تارت جينواز بنكهة الحامض + نصائح لنجاحها بالشرح المصور

[اميرة الساحل]

السلام على الجميع​

- تارت جينواز من اروع الكيكات اللي نحبها لاانها جي خفيفة و مرة كانت دورة لتعلم فنون الطبخ في المنتدى و عملت الاخت nada242008 تارت جينواز و جربتها و كانت نتيجتها اروع حيث وليت نعتمد على طريقتها و نشكرها بزاف على الكيفية و على جميع وصفاتها الصحيحة و المضمونة و للاستفادة اكثر حبيت نطرح عليكم اليوم موضوع خاص بتارت جينواز لان مرة عملت عليها موضوع لكن الفترة اللي انقطع فيها المنتدى حذفت بعض المواضيع بدون اطالة اليكم ​

- اولا نصائح خاصة لنجاح تارت الجينواز
- و ثانيا شرح مصور لعمل تارت جينواز بنكهة الحامض و هنا لكي الاختيار في التزيين هي الاساس راه في تحضير الجينواز ​

1/نصائح لنجاح كيكة الجينواز
1-الجينواز تعتبر من الكعكات الاساسية لتحضير معظم الطورطات و هي خفيفة لعدم احتوائها على دهون ( لا زيت ولا زبدة)
2-قبل البدء في تحضيرها يستلزم اخراج البيض من الثلاجة ساعة قبل التحضير أي يكون بدجة حرارة الغرفة
3-يستحسن فصل الصفار عن البياض و هي باردة حتى يسهل عملية الفصل
4-في الاصل جينواز تخبز بدون خميرة كيميائية لكن نضيفها للاحتياط
5-نقوم بنخل ( غربلة) الفرينة مع رشة الملح و خميرة الحلوى مرتين لاعطاء نتيجة افضل
6-عدد ملاعق الماء = ½ كمية البيض
7-خفق الصفاراولا مع كمية السكر ثم خفق البياض مع كمية السكر المتبقية لاننا لو قمنا بخفق البياض في البداية ينكمش مع الوقت و درجة الحرارة المرتفعة في المطبخ
8-كيس فانيلا نضيفه للصفار و للبياض للقضاء على رائحة البيض
9-بعد الانتهاء من خفق الصفار نغسل مضربي الخفاق الكهربائي جيدا و نمسحها قبل خفق البياض
10-يسخن الفرن على 180 درجة قبل البدء في الخفق
11- ندهن الصينية بالزبدة و نرشها بالفرينة مع نزع الفرينة الزائدة
12- يجب الا يتجاو خليط الجينواز ½ ارتفاع الصينية ولا يجب الفتح على الكيكة قبل نضجها
13-الحشو يكون حسب اختيارك ممكن تحشى بالكريمة شانتيي او كريم باتيسيار او كريمة الزبدة و من الاحسن سقي الكيكة بالسيرو حتى ماتبقاش ناشفة وكذلك بالنسبة للتزيين لك الاختيار
14-ضروري باش نخليها على الاقل ½ يوم في الثلاجة قبل التقديم حتى تبرد و تشرب كل المكونات فيها و تعطي ذوق رائع​

ملاحظة
- نفس الشيء بالنسبة للبيسكوي رولي ( gateaux rouler) نتبع نفس الخطوات الفرق فقط في صينية بحيث يخبز في صواني المستطيلة الشكل او المربعة و هنا خليط جينواز يكون سمكه قليل وليس ½ ارتفاع الصينية
- مدة الطهي في بيسكوي لا تتجاوز من 10 الى 15 د​

​

3/ان شاء الله نكون وفقت في الشرح المفصل و اليكم كيكة من صنعي نبدا على بركة الله
المقادير

-6 بيض
-180g سكر حرش ( هنا سكر يقسم على 2 نصف يخفق مع الصفار و نصف مع البياض)
-180 g فرينة
-رشة ملح
-3م.ك ماء ساخن
-2 سكر فاني او فانيلا
-1 خميرة كيميائية
التحضير
-نفصل الصفار عن البياض نضيف للصفار كيس سكر فاني و نبدا بالخفق تدريجيا بسرعة متوسطة ثم نضيف السكر ملعقة بملعقة و 3 م.ك ماء ساخن مع مواصلة الخفق و زيادة السرعةنكمل كمية السكر و نواصل الخفق الى ان نتحصل على كريمة ثقيلة فاتحة اللون

​

-ثم نخفق بياض البيض + كيس سكر فاني جيدا ثم نواصل الخفق باضافة كمية السكرالمتبقة تدريجيا حتى نتحصل على مورينغ

-نغربل الفرينة + رشة الملح + الخميرة الكيميائية مرتين

-نضيف خليط الفرينة و المورينغ بالتناوب الى خليط الصفار على 3 مرات الى ان نكمل الكمية لنتحصل على خليط متجانس فيه اكبر قدر ممكن من الهواء

-نضع المزيج في مول مدهون و مرشوش بالفرينة و نرفد المول قليلا ونخبطوه شوية على الطاولة باش تستوي العجينة​

ثم ندخله الفرن او مانفتحش على الكيكة حتى تنضج و لتاكد من نضجها ندخل طرف السكين فور خروجها من الفرن ننزع الاطراف بسكين حاد من الجوانب المول ثم نقلبها على مشبك حتى لا تؤثر عليها الرطوبة و هذه النتيجة النهائية

معذرة راني خليتها حمارت بزاف :cra_zy::cra_zy::cra_zy:لهيت بالهدراههههه نصيحة مني راقبوها مليح ماتغفلوش عليها _o:_o::schmoll:​

دوك نروحو لمرحلة التزيين و لك الاختيار اختي انا زينتها بكريمة الحامض و كريم شانتيي و سقيتها بالسيرو و هو ضروري لهدا النوع من الكيكات لانها في الاصل جي ناشفة بدون دهون ولازم نسقيها باش جي رطبة و انت اختي تتحكمي في نكهات و الاذواق كيما تحبي​

لتحضير الكريم شاتيي
نخلط كاس حليب بارد جدا+ 100g كرام شانتيي نخفها جيدا بالخفاق الكهربائي الى ان نتحصل على كريمة

للسيرو
-كاس ماء / ½ كاس سكر عادي + م.ك عصير قارص و لك الاختيار في نكهات في كسرونة ندير الماء مع السكر + عصير القارص و نخليه على نار كي يبدا يغلي نضيف حبات الاجاص بعدما قشرتها و قسمت الحبة على 4 نحسب 5 د و نطفي عليه من بعد ننزع حبا ت الاجاص و مباشرة نغطسها في الماء البارد باش توقف الطهي من بعد ننزعها من الماءو نخليها على الجهة و يبقى السيرو على جهة بنكهة الاجاض نخليه حتى يبرد باش نسقي بيه الكيكة​

لكريمة الحامض
-تقريبا كاس سكرنتاع لتاي او كاس صغير
-كاس عصير حبة قارص ( انا درت تقريبا كاس عصير حبة قارص و الباقي كملتو ماء)
-حبة بيض
-مبشور حبة قارص
-ملعقة قهوة نشاء
-ملعقة كبيرة زبدة طرية
-ذرة ملون غذائي لون اصفر​

التحضير
-في كسرونة ندير السكر + عصير القارص+ حبة بيض + الزبدة + المبشورو نخلط الكل على نار هادئة جدا و نبقا نخلط و نشوف لان اصل هدي الكريمة مانديرش نشاء+ الملون لكن هذه اضافة من عندي انت تلاحظي اذا ماعقدتش ضيفي النشاء+ ملون من بعد كي تبدا تعقد نحيها من نار و صفيها حتى تتخلصي من المبشور اللي فيها و تتحصلي على كريمة لامعة و رطبة اتريكها تبرد من بعد زيني بيها تارت جي فيها ذوق الليمون ممممممممم

بعدما طابت الكيكةو خليناها بردت مليح و كنا وجدنا الكريمة و سيرو نبدا في تزيين
نقسم الكيكة على نصفين و نسقي كل نصف بالسيرو اللي حضرناه مليح

من بعد نطلي جزء من الكيكة بالكريم شانتيي انا هنا قسمت الكريمة على 2 جزء خليتو للتزيين الخارجي و الجزء اللي حشيت بيه الكيكة خلطتو مع مبشور الليمون مادام انها بنكهة الحامض من بعد درت قطع الاجاص اللي حضرتهم لصقت الجزء 2 من الكيكة و زينتو بالكريم و بالكاوكاو ايفيلي المحمص قليلا مع الجوانب ثم و ضعت كريمة الحامض من الفوق و بواسطة شوكولا مذابة عملت تزيين من الفوق و صور توضح اكثر

و هذا شكلها نهائي من الاحسن بل ضروري خليها تبات في الثلاجة قبل تقديمها باش تتشرب كل مكوناتها و جي منعشة في مذاقها و هكدا تتحصلي على كيكة او تارت مضمونة خير ماتشقاي تشريها من برا و زيد من جهة اخرى تفرحي انك نجحتي فيها:sheer: ان شاء الله نكون وفقت في الشرح ادعولي باذن الله تتحقق امنيتي :shay:تحياتي للجميع و بصحتكم​

:heh::ax_flw::heh:​

 

[السعيدة بربها سارة]

مشكوورة اختي كون يشوفها زوجي دوك يقولي نوضي ديريها لي؟ هيهييه

 

[اميرة الساحل]

مشكوورة اختي كون يشوفها زوجي دوك يقولي نوضي ديريها لي؟ هيهييه

الله يسلمك اختي نورتي الصفحة و ان شاء الله جربيها و تفرحي زوجك و تعمليها ليه مفجاة بلا مايقلك ​

 

[assia11]

حلوة رائعة أختي شكرا لك

 

[imane27]

جاتك هايلة يعطيك الصحة

 

[كوثر الوهرانية]

هااااااااااااااايلة اختي اميرة الساحل جاتك الطرطة راءعة بارك اله فيك على لوصفة والشرح المفصل راكي وفيتي و كفيتي الله يعطيك ما راكي تتمناي في حياتك
عيد ميلاد زوجي راه قريب نخدمهاله بطريقتك عجبتني بزاف بصحتكم

 

[عشقي الامارات]

emmmmmm
chahitini
ya3tik essa7a

 

[Djazaire-El-Ghalia]

يعطيك الصحّة أميرة تبان مشريّة

 

[sara76]

روووووووووووووووووووووووووووووووعة الله يعطيك الصحة

 

[حكيك]

روووووووووووووعة
جاتك هايلة يعطيك الصحة

 

[BASMA19]

ما شاء الله , روعة
تصلح لأعياد الميلاد , شكرا جزيلا على الشرح المفصل و جاري التطبيق بإذن الله

 

[fleur flower]

أممممممممممممم
يعطيك الصحة أختي جاتك هايلة​

 

[اميرة الساحل]

شكرا لكل وحدة باسمها ردود كم افرحتني تحياتي لكم جميعا​

 

[ام حنان13]

يعطيك الصحة اختي الله يبارك
​

نحب بزاف تورتات الحامض

ان شاء الله نجربها ونصورهالكم
​

 

[ياسمين س]

كيكة رووووووووووووعة يعطيك الصحة

 

[الحلم الوردي]

يعطيك الصحة
جاتك هايلة
بصحتك
​

 

[أميرة اميرة]

واااااااااااااو رووووعة و الله تقولي عليها مشرية تبارك الله عليك حبيبتي اميرة يعطيك الصحة و شرحك بسيط و مفهوم الله يرزقك الجنة الحبيبة و يعوض تعبك بالصحة و الراحة و انا سبق و جربت تارت جينواز اللي دارتها الغالية ام ندى و جاتني رووووووعة بصح هاد المرة ان شاء الله نجرب التارت تاعك شهاتني بزاااااااااااااااااااف
الف الف شكر غاليتي

 

[dahbito]

دائما مبدعة يعطيك الصحة اميرة الساحل

 

[اميرة الساحل]

شكرا و شكرا لكم جميعا و تحية للعزيزة اميرة و الله كلامك رفع من معنوياتي شكرا على دعواتك و ان شاء الله نكون كامل من اهل الجنة شكرا لك عزيزتي مرة اخرى

​

 

[ام ايناس وفاروق]

شكرااااااااا اختي اميرة الساحل على الوصفة وطريقة الشرح وعلى الوضوح والدقة ربي يعطيك ما تتمني ان شاء الله وصفاتك كلها تنجح