اهلا بيك اختي لعزيزة نتمنى تكوني مليحة،،
اسمحيلي حبيبتي مرديتش عليك بكري نورمالموا حنونتي نرد عليها الولة مي معليش ههههههه
نرجعوا للموضوع،، اختي متقلقيش روحك خلاه هدا راه مكتوب رانا غير نهدروا ونقلقوا في رواحنا باطل
هو صح حنونة طولتوا بزااااف خليتي الوقت يفوت باطل وكان نورمالمون تحوسي تفهمي على السبب لي خلا خطيبك يطول هكدا كامل ويصراو هاد لخيلافات بيناتكم ،، انا نشوف في خطيبك نيتوا صافية معاك باسكوا كان في عينوا حاجة خايبة راكي عرفتيها فالوقت هدا لي كان بيناتكم يعني هاد لحاجة بلا منقولهالك راكي مكيش مراهقة وتعرفي وين تحطي رجليك قصدي كان جيتي مراهقة بلاك نقدر نقلك كلاموا لمعسل اثر عليك وخلاك متفكريش تشوفي حياتك نورمال وبقيت هاد لمدة كامل معاه ،، انا نظن بلي كاينة حاجة راها ادور على خطيبك وخلاتوا ميقدرش يتحكم في قراراتوا ويتحكم فالوقت رابيد وزيد انت قلتيها بلي راكي حاسة انها نيتوا صافية وانت لي راكي تشوفيه وتعرفيه وتعرفي تصرفاتوا زيماه دايرة انت لي تقدري تقرري فالحاجة هدي ،، ننصحك برك متتسرعيش ديري كلش في عقلك باش متندميش مبعد مهما طولتي ميهمش لحاجة لي تهم انك تحطي روحك فالصواب وتعيشي مبعد متهنية خير متتسرعي،، باسكوا لحاجة لي تجي رابيد راها تروح رابيد ،، وصلي صلاة الاستخارة وديري ربي ديما في قلبك والصابر ديما راه ينال ،، راه ربي لي يمتاحن فيك وانت قلبك صافي ونيتك صافية وراه قليل لي يصبر كيفك ويتحمل وبربي انشاءالله مايكون غير لخير لي بغاه ربي راهوا راح يكون ماتقولي ندير هادي ولا هادي ،، ارتاحي حنونة ومتعبيش روحك وراني ندعي معاك انشاءالله تفرج عليك وتهناي ،، انت لحاجة الي اديرها انك تحاولي تفهمي الاسباب لي راها عند خطيبك وحاولوا تفهموا بعضاكم بشوية وانشاءالله تلقاو صوليصيون وتتهناو مع بعضاكم وتعيشوا ديما فالفرح انشاءالله...وانشاءالله تفرحي قريب ونفرحوا مع حبيبتنا لغالية...
