حاجة توجع...لما يتغيروا عليك.. :(

[حالمة بالجنة]

اختي الكريمة كامل الناس تتبدل مي انت ماتقلقيش من الناس خيري 2 صحابات يكون بنات فميلة متربين و مايهمكش في الباقي لي هدر معاك صحا و لي مهدرش تهنيتي من هدرتوا و طبعا يتغيروا الأشخاص في هذه السن لأنها سن مراهقة لكن ليس في الأشياء السلبية تهلاي في روحك و في قرايتك هيا لي تنفعك و دمتي بخير

اهلا بك اخي
صح وكاين منها
بصح المشكلة وين راهم دوك2 صحابات
اممم علابالي كنت متوقعة لكن مشي بهاد الدرجة
ان شاء الله خي
ربي يحفظك وشكرا على النصائح
أسعدك الله
​

 

[حالمة بالجنة]

اهلا اختي موضوع مليح

هدو هوما العباد يا اختي غير ما تعييش راسك

انا كي مديتش لباك الغاشي اللي دا كي شغل مكانوش يعرفوني

نقولك وكتاش يعرفوك كي يحتاجو صلاحهم ميكي يقضيو حاجتهم صاي سلام ميعرفوكش

مي والله كما يقول المثل الي باعك بالفول بيعو بقشورو

عرفت بيان بلي هد العباد ميستاهلوش مني كلمة

والعباد هدو والله مكان لاه تعطيهم كثر من حقهم وتقعدي تخممي فيهم

خممي في عباد يستاهلو ويكونو يستاهلو منك انك تصاحبيهم

هيا صحيتي على الموضوع تحياتي


​

وبك اختي
ربي يحفظك
تع الصح ان شاء الله نحاول
اييه والمشكلة انو دوك العباد ما لقيتهومش =))
ربي يرزقنا بالصحبة الصالحة
يسلمة حنونة
يعطيك الصحة على ردك
=)
​

 

[حالمة بالجنة]

ماعليك غير تولفي روحك على هكذا عفايس
بويسك الناس ولاو كامل فيهم هاذي العقلية
واللي يدور عليك مايستاهلش الصحبة نتاعك
ناس كبرت ومرقت وولاو حاسبين رواحهم شادين السما
وانتي اعرفي تخيري صحاباتك
وزيدي مااديري ثقة في اي شخص في هاذي الدنيا
​

امم صح على حساب الشوفة لازم نوالف من دروك
تع الصح...يعرفك غير في صلاحو تكمل المصلحة يمحوك من القائمة
ربي يهدينا
شكرا لك اخي على ردك واهتمامك
ربي يحفظك
=)
أسعدك الله
​

 

[مابقاش بزاف.Dz]

ياو ربي يهديك واش شفتي و واش ريتي مازال الخير القدام غير وجدي روحك حنونة
ما بقاش بزاف

 

[عفوفة]

كاينة ختي صح ... انا راني سنة ثانية الآن وصراتلي العام اللي فات.... مي شكون الي تجي وتلعبها علي والله ما نخليلها... المهم بزااف ناس تبدلو حتى انتي تتبدلي رح يولي عندك منظور آخر للنديا صدقيني... لكن ماشي باه تولي تتكبري عالغاشي رح تتبدلي من ناحية تفكيرك فراستك فمستقبلك...... خلي الايام فقط تمر ورح تلاحظي ذلك سلام وبالتوفيق حنونة

 

[ملكًة الاحسآس]

وعليــكم السلام
ايه ياأختي مازال ماشفتي والو ، هدو كي شغــل كانو في دنيا وكي طلعو لليسي بانتلهم دنيــا وحد أخرى
ماتكسريش راسكـ بيهم كــامل ، احمدي ربي على العقل الي مدلكـ ، ربي يكملكـ هكدا
أنتي ديري وحده ولا زوج صحاباتكـ كيفكـ ويخممو كما أنتي ، والباقي ماتعمريش راسكـ بيهم
ربي يوفقكـ حنونه ، ويكملكـ بعقلكـ
​

 

[nina bonoise]

لي متربي و الله ما يتبدل

 

[حالمة بالجنة]

يا حسرااااه
هاذي البداية و مزااال ما شفتيش..
هكا الناس ...مستوى جديد، عقلية جديدة و لبسة خالع بيها روحو و اللي معاه p:
انت كيما قلتي هذا وين طالعين ثانوية
يعني كنتو في عالم الكبت و رحتو لعالم آخر وين الدنيا مفتوحة هكا يبانلهم
بمعنى آخر <كبروا زعما lol
بصح تلقاي اللي مازال فيهم الخير
ان شاء الله تلقي الصحبة الطيبة اللي تعاونك و تعاونيهم
و ننصحك برك..ما تزيديش تتوقعي ان الناس تقعد نفس العقلية
راهم معظمهم كيف خيط معلق في الريح
وين جا يديه ^^

على حساب الشوفة راه تصرالي بزاف
ربي يستر برك ههه
=)
ان شاء الله نلقاهم
والله هادو اللي نحوس عليهم
تع الصحربي يهدينا
شكرا لك حنونة على الد
ربي يوفقك
=)
​

 

[حالمة بالجنة]

انا ساى كرهت قاع شيرات

اهلا بك اخي
ان شاء الله مازال كاين اللي فيهم الخير
ربي يوفقنا باش نلقاوهم
وربي يرزقك ببنت الحلال
شكرا لك
=)
​

 

[حالمة بالجنة]

السلام عليكم

عندك الحق اختي كامل شفناها هاذي
ماشي غير فالليسي حتى في لافاك

والله ما يقيموك ولا كانهم يعرفوك
المهم
قالك اللي قيمنا نقيموه نديروه فوق الراس عمامة

واللي ما قيمناش بال ما نهدرو
ما ندوهاش فيه وخلاص​

ايييه صح حنونة
ربي يقدرنا
راني معاك في هادي تع الصح
ربي يهدينا برك
يسلمك حنونة على الرد
بوركت
=)
​

 

[حالمة بالجنة]

اصبري نهار يجيبو الباك
من بعد نهار يلقاو خدمة
هادي هيا الدنيا كل واحد يشوف لمصلحتو و واش يخرج عليه
​

ربييي يستر ههه
هادي هي كيفاش ولات الدنيا
ربي يرزقنا بالصحبة الصالحة
شكرا لك اختي
=)
​

 

[حالمة بالجنة]

أهلا بيك حالة الجنة
ربي يرزقك الفردوس الأعلى
هذو ناس كأنهم كانو مكبوتين كانو مخلوعين من الليسي كانو ينتظرو يطلعو لليسي وينفاجرو
نقدرو نلوموهم ونقدرو نعذروهم لأنهم ذراري صغار مايعرفوش
انتي احمدي ربي على البصيرة والعقل الي عطاهولك ربي سبحانو
خيري صديقة مثلك وبتفكيرك وماتخالطيش
واذا تقدري تفيقي بعض صحاباتك فحاجة مليحة ...​

وبك أهلا وسهلا اخي سفيان
آميـــن يا رب وإيـــاك
ههه تع الصح
تعقول عمرهم ما قراو ولا لبسوا...ربي يهدينا
ولله الحمد...مع اني نظن انها حاجة عادية =)
والله غير في هادي تخاف...تع الصح وليت نخاف..علاخاطش لما يشوفوك تقرا وهاكا يقلبوا عقليتهم على جالك ويولي يخمم كيفك غير علا مصلاحتو
ربي يرزقنا بالصحبة الصالحة برك
وعلى التفياق...الي تهدر معاك تقول كي شغل راك تعايروا..مع انك تهدر بشوية وماش من النهار الاول لازم تعاشرهم امبعدا تهدر معاهم ومرات يقلبوا عليك..على العموم ربي يهدينا
وشكرا لك اخي على الرد
​

 

[Hadjer_HmD]

سلآم عليكم
موضوع فالصح ختي ,,
لي كآآين قلتيه ، وحنآ ماعلينآ غير نقولو الله يهدي ويثبتنآ على الطآعة
بويسك لفسآد ولعوج رجع مودآ في بلآدي
ربي يوفقك ,

 

[حميدة المازونية]

واه نيشان ختي حالمة بالجنة صراتلي هدي الضربة انا تاني .و لي يديروها غي لييخلعهم الليسي و انا نقولك لي ما يقيمكش ما تقيميهش و تشوفي مع الوقت هوما يولو يحوسوا عليك .d'accord حبيبتي هادو لي كيما هاك حالهم يجي صعيب .

 

[شهرزاد32]

السلام عليكم
عندك الحق اختي كامل الناس يتبدلو كيطلعو لليسي
يحسبو في رواحهم طلعو للمريخ
وما زال تشوفي في الجامعة
وكيخدمو وهي رايحة
وهدا دليل على ضعف الشخصية ليس الا
تقبلي مروري اختي​

 

[missa_1]

خير عليك خيتو
ايه ضوك ولات هك خيتو كل ما الوقت يتبدل الناس تتبدل معاه
المهم اختي انت اقعدي بنيتك ومتتبدليش يجي نهار وين يعرفوك في صوالحهم
وربي ينجحك خيتو ويوفقك في قرايتك
سلام​

 

[لؤلؤة القرآن]

اهلالا حنونة
اولا نشاء الله تلقاي الصديقة الصالحة
انا ثانيك راني كيفك
نهار لول دخلت تشوكيت فيهم كامل
بنات الكل مع الولاد
و لي تحكي ولي تتقابض مع والولاد ولي .......
و الله صحباتي قريت معاهم هو صح نورمال نحكو اهلا اهلا
ما تبدلو كومبلاتمو
منعرف الا يحسابو في رواحهم كبرو و لا مفهمتش والوو
اللمهم المكياج ؟؟؟؟؟
لبسة تع عرس ؟؟
خيمار كيفاه كون جاء اوموا خيمار عادي بكل راه فولار و بتيتماش خارجة
بفففففففف و الله صح يشوكو
مفهمتش ميخافوش من ولديهم يخافو من ربي
اسمحولي طولتما و الله هذي هي
راني طلعت للي و ندمت تع الصح

 

[حالمة بالجنة]

ـــــــــــــــــــــــ
رد الأخ ماكانش مليح وخير من ردي
ــــــــــــــــــــــ

انا صراتلي في الثانوي هاذ العام
ولات كل وحدة تحوس على مصلحتها هاذا ماكان
امالا انا كل وحدة نمدها ابتسامة مصطنة وكيما بغات تفهم تفهم
انا عجبتني القعدة معا احباب قلبي الي يحبوني صح ويعاونوني ونعاونهم وسقسو عليا ....

ــ مع قعدة غدر الأصحاب..راني معاهم بلا قلب ..تغلط تخلص لا خاطر قلبي مقفل فلا مزيد من الأصحاب الخونة ــــ
​

اهلا بيك حنونة
ايه ولاو قاع هاكا
ربي يلاقينا بيهم ويرزقنا بالصحبة الصالحة
شكرا لك اختي على الرد
ربي يوفقك ويخليلك احبابك
=)​

 

[حالمة بالجنة]

نورمال اختي ديما تصرا هذي
في وقتنا هذا كل واحد يحوس على مصلحتو
و الحاجة الي تكون مبنية على مصلحة
سي نورمال تخلص كي تخلص هاذ المصلحة :shiny:
المهم الي باعك بيعيه و الي ماقيمكش ماتقيميهش
اعرفي تخيري صحاباتك درك
ربي يرزقك بالصحبة الصالحة و يحفظك اختي
موفقة

اهلا بك حنونة
ايه لازم نوالفها

تشوكيت لاني ناس قراب ليا داروهالي
وماش وحدة ولازوج
ووصلوا انهم يركبوا في الطونوبيلات وهاكا
ربي يهدي ما خلق,,,تهدر معاهم كي شغل راك تهدر مع الحيط
اييه تع الصح وهادالحاجة كاينة منها بزااف
ان شاء الله ربي يرزقنا بالصحبة الصالحة
واياك اختي
بالتوفيق لك وللجميع​

 

[حالمة بالجنة]

واش بيك ختي انا صراتلي هد العفسة بصح ديري في بالاك غير يوصلو الباك يوليو كامل يهدرو معاك بصح العقلية تتبدل لخاطر راكم في فترة المراهقة كل واحد راح يتخذ شكل معين وانا صراتلي درت صاحبي نقعد معاه في الكلاسا و من بعد في ال2 بدلت صاحبي وهي رايحة ماتخافي والوا ختي نورمااااااااااااااال قاع حاجة ريان تبعي غير قرايتك وزدمي للقدام وان شاء الله يرزقك ربي صحبة مليحة صالحة ايا سلاااااااااام

اهلا بك اخي
ههه يبدوا لي انا برك زدت فيها بصح لما يكون من ناس قراب شويا تنضر
بصح المشكلة العقلية تاعهم ما تتسقمش بالعكس يولوا حاسبين رواحهم وهاكا ما تفهم والوا وهوما را قراية لا زدمة
اميييين يا ب واياك
وعليكم السلام
​