سؤال عن الولادة

[hopeful girl]

السلام عليكم

أنا حامل في الشهر الخامس و هذا حملي الأول
في البداية لما عرفت أني حامل طرت من الفرحة و شكرت ربي سبحانه كي رزقني و بقيت فرحانة كل الأشهر اللي فاتو بالرغم من أنو الوحم كان صعيب و الان في الشهر الخامس بديت نحس الجنين يتحرك فرحت بزاف و حسيت بالأمومة قبل ما نشوفو بصح يا أخواتي الكريمات على قد ما راني فرحانة راني خايفة من الولادة حتي ولاتلي هاجس أحيانا نفطن في الليل مخلوعة و خايفة..حبيت نعرف اذا هذا الخوف طبيعي؟؟ و هل الولادة فعلا صعيبة بزاف؟؟ و كيفاش ندير باش يروح علي الخوف هذا و أنا الحمد لله نصلي و كل وقت ندعي ربي يسهلي..

حبيت نعرف من الأمهات الكرام اللي في هذا المنتدى يقولولي احساسهم قبل و بعد الولادة
و شكرا للجميع
​

 

[دمعة اشتياق]

السلام عليكم
مبروك عليك مسبقا و ثانيا ربي يسهل عليك الولادة يااااااارب
ماتخافيش والله العظيم هاد الخوف هو لي يكمل عليك
نحي من بالك كلشي وخلي غير ربي برك و دعي ربي يصح و عشية
و ان شاء الله تجيبي بنبون ولا بنبونة كي القمر ان شاء الله
الله يهون عليك و يسهل عليك ويكون معاك و ماتخمميش كلشي يفوت بإدن الله ....​

 

[hopeful girl]

يبارك فيك أختي دمعة اشتياق و شكرا على الكلام الحلو و الرد الجميل..أحيانا الانسان مهما يكون ايمانو قوي بربي سبحانه بصح يحتاج للدعم و الدعاء من عند الناس باش يرتاح نفسيا .

و شكرا مرة أخرى
​

 

[blsamira]

مبروك عليك الحمل وربى يتمملك على خير ويسهلك
متخافيش اختى الولادة ماشى صعيبة مجرد ساعات فليلة ومن بعد خلاص غير تشوفى البيبى بين يديك تنسى كل شيء

ربى يسلكك على خير ويفرحك

 

[SAMIRA25]

ربي يسر لك ولادتك اختي و يرزقك الذرية الصالحة صح الوحدة تبقى تخمم بصح اشغل روحك بحوايج اخريين باه تنساي و راهي غيير سويعات يفوتو بالصبر و الايمان و غير تشوفي البيبي تاعك خلاص تنساي كل شيء
و لازمك تمشي بزاف خاصة في الشهرين الاخيرين باه جيك الولادة سهلة و ربي معاك اختي​

 

[hopeful girl]

شكرا blsamira و samira25 على الردود الجميلة:regards01:
​

 

[Ferial07]

ربي يسهل عليك
ويكمل عليك علي خير

 

[hadda0425]

مبروك اختي الكريمة وربي يرزقك بالذرية الصالحة
بصح ننصحك تنحي عليك الوسواس من الولادة لانو كل شي مع ربي سبحانو ساهل
هادي سنة طبيعية لكل خلق الله
وكل شي تع ربي ساهل
هادي الوساوس من الشيطان استعيني بالله واسعيذي من الشيطان الرجيم
تحياتي

 

[قمر ال14]

ما تخافي ماوالو ا كي تشوفي البيبي تنسي كل شيء ساعات وتنوضي نورمال

 

[samah06]

اختي اولا مبروك عليك الحمل وانشاء الله هدا الضيف اللي راح يكون اوتكون مول الدار
متخافيش اختي المخاض يكون مثل الم الحيض او الحيض اصعب لانو ساعات يجيك وساعات يروح
لكن الولادة دقائق وغير يحطولك وليدك على صدرك تقرري باه تخاويه ومتخليهش وحدو
الله يسلكك على خير ولاداعي للخوف خلاص وسالي امك او عجوزتك واش يقولولك
ربي يهنيك ومتنسايش الطمينةوالقهوة

 

[anissa 13]

مبروك عليك حبيبتي الحمل
والله انا من الفرحة ماني خايفة من والو راني مقلقة وقتاش يجي هداك النهار
على الرغم من انو عندنا هنا يعملولك ابرة يعيطولها la péridurale

كي تعمليها تولدي بالضحك ماتحسي بوالو بصح انا مانيش حابة نعملها نتحمل الوجع ونولد عادي
حنا عندنا مثل يقول كي تشوفي عويناتو تنساي وجيعاتو
ماتوسوسيش راسك انشاءالله كلشي يفوت بخير وربي يرزقك بدل الواحد 10
​

 

[ISMA.dz]

ربي يعطيك وقفة ساهلة

وان شاء الله لما تحطي ابنك في صدرك تنساي كلش

خليك من الوساوس

وربي معاك​

 

[ام اسراءواسحاق]

نعطيك رايي بكل صراحة بصح ما تخافيش و ديري حاجة في بالك ماكاش لي يبقى في كرش يماه
و مهما كانت الولادة سهلة او صعبة حنا منقنعوش ،و الحمد لله في حملي الاول باسراء كنت فرحانة في الحمل و خاصة لما عرفت بلي بنت و لكن الولادة كيما يقولو ناس بكري دخلت قبري و عاودت خرجت و الحمد لله سلكت ، و منسيتش هذاك الالم و كتبلي ربي الحمل باسحاق على 40 مت بالخوف و ما حبيتش هذاك الحمل 9 اشهر و انا نبكي و خايفة و زوجي يصبرني يقولي 2 ماشي صعيب كيما 1 و في الاخير جاتني الولادة اصعب بكثير من 1 و الحمد لله على كل حال ، وكنت حابة نزيد بيبي لان اسحاق راه قريب يكمل 4 سنوات و زوجي مقلقني على الاولاد راني حبست الحبوب هذا الشهر بدون علم زوجي لاني حابة نديرهالو مفاجئة و ان شاء الله يكون خير.
ما تخافي ما تخمي ربي يعطيك وقفة ساهلة .

 

[سندس الجزائر]

مبروك عليك الحمل اولا ان شاء الله يفرحك ربي
واش نقولك لكان نقولك ساهلة نكذب عليك ولكن الالم لتحسه الام هو الشيء لمتعرفه غير هي وهو السبب الرئيسي ليخليها تعرف قيمة الاولاد .
بصح استعيني بالله تجربتي انا في الولادة واشنقولك وين نروح يقولي الطبيب راكي رايحة تموتي حتي اخر طبيبة كتبتلي ورقة وقاتلي وين ترويحي وريها باش نبرأ نفسي من موتك لكن تعذبت وعندي ولد الله يبارك يقولي ماما انتي حنونتي نموت عليك يهون كل عذاب ورجعت لنفس الطبيبة باش تعرف بلي الموت امر بيد الله قاتلي مازلتي حية وراني حامل في نفس الشهر والله غير نتناسي امر الولادة لانه كاين لراهي حابة تشوف البيبي ولو للحظة وتموت والحمد الله قمة الب تعطيه الام لتعاني اقسي الالام

ماتخافــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــيش

 

[نور الرحمان]

السلام عليكم اختي الكريمة اولا ميروك عليك الحمل
عليكي بكثرة الاستغفار في كل وقت ستلاحضين راحة بال وستزول عنك كل الهموم وانصحك بسورة مريم وانت حامل