عندنا نقص فال....

[D aucun]

السلام عليكم
اختي الموضوع تاعك في الصميم
وي لي قلتيه صح ومانزيدش نعاود شا قلتي برك بغيت نقولك بلي كي الشيرة بالاخص ماتلقاش لحنانة في دارهم ويجي واحد برك يقولها غير كلمة ايا راحت فيها مسكينة والاولى بالطيبة والابتسامة هوما الاهل تاعك بما فيهم الوالدين لي هوما من واجب حتى نجو للاخوة ..... والصراحة يا أختي ادا ماضحكتش مع ولادي ولا مع خوتي مع من نضحك .....
​

 

[־●ـ‗غمــــوض ــالــورد_ـ●־]

والله عندك الحق حنونة تقريب بارتوا طبعهم هكدا وهدا هو الواقع لي نعيشوا فيه
براسك ينطبق عليا احنا فالدار منتفاهموش خلاص ماما وخوتاتي براسك نفس لامونتاليتي لحنانة مكنهاش عندهم ميقولش واحد فيهم راني نحبك ولانعزك والوا وانا كونتر تاعهم انا نحب نعبر على مشاعري نحب نقول لخوياني ومي parent نحبكم نعزكم وبورتوا راني لكبيرة فالدار مي يريبونديوا عليا بفاصوا تاع واحد ميقدركش خلاص ولايقولك وشكي باغية ملخر وكي يجيو ضياف ولا مع الناس برا وش راح نقلك يوليو يعسلوا لهدرة ديفوا نبقى متشوكية نشوف فيهم حايرة نولي منعرفهومش خلاه مي بابا وخويا كوم موا يقولولي نحبوك نعزوك مام هوما عندهم حاجة عادية يحبوا يعبروا على مشاعرهم وانا فالدار خويا هو صاحبي مي جوبونس كان جا اكبر مني نحبك هديك يقولهالي بضربة ههههههههههه باسكوا راني شايفاها عند بزاف لي نسقسيها على معاملة خوها ليها تقولي تهنيتي معندكش خوك اكبر منك ههههههه سينون راهو داير فيك حالة درك منيش عارفة بوركوا لواحد ميعملش اختوا كيما راهوا يدير مع الناس لبرا بورتون راها حاجة نورمال كان قالها نحبك ولا نعزك مي المشكل عند ليزالجيريا انهم ديما يفهموا النقص يقلك انا نقول لأختي كيما هاك صايي ادير جناحين تولي متقدرنيش وكاين لي قاسي ميقدرش يقولها هاديك هي طبيعتوا وتلقاي وحايد مام مع الناس وميتعاملوش مليح ميقدروش يصارحوا بلي سونتيموا تاعهم مي موا جاسبار كان لواحد يكون صريح بماشاعروا مع اختوا ولاخوه ويعاملهم بحنانة نظن هكداك راح يكسبهم راح يوليوا يقدروه باسكوا لقباحة ولقساوة ديفوا تكون كونتر لواش باغيين يوصوا هوما ديفوا متنفعش يقلك واحد انا منكونش حنين مع خويا نبين روحي راني صعيب باش مايفهمش عليا يولي لوتر ميقدروش خلاه كيما انا لامونتاليتي هادي متنفعش معايا كان ماما ولا اختي ولا واحد خلاف فلافامي يجيبها معايا بلقباحة منجيبهاش فيه خلاص موا نبغي لي صريح بماشاعروا وكل واحد وكيفماه يفهما وكل واحد وطبعوا مي هادا هو الوقت يفرض عليك تكون كيما هاك باسكوا كان تجي حنين مع لواحد يقلك وشك باغي ملخر وش خصك بلا متمتل عليا وتلعبها بظرافتك وحنانتك مجتمع ميفكرش بعقلوا وميفكرش لبعيد ..وكاين وكاين وكاين كل واحد وكيفماه .....ونسيت تاني نقول انوا هدا خطا كبير يوقعوا فيه ليبارون باسكوا الطفلة ايدا ملقاتش حنانة في دارهم وين راح تلقاها تولي ديما تحس بالنقص وايدا لقات بعيد شي ناس حنان معاها باي باي عليها ومبعد يقولوك زيماه دارت كوم صا ومهمش عارفين بلي الطفلة ولاالطفل محتاج حنانة فالدار سينون حارت عليه يتعقد و و و و ...
مشكورة اختي على الموضوع والظاهرة راني فتحت هنا موضوع معاك ههههههه
​

 

[وردة رمال الصحرا]

السلام عليكم
والله موضوع شباب
أنا كنت عملت موضوع يشبهلو شوي .... https://www.4algeria.com/vb/showthread.php?t=320526
المشكلة انو حتى كي يكبر الصغير على هذاك الجفاف ..... تلقاه حاب يسمع ولا يقول هذا الكلام الحلو.... لكن يتوجه للشي الغلط.... الولد تلقاه حاكم الموبايل ويفرغ ف مشاعرو على ألف بنت..... والبنت تقريبا نفس الشي اذا ما شدتش الموبايل تشد الفايس ولا السكايب ولا....... (إلا من رحم ربي)....
الله يصلح الأحوال برك​

 

[فتاة حساسة]

.لي عودة..

 

[همس الوُرود]

يا أختي ماكانش أخ كيما قلتي يتعامل بخشانة مع أختو ربما هي الي مافهموش مي كل طفل عندو طريقة يعبر فيها عن حبو لأختو كيما أنا خويا يضل يضربني ويقتلني صح يوجعني مي هو مازال ماقاسنيش وأنا ميتة بالضحك هو يضربني سيبون نولي مانتنفسش من الضحك بزاف
وجامي قالي كلمة حلوة غير يبخص وضدي مي بضحكة وهاكاك وأنا نفهمو وعلابالي بيه مايحبش يعبر برك والهدرة تاعو هي عكس واش كاين ونهار يغيب هو الدار تولي وحش بالنسبة ليا ونهار نغيب أنا الدار أكثر من وحش بالنسبة ليه ونشفى نهار أنا مرضت بزاف ووصلت للسبيطار قالولي كان غير يدور ويدور ومقلق وكي شفتو شفت عينيه معمرين بالدموع وهو يضحك معايا وممبعد قالي علاش مامتيش وتهنيت منك؟؟ومام أنا ثوجور ضدو مي الضحكة الي نضحكوها مع بعضانا تبين واش كاين في قلوبنا كل واحد وكيفاش يتعامل وهادي حاجة أنا نعتبرها مليحة لينا ولكلام هاداك الي تحبيه أنتي أنا مانحبوش ههههههه وكل عايلة وكيفاه عقليتها نورمال ختي
​

 

[سلفي والحمد لله]

بارك الله فيكم
قال رسول الله صلى الله وعليه وسلم (خيركم خيركم لأهله وأنا خيركم لأهلي)
فالحديث رواه الترمذي وابن ماجه عن عائشة رضي الله عنها قالت: قال رسول الله صلى الله عليه وسلم: خيركم خيركم لأهله، وأنا خيركم لأهلي، وفي هذا الحديث دليل عظيم على محاسن الإسلام التي جاء بها، ومن جملتها أنه جعل الإحسان إلى الزوجة والعيال من أفضل الأعمال والقربات، وفاعله من خيرة الناس، قال صاحب تحفة الأحوذي في شرحه لهذا الحديث: قوله: خيركم خيركم لأهله: أي لعياله، وذوي رحمه، وقيل لأزواجه وأقاربه، وذلك لدلالته على حسن الخلق، "وأنا خيركم لأهلي" فأنا خيركم مطلقا، وكان أحسن الناس عشرة لهم، وكان على خلق عظيم.
والله أعلم​

 

[أم راضية ~_]

السلام عليكم
شكرا جزيلا ليكم كامل على المرور والرد وإبداء الرأي
و يظهر أنو هادا جزء من واقع مجتمعنا مع العلم انو كاين بعض الحالات الشاذة
ويبقى الاحتواء العاطفي من قِبل الأسرة هام و هام جدا لا يشعر به إلا من حُرم منه و لَقِيَ شرّ الفتن من هنا و هناك والحديث قياس ...
:regards01:​

 

[بنت الـ25]

يضاف الموضوع إلى قائمة المواضيع المميزة
قائمة المواضيع المميزة لمنتدى واش راك تهدر - متجدد -
​

 

[magique]

حبيبتي يلديز موضوعك رائع في القمة هايل وتوووووووpــ رايحة نعاينك :$:$
راح نبدا نقول بلي صح وش قلتي ،،عندنا في بلادنا معروف علينا الخشونة في التعامل بالرغم من انو الشي ليكاين داخلنا ماوش هكداك.نشوفو الناس من جنسيات اخرى مختلفين خلاص، يعني يعبرو على مشاعرهم وعواطفهم من جيهة لقراب ليهم لانهم اصلا مشبعين بالحنان هداك ،،اما عندنا فلا ونقول بلي فاقد الشيء لايعطيه...
وفي المقابل نلقاو كيما قلتي لحنانة من جيهة لخرين والظرافة وغيرها ،،ممكن بين الاصدقاء كلش مباح يعني يقدر يكون حر ويعبر كيما حب لكن وسط اهلو شوي ناقصة هديك الحنانة وهديك الحرية انا شخصيا هكدا بكل صراحة،، صديقاتي كامل نستعمل معاهم غير حبيبتي وحنونتي وعمري ،،توجور نعبرلهم بلي نحبهم لكن الاخوة تاعي والوالدين لالالا تجيني شغل """وش راني ندير""" كلي حشمة ولا مانعرف وشنو هداك:$:$:$

طولت عليك بزاااف ان شاء الله يماتكم دايما حنانة في الاخير نقولكمGive love كيما يقولو الاجانب
​

 

[magique]

السلام عليكم
والله موضوع شباب
أنا كنت عملت موضوع يشبهلو شوي .... انت جزايري؟؟... $$ شــوف كيــفاشــ يشــ وفلك غيركــــ $$
المشكلة انو حتى كي يكبر الصغير على هذاك الجفاف ..... تلقاه حاب يسمع ولا يقول هذا الكلام الحلو.... لكن يتوجه للشي الغلط.... الولد تلقاه حاكم الموبايل ويفرغ ف مشاعرو على ألف بنت..... والبنت تقريبا نفس الشي اذا ما شدتش الموبايل تشد الفايس ولا السكايب ولا....... (إلا من رحم ربي)....
الله يصلح الأحوال برك​

اسمحيلي نرد عليك ونقولك بلي صح والشي هدا زاد في الظاهرة تاع الصحبة بين لبنات ولولاد ولا وحدة يدراgــيها واحد في الطريق مرة زوج تولي تحب تسمع وش يقوللها دونك هي تولي تــpــريزونتي روحها باش تسمع مايرضيها ولو جون تاني يحب يعبر يروح يحكم الحيط ويقعد يفرغ مشاعرو كيما قلتي.
​