهم عفسة : يخدموا خدمة النساء


​
 
قال sandoussa3000:
السلام عليكم

انا اليوم مريضة في حالة ،عيطتلي حبوبتي هبة الصباح مت بالفرحة توحشتها بزاااااااااااااااااااااااااااااااااااااااااف
من الصباح داخلة خارجة للمة ههههههه نبان هبلت ،نرقد شوية ونجي نجري نطل عاللمة
وعادل كل دقيقة يعيط ،وكي يلقا الموبيل مشغول يبعث ميساج مع وييييييييييييييييينك اسندس هههه
حكيت مع عايشة وبعثتلها صورتي شوكاتني قالتلي تباني سورية هههههههههه فرحتيني ياشوشو ختي ، حتى انتي ربي يبارك تهبّلي ماشا الله عليكي
بعدها حكيت مع حبوبتي عفاف وللأسف صوتي وصلها وصوتها لم يصلني ههههههه
مبعد حكيت مع نور ونحبك يا الجزاير
وطاطا اسراء وعدتني تبعثلي واحد الحاجة راني نستنى
وتفاهمنا نديرو واحد الطبق الحمد لله ماتحرقش ههههههههههه
اني غدوا ان شا الله نحطو في مطبخ اللمة

حقا نسيت نقولكم راني سجلت فواحد الموقع مافهمت فيه والو هههههههه مزية لقيتكم كامل فيه هههههههه​
إضغط للتوسيع...

وأخيييييييييييييييييرا بان علينا القمر..:heh:
والله توحشتك بزاااااااااااااااااااااااااااف سندوستي
ماتعرفيش شحال فرحت كي حكيت معاك و سمعت صوتك
والله يا عمري نتي تاني صوتك يجننننن..:yahoo:
علابالك انا نحكي معاك وندعي باه مايطفاش بورطابلي..حتى هو راه مجنون كيما موبايلك...مي هاذي المرة كي سمع صوتك مابغاش يطفى..:shay:
قوليلي حنونتي..واش راكي..؟؟ و توحشتيني ولا لا..؟؟..:blush:​
 
اهلا غاليتي نحبك يا الجزاير توحشتك حبوبتي كيفاه مانتوحشكش هدا؟؟؟؟؟
ربي يحفظك والله ماتتخيلي قماه نفرح كي نحكي معاكم:yahoo::yahoo::yahoo::yahoo:
موبيلي وحدو وحدو ههههههه ياو ستر ربي سمعتك
دي فوا نحكي هواوي كي نحشم نقول اني ماسمعتش ههههههههه
ربي يحفظك غاليتي
وان شا الله تفرحيني بنجاحك
ربي ينجحكم كامل يارب
 
آخر تعديل:
الحمد لله رانا رجعنا و فاليومين اللي فاتو تفرجت فيلم قريب يدخلني في بعضايا اسمو Clash Of The Titans 2010 كي كملتو بقيت بلاعقل
هههههههههههههههه
و اليوم لعشية رحت للبراج كاشما نصيد وليت راح نتصيد:scared::scared: مايبانش حوت تبان عليه روكان و لابالين هههههههههه:fish::fish::fish: روحت للدار قريت شوي ومبعد كلاني قلبي قلت ندخل للمة لقيتها فارغة تصفر غير الكيلوات يدورو كاشما يصيدو:no_1::no_1: كيناى هوما زدت سمعت بلي عادل راح من اللمة و الله ما فهمت فيها والو
و هدا وين جاتني رسالة من عند مولات الطاجين تسقسي فيها على مول الباش و مولاتو أنا نقولها والله رانا في رحمة ربي و شكرا على السؤال و ضرك راح نشوف فيلم dear jhon و نرقد
نخليلكم أسمراني أتهالالي فيه يا الروج:yahoo::yahoo:
​
 
قال sandoussa3000:
اهلا غاليتي نحبك يا الجزاير توحشتك حبوبتي كيفاه مانتوحشكش هدا؟؟؟؟؟
ربي يحفظك والله ماتتخيلي قماه نفرح كي نحكي معاكم:yahoo::yahoo::yahoo::yahoo:
موبيلي وحدو وحدو ههههههه ياو ستر ربي سمعتك
دي فوا نحكي هواوي كي نحشم نقول اني ماسمعتش ههههههههه
ربي يحفظك غاليتي
وان شا الله تفرحيني بنجاحك
ربي ينجحكم كامل يارب
إضغط للتوسيع...

ربي يخليك ليا يا حبيبة قلبي..:heh:
والله قلبك بيض و حنينة بزااااااااف و تستاهلي كل خير..وهاذي مش مجاملة بالعكس حقيقة يعرفوها الناس كامل هنا..:blush:
ربي يحفظك و يعطيك ما تتمني..آميييين يا ربي
نتمنى من ربي يدوم المحبة بيناتنا قاع....قاع البنات الزينات اللي عرفتهم هنا
وان شاء الله ماتنساوش اختكم * نحبك يا الجزائر *
نحبكم و نعزكم كااااااااااااامل كيما راكم..:ax_flw::ax_flw::ax_flw:​
 
يااااااااااااااااااااااا جماعة من فضلكم الموضوع ليش للدردشة
راني وعدت المشرف و حضاراتكم راح تخليوني مش قد كلمتي و لا كفاه :sneaky2::sneaky2::sneaky2::sneaky2:​
 
موضوع روعة تسلمو
انا السيوم نضت على 9:00 شربت الحليب و عملت دورات في الدار و طيبنا المطابيق
و فطرنا و غسلت الماعين و دخلت للمة و لقيت هادا الموضوع اللي يهبل و كتبت كل شي على يومي​
 
نغسل سحن و مغرف و نجي نقلكم وش دارت اسرا :yahoo::yahoo://**


*********
راني جيت
سلام قولا من رب رحيم
اولا البارح رقدت على صوت عندي 7 اشهر ما سمعتوش
و ضحكة كانت وحشاني و الحمدلله تاكدت من حاجة :closedeyes:

اليوم على 6 تاع الصباح كملت كتابي 2 و النهاية كي العادة سعيدة :closedeyes::closedeyes: حتى كي جاتني صدمة في روحي و اتكادت اني نحكم سابعي خير ما نموت بقلبي :no_1:

لبست حوايجي رحت عقبت الكونترول :closedeyes: ساعة غير ربع خرحت عيطت لالة اسراء لقيتتها مازال راقدة :scared:
رحت للسيبار و سنيتها :no_1:
تلاقينا واحد النص ساعة منشرنا 3 ايام :scared:من اكبر راس فاللمة الى العضو الي مازال ابيض :music_whistling:
و مبعد راحت تقرا و ان قعدت فقسم اللغات :glare::glare:
خلصت الكونترول 2 و عيطتلي تلاقينا
رحت عند بابا سلمتلو على راسو باه عطاني 50 دج:no_1::no_1:
رحت عاودت التصاور و زدت جيت مونغو :crying_1:
ما علينا رحنا للسيبار لالة ظهرتلها تعتمد المواضيع :yaw:
وثم لقينا واحد الحاجة و لقينا رواحنا في زوج نعرفوها ماكالاه نسميها هههههههههه
و كي جينا مروحين قالي الراجل في الطريق ربي يزوجك و هيا ما قللهاش :like_1:
كلينا شوي حوايج و روحنا و على فكرة يا سرسور بابا دخل قبلي للدار :scared::scared:
و راني تعبااانة اوي و الخبر الغير سار انو دالتي فالماعن اليوم :crying_1:​
 
آخر تعديل:
هاني جيت،،

اليوم انا نغسل في لماعن مع صباح ربي،، منعرف منين تحطو:sneaky2::sneaky2:

عيطتلي ريوم :glare::glare: زهقت في وجهي وقاتلي ويـــــــــــن راكي،، منقبيل ونا نستنا،،:no_1:

زربت لبست،، وقعدت نندب علا التريسيتي مكانش ( جارنا زاد عندو طفل ضرب البارود،، جاب خيوط التريسيتي في الارض)):busted_red::busted_red:

وليت قردة مكانش التريسي منقدرش نحدد القش :sneaky2::sneaky2:

المهم وصلتها،، قلتلها لازم نضرب دورة للمة توحشتها لليلة كامل ونا بلا بيها:tears:

هيا درنا نص ساعة،، خرجنا جينا طالعين،، لقينا طلابة تجي قدي في العمر،،قاعدة تطلب،:glare:، قلتلها اشومي تطلبي ونتي لابسة خير مني:huh::huh:،، والله لابسة عباية باهية علا تاعي:sneaky2: مالا بهدلتني بالسبان وقاتلي العما يعميك،:cra_zy:، ونا فمي خاطيني ورديتلها التبهديل:like_1::like_1::glare:

المهم شراتلي ريمة قاطو ومعجبناش:heh: وقاتلي ضرك نرجع نقولو ردلي صواردي:surrender::surrender:

ايا رحت نقرا وخليتها راحت تهوم:rolleyes::rolleyes:،، وعلا 2 عاودنا تلاقينا ولقيتها تشكي بالربا ونا شفت بعيني السوجي ولقيتو ساهل:glare:

هبطنا،، رحنا عند باباها عطاها 50 دج هههه،:yaw::yaw:، ورحنا للصوار صورت،،:tongue_3: وطريق كامل وهي تندب علاخاطر جات مونغو ومعجبوهاش التصاور،،:tongue_3:

ايا حوسنا علا لونتي صولاي ملقيناش لامارك للي حبيتها،:crying_1::blink::blink:، ولينا مشينا نروحو وفي الطريق شرينا لاكرام وتفارقنا،،:lolo:

وصلت عند الخياط لقيتو مزال يكركر كالعادة وكل يوم يقولي غدوا،، ( حالة لبلاد الله غالب)):sadwalk::sadwalk:

روحت للدار ميتة بالتعب :sadwalk:،، دخلت طرشتني الكوزينة نبان خليت هيشر ورايا مايش عباد،:sneaky2::sneaky2:، تحطيت فيها هذا وين كملتها،،:yahoo::yahoo: وراني معاكم قاتلني التعب:closedeyes:
​
 
​

هيا درنا نص ساعة،، خرجنا جينا طالعين،، لقينا طلابة تجي قدي في العمر،،قاعدة تطلب،:glare:، قلتلها اشومي تطلبي ونتي لابسة خير مني:huh::huh:،، والله لابسة عباية باهية علا تاعي:sneaky2: مالا بهدلتني بالسبان وقاتلي العما يعميك،:cra_zy:، ونا فمي خاطيني ورديتلها التبهديل:like_1::like_1::glare:

ياخي قاتلك هاكي نعطيهالك :like_1::like_1:​

المهم شراتلي ريمة قاطو ومعجبناش:heh: وقاتلي ضرك نرجع نقولو ردلي صواردي:surrender::surrender:

وخذني :tears: هههههه ​

ايا رحت نقرا وخليتها راحت تهوم:rolleyes::rolleyes:،، وعلا 2 عاودنا تلاقينا ولقيتها تشكي بالربا ونا شفت بعيني السوجي ولقيتو ساهل:glare:

والله ماهم كيف كيف يا اسرا :tears::tears:
ديما لغروب الي نكون فيه يسخطونا بسوجي ما يشبه لوالو :no_1::no_1:
​

هبطنا،، رحنا عند باباها عطاها 50 دج هههه،:yaw::yaw:، ورحنا للصوار صورت،،:tongue_3: وطريق كامل وهي تندب علاخاطر جات مونغو ومعجبوهاش التصاور،،:tongue_3:

:no_1::no_1::no_1: ما تفكرينيش لا نخبط راسي فالحيط :no_1::no_1:​

ايا حوسنا علا لونتي صولاي ملقيناش لامارك للي حبيتها،:crying_1::blink::blink:، ولينا مشينا نروحو وفي الطريق شرينا لاكرام وتفارقنا،،:lolo:

اه يا لوكان نلقا عمو باباك و نقولو وش درتي اه :heh:​

​
 
اليوم ملي نضت ونا مع الدار
مبعد تغديت و حكمت لبلاصة هنا خليت ماما خرجت

و حكمت الفايس بوك يا جدكم و ما طلقتوش لذك
لقيت عادل و اسرا و ندوووووش و سايكو و نسيم و..... الخ
حكمتهم كـــــــــــــــــامل
هههههه

و مبعد جات عمتي مع ذرها هبلوني و شعري طلع
اخــــــــــــــــاه عييت

و ذكا زادت خرجت ماما و لصقت هنا مع اللمة الفايس بوك

بالصح لقيتلكم وحد التصااور يفلقووو بالضحك
انا طحت فراش ونا نقهقه وحدي

المهم مبعد نجيبهم نشالله

bonne nuit
​
 
السلااااام عليكم
اليوم الثلاثاء على ما اظن:huh:
رحت نعقب الكونترول الصباح
على 7 خرجت من دارنا بابا ماكانش :tears:
هابطة فالطريق و نضحك مع صباح ربي :yaw:
وصلت سع صرفت الفعل طربg فالكونرول 1 و خرجت تلاقيت اسرا :yaw:
منشرنا فواحد الحاجة كي تجي تعتمدلي الموضوع اكم تفهمو :yahoo::yahoo:
و مبعد وليت نعقب و هيا راحت تقرا:thumb_down:
بقاتلي ساعة على الكونترول جاني النعاس حبيت نرقد :crying_1:
حطيت راسي على صاحبتي لعبتلي شوي في راسي رقدت :scared::scared:
نص ساعة باه فاقتلي بلي رقدت :laugh:نوضتني وجه الشر :busted_red:
كونترول كامل و انا نثاوب:no_1: عقبت ساعة و خرجت ضربت طلة على سرسور لقيتها مازالت تقرا:closedeyes:
تفاهمنا نقضيو على واحد الحاجة :showoff:
و جيت روحت :heh: لقيت اللمة جات :yahoo:
و راني نخمم فهم النعاس الي عاد نهار كامل و هو حاكمني :no_1::no_1:​
 
آخر تعديل:
اييييييييييييييييييييييه كوون امالا تشوفو يوميااتي المملة:mellow:

واااااااااااااااااااااا:scared:

نضت على صباح ربي على 10 و نص >>> هههههههههه:wink:

عين محلولة و عين مغمضة :heh:لقييت اعضااء العاائلة بكل مسااطرين كي العسكر يسناو فيا و ضاربينلي هاذيك:no_1: الضحكة ضرسة لعقل تباان:music_whistling:

بقيييت مستغربة و قلت ااااااااه الضحكة هاذي ما تجيب وراها غير الشر:surrender:

اممالا عقبت عليهم كللي ما شفت والو:closedeyes:

رحت للكووزيينة اااااااااااااااااااااااااااااااااااااااااا:busted_red:

لقييت 2 جبااال نتاع الجوزية >>> و الله :u_pc:كااابووووووووووووووووووووووووووووس:tears:

بقييت سااعتيين و انا مشووكية:fish:
وامبعد استسلمت للامر الواقع..:sneaky2:


حطيتهم في لومبالاج هاذا وين خلصت ااااااااااااااااااااااه

مع ختيوتي الله يباارك راحت دات التقاعد من الخدمة نتاع الداار:busted_red::busted_red::busted_red::busted_red:

و ددات les vacances عند داار جدي:busted_red::busted_red::busted_red::busted_red:

واااااااااااااااااااااااااااااااااااااااااااااااااااااع:scared::scared::scared:
 
آخر تعديل:
أحم أحم
رانى روطار ماشى شوية رانى روطار بزااف
ياك نقدر نحكى انا تانى ؟
وى نقدر نحكى أنا باسكو عندى معريفة قاوية بزاف هنا
المهم نحكيلكم على نهارى تاع اليوم
25 / 05 / 2010
مالـGـرى ما كانش سوسبانس كبير اليوم
ايه مالا اليوم خوكم أسامة لى هو انا ( Messi Bomb )
بكرت على الصباح على الستة زكارة فى اللى يقولو رانا نوضو على الـ 12
المهم كيما قلتلكم بكرت على الستة
و توكلت على الله رايح نفتح لمحل
ايه مالا وصلت للحانوت ضربت جيبى نفركت على المفاتح
أووووه يا زهرى لمعوج رانى نسيتهم فى الدار
خلاص هنا ديجا هاي راحت التبكيرة ديجا راها الـ 7 و ربع
ايه أنا وصلت للكرطى لقيت جارنا يطبع فى 505 تاعو ما حبتش تنوض
آيا قلت و الله نربح فيه أجر مسكين و نعاونو
مالا رانى نطبع نطبع نطبع و الطوموبيلا قالت و الله ما رانى نايضة اليوم
ايه كى خلاصت الطريق قلنا لازم نرجعو بيها ماشاريار بالك تنوض
و هكذاك و الله ما حبت تنوض ، الله غالب أنا لى عليا عملتو
آيا روحت للدار هزيت لمفاتح و رجعت للحانوت وصلت على الـ 8
آيا قعدت نوجد فى الحانوت
المهم كملت حوالى الـ 9:30
ايه جبدت البورطابل باش نعيط على الخدام لى معايا على خاطر طول
أنا عيطت و خرجتلى Algerie Telecom Ota Bonjour
قلت سى سور رانى غلطت فى النيمرو
زدت عاودت كيف كيف تجينى تاع جيزى هاذيك بصوتها لحنين و تعاودلى نفس الهدرة
ايه من بعد عيطت لـ 777 نسقسى واش لحكاية هاذى
قالولى راك ما خلصتش الفاتورة تاع التيليفون ( Millenium )
آآآآ رانى عرفتها اليوم نهار مسود من الوقت لى بكرت فيه
ايه واش نقوللكم غلقت لمحل و رحت للسنتر تاع جيزى
هههههه لقيت وحد الخمسين رقبة قبلى ، لمزية لى لقيت واحد نعرفو يخدم تم يكثر خيرو هو لى دبر راسو فى المشكلة هاذى
ايه روحت على الـ 12 تغديت و صليت الظهر و قلت و الله غير نضرب فيها قيلولة تاع نصف ساعة
بصح غير غفيت تقعدت على ال14:00 الله غالب من التعب
ايه من بعد عيطت لوحد العبد نحكى معاه فى التيليفون و من بعد لقيتهم زوج عباد كلاونى بالهدرة ( ويك ويك ويك ويك ) ما خلاونيش نهدر
من بعد رحت تفرجت شوية فى التيلى عاودت الماتش تاع الأرجنتين تاع البارح
و درك رانى هنا معاكم فى اللمة
و هاذا ما كاين
آيا خلونى برك صوابعى زراقو من الكلافى
تشاو تشاو





​
 
مممممممم اسراء وريمة راكم مشهورين (الله يبارك) في جميع انحاء المنتدى ممكن تعطوني لاروسات راني نخدم في پروجي كبير..​
 
وانا ياسيدي اليوم نهاري مافيه والو خاويييييييييي
انا راقدة كي العادة حتى نسمع صوت كبير فوق راسي ...........
خياتي الصغار نهلة و سيرين جايبين الطبالة ويغنو معاك يالخضرة
يا حبيبي حب الوطن اللي جاكم على 7 تاع الصبح روحو لبيت القعاد وغنو
مي هوما رشقتلهم عليا باسكو علابالهم نموووووووووووووووووووت على الرقاد
محبوش يروحو حتى رميت فيهم المخاد وغلقت الباب موراهم
ومنبعد كملت رقادي
ومتنضتش حتى على 11و كيما العادة مانيش قادرة نحرك ساكن
قعدت ريحت شوية وتفرجت شوي ومن تم رحت للفينقا تاع التسياق والتخمال كملت
وفطرت
ومن تم قابلت لاتيلي وتفرجت أسما (قلوب منسية)
تم ليلي (لحظة وداع)حتى لل3 باش كملت
ومن بعد جيت ودرت الحرب مع خويا على جال الميكرو باسكو راه من صبحة ربي وهو فيه
واخيراا انتصرت عليه
ودخلت عالمنتدى نيشان حىت صبت هاد الميضوع
وراني نكتب ونسمع في غنية :بنص الليل تاع عامر زيان ​
 
انا يا سيدي هاذا وين لحقت دالتي
نضت الصباح على 7 الحمد لله سيقت في الليل على 11 يعين الدنيا نضيفة
مي تالمون سيقت على 11 لازم نضرب رقصة مع البالية والبيدون
شطحت شويا مع البالية والفروتوار
ومباعد لازم نخمل القاطو نتاع بنت خالتي اللي كملتهولها في دارنا
ما لقيتش فاه نخملو
طلعت فوق الطيراس نجيب في البيدون مخبيينو في لاشومبر نتاع القراقز
لقيت جارتنا واقفة
حكمتني بالهدرة حتان دوختني الشمس
هبطت ما نشوفش تالمون القايلة
ومباعد درت لغدا غير انا واماما حاجة خفيفة برك
المهم فريتها مع لغدا
وخليت لماعن فوق الطابلة وجيت نجري للمة
حتان نسمع في الحرب في الشمبرة
رحت لقيت ماما تعيط على الماعن قاتلي ديما روطار
الله غالب هواية نتاع تاخير الماعن
غسلتهم كي الفحلة
جا خويا قال وينه القاطو
قلتلو نتاع مواليه
نوض الحرب قال لاه حنا ما ناكلوش ولا
وليت على سعدي ووعدي خدمتلو كيلة نتاع قاطو
وحطيتو في السنية داخل بحبة وخارج بحبة
تقدرو تقولو كملو
جات اختي لمتزوجة رحنا شريت غوب دو سواري لعرس بنت خالتي نهار الخميس
وروحنا
دوزنت الكوكوطة مرقة نتاع بربوشة بالجاج
درت البربوشة تفور
وراني هنا في اللمة
جاني هاذا وين اتصال عيطت اختي التانية قالت ممكن غدوا نجي ونروح نشري جلابة
كي قلتلها انا
قالتلي ماعليهش نشريلك واحدة
واااااااااااااااااااااااااااااي
ربحت فيها جلابة للصيف
اتلاو في رواحكم
والى الحلقة القادمة
حط التيليكوموند من يدك
​
 
الحالة
مغلق ولا يسمح بالمزيد من الردود.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top