نصائح لكل من راسلني على الخاص ، عذرا ، فعدد مشاركاتي لا يسمح لي بارسال رسائل خاصة
السلام عليكم و رحمة الله
اختي ، اذا حابة تنجحي و تفرحي والديك و تفرحي الناس الي يحبوك ، ديري شوي ارادة و توكلي على ربي سبحانو
و بإذن الله توصلي
شوفي 1ermn نهدرلك على le coté psychique
لازم تنظمي روحك "روحانيا" ان صح التعبير يعني تصلي صلاتك في وقتها و اذا مقدرتيش عوضي المهم متسمحيش في صلاتك ، psk هي الشئ الوحيد الي يربطنا بربي و يقربنا ليه و التوفيق بيد الله
+ الدعاء ثم الدعاء ثم الدعاء لا تياسي ابدا و ديما ادعي ربي يوفقك و يحققلك مبتغاك و تفرحي والديك و اطلبي من والديك و الناس الكبار يدعيولك
+حاولي التصدق و لو بمبلغ زهيد ، المهم ديري في كل يوم جمعة صدقي 10الاف ولا 5الاف في صندوق الزكاة تع المسجد تاعكم
حاربي الخوف و القلق أعلني الحرب على البكالوريا ، اسحقيها بمعدل ممتاز ، اذا كان عندك نوع من القلق حيال مادة معينة ، اكتبي في ورقة "...الرياضيات سهلة و ممتعة و انا احبها" او مثلا " الفيزياء مادة رائعة و انا عشقها"... و هكذا كل مادة تحسي فيها بضعف ، باه تترسخ في ذهنك الفكرة بأنك قادرة على سحق هذه المادة و فعلا ستصبحين كذلك باذن الله
اهم شيئ متخافيش انسي الخوف و القلق لان الباك هو امتحان جد عادي و ليس بمسابقة
mtn , nahdarlek 3la le coté du travail
شوفي لازم ديري برنامج مراجعة يومي تمشي عليه باه تسهالك الامور ، اخدميه بالـword و زينيه و علقيه في شمبرتك لكن الاهم ثم المهم هو أنك تركزي جيدا و جدّياا في القسم او في دروس الدعم و لا تضيعي اي معلومة و ميخلعكش معدل الثلاثي انا جبت 12 و ممبعد 11 و في الثلاثي الاخير 10 بصح الباك جبتو ب15 الحمد لله
بالنسبة للمواد
الرياضيات و الفيزياء كثرة حل التمارين هي الي تقويك بزاف ، حلي تمارين يوميا بالنسبة للرياضيات عندك الكتاب المدرسي و سلسة الهباج نفش الشي في الفيزياء ++ دروس الدعم في لامادتين ضروري
العلوم حلي انشطة الكتاب المدرسي في القسم مع استاذك و في الدار حلي تمارين كتاب احمد امين خليفة
الانجليزية لخصي القواعد جيدا حاولي البحث هنا في المندى او في منتدى الجلفة ستجدين ملخصات رائعة و حللي مواضيع العلميين من باك2008 الى 2012 راه عندك 10 مواضيع لانو كل عام موضوعين / نفس الشيئ في الفرنسية
الفلسفة خصصي من برنامجك الاسبوعي ساعة و نصف اليوم مثلا جيبي مقالة و حلليها جيدا analysiha و عاودي صيغيها بطريقتك و في الغد خصصي ساعة و نصف لحفظها و بالاحرى قراءتها عدة مرات و قبل النوم اقراي المقالة الي كتبتيها لانها تترسخ و نامي ، و هكذا كل اسبوع مقالة ، يلحق الباك تلقاي روحك خدمتي عدد لا باس به من المقالات و تكوني تكونتي
خصصي يوميا ما عدا الجمعة و السبت من 6:00 الى 7:00 او من 5:30 الى 6:30 لحفظ مصطلحين تاريخيين و مصطلحين جغرافيين + حدث تاريخي+شخصية
و في نهاية الاسبوع حاولي تحفظي درس في التاريخ او الجغرافيا او الشريعة ، المهم كل اسبوع مادة من الثلاث
الادب ، اقراي القواعد ملييييييييييييح و سقسي استاذك على اي غموض و حلي مواضيع باك2008 الى 2012 و اشري سلسلة مستقبلي خضراء اللون الخاصة بالعلميين و حللي المواضيع و قيمي روحك جيدا باه تعرفي في اي النوعين تدي نقاط باف ، القصيدة او المقال ، هكذا تعرفي واش تخيري نهار الباك + كاين مرجع مماز لكن مفقود بعض الشيئ نتي حوسي بالاك تلقايه ، كتاب الموجه في تحليل النصوص الادبية لـ صبري موسى العجااوي
مممم نوغمالمو راني قلتللك كل شي اذا كاش معندك سؤال او استفسار سقسيني حبيبتي ما كان حتى مشكل ،
ايييه نسيت حاولي تمارسي رياضة بشكل منتظم و بعدي على القهوة و التاي و المنبهات psk ممبعد يولليولك drogue توالفيهم ، القهوة و التاي اشربي نهار الباك بعد ملاح المنبهات يوم البكالوريا فقط و ليس ايام المراجعة
دعواتكم لي بان يحقق الله امنيتي
..