كرهت وماليت من حياتي وفي الاخير قررت الانتحار قرار اخير

[MĺŹǾ žĕĥÔŖ]

راني حاسا بيك حنونة وي كامل نفكرو هاكا بويسك الدنيااا تخليك تفكري هاكا وتقولي ماكاش حاجا تستاهل تعيشي ع جالهاا وي كاين منهاااا ونفكروا في الإنتحار
مي يادرى عداب الدنياااا اهون من عداب الآخرة؟؟؟؟ فكرتي ولالا

لوكان تنتاحري راكي قتلتي نفس وهي نفسك انتيي وربي مش رح يغفرلك ربي يهدينااا عاودي فكري في الموضوع مليح الحاجة مش ساهلةة


مهما حكينا مش رح نفهموك مليح بويسك انتي المجروحة مش احنااا عاى هادي ماعندي وش نقلك بويسك عندك عقل ختوو

نقلك ربي يهديك هادا مكان ويرشدك في الطريق الصاح ان شاء الله​

 

[JSK 14 CH]

ماتزيديش تعاوديها اختي اكثري من ذكر الله

 

[bida27]

حرام ترتكبي جريمة في حق نفسك رانا قاع معاك باش نعاونوك يا اختي فرغي قلبك واعطينا فرصة نعاونوك ومكالاه تخدي قرار ممبعد تندمي عليه ارجوك

 

[دعاء19]

ان شاء الله تكوني رجعتي في كلامك
وربي اهنيك اختي

 

[قساوة الماضي]

حكايتي طويلة ان شاء الله نلقى اللي يسمعها
انا بنت في عمري 20 سنة قاسيت في صغري وفي كبري عشت وتربيت في عايلة فقيرة بزاف
والفقر ماشي عيب ولا حرام
كنا نعيشو في بيت وحدة درناها كوزينة ونتاع نوم واحنا عايلة كبيرة رانا في 8 نرقدو فيها كامل وضيقة علينا وكنت ساعات مانرقدش هكذا باش نخللي خاوتي يلقاو بلاصة يرقدو وكان بينا وبين دار جدي حيط مهوش مدالي وهو الله يبارك عايش وحدو هو ومرت جدي وبانيين دوزيام ايتاج ولا عمرو حس بينا ولا قال نعاونكم ولا طل علينا كان يحقرنا وحتى لدارو مايخليناش ندخلوها واذا دخلناها كان يحاوزنا بصراحة ذقنا الذل منو والحاجة اللي غايضتني كان يعامل ولاد عمامي خير منا وكان يحبهم بزاف وكنا كامل صغار نشفا كي كنت مع بنت عمي قدي يجي ويقولها هايا نديك تروحي تحوسي ويروح يشريلها ويحوسها وانا نكون قدامها عمرو لاقالي ايا تروحي معانا وانا كنت في عمري 6 سنين حتىكي تطيح الشتا والله ماكنا نرقدو كانت النو تصب علينا في بيتنا نقعدو واقفين حتى يوصل النهار ونخرجو من الدار

بابا مسكين كان يخدم بصح مكانش كافي باش يكريلنا دار يعني عمامي كامل جدي قراهم ولقالهم خدمة وراهم لاباس بيهم كل واحد ببلاصتو من فوق كل هذا والله مازالو يعاون فيهم ويصرف عليهم وهوما متزوجين
هذا صغري كيفاش فوتو غير في الهموم كنت صغيرة بصح والله كنت نحس بالحقرة بزاف وحتى ماما كان جدي يحاوزها والله لذرك ماهيش هازة حقد عليهم

هذا كامل ذقتو انا وخاوتي في صغرنا وخللي لوكان نكتب التفاصيل منيش راح نكمل

............. يتبع

 

[قساوة الماضي]

راني كملت حكايتي في موضوع تاني ياريت تقراوه

 

[قساوة الماضي]

راني مالقيتش الموضوع
المهم درك نكملكم حكايتي وانتو احكمو علي
بعد كل هذا صبرنا والحمدالله ربي فرج علينا وبابا شرالنا دار ورحلنا ودرك رانا عندنا 6 سنين منين رحلنا
وبعدنا عليهم بصح مازالت قلوبهم قاسية علينا
وانا كي كبرت ماتصوروش شحال رجعت نكرههم وماقدرتش ننسا واش صرا فينا وبسبتهم ماما راهي مريضةوحتى طبيب مالقالها حل

هذا كامل فوتو وتمنيت كي نكبار يتبدل كلش
كان ديما عند امل عند ربي وكنت ديما نقول بلاك صغري ماحسيتش بيه كي نكبار يتبدل كلش
بصح عكس ماكنت نتوقع كي زدت كبرت والمشاكل مازال مابعدونيش
كاينة عندي صحبتي وحدة وكانت غير هي اللي نشكيلها على همومي وفي اللخر خدعتني
انا كنت نحب واحد وكان بالنسبة لي هو حياتي كنت نحبو والله كتر من روحي
هو اول حب في حياتي
مشيت معاه 3سنين وعمرو ماقاسني
هو تاني كان يحبني حكيتلو على روحي وكان هو ينسيلي همومي
وماكانت نيتنا غير نديو بعضانا
هذي صحبتي اللي قلتلكم عليها كانت تدخل لبيتنا وكنت حاطتها كي وحدة من الدار سرقتلي لافوطو نتاعي من دارنا وراحت مدتها لواحد كان باغيني بصح انا ماقبلتش بيه ومن الفوق زادت حكات مع صاحبي وقالتلو بللي انا راني معاه وانا اللي مديتلو لافوطو
ومنبعد رجع هذاك خدم لافوطو بالفوتشوب كي شغل راني تصورت معاه ورجع يهددني بيها
وراها لصاحبي اللي قلتلكم كنت نحبو المهم صاحبي صدقو ومنبعد عيطلي قالي عمري ماتخيلتك ديري هك انا كنت ناوي نخطبك قالي بللي انتي ماتستاهلينيش عييت نفهمو وانا ماني فاهمة والو هو مصدقنيش وفي اللخر تفارقنا بصح عمري مانسيتو وبقا خوفي لا هذاك اللي عندو لافوطو يوريها لدارنا

وعندي خوي قادر حتى يقتلني
وماليا واعرين بزاف ياك تعرفو عقلية الشاوية
ومكانش علابالي بللي صحبتي اللي دارت هاد الشي كامل واحد ماقالي
المهم عشت ايامات صعاب حتى الرقاد
منرقدوش

............يتبع

 

[الفيحاء]

السلام عليكم اختي
اولا و قبل كل حاجة هوني عليك و لا تعطي هده الدنيا اكثر مما تستحقه و و ادا كان على المشاكل الناس كامل راهي في المشاكل و الهموم واحد ماراهو عايش هاني في هده الدنيا و لوكان تشوفي هموم الناس صدقيني باللي راكي رايحة تنساي همومك موحال مايكون عندك حتى امل تعيشي بيه في هده الحياة شوفي مليح مع حياتك و نحي نظرة التشاؤم على خاطر الانتحار و اعود بالله راهو استسلام و ان شئت ضعف و انا اعرف انك في نفسك قوية و الحمد لله و انا متاكدة من هدا الشيء موضوعك هدا اقلقنا و نحن نريد الاطمئنان عليك فادا اردت احكي لنا قليلا علنا نستطيع ان نخفف عنك انا في انتظارك اختي ماتخليناش هكا مقلقين عليك راكي ختنا و ياك ماكان حتى احراج بين الخاوا

 

[قساوة الماضي]

واحد النهار تلاقيت في الطريق مع هذاك اللي عندو لافوطو نتاعي اعطاني النيميرو قالي احكي معايا راني نسحقك لازم تحكي معاي وانا من خوف ماكان علي غير ندي النيميرو نتاعوونعيطلو قالي بغيت نتلاقا معاك ونحكيو
انا ماقبلتش كي قلتلو لالا قالي علابالي مادرتيش في كونفيونس ودرتي كونفيونس في صاحبتك هذيك
ومنبعد قالي بللي هي اللي مدتلو لافوطو قالي صح كنت ناوي نديرلك مشاكل بصح شفيتيني بصح لافوطو نتاعك نخليها عندي
فت كل شي بصح قعدت مصدومة من صحبتي اللي كنت نحبها كتر من اختي ومافهمتش واش درتلها حتان تديرلي هكا بالعكس كنت نخاف عليها ونحبها
صحبتي كي سمعت بللي راني عرفت كل شي رجعت هي تشنف علي وكأنو انا اللي درت فيها هادا كامل
بصح انا وكلت ربي عليها والله لحد الان ماقابلتهاش ولا تكلمت معاها بصح خلاص زاد الحقد في قلبي
وحكايتي ماخلصتش هنا

والله تعذبت بزاف في حياتي
هذاك العام كنت نقرا دوزيام في الليسي
كانت عندي استاذة هذا هو العام اللول نتاعها اللي تقري فيه يعني ماشي كبيرة في العمر
كان عندها خطيبها وانا هذيك الاستاذة كنت نتفاهم معاها بزاف وساعات نروحو نروحو مع بعضانا المهم واحد النهار جا خطيبها يوصلها انا كنت معاها
المهم كي شفتو قلتلها نروح نخليك معاه
لثم اول مرة نشوف خطيبها
بعد سمانةعيطلي نيميرو ماعرفتوش المهم طولت باش هزيت عليه كي هزيت لقيتو خطيب الاستاذة المهم قصة طويلة كيفاش عرفت بللي هو
قلتلو واش تسحق لثم قالي والله راني شفتك عجبتيني وصدقيني انا والله مانحبها بصح هي اللي لاصقة فيا
امنيني اختي اعطيني فرصة وانا مستحيل كنت راح نقبل قلتلو غير هذي ماتصراش
قلتلو ماتزيدش تعيطلي لانقولها
هي كانت تموت عليه ومستحيل انا ندخل بيناتهم ونقولها يصرا مشاكل سورتو كعاد خطيبها وزادو ايامات سمعت بللي خلاها صح بصح مكانش في بالي بللي علاجالي
هي مكانتش حتى تجي هدوك ليامات تالمو كانت مشوكية لقالها سبة وخلاها المهم
زاد عيطلي وياريت ماعيطليش هو سباب مشاكلي
راني جاياتكم بالهدرة

.........يتبع

 

[قساوة الماضي]

رجعت منهزش عليه ونكوبي عليه والو ديما يعيط ويبعث ليميساج كثر من 10 في اليوم والله عييت حكيت معاه وبغيت نصلح بينو وبينها بصح هو قالي والله مانديها انتي عجبتيني وكنت نعرفك من مدة كبيرة وانتي ماتعرفينيش
هكذا حتان بدلت النيميرو غير علاجالو والغلطة نتاعي اني ماقدرتش نحكيلها ونقولها كنت خايفة نجرحها هي وترجع تكرهني وانا مادرت والو
هكذا حتان الهدرة مشات وسمعت هي بللي راهو يعيطلي وراني نحكي معاه وكانت تحسب في بللي انا اللي ندور بيه
لثم بداو المشاكل نتاعي في الليسي
جات لعندي وحكاتلي قالتلي هاو واش اسمعت بصح لقيت بللي تبدلت لافوصو نتاعها معاي وصدقت واش قالولها بصح انا ماصارحتهاش ومن خوفي والله عليها غير قلتلها ماكانش منها هو راهو باغيك انتي انا مكان بيني وبينو والو

لعبتها صدقتني بصح الشك مازالو في راسها واحد النهار خليت بورطابلي في الكلاسة وقلتلها نخرج خلاتني راحت فتشت الساك نتاعي وجبدت البورطابل والله مانزيد عليكم بكلمة

وكاين ليميساج نتاعو مسجلين في لاباراي ماشي في لابيس
وكي رجعت قاتلي بورطابلك راهو عندي اسمحيلي اديتو منبعد نردهولك وانا نسيت بللي ليميساج كاينين
قلتلها مكان حتى مشكل كي وصلت وقت 12 وراح نخرجو من لاكلاس جات لعندي وعطاطني لابيس وقالتلي بورطابلك خليهولي نسحقو حتى لغدوا نردهولك وانا بنيتي قلتلها مكانش مشكل
لغدوا هذيك وانا كنت داخلة للقسم قالتلي جيت شوي روطار قلتلي اخرجي مانسحقكش تدخلي لاكلاس غير لاكان جبتي ولي امرك
لثم انا مافهمت والو وقعدت مشوكية كعاد مادرت والو وكعاد كي دات بورطابلي كاينة تحكي معاي نورمال وكاينة تقولي بللي راهي ماصدقتش هدرة الناس
يعني لعبتها بي
المهمرحت للرقابة وحكيت معاهم قالولي واش درتيلها قلتلهم مادرت والو خللي كي تخرج وسقسوها
كي خرجت قعدت تعيط قدامهم كامل وتقولهم طفلة ماشي مربية كيما هذي مانسحقهاش تدخل لحصتي
وراح ندير كونفوكاسيون لباباها يجي يشوف واش راهي دير
لثم عرفت علاواش راهي دير هكا
ماحكيتش لدارنا على هذي الحكاية ورجعت نقرا كل الحصص غير حصتها مانقراهاش وماحبيتش نجيب بابا كنت خايفة كاشما تقولو نشرتني عند الاساتذة كامل وشوهت بيا وقالتلهم بللي انا ندور بخطيبها ورجعو الاساتذة كامل مايحملونيش

وانا مادرت والو ومالقيت حتى واحد ينصحني كيفاش نحل المشكل نتاعي
وصدقوني من شرها ومن الكره نتاعها ليا كي سمعت بللي هذاك اللي قلتلكم عليه دالي لافوطو نتاعي من قبل حكات معاه وجابت من عندو لافوطو ورجعت هي تاني تهدد فيا
علابالي صعيب باش تصدقو بللي استاذة تدير هكذا بصح والله والله والله غير دارتلي كثر من هك بصح ماشكيتش هذي الصفحة تكفيني وراني نحاول نختصر برك معاناتي في هذي الدنيا وكيفاش كلش معكوسلي
وماكملوش مشاكلي هنا

.........يتبع

 

[الفيحاء]

اختي العزيزة اني هدا وين قريت حكايتك و رح نقلك باللي ربي جامي يضيعك على حسب ماحكيتيلي الظروف اللي عشتيها انت وحدة من بين الملايين اللي يعانيو من الحقرة من طرف الاهل و علابالي باللي قاسية بزاف لكن وش ديري هدا حكم الله و لا مرد لقضائه هدا ابتلاء من عند رب العالمين و نتي تقولي الحمد الله اللي راكم بدار مستقلين اما عن الفوتو فنقلك ختي ما عليك الا بالدعاء لرب العالمين لانو في هده المحنة غير ربي سبحانو بمعجزة من عندو اللي يقدر ينجيك صدقيني يا اختي مادام انتي طاهرة و عفيفة و فربي راح يدير الف نسبة قادر حتى هداك الفوطو يروحلو اووووو و ربي هو القادر و اما عن الانسان الدي فقدته فهده تجربة تعلمك للحياة و ان لا تثقي حتى باقرب الناس لك و ان تقولي عسى ان تكرهو شيئا و يجعل الله فيه خيرا كثيرا اللي يشوفو ربي حنا ما نشوفوهش اوصيك اختي بالدعاااااااء حتى و اننا في شهر رمضان شهر الرحمة شهر المغفرة شهر العتق من النار و ارجوك اختي انزعي فكرة الانتحار من راسك اريد منك ردا يطمنني

 

[Łøst Fłôwęr]

يااختي كملي حكايتك رانا نسمعولك وكي تكملي رانا نفيدوك ان شاء الله و عمرو ماكان الانتحار حل

راه بداية جهنم

 

[zi_crazy]

اذا ضاقت بك الدنيا فلا تقل: يارب عندي هم كبير .... ولكن قل: ياهم لي رب كبير

استغفري ربي يا اختي
كامل الناس راهم عندهم مشاكل ، بصح واحد لازم يحمد ربي
على خاطر راه يبغيه مين حطه في هاد المشاكل

و ما تنسيش مصير اللي ينتحر
و اذا راكي تخممي بلي غادي تموتي تريحي هاذي غير اقلعيها من راسك

ما ينتظرك اصعب بدأ من عذاب القبر، بلا ما نقولك

المهم اختي استغفري و اقري شوية قرآن

و ان شاء الله ما يكون غير الخير

و يتحلوا كامل المشاكل​

 

[قساوة الماضي]

ومنبعد رجعت منروحش نقرا خلاص ولحق كونفوكاسيون لدارنا بصح الحمدالله بابا ماسمعش بيه وعادو نتاع دارنا يشكو ويقولولي وين كنتي تروحي كي مارحتيش تقراي

المهم فوت مشاكل اللي عالم بيهم غير ربي وشوي لاخرجوني من القراية

وفي زهري الاستاذة خلصت الكونترا نتاعها وكان باقيلها سمانة تفوتها وتخرج
حاولت نتاع دارنا يخلوني نرجع نقرا باش مايسمعش بابا لانو بابا كان مسافر
رحت حكيت مع الرقابة المهم وتفاهمت معاهم ورجعوني بلا مانجيب بابا
ومنبعد كل هذا الاستاذة بعثتلي بورطابلي ولافوطو نتاعي بصح بعد واش بعد ماعذبتني كيما بغات وصلت بيا اني تذللتلها باش ترجعهملي
فوت الدوزيام وطلعت التارمينال كرهت حياتي وكرهت القراية لانو الليسي كامل عاد يشوف في بخزرة ماشي مليحة ماديتش الباك
جا خطبني واحد يقربلنا
خطبني من قبل بصح ماقبلتش بيه
بصح تالمو كنت مهمومة وكارهة وحتى نتاع دارنا رجعو مايديروش في كونفيونس وكرهولي حياتي ماكان الحل الوحيد غير نقبل بيه
وقبلت بيه وكنت حاسبة بللي هو اللي ينسيني واش قاسيت في حياتي بصح دوماج لقيتو كتر من اللي قبلو وكتبلي ربي نتلاقا في هذي الدنيا غير مع اللي مايحبونيش كيفاش ماحبيتونيش نكره حياتي

كان يعاملني مليح بصح بعد الخطبة هو زرب للفاتحة وزدنا عقدنا وبعد ماعقدنا حسيت بللي عاد سحكم في
وتبدل ومارجعش كيما كنت نعرفو
حتى كلمة حنانة مكانش
اونديغي ناقصة غبينة في حياتي
هربت من هم لقيت هم اكبر من هكا
الناس كامل قالولي والله تستاهلي خير منو
وكومام انا حاولت نكسبو هذا كامل خايفة من دارنا كعاد انا اللي قبلت ومستحيل يخلوني نبطل علي
بصح عشت معاي عام خطبة
كان يذلني كيما يحب
وكانو زوجني غير باش يحكم في
تصورو منين عقدنا مازدت شفتو حتى لزواجنا
مكانش لاتي بيا كنت حاسة بروحي كللي راني ثقيلة عليه بصح مافهمتش علاه داني
مابغا يخليني مابغا يريحني
هكذا فوتنا عام الخطبة غير مشاكل ومن عندو وقلبو قاسي

المهم درك عندي شهر ونص منين تزوجنا قعد معاي غير سمانةوحدة ومنبعد سافر للخدمة فوتها كانو جحيم وكانو زوج خديمة تخدم وتطيب هذا ماكان يخرج من الصباح ومايروحش حتى 12 نتاع الليل وعمرو ماحسسني بللي راني مرتو
راني منهارة نفسيا مقيوسة بزاف
عييت بكيت واحد ماحس بيا

تخيلو عند شهر منين سافر للخارج ولا مرة سقسا علي وماقاليش حتى وكتاش يروح وكي نعيطلو مايهزش علي فهموني واش راح ندير راني كرهت حياتي الموت اهون وحتى كي نعيطلو مايهزش علي انا مافهمتش علاش داني مانيش ناقصة غبينة

احكمو على قصتي

 

[الفيحاء]

لا حولى و لا قوة الا بالله
و الله يا اختي راني هازة معاك الهم تقولي وحدة قريبة مني و بادن الله نعاونك باللي قدرت عليه و زوجك مالقيتلوش حتى انا تفسير هو يخدم خارج البلاد بالاك عندو التزامات كيما يقولو الغايب عدرو معاه و بالاك مازال مافهمتوش بعض على خاطر راكم جدد و ماتقوليش تبدل على خاطر هكدا الرجال كامل من بعد الزواج و نتي ماعليك الا تزيدي تصبري و كيما قلتلك لازم تقربي من ربي سبحانو و تكتري من الدعاء و الالحاح و ربي يحنن زوجك عليك و نتي تاني حاولي تفهميه بالاك عندو ظروف تاني كيما نتي عندك ظروف و راني مازال ما نخرج زيدي اهدري وش راكي حابة

 

[Łøst Fłôwęr]

يا اختي واش رايحة نقولك قصتك صعيبة بزاف و راكي سوفريتي بزااااااااااف
مي صدقيني مكانش حاجة تستاهلي تدخلي للنار على جالتها
وهذا بلاء من عند ربي و راح يجازيك على صبرك و يفرج عليك و بعد العسر يسر

و يا اختي بالنسبة لزوجك كي يرجع احكي معاه و فهميه و اكسبيه بالحاجة لمليحة و كوني مرة و نص في دارك دك يرجع ليك و يكون ان شاء الله كيما حاباتو انت

وسيرتو رانا في رمضان كثري من الصلاة وقراءة القران و قيام الليل
وادعي ربي يعوضك على لي فات
ويحققلك واش تتمناي

وبلاك دك يرزقك ربي بابن يعوضك على واش شفتي في حياتك كامل

والله ندعيلك من كل قلبي ربي يفرج عليك و يعطيك كل ماتتمناي ​

 

[قساوة الماضي]

لا حولى و لا قوة الا بالله
و الله يا اختي راني هازة معاك الهم تقولي وحدة قريبة مني و بادن الله نعاونك باللي قدرت عليه و زوجك مالقيتلوش حتى انا تفسير هو يخدم خارج البلاد بالاك عندو التزامات كيما يقولو الغايب عدرو معاه و بالاك مازال مافهمتوش بعض على خاطر راكم جدد و ماتقوليش تبدل على خاطر هكدا الرجال كامل من بعد الزواج و نتي ماعليك الا تزيدي تصبري و كيما قلتلك لازم تقربي من ربي سبحانو و تكتري من الدعاء و الالحاح و ربي يحنن زوجك عليك و نتي تاني حاولي تفهميه بالاك عندو ظروف تاني كيما نتي عندك ظروف و راني مازال ما نخرج زيدي اهدري وش راكي حابة

زوجي يخدم في الخارج بصح مو راهو يعيطلها ديما
صدقيني يا اختي اللي جوزت هاد المشاكل هذو كامل عقلها راهو كبير
وديما نحطلو اعذار
نرد الغلطة مني وحتى لو ماكنتش مني
بصح هذا مكتوبي
نشكرك اختي بزاف والله راني كي سمعتلكم تنح علي شوي ​

يا اختي واش رايحة نقولك قصتك صعيبة بزاف و راكي سوفريتي بزااااااااااف
مي صدقيني مكانش حاجة تستاهلي تدخلي للنار على جالتها
وهذا بلاء من عند ربي و راح يجازيك على صبرك و يفرج عليك و بعد العسر يسر ​

و يا اختي بالنسبة لزوجك كي يرجع احكي معاه و فهميه و اكسبيه بالحاجة لمليحة و كوني مرة و نص في دارك دك يرجع ليك و يكون ان شاء الله كيما حاباتو انت​

وسيرتو رانا في رمضان كثري من الصلاة وقراءة القران و قيام الليل
وادعي ربي يعوضك على لي فات
ويحققلك واش تتمناي​

وبلاك دك يرزقك ربي بابن يعوضك على واش شفتي في حياتك كامل​

والله ندعيلك من كل قلبي ربي يفرج عليك و يعطيك كل ماتتمناي ​

ربي يعيشك اختي
علابالك والله البارح كان عقلي طار اقسم بالله كنت راح نسويسيدي بصح الحمدالله دخلت قريت واش كتبتو قعدت نبكي نبكي والرقاد مجانيش وماقدرتش حتى نرد عليكم
اختي والله نرتاح كي نسمعلكم
راجلي هو اللي زاد علي درك
درك راني قاعدة في دارنا وماخطاطنيش هدرة الناس
هذا يقول راجلها طلقها وراح للخارج وكل واحد واش يهدر قوليلي واش من عقل يخلينيي نصبر
راني في عمري 20 سنة بصح راني حاسة روحي عجوزة صدقيني​

 

[الفيحاء]

اختي وين راكي اني نستنا فيك

 

[Łøst Fłôwęr]

ماتخافيش راه يرجع و تسكتي كامل لي يهدرو فيك
والي هدر فيك راه نقص عليك الذنوب ولي تبع هدرت الناس ماتفراش​

 

[الفيحاء]

حبيت نقلك كلام الناس ديريه تحت رجلك على خاطر الناس هدي هي خدمتهم القيل و القال التفتي لحياتك لزوجك حاولي كيفاش تكسبيه و كيفاش تاسسي عائلة مستقرة انشاء الله انا عندي امل كبير في هدا لاني لمست فيك الصدق و راكي عندك فرصة كبيرة تاع رمضان باه تقربي لربي و انشاء الله تنقلب موازين حياتك 180 د و تولي من اسعد الناس و لو ان الدنيا م تكمل لاحد