sahiko جابلكم موضوع مكتاش خوه فالمنتدى

[sahiko hamza]

سلام عليكم ورحمة الله




ياهلا بالحبايب عند أخوكم sahiko الى لي رايح يتهلى فيكم ان شاء الله

ماشي كي العادة هاذ المرة :scared:
ليه خطاراه راح نجيبلكم موضوع يقيس الواقع والشباب لي في عمري كامل راهم يخمو بيه عكس الجنس الخشين عفوا أقصد اللطيف يخمو غير في نقطة وحدة برك الي هي ..... خلي ندخلو فالموضوع ومن بعد ساهل الحال



ديفوا توصل مرحلة تعد تخمم غي فالزواج كيما نخمم انا ولوخر و و و
بصح قبل ماتخمم لازمك تسقسي من الاخوة لي عدات عليهم هاذ التجربة كيفاه جازت عليهم أسكو راهم لاباس ولا لا و و و
مانكذبوش على رواحنا بكل زواولة بكل رانا مع هم الدنيا ماناش معولين على والدينا باش يزوجونا بصح رانا الحمد لله .... :re_gards:

كون جيت ولد فلان مانخممش بكل ديركت نجيب بنت الناس ونحطها فالدار ونديرلها واش تحب ( كيما تخمم هي ههههه )

ايا نكمل واش عندي من قرع

درت روبورطاج من عند لمجربين ( ياك يقلك سقسي لمجرب وماتسقسيش الطبيب ) على هذي رحتلهم وحصرتهم وطاكيت فيهم بالاسئلة خرجت كيما آل وحد السيد

هانتابهو مليح وسكتو كلشي بحذاكم ماتنساش ليكتور أمبي 3

بأسم الله :


خويا وش رايك فالزواج
آاااااااااو أكسيدون كبيرة :scared: آلطيف تقول 404 باشي ظربت فكاميوناااا :bored:
( هذاا سير خسر فزواجو خسارة كبيرة عموما مارسي عليه )

خويا وش رايك فالزواج ؟؟
حاجة مليحة الزواج نعمة من نعايم ربي نا نقلك غي ازوج ( راح وخلاني هكاك .... بلا مايشرحلي معليش خير من سابوطاني كيما لوخر هههه )

خويا وش مارايك فالزواج
الى راك راح تتعذب أزوج
علاه ؟
هاني قتلك
علاه انت راك تتعذب i-o:
لا مش هكذاك بصح روح جرب وردلي لخر
علاه الزواج في نجرب ولا لا ؟
ياو ........... موهيم ماحبش يمدلي الصح مي فهمتو انا يحكي على شهريتو ماتكفيهش ليحياتو اليومية


اما هاذا لي أعطاني الصح
خويا وش رايك فالزواج ؟؟
الزواج نا نقلك غي ماكلاه بعدا لأنو مسؤولية كبيرة الى راك قدها غي ديماري وعول على الكريم
معليش خويا تشرحلي المسؤولية هذي كيفاه ؟

إماجيني لازمك حق لمرا باه تشري لاوزمها من ..... ( راهم عارفينها بنات اللمة :angel: )
تقول انت خلاص جاك الشتا مونطو الرخيس فيهم ب 700 الف
ماتنساش السكر راه مكانش تجيب القضية تقلك ياو وين راها القهوة
وين راهم لعدس .......... وش بيه لفريجيدار فارغ ؟
كيفاه ناكلو ومكانش ديسير ؟
واش فلانة عندها تيلي HD وأنا معيشني فالنواري بلون ؟؟ ( تيلي تاع 4 ملاين داراتو نواريبلون مليح )
أسي محمد واش تحوس تخليني مانخرجش ؟
الناس كاملة بلبسة جديدة وانا عندي قناديري كامل قدم ( شراتهم الشهر لي فات )
الخياطة راها تسال ... الحفافة تاني
و و و ............


ايا هو يحكي بدا يتنارفا قتلو أحبس ... أحبس ... :cra_zy:
راسي راح يطارطق بطلت الزواج :laugh:



نقصر برك


من موضوعنا ولا هاذ الربورتاجات
استخلصت حوايج حبيت ندهالكم ولي عندو إضافة يمدهالنا والى راني غالط يصحلنا موهيم المشاركة برك



القانون الاول لزواج هو لازمك تكون ماديا مليح مليح هذا الى راك مش حاب تكون من المعذبون في الارض
لازمك وسع البال ...
تعرف من تخير من لبنات علاه تقلك في الاول نصبر معاك ومن بعد تدور عليك نهار زواجك بعد :closedeyes:
كيما وحد ليستوار قالت فيها
حبيبي نعيشو على الخبز و الماء موهيم نكون معاك برك
ايا زوجو وياكلو غي خبز و الماء
كرهت المسكينة وقاتلو
حبيبي الحب على الخوا يمرض :lol: :lol: :lol:

كي عادتي ديما فآخر الموضوع نحط أسئلة باه تشاركونا رايكم على حسب ما قريتو


زعمــا ذركا مزال كاين بنات يصبرو معاك ؟
ولا الزواج مكتوب غي على وليد الشكارة ؟


يالله لحباب شاركو فالموضوع وديجا فاتحو لكل الاعمار ماشي شرط على لكبار برك

كان رديت راك نفعت روحك
مارديتش نزيد نشكرك على قرائتك للموضوع
ماعجبكش نقلك اسمحلي سمطت عليك
عجبك هذيك لي نحوسو علبها
كان ............ ( خلاص حاولناكم بزااااااااف :closedeyes: )


موهيم خوكم sahiko راه يستنا فيكم

أتفضلوا مرحبا بيكم



​

 

[4Akram]

~ احجـز احجــز ، تجبنـي حمــزة ^_~.​

 

[يوسےفے]

صح موضوع ماكاش كيفو ...ما خليت ما بقيت... وراك خربتلي فل المخ...صاي بديت نحسب من دورك...او علاه كنا ملاح خوي....كي شغل كي تتزوج معنتها تزوجت بروسي مدته حياتك...كل يوم تخلص....ههههههه صحيت على الموضوع ++++تقييم​

 

[هآجر]

السلام عليكم

الزواج ساهل اذا مخكم سهل الزواج

مي يصعاب اذا صعبتوه نتوما بعد

الي سقسيتهم الكل ممدوش الصح كلهم صابوتاوك

على بلاك وعلاش

خاطر كلهم حسب وش كتبتي مقالوش الحمد الله

وسي نورمال

الي مايقلولش الحمد الله حتى لوكان جاتواا مصبة ربي راح يغضب عليه

اما البنات الي يصعبوا في المعيشة هدوك اسور خالقين و في فمهم ملعقة من ذهب + والفوا التبدير كما حكاية المونوت

مش لازم كل شتا منوتوا جديد بسوما غالية على اقل تراعي ظروف راجلها وشهريتوا تستحفظ بلي عندها وتعرف كفاش تصرف دراهم راجلها + البراكة راهي تنزل برحمة ربي بالدعاء وربي يدير اسباب للرزق

كل خطوة في الدنيا هذي يدرها البني ادم فيها بركة من عند ربي لما يتكل عليه عمرو لا خيبوا

دعاء ليل نهار واذكار واستغفار المستمر معدوم في المجتمع على هذي جاوبوك الي س\التيهم بهديك الطريقة

والله مستعان

وعليكم السلام​

 

[mimi.dz]

زعمــا ذركا مزال كاين بنات يصبرو معاك ؟

و انا نقولكـ زعما مزالـ كاينـ رجالـ يستاهلو الواحدة تصبر معاهمـ ؟؟
رانا عايشينـ كاملـ فيـ بلاد وحدة و نعرفو العفايسـ ( زعمة نفهمـ ههه)
ميـ الحقـ كيما رانيـ نحكيـ الطفلـ مبقاشـ جدّيـ فيـ موضوعـ الزواجـ
واذا كانـ يتبدلـ منـ بعد لانو المسؤولية تكبر على كتافو و قليلـ الليـ يقدرلها
اما النساء صحـ كثرو الطلباتـ رجعتـ الوحدة تتزوجـ بـ 10 ملاينـ
آآآو رجعو يبيعو فيـ رواحهمـ
وعلابالنا المعيشة غلاتـ و الخدمة مكانشـ
وكلـ وحدة تحوسـ تضمنـ مستقبلها
الزواجـ مبقاشـ ساهلـ
و راحتـ النية نتاعـ درجة درجة نبنيو الدار
هاذيكـ كانتـ بكريـ
دركـ لازمـ تكونـ واجد 100/100
ولاّ خليكـ عند باباكـ
واذا رانيـ غالطة قوليـ ؟؟

ولا الزواج مكتوب غي على وليد الشكارة ؟

الزواجـ مكتوبـ على الغاشيـ كاملـ
بصحـ فيـ بلادنا طارو بيهـ ناسـ الشكارة i-o:

والواحد مييأسشـ منـ رحمة ربيـ سبحانهـ
معـ الوقتـ تلقى بنتـ لحلالـ انشاء الله
فيـ عامـ 3011

+ يعطيكـ الصحة خويا
وانشاء اللّهـ تكونـ بخير
اتهلا فيـ روحكـ

​

 

[اسماء16]

انا نقولك كلمة برك ولله العضيم معضم الرجال ينحيها من فوقو ما يكل ما يلبس المهم يزوج برك
في هدا الوقت راه مول 11 سنة راني نخمم فزواج خلينااا مكاش الي يقولك زواج ماشي مليح هدرة برك مي الي فلقلب فلقلب صح ولالا
​

 

[محبة الاستطلاع]

السلام عليك نقولك حاجة الزواج ماكش راح تلقى الجنة وماكش راح تتمرمد ساعات يكون المشاكل وساعات يكونو الهناء وسعات يكونو الدراهم وساعات مايكونوش كيما يقولو مول التاج محتاج الدنيا هذي ساعة طالعة بيك ساعة هابطة بيك ومكانش دار مافيهاش المشاكل بصح كل دار ومشكلها كيفاه وكل مراة كيفاه تتعامل مع زوجها وابنائها كاينة لي تحي راجلها في السراء والضراء (لعقوية ليك تلقى وحدة كيما هك) وكاينة لي تحب راجلها غير في السراء ربي يطيحك في وحدة على قد قلبك ولي خلق مايضيع اسمحلي راني خربشت بزاف
​

 

[ماكانش]

سقسيني انا نقلك
الزواج مليح بزاف ....
بصح كي تكون لمرا مليحة وصالحة

 

[يسرى 2008]

موضوعك فوووووووووووووووور بزاااف مي المشكلة انا مازلت صغيرة على الزواج ومامبا سقسيت روحي وش هو ههه منقدرش نجاوبك
مي حسب ما نسمع عليه مليح والصراحة انا منحبوش وباسكو فيه مسؤولية كبيرة وانا نحب توجور نقعد صغيرة كي نبدا نخمم فيه نجي نقلك نشكرك على الموضوع

 

[GI Joe]

le monde parfait serait sont mariage ^^
pour assurer lka survie humaine chaque homme et chaque femme doit aller a l hopital donner

&

et le tour est jouer
​

 

[sahiko hamza]

~ احجـز احجــز ، تجبنـي حمــزة ^_~.​

أهلا أكرم خويا
والله مام انت تعجبني المايسترو... :shiny:
​

صح موضوع ماكاش كيفو ...ما خليت ما بقيت... وراك خربتلي فل المخ...صاي بديت نحسب من دورك...او علاه كنا ملاح خوي....كي شغل كي تتزوج معنتها تزوجت بروسي مدته حياتك...كل يوم تخلص....ههههههه صحيت على الموضوع ++++تقييم​

مرحبا بيك خويا لعزيز فالموضوع :shiny:
توجور نحط يدي فبلايس تقيس ...
الزواج نخمو بيه توجور مي مانخموش على لمرا برك
نخمو وش كاين بعد الزواج ... :sadwalk:
معليش نقولو الحمد لله و و و و
بصح لازم شويا تخمام سينو تكسرلك رااسك ببكاواتها فالليل هههه i-o:
​

 

[sahiko hamza]

انا نقولك كلمة برك ولله العضيم معضم الرجال ينحيها من فوقو ما يكل ما يلبس المهم يزوج برك
في هدا الوقت راه مول 11 سنة راني نخمم فزواج خلينااا مكاش الي يقولك زواج ماشي مليح هدرة برك مي الي فلقلب فلقلب صح ولالا
​

يا اختي العزيزة :re_gards:
بون احنا رانا كبار مابقاناش نلعبو
الواحد في عمرو 25 سنة وراها ربع قرن من حياتنا فاتت يسما راح وقت اللعب باه نقلك اني عنزوج هكذاك برك ؟؟؟
اما مول 11 سنة يخمم فالزواج تبعيه وذرك تتزوجي بيه بعدا هههه
وديجا ديما انتوما واحد كي يعود يحكي صح تقولو او خدااااع
وكي كي يعود يخدع فيكم تحبوه وزيدو تمدولو كلشي ...
وهذي كاينة وماتقوليليش لا ...
​

السلام عليكم

الزواج ساهل اذا مخكم سهل الزواج

مي يصعاب اذا صعبتوه نتوما بعد

الي سقسيتهم الكل ممدوش الصح كلهم صابوتاوك

على بلاك وعلاش

خاطر كلهم حسب وش كتبتي مقالوش الحمد الله

وسي نورمال

الي مايقلولش الحمد الله حتى لوكان جاتواا مصبة ربي راح يغضب عليه

اما البنات الي يصعبوا في المعيشة هدوك اسور خالقين و في فمهم ملعقة من ذهب + والفوا التبدير كما حكاية المونوت

مش لازم كل شتا منوتوا جديد بسوما غالية على اقل تراعي ظروف راجلها وشهريتوا تستحفظ بلي عندها وتعرف كفاش تصرف دراهم راجلها + البراكة راهي تنزل برحمة ربي بالدعاء وربي يدير اسباب للرزق

كل خطوة في الدنيا هذي يدرها البني ادم فيها بركة من عند ربي لما يتكل عليه عمرو لا خيبوا

دعاء ليل نهار واذكار واستغفار المستمر معدوم في المجتمع على هذي جاوبوك الي س\التيهم بهديك الطريقة

والله مستعان

وعليكم السلام​

وعليكم السلام ورحمة الله
اولا خليني نشكرك على ردك الوافي والمقنع
وذركا خيتو معليش مكانش واحد قال الحمد لله
مي أفون من الداخل يقولها بلا عزريانو ....
ونزيدك روحي برك شوفي النسا لي نوفو ماريي ذرك يحكيولك
ولا لبي عندها عام وهي ماريي ذرك تبكيلك ماشي تحكيلك
سقسي ومن بعد رديلي لخبر .
​

 

[sahiko hamza]

اهلا بيك ميمي
والله شت اسمك فالموضوع فرحت علاخاطر تمدي الموضوع حقو
على هذي ديما تعجبيني فالردود ... :shay:


​

زعمــا ذركا مزال كاين بنات يصبرو معاك ؟

و انا نقولكـ زعما مزالـ كاينـ رجالـ يستاهلو الواحدة تصبر معاهمـ ؟؟

بعد الزواج وي كاين لي تصبرو معاهم
قبل الزواج مانتحملش المسؤولية :showoff:

رانا عايشينـ كاملـ فيـ بلاد وحدة و نعرفو العفايسـ ( زعمة نفهمـ ههه)
ميـ الحقـ كيما رانيـ نحكيـ الطفلـ مبقاشـ جدّيـ فيـ موضوعـ الزواجـ
واذا كانـ يتبدلـ منـ بعد لانو المسؤولية تكبر على كتافو و قليلـ الليـ يقدرلها
اما النساء صحـ كثرو الطلباتـ رجعتـ الوحدة تتزوجـ بـ 10 ملاينـ
آآآو رجعو يبيعو فيـ رواحهمـ
وعلابالنا المعيشة غلاتـ و الخدمة مكانشـ
وكلـ وحدة تحوسـ تضمنـ مستقبلها

مالا شوفو كاش مدير أعمال يكون صحيح وتقاسمو عليه في 4 بناااات ههههههههه

الزواجـ مبقاشـ ساهلـ
و راحتـ النية نتاعـ درجة درجة نبنيو الدار
هاذيكـ كانتـ بكريـ
دركـ لازمـ تكونـ واجد 100/100
ولاّ خليكـ عند باباكـ
واذا رانيـ غالطة قوليـ ؟؟

انا لوم فالجنس تاعكم وانتي تلومي فالجنس تاعنا
وش بينا لاباس ؟؟؟ :cra_zy: :schmoll:

ولا الزواج مكتوب غي على وليد الشكارة ؟

الزواجـ مكتوبـ على الغاشيـ كاملـ
بصحـ فيـ بلادنا طارو بيهـ ناسـ الشكارة i-o:

ناس الشكارة ههه شوفيهم كيفاه عايشين ورديلي رلخبر ياو الدراهم على مد عي*** مي الاحساس الزوج لزوجة ... شبه منعدم .

والواحد مييأسشـ منـ رحمة ربيـ سبحانهـ
معـ الوقتـ تلقى بنتـ لحلالـ انشاء الله
فيـ عامـ 3011

+ يعطيكـ الصحة خويا
وانشاء اللّهـ تكونـ بخير
اتهلا فيـ روحكـ

​

والله بيان ميمو
رانا رحمة ربي
كيفاه نشوف رد كيما هاذا ومانكونش مليح ؟ آنبوسيبل ...
شكرا
​

 

[هآجر]

وعليكم السلام ورحمة الله
اولا خليني نشكرك على ردك الوافي والمقنع
وذركا خيتو معليش مكانش واحد قال الحمد لله
مي أفون من الداخل يقولها بلا عزريانو ....
ونزيدك روحي برك شوفي النسا لي نوفو ماريي ذرك يحكيولك
ولا لبي عندها عام وهي ماريي ذرك تبكيلك ماشي تحكيلك
سقسي ومن بعد رديلي لخبر .

السلام عليكم

مرسي اخي على تقبل الرد انا قلت بلاك تتعارك معيا خاطر عكستك

بخصوصو نسقسي النسا نفوا ماريي

الحمد الله عندي زوج صحابتاتي مشاء الله تربية ودين واخلاق والحمد الله عليهم للزوج داو رجالة قدهم قد روحهم ياربي الشهرية نتع زوج ملاين تكفي وتتوفي
وحتى هما ثاني ماشاء الله مش من النساالمبردرات العكس الي يجيها هداك هو وعاشين على المرة والحلو
و كاينة وحدة من لا فامي جابت الابن الاول حمدت ربي على هذه النعم وجا برزقوا كانوا ساكنين بالكرا
والكرا ديد نص الشهرية لا مش الكل
والحمد الله درك معندهمش شهرين سكنوا في دار رزق بعد طول عناء طبعا يعني جاء الابن الاول بخيروا فقط انسان يصبر


يعني يا اخي

كلش بيد ربي سبحانه وتعلى لما الانسان يمد يدوا للربي ومش للعباد وبقلب صافي ومتيقن من انالله ميردوش = تفتح ابواب الفرج

مرسي

وعليكم السلام

 

[تاعبة كل الناس]

خطأ خطأ خطأ يا اخ تعرف علاه ؟؟
خاطر سمعت غير وش قالو الاولاد
هيا لله في سبيل الله نقلك وش يقولو المتزوجات
------- والله مني بالصح ------
هادي زعمة تزوجت اللي شتاتو بعد تقول : بفففففففففففففففففففففففففففففففففففففف كرهت كرهت كرهت تبدل بعد الزواج و بانتلي شوي زربت روحي معاه
انا نصحك يا عزيزتي كملي قرايتك و اخدمي و ديري مستقبل لروحك الراجل راهو اخر حاجة تخممي فيها
:shiny:

الثانية : توحشت كي كنت سيليباتير و يدراقيوني الزينين ملي زوجت وانا فالسماااااااااااااااااااااااااطة
عيشي حياتك مع صحاباتك و ادخلي واخرجي كيما تحبي
:shiny:

الثالثة : ظل راجل ولا ظل الحيط i-o:

الرابعة : ملي زوجتو وانا فالمشاكل مع والديه وش داني وش داني وش داااااااني هم الدار و الاولاد كرهولي حياتي :shiny:



الخ الخ الخ
مش غير الرجال يا اخي اللي راهم قرفانين
حتى النساء راهم كيف كيف
ولا تنسى انو دايما كاين كل الحالات فالمجتمعات
:re_gards:
​

 

[سجل أنا جزائري]

كيما قالت راجية الجنة

الزواج يصعاب اذا صعبنها في راسنا

بالك اللي سقسيتها كامل يحسو غير على المادة ما يكفيهم كفاي

و ذرك بزاف لي جون يديرها سبة باش ما يتزوجش

بسكو راه زاهي بلا زواج نسااء و تحوس و ...

علاه يربط روحو بالزواج

بصح هذاك اللي يخاف ربي و يخاف على روحو من فتنة

كون يلقى اكوزيو ما يعطلش

en fain كل واحد و القناعة تاعو انا ان شاء الله مين نستابيلازا في حياتي

ما نستناش

شكرا على الموضوع خويا
​

 

[فوفا المقلشة]

موضوعك فوور خويا
الزواج يكون مليح لما تكون الزوجة والزوج متفاهمين يعني الزوجة راضية براجلها ادا كان بوكو حلة ولا ماعندوش يعني تصبر عليه وتوقف معاه هكا نعرف انا والزوج تاني راضي بمرتو وهادي هي وهادا هو
وعطيك الصحة على الموضوع مرسيتو ...​

 

[adraa]

هههههههههههههههههههههههههههههه اححم
مزية مديتلنا لا باغميسيون حنا الصغار ههههه

well...الزواج صح مسؤولية كبيرة...

ايا ما نحبش نتفلسف بزاف تعودو تفهموها حاجة خرى...

و الجواب نتع الاسئلة:

ج1/ ان الله مع الصابرين..>>ديجا معظم اللي جايبين روحهم فالدنيا هاذي بداو حياتهم ياكلو فلخبز و الما...

ج2/ نقولها و نعاودها كل شي يجي بالقناعة و الصبر...

 

[ابوصفوان]

السلام عليكم
اديها من واحد متزوج اللي هو انا
انا قبل مانتزوج كنت داخل في حيط كيبحال واحد دحسو كاميو ولصقو فالحيط والشيفور مازال يحوس يبزقو مع الحيط
اما والحمد لله كي تزوجت صفا التفكير انتاعي و ولات عندي قابلية للحياة حتى وليت نستبن واش راني ناكل ونشرب مهما كان والحمد لله الله يكمل النعمة علينا
وماشي الصح يكونو عندك الدراهم الصح تصيب بنت الحلال اللي تزينلك حياتك

 

[mimi-ba]

سلاموووو
آه موضوعك هايل ومليح يلي فتحتيه لكل الأعمار احم احم ههههههه
ياو خيو في الوقت هدا ولا الزواج خلعة كوشمار وخوف ههههه:schmoll:
و قبل ماتخمم على الزواج خمم كي تروح تخطب واش يطلبو عليك
حنا هنا وحدة تكون منا تخطبت ماخلات للعريس باه يهدر شرطو عليه حتى قريب يطيحلهم تم هههههههه
يعني الزواج من أولو مشاكل حتى آخر نهار في حياتك و نتا تعاني
وسيرتو اذا ديتي مرا غيارة والا تحب تتفاخر هه
{يعني بيناتنا جارنا مسكين كل يوم يجي لبابا يشكي من مرتو الي راح تهبلو بلمصروف }
حنا عندنا نقولو هدو هوم الي يحبو الفوخ والزوخ النوعية هدي عندك تدي منها آو تشيب تاع الصح هههههه
​