حاجة توجع...لما يتغيروا عليك.. :(

[حالمة بالجنة]

ــالسلام عليكم ورحمة الله وبركاآته
كيف حالكم يا لحباآب؟
إن شاء الله تكونوا بألف خير

.....
امم بغيت نحكي على حاجة صراتلي هاد العام برك

طبعا بعدما فوتت الـBEM ودخلت للثانوية

وخصوصا مازالنا في الايام الاولى ..شفت حاجة غريبة وانو
سبحاآن الله العقلية الكل تبدلت

يعني ما نيش نحكي على المتوسط والثانوي لكن عن عقلية التلاميذ اللي كانوا معانا
تسلم عليها ما تردش تلقايها في الطريق ما تقيمش..رغم انهم كانوا صديقاتي وكنت نعاونهم

لكني تع الصح استغربت...خصوصا انو وحدة كنت نعرفها مليح تغيرت 180درجة

ولات مع جماعة تع ذكورا وهاآكا

وطبعأآ الحاجة اللي حيرتني انهم زادوا تخلعوا في اللبسة...انا ما فهمتش حاجة..الانسان لما يكبر ياك يستعقل ما يزيدش في هبالوا...يعني الوحدة لازم تزيد تتحجب اكتر من كانت
مالا انا شفت العكس تماما...سبحاآن الله مغير الأحوال...

والله انا الفكرة اللي دخلت بها انو هاذي الفترة هي فترة بناء الشخصية والعطاء

وكانوا عندي افكار بغيت نطبقها في الثانوية وهاكا

ومع التالي لقيت الناس تبدلت ولا واحد يمكن يدعمك غير اللي

يجي ويزيد في التحطيم...والله تع الصح حاجة توجع في القلب

نتوما كيفاش جاتكم هاد الفترة...وهل صراتلكم نفس ما صرالي؟

صح يمكن انو تصرالك مرة صاحبك يتغير عليك لكن جماعة ودفعة وحدة...والله حاجة توجع:sad:

وأخيـرا يا لحباب ادعوووولي بالصحبة الصاااالحة يا رب
والله هاد اللي نحتاجو اكثر في هاد الوقت

الصحبة اللي تعاوني ونعاونها باش نغيروا من واقع الناس والبلاد
وفي امان الله
ربي يوفقكم ويفرحكم
=)
​

 

[حالمة بالجنة]

شــكراآآ لكم على الإعتماد
=))
​

 

[homework]

اختي الكريمة كامل الناس تتبدل مي انت ماتقلقيش من الناس خيري 2 صحابات يكون بنات فميلة متربين و مايهمكش في الباقي لي هدر معاك صحا و لي مهدرش تهنيتي من هدرتوا و طبعا يتغيروا الأشخاص في هذه السن لأنها سن مراهقة لكن ليس في الأشياء السلبية تهلاي في روحك و في قرايتك هيا لي تنفعك و دمتي بخير

 

[meriem150491]

اهلا اختي موضوع مليح

هدو هوما العباد يا اختي غير ما تعييش راسك

انا كي مديتش لباك الغاشي اللي دا كي شغل مكانوش يعرفوني

نقولك وكتاش يعرفوك كي يحتاجو صلاحهم ميكي يقضيو حاجتهم صاي سلام ميعرفوكش

مي والله كما يقول المثل الي باعك بالفول بيعو بقشورو

عرفت بيان بلي هد العباد ميستاهلوش مني كلمة

والعباد هدو والله مكان لاه تعطيهم كثر من حقهم وتقعدي تخممي فيهم

خممي في عباد يستاهلو ويكونو يستاهلو منك انك تصاحبيهم

هيا صحيتي على الموضوع تحياتي


​

 

[ALEXIS SANCHEZ]

ماعليك غير تولفي روحك على هكذا عفايس
بويسك الناس ولاو كامل فيهم هاذي العقلية
واللي يدور عليك مايستاهلش الصحبة نتاعك
ناس كبرت ومرقت وولاو حاسبين رواحهم شادين السما
وانتي اعرفي تخيري صحاباتك
وزيدي مااديري ثقة في اي شخص في هاذي الدنيا
​

 

[Black-Blossom]

يا حسرااااه
هاذي البداية و مزااال ما شفتيش..
هكا الناس ...مستوى جديد، عقلية جديدة و لبسة خالع بيها روحو و اللي معاه P:
انت كيما قلتي هذا وين طالعين ثانوية
يعني كنتو في عالم الكبت و رحتو لعالم آخر وين الدنيا مفتوحة هكا يبانلهم
بمعنى آخر <كبروا زعما lol
بصح تلقاي اللي مازال فيهم الخير
ان شاء الله تلقي الصحبة الطيبة اللي تعاونك و تعاونيهم
و ننصحك برك..ما تزيديش تتوقعي ان الناس تقعد نفس العقلية
راهم معظمهم كيف خيط معلق في الريح
وين جا يديه ^^

 

[احلى لمة]

انا ساى كرهت قاع شيرات

 

[دنيا البسمة]

السلام عليكم

عندك الحق اختي كامل شفناها هاذي
ماشي غير فالليسي حتى في لافاك

والله ما يقيموك ولا كانهم يعرفوك
المهم
قالك اللي قيمنا نقيموه نديروه فوق الراس عمامة

واللي ما قيمناش بال ما نهدرو
ما ندوهاش فيه وخلاص​

 

[AHLEM1992]

اصبري نهار يجيبو الباك
من بعد نهار يلقاو خدمة
هادي هيا الدنيا كل واحد يشوف لمصلحتو و واش يخرج عليه
​

 

[ماكانش]

أهلا بيك حالة الجنة
ربي يرزقك الفردوس الأعلى
هذو ناس كأنهم كانو مكبوتين كانو مخلوعين من الليسي كانو ينتظرو يطلعو لليسي وينفاجرو
نقدرو نلوموهم ونقدرو نعذروهم لأنهم ذراري صغار مايعرفوش
انتي احمدي ربي على البصيرة والعقل الي عطاهولك ربي سبحانو
خيري صديقة مثلك وبتفكيرك وماتخالطيش
واذا تقدري تفيقي بعض صحاباتك فحاجة مليحة ...​

 

[ْ ~ دمعة سجدة ~ ْ]

ـــــــــــــــــــــــ
رد الأخ ماكانش مليح وخير من ردي
ــــــــــــــــــــــ

انا صراتلي في الثانوي هاذ العام
ولات كل وحدة تحوس على مصلحتها هاذا ماكان
امالا انا كل وحدة نمدها ابتسامة مصطنة وكيما بغات تفهم تفهم
انا عجبتني القعدة معا احباب قلبي الي يحبوني صح ويعاونوني ونعاونهم وسقسو عليا ....

ــ مع قعدة غدر الأصحاب..راني معاهم بلا قلب ..تغلط تخلص لا خاطر قلبي مقفل فلا مزيد من الأصحاب الخونة ــــ
​

 

[*NoOoR*]

نورمال اختي ديما تصرا هذي
في وقتنا هذا كل واحد يحوس على مصلحتو
و الحاجة الي تكون مبنية على مصلحة
سي نورمال تخلص كي تخلص هاذ المصلحة :shiny:
المهم الي باعك بيعيه و الي ماقيمكش ماتقيميهش
اعرفي تخيري صحاباتك درك
ربي يرزقك بالصحبة الصالحة و يحفظك اختي
موفقة

 

[malek2010]

واش بيك ختي انا صراتلي هد العفسة بصح ديري في بالاك غير يوصلو الباك يوليو كامل يهدرو معاك بصح العقلية تتبدل لخاطر راكم في فترة المراهقة كل واحد راح يتخذ شكل معين وانا صراتلي درت صاحبي نقعد معاه في الكلاسا و من بعد في ال2 بدلت صاحبي وهي رايحة ماتخافي والوا ختي نورمااااااااااااااال قاع حاجة ريان تبعي غير قرايتك وزدمي للقدام وان شاء الله يرزقك ربي صحبة مليحة صالحة ايا سلاااااااااام

 

[somiasahraoia]

ما تديري حتى حاجة في بالك خطيك منهم مزيا عرفتهم على حقيقتهم من دروك

 

[waba]

rbi ywf9k f9raytk w yb3thlk sahba mliha mliha li tfhmk b1

​

 

[═♥.ЈŪšť_ màn.♥═]

..
و الله فترة الثانويــة هي اصعبــ فترة في الحياة
و الواحد لازمــ يعيشــ معاها .. على حسابــ الظروفــ
مي كيما قلتــ الليسي تحلابــ .. :shiny:
اللبســة و العقليــة و ليكونيسونسـت و هكا حوايجــ
مي ربي يهدي ما خلقــ
:shiny:​

 

[Black heart]

هاذا هو الليسي اختي سدي ودنيك وتبعي قرايتك هذا مكان وما تسمعيش هدرت الناس بويسك جامي يهدرو الصواب
وصحاباتك وحدة با بليس .
good luck​

 

[أم راضية ~_]

السلام وعليكم
أول حاجة الله يثبتك على دينك و يخليلك العقل
هكدا قاتلي ماما نهار حكيتلها واش راكي تحكيلنا دوكا
واش صرالك هو نفسو صرالي ليا :sad: :sad: :sad:
علابالك لوكان ماشي العقل ودعاوي الخير، لوكان راني كاش ما درت في روحي ، الحمد الله هداني ربي لوحد الطريق فيها ناس طيبين على الأقل ما يخموش يضروني
حكايتي أنا مع وحدة كانت صاحبتي و عندها بلاصة كبيرة في قلبي و حتى هي كانت تتفاهم معايا و تجري ورايا غير باش نكون صحبتها ; و نهار طلعنا لليسي تبدلت 360 درجة (دارت على روحها) :cra_zy: ولات تمشي مع واحد :scared: و غيرها ،أنا انصدمت :tears:و اللي كمّل عليا أنو كل البنات اللي كانو يعرفونا ما حاولوش ينصحوها و هوما تاني كي تسلمي عليهم تقول سلمتي على حيط :schmoll: ، المهم سببولي صدمة كبيرة و أزمة نفسية دفعت ثمنها نتائجي الدراسية :sad: :sad: :sad::crying_1::crying_1: :crying_1: :crying_1:
على جال هادي اللي راني نحاول نعطيك نصيحة عن تجربة ,من كل قلبي راني نهدر :sad: جرح كبير :tears: :schmoll:
بصح نقولك حاجة هوما الخاسرين والله هوما الخاسرين ،الإنسان المؤمن ربي معاه و صاحب النية دايما ربي ينصرو و هاد الكلام راهو عن خبرة الحمد الله الحمد الله الحمد الله الحمد الله
ربي ينجحك ربي يوفقك ربي يجبر بخاطرك و ربي يعطيك ما تتمناي
و عندي قصيدتين كتبتهم بعد خيبة أملي من صديقاتي كاش نهار راني نحطهم موضوع :shiny:
سلام و اسمحيلي كي طولت عليك :shay: :shay: ​

 

[حمد العساس]

يا ختي لعزيزة
دوام الحال من الموحال و كيما يقولو
الحيات حتا تختبرك باش تتعلمي منها
تسما حبيت نقولك يا ختي من صحاباتك هادو تعلمي راهي اكبيريونس جديد و اعرفي واش تصاحبي المرة هادي باش ماتصرالكش كي تروحي للجاميعا تاني
يعطيك الصح راكي درتي موضوع جيد صراحة وهاد المرحلة اكل فتنا هادا هو الليسية
​

 

[القطة الزهرية]

سلالالالالالالالالام
هدي غير سن المراهقة برك مكان والو وربي يهدي ماخلق