الليكول والحطّة..

[Melia azedarach]

سلام الله عليكم ورحمته تعالى وبركاته ..
ان شاء االله راكم كامل ملاح ..
يلا رايحة نهني التلاميذ بمناسبـة الدخول المدرسي ..وان شاء الله عام مليء بالجد والاجتهاد متوج آخره بالنجاح..

أنا اليوم بحكم اني متمدرســة .. لاحظت ظاهرة غريبـة بزاف ..حيرتني ..
كيما نقولو معليش النهار الأول يعني النص نهار برك مايجيبوش البلوزات [الطابليات].. يعني نهار الدخول المدرسي لعشية يجيبوها ..مي شفت الأغلبيّـة مكانش ..وإستعراض الملابس تقولي في محلات يمكنك انك تشوف جميع الملابس المعروضة في السوق تلقاها في الليكول .. متقدرش تفرق بين الفقير والغني ..والله تحيـــــــــــــــــــــــــــر:scared:
أنا نقول أنو الآباء ميحكموش ..انهم يخليو بناتهم و ولادهم يجي لليكول بلا طابليّـة ..
يك راهي تلميذ من المفروض الطابلية دلالة على أنو جاي يقرا مي مشكيتش أنهم يجيو لليكول بـاه يدرسو جايين على جال عرض اللبســة وأشياء راكم تعرفوهــا ...
معليش يجيو نص النهار لأول بلا طابليّــة مي لعشية لازمهم يلبسوهــا

أياّ قولولي واش رايكم في هذا الموضوع ..

و ممكن آراءكم الشّخصية ان امكن ..


ويعطيكم الصّحــة ..
أدعولي بالنجاح

 

[*امينة*]

عندك الصح
الله يهديهم وكلش من الوالدين
تقبلي مروري
​

 

[نور الهدى22]

مام أنا شفت هاذي الظاهرة اللبسة والحطة والقراية ربي يجيب هههههه
تقولي راهم جايين يعرسو قاع ماعندهمش هيئة تلميذ
قولي الله يهدي برك
شكراااا خيتو+تقييم​

 

[loca]

هههههه واه صح اللبسةو حطة وستيل emo
يا ماما كيتي يانا كيتي ها عقلية gوار كي ديري خليهم يعيشو مزالو اطفال ديجا ربي يحفظلهم بن بوزيد
نيـــvــو طايح لرض و يقولك منظومة ومش عارفة صحاب باك ياكلو les cahiers كيفي انا وفي تالي متلقى والو
تعليم في l'algerie عظم الله اجرك فيه + باك تاعنا غير معترف بيه دوليا
نقراو باه ناكلو برك ماشي ثقافة
ايا و تمضي ايام ههههه
مرسي عليك ختي وتبقي على خير ​

 

[بنت الجسور المعلقة]

مرسي خيتي على الموضوع الشبآآآآآآآآآآآآآب
الله غالب كلش جاي من لوالدين معندك ماديري حنونة
وخلي لمكياج ولات لي جي تدهنلي وجها هههههه
والله كلش تبدل وتعكس في وقتنا هدا
سلامــــــو ​

 

[Orodent]

عندك الحــــــق أختي كلآمك صوآب
أنآ شدتني la vertige نهآر الأحد والله عجب
أشكآل وألوآن ومن كل الأنوآع
ربي يهديهم برك لوكآن غير جآو فآلحين في قرآيتهم هآذآك لي كآن
mais الله غآلب يآ الطآلب ​

 

[اجمل زهرة]

ههههههه لوكان تشوفي انا فالليسي وين كنت نقرا درك ختي تقرا ثم
نهار راحو يماركيو المراقب واقف عند الباب لي يشوفو لابس بونطاكور ما يدخلش ، كلاكيت والو طير لداركم بدل و ارواح بلبسة محترمة هههههه
و الطابلية و la dcarte ما نهدروش بلا بيهم ماكاش الدخلة
الحالة مزيرة grave
​

 

[AHLEM1992]

مدامهم مزالو معترفين بالباك الباقي ما يهمش
كل واحد يدير واش يحب راهم كبار و يعرفو صلاحهم
و لي بلوز انا تبالي لوكان ينحوهم كامل و يخلوهم في حصص الاعمال التطبيقية برك كيما الجامعات خير
بالتوفيق ليكم ..​

 

[اماليا]

تقولي دايرين عرض ازياء يا حوجي كل يوم لبسة

 

[ماكانش]

أهلا بيك ميسون
ربي نجحك
المشكل في المدير والمراقبين والمؤسسة
إذا كانت مرخوفة التلاميذ يديرو رايهم
نعرف ثانوية بكري كان التلميذ لازم طابلية بيضة وتوصل للركبة تاعو والله كامل هكذاك يبانو طبة
يعني كي يكون المدير مزير الحالة تزير والعكس
يعطيك الصحة والسلام على العلم والتعليم في الجزاير ...​

 

[إيمان قلب]

المشكلة الاولى فالمؤسسة التعليمية اللي ماتراقبش
عندنا واحد الليسي ماشاء الله حاطلهم افيشاج عند الباب الهندام المحترم والطابلية مقفولة
وكاين اللي راخفين الله يهديهم
والثانية من الوالدين اللي يخلو ولادهم يخرجو في هذيك الحالة .. ليوم اختي رايحة تقرى فالسيام
رايحة بلاطابلية قلتلها عندكي نسيتي لبلوزة تاعك قالتلي او نورمال ماقالولناش عليها ومكاش قاع اللي جايبها
عيطلها خويا منهيه قالها البسيها ولا احكمي الدار
يلزم تكون مراقبة من الدار اولا ومن المؤسسة ثانيا
ربي يوفقك اختي وشكرا​

 

[hadjer662]

والله غير عندك الحق حنا ماشي غير النهار الاول الطابلية تقريبا مكاننش انا مزال مرحتش لليسي حتى السمانة الجاية على حساب ما حكاولي قاللك المكيااج .................تقولي عرس ماشي مدرسة
شكرا على الموضوووووووووووووع

 

[moli_dz]

ياااااه يعطيك الصحة ختي على الموضوع فكرتيني باحسن حاجة في الدراسة اللي راح نتوحشها بزاف وهي الطابلية
ذرك ياختي مل واحد وتفكيره كيفاه كيما نتي ذرك تعتبريها الهوية تع التلميذ وصح هي هكاك
هي اللي تخليك تفرقي اذا راكي خارجة تقضي حاجتك ولا رايحة للمدرسة
mais كاين فئة اللي تعتبرها انها تبينهم صغار وماهيش مليحة
وحالة الالتزام بيها المسؤول الوحيد عنها هي المؤسسة وصرامتها من المدير الى اخر فرد فيها كل ماكان الانضباط كل ماراح تقل هذه الظاهرة
ان شاء الله مانوصلوش للزمان اللي ماتعودش الطابلية شرط من شروط المدرسة
مشكوووورة تستاهلي تقييم
​

 

[القطة الزهرية]

ايه كون جات في الطابلية معليش اي اجي معرية روحا خلالالالالالاص ان راسك يتفورماطا كي تشوفيها لاحياء لاحشمة ولا اصل كل وحدة جيبلك قصة تاع شعر وستيل تاع لبسة وانواع السيكان وصبابط عارضات ازياء وخلي الماكياج هذيك وحدها خلاص

 

[Black-Blossom]

أنا من رأيي الشخصي يعني
و من سنوات تمدرسي اللي الحمد لله انتهت
نقولك اختي من أولها البلوزة هاذي و الله العظيم ياو ما عندها حتى معنى ...
صح راني معاك في قضية انهم ما يحبوش يجيو فيها و يجوا كل واحد يحب يبين نفسو..بصح من أولها يعني هي ما عندها حتى معنى تدير كبت برك
خاصة لطلاب الثانوية ...و الأخص الذكور راني شفت واحد ما يحملها جايين فوق قلبهم
شوفي الدول المتقدمة.يستعملوها غير في الحصص التطبيقية و المخبر..اللي فيه صح المواد و المحاليل
و حنا لواشي يديروها؟؟ حصص كاملة من يبدأ الطالب و هو حاكم الستيلو و الكراس و يجرد مسكين ..حتى التجارب يكتبها ماشي حتى يسييها عمليا ...مالا علاه؟؟
مدايرينها غير حجة لحرمان الطالب من دخول القسم او المدرسة ككل
و هذا مجرد رأيي الخاص
​

 

[القطة الزهرية]

أنا من رأيي الشخصي يعني
و من سنوات تمدرسي اللي الحمد لله انتهت
نقولك اختي من أولها البلوزة هاذي و الله العظيم ياو ما عندها حتى معنى ...
صح راني معاك في قضية انهم ما يحبوش يجيو فيها و يجوا كل واحد يحب يبين نفسو..بصح من أولها يعني هي ما عندها حتى معنى تدير كبت برك
خاصة لطلاب الثانوية ...و الأخص الذكور راني شفت واحد ما يحملها جايين فوق قلبهم
شوفي الدول المتقدمة.يستعملوها غير في الحصص التطبيقية و المخبر..اللي فيه صح المواد و المحاليل
و حنا لواشي يديروها؟؟ حصص كاملة من يبدأ الطالب و هو حاكم الستيلو و الكراس و يجرد مسكين ..حتى التجارب يكتبها ماشي حتى يسييها عمليا ...مالا علاه؟؟
مدايرينها غير حجة لحرمان الطالب من دخول القسم او المدرسة ككل
و هذا مجرد رأيي الخاص
​

عندك الحق حنونة والله كلامك صواب ملي ندخلو وحنا لاصقين في هداك الكرسي نطرزو في لكرارس مافهمتش علاه

 

[somiasahraoia]

دروك وللى الغاشي يسنى الليكول غير على جال باه يوري اللبسة والحطة ديالو ماشي للقراية

 

[مايا الجزائرية]

rabi yanajhak khtito mais hadi normalment fi sem pisl lycée 9raya mkach la 1ere semain ma chakitch yjibo tabliyat wykon fi 3ilmak khti jabli rabi ghachin ayahachlo 3la tabliyat

 

[★ ميمي dz ★]

والله عندك الحق صباح وعشية تقول شي عرض ازياء
مشكوورة على الموضوع

 

[نجاة40]

قبيل طليت على الطاقة لقيت لبنات تاع الليسي يعدلو في شوافرهم بلاباراي تاع الشوافر​