قولولي واش ندير ..الامر مصيري و عاجل

[salisasso]

السلام عليكم ياناس اللمة
صح عيدكم وكل عام وانتوما بخير
بلا مانطول عليكم ندخلو في الموضوع مباشرة
انا بنت في سن الزواج تعرفت على شخص (او بالاحرى هو اللي خلاني نتعرف بيه باسكو شافني في الجامعة وعجبتوا وحوس على نيميرو تاعي الشخصي و جابوا وعيطلي ..*هو وليد بلادي وخدام ونضيري في العمر اكبر مني بشهرين*هدرت معاه بالنية نتاع وحدة ماشي حابة اللعب والزهو وتجواز الوقت نتاع شباب وشابات هاد الوقت وقتلوا باللي الا راك تحوس عليا تقدم للخطبة - متقولوش راكي كترتي ومن اللول بديتيها بالخطبة - مي هاد الوقت لوكان مانزيروش عليهم يعقبوا بينا الوقت هاداماكان صافي ماكاش حاجة رسمي وانا مانيش حابة بروح وقت من عمري في باطل -
وهو تاني قال راني ناوي على الخطبة ) هدرت معاه عرفني عرفتوا عجبتني عقليتوا مبدئيا عجباتوا عقليتي surtout كي قتلوا تقدملي فهم باللي راني مانيش نتاع تمسخير

الحاجة الثانية اللي خلاتني في حيرة من امري هي:
قبل مانعرف الشخص اللول كنت قبلوا نعرف شخص آخر غير في التليفون*من العاصمة كان يخدم وحبس* تعلق بيا بزاف وجوز معايا perioda مليحة تقريب 9 اشهر وهو معايا وفجاة انقطعت اخباروا عليا تليفونوا مبلع سقسيت عليه صاحبوا قالي ماشفتوش عندي مدة ..هاديك هي بقيت مييييييييييين داك نسييي نعيطلوا ماكان والوا وامبعدا فاتت مدة6 اشهر وهو غايب ماني عارفة عليه والو حتى والفت باللي فلان صايي راح ميزيدش يولي
ليلة العيد عيطلي وش راكي.. اسمحيلي كي سقسيتوا تلفونك علاه مبلع قالي طاحلي في البحر وانا كنت خدام مالتيتش باش ندير تليفون وحد اخر والا nrécuperi la puce انا كي قالي هاكا زعفت والزبل طلعلي وقتلوا باللي راني تعرفت على وحد آخر و راني معاه b1 وراح يخطبني
المرة اللولة كي قتلوا هاكا قالي ربي يهنيك وتهلاي في روحك وامبعد زاد ايامات و عيطلي قالي راني راح نخدم في حاسي مسعود في شركة مليحة والراتب نتاعي مليح وراني حاب نشوفك و نهدروا على الخطبة وكيفاه نجيك لداركم
انا كي قالي هكا راسي حبس ومعرفتش كيفاه ندير وليت نقولوا واللي راني معاه دركا كيفاه نديرلوا وراه ناوي الحلال معايا
قالي هو خممي مليح و امبعد قوليلي
انا هنا معرفتش واش ندير
شكون اللي نحكموا في يديا وشكون اللي نطلقوا
معرفتش معرفتش واش ندير دخت وراني في حييييييييييييييييرة كبييييييييييييييييييييييييرة
ربي يعيشكم يا احبابي قولولي واش نديييير
الامر جدي ومصيري ومادابيا اصحاب الخبرة يفيدوني ويعطوني الراي الصواب
وربي يجازيكم كل الخير
ردولي في اقرب وقت من فضلكم ​

 

[sahiko hamza]

لحد الآن الصح ماكانش
انا نقلك حبيبك لي يجيك لدار ....
​

 

[مصري مواليد الجزائر]

لحد الآن الصح ماكانش

انا نقلك حبيبك لي يجيك لدار ....​

اخونا حمزة قال الخلاصة .. وانصحك بعدم الاستعجال .. ربنا يوفقك

 

[sahiko hamza]

اخونا حمزة قال الخلاصة .. وانصحك بعدم الاستعجال .. ربنا يوفقك

ربي يعزك خويا المصري
انا درت الواجب تاعي ...:up:
​

 

[MiSs Sisi StyLe]

ختي ربي يجيبلك الي فيه الخير و احكمي عقلك قبل قلبك هاد وش راح نقلك و استخيري ربك و لعل تلقاي حل للمشكل تاعك​

 

[la_safa]

السلآم عليكم ~

اختي كي تحيرلكـ في حآجة صلي صلآة الاستخآرة ,,
و مآدآم حآجة جدية و فيهآ خطبة مآ بقآتش فيهآ تخبية قولي لمآمآكـ
و هي تفهمكـ و تنصحكـ
قتلكـ هكآ لآخآطر امكـ لي تعرف مليح و تحبلكـ الخير ,,

و ربي يقدملكـ لي فيه الخير ان شآء الله ْ~
​

 

[dana1993]

wi kima gal lahk hamza
li nawi lahlal kayn bab adar w li 3inou fik sah raw yjik
rabi ykoun fl3oun​

 

[salisasso]

مرسي خاوتي يعطيكم الصحة

 

[بيّاع الورد]

صاحب حسن النية اولاً .
بالتوفيق​

 

[عليلو 24]

والله ماعندي فكرة انا تاني حاصل في مشكل كيما تاعك
ربي يسهلك​

 

[الشلفي02]

li yal7ag lawal bsa7to
slm

 

[بنت الـ25]

السلام عليكم ورحمة الله وبركاته
انا من جهتي ننصحك تبعدي على هاد الطريق لأنها متوصل لحتى نهاية
واللي يبغيك يجيك للدار
وربي يقدم اللي فيه الخير


​

 

[blida2008]

شوفي اختي انا مراحش ننصحك لكن نعطيك راي
و انت شوفي ظروفك

مين تطلقي مين اتخلي شوفي يا حنونة
ما تدي غير لكتبهولك ربي لذالك ارمي اتكالك على الله
صلي صلاة استخارة
الامر ثاني الكلام بزااف ما اتصدقي الاحد
غير لي اجي و يطرق باب داركم
و هو لي باحث عليه


********
ربي يكتبلك الخير

​

 

[fatima der]

فعلا شر البلية ما يضحك

اه يا رب لا تغضب ولا تخسف بينا الارض يا رب

اصبحنا في زمن ناس تصلي الاستخارة يلا تكمل علاقة ولا لا ( راه ناوي الحلال)

ربي يهديك ويهدينا

 

[amel amoula]

ما تتسرعيش هو خلاك ومن بعد رجع ليك ونتى عرفتيه غير فى التيليفون
يعنى حتى ولو عرفتيه اكيد متعرفيهش مليح

والتانى من الاول قالك نجى نخطبك يعنى ناوى الحلال والتانى غار كى قلتيلو راح نتخطب هدا ماكان

انا نقولك خمى مليح والزواج ماشى ساهل لانو هد الانسان راح تعيشى حياتك كامل معاه

وزيدى صلى وش نقولك هدا مكان

 

[بياديق الشطرنج]

شوفي يا ختي ماتخميش بزاف بقلبك خمي بعلقك وانا كون جيت في بلاستك نعطيهم مهلة شهر واللي يزرب يجي هذاك هوا اللي كتبهولك ربي

 

[أم أنس الموحّدة]

الله المستعان

مشكلة والله غير مشكلة والسلام

يا اختي سامحيني على الكلام هذا لاني راح نخاطب فيه كل البنات اللي في مثل سنك او اقل او اكثر

مانيش عارفة كيفاش يعطيك قلبك تحكي مع هذا وهذا حتى لو كنتي جادة

حبيبتي الجاد ما يجاوبش على مكالمة من مجهوووول الهوية

حبيبتي هذ الانسان اللي شافك في الجامعة لو كان جاد كان ما يحوسش على رقم هاتفك كان يحوس على عنوان بيتك ويجيك مباشرة الى قلبتي تبارك الله ما قبلتيش ربي يجيبلو ما احسن وانتي بالمثل لكن هذ التلفون هو اللي راه ينزع حياء الفتاة المسلمة وينزعها من محارها

اما الانسان الثاني يا اختي راكي غلطتي من الاول كي حكيتي معاه

فاولا عليكي الندم على ما اقبلتي عليه
ثانيا ما تزيديش تحكي معاهم في الهاتف والا المكالمة الاخيرة تكون عبارة عن اخر كلام يكون بيناتكم وهي ان تشوفي شكون اللي يجي لداركم معناهم في زوج اعطيهم عنوان بيتكم وقوليلهم هذ هو العنوان اللي يحب يجي مرحبا و هذي اخر مكالمة معاكم

والله اعلم
​

 

[زهرة البحر]

لي باغيك منهم يجيك للدار واللي شافو ربي مكتوبك هذاك هو
ماتقلقي ماتحيري ربي معاك
صلي وادعي ربي لي فيه الخير يقدمهولك
رآآآآآآآآآآو ربي معاك ديما ان شاء الله خير
​

 

[Mr Brahim]

يا ربي يهديك انت اختي واش داك لهاد الشي كامل . . . . ؟؟؟
تخربطوها و مبعد دوروا تحلوها بسنيكم يخي حالة يخي
​

 

[ماكانش]

ياختي نتي قوليلهم الي حاب يتقدم يجي للدار والمفاهمة في الدار ومع واديا
والسلام