مادام عارفين وعلاش نظلمو ؟؟

[أم راضية ~_]

السلام عليكم ورحمة الله وبركاته

إن شاء الله لاباس وبخير؟
---
مادام رانا عارفين
واش عارفين ؟؟؟
***
كلنا عارفين بلي ربي هو العاطي وهو الرزاق و هو الي يبتلي الانسان بأمور , بصح مع هادا تلقى الناس
يحكمو و يفصلو و يخيطو و يعيشو على حاجات الانسان ماعندووش دخل فيها (ماشي هو الي خيرها).
* متلا باش تفهمو و ندخلو لصلب الموضوع
- تلقى ناس وماااااااااااا أكثرهم يقيموا الناس على حساب دراهمهم و على حساب خلقتهم و على حساب امور ماخيروهاش هوما
- مرات بزاااف تصرالي وتصرا قدامي , حقيقة حاجات تحبس العقل !!!

مرة وحدة تقولي على وحدوخرا تقرا معانا ماتعجبنيش وانا نقولها لالا مليحة و فاهمة وكلش و هيا تقولي بصح ماشي شابة :-o واش دخل الزين في عقليتها؟؟؟؟؟

و وحدة فاميلتنا ما يحبوش يقعدو معاها وعلاش ؟ على خاطر يماها تاع برا وماهيش مقدمة و جبايلية ؟؟
و واحد مايحبوش يزوجولو بنتهم على خاطر ما عندوش الدراهم
و لوخر ما يحبوش يخطبولو هاديك على خاطر ماليها فقراء و ماهومش من فاميليا معروفة ( الحسب )
و وحدة صحاباتها ما يمشوش معاها على خاطر وجهها مشوه
و لوخرا على خاطر عرجاء
..... إلخ من الأمتلة ما قدرتش نجبدهم كامل هنا على خاطر قلبي وجعني وما قدرتش لوجوه الشرّ هادو الي عقدو بزاااااف ناس بجياحتهم و أذاو بزاااف ناس

دوكا هل صح " الي ماعندوش الفلوس كلامو مسوس" ؟؟؟ و"الي ماعندوش الفلوس هزو الما "؟؟
وادا كانو عارفين بلي "الزين عمرو ما يبني دار " وعلاش يحكمو و يبنو تخمام غالط و ينشروه على وحدة ربي ما رزقهاش بالزين ؟؟
وادا الواحد ابتلاه ربي بقلة الدارهم , هل نبعدو عليه وما نعيشوش معاه وننفوه ؟؟؟
والي الله غالب عليهم ما شافوش وما عاشوش و عمرهم ما عرفو بعض الامور هل نضحكو عليهم ونحتقروهم و نحطوهم أ كوتي بجيهة و نستعملوهم للضحك ونديرو بيهم القوالب ؟؟؟؟؟؟؟
انا راني متأكدة من حاجة ما يفهموهاش الي ماعاشوهاش والي هيا :
" قلة الشي ترشي و تنوض من وسط الجماعة " و "ما يحس بالجمرة غير الي عافس عليها "
و نقول للناس الي بلاهم ربي بهاد الامور نقولهم "الي يشد فالصحيح ما يطيح " والصحيح هو الدين والاخلاق والباقي يجي ويروح و قادر تغطي عليه حاجات اخرى ..
نحبس هنا خير
ادا كاش ما عندكم اتفضلو
وإن شاء الله ماتكونوش منهم يا ناس اللمة
و اسمحولي ادا غلطت وشكرا على قراءتكم للموضوع :regards01:
---
السلام عليكم
سبحانك اللهم وبحمدك أشهد أن لا إله إلاّ أنت أستغفرك وأتوب إليك
واللهم صل على محمد وعلى آله وصحبه أجمعين​

 

[بنت الـ25]

السلام عليكم يلدز
للأسف الشي لي حكيتيه كامل كاين في مجتمعنا
الفقر مش عيب ياك مول التاج ويحتاج
والزين ما عمّر الدار كيما قلتي
والمشكل راهم عمبالهم بيها مي اللي فيه نقة ما تتنقى
بصراحة ما بردتش قلبي لي عودة ثانية نحطلك الختم:up:
​

 

[FATIMA 19]

مرسي على الموضوع
كيما نقولو خلي البير بغطاه واش نحكي واش نخلي
تلقاي اللي عندهم الدراهم يزيدو يشبعوهم ويمدولهم و يبغاو يعبدوهم
واللي ماعندوش وتجوز فيه الصدقة مايمدولوش
وكلش بالوجوه
تقبلي مروري
​

 

[فتاة حساسة]

لي عودة اختي​

 

[ماكانش]

هاذو هوما الناس ألي مانقدرش نحكي معاهم

 

[zagane]

السلام عليكم
الشيطان والهم مين يعمي الانسان يولي يخلط برك ويحصل

 

[أم راضية ~_]

السلام عليكم يلدز

وعليكم السلام ميناتو
شكرا على اعتماد الموضوع :regards01:​

للأسف الشي لي حكيتيه كامل كاين في مجتمعنا
الفقر مش عيب ياك مول التاج ويحتاج
والزين ما عمّر الدار كيما قلتي
والمشكل راهم عمبالهم بيها مي اللي فيه نقة ما تتنقى

صح راهم عارفين بصح زكارة و جهل يظلمو عباد بزاااف ​

بصراحة ما بردتش قلبي لي عودة ثانية نحطلك الختم:up:
​

والله مام انا مازال ما بردتش قلبي وما فرغتوش حرت كيفاش قدرت نكتب الموضوع بلا ما نخلط فالهدرة على خاطر تاع الصح 3/4 الموضوع صرالي ......
شكرا ليك ومرحبا بيك لربما نلقاو حل معاهم ​

 

[أم راضية ~_]

مرسي على الموضوع
كيما نقولو خلي البير بغطاه واش نحكي واش نخلي

رانا كامل كيف كيف و الواحد واش يحكي و واش يخلي ​

تلقاي اللي عندهم الدراهم يزيدو يشبعوهم ويمدولهم و يبغاو يعبدوهم
واللي ماعندوش وتجوز فيه الصدقة مايمدولوش
وكلش بالوجوه

صح شفناها و التمييز في كلش فالمعاملة , فالهدايا , فالماكلة , فالهدرة يا عجابة !!!
ربي وكيلهم كرهولنا الحياة ​

تقبلي مروري
​

ي

عطيك الصحة على المرور والردّ​

 

[أم راضية ~_]

هاذو هوما الناس ألي مانقدرش نحكي معاهم

هادو هوما الناس الي نكرهوهم و مانحملوهمش و ما نقدروش نتنفسو معاهم بصح بالسيف علينا نهدرو معاهم وغالبا يكونو من المقربين
فسدولنا وكرهولنا الحياة
والحلّ كيفاش ؟؟؟
شكرا على المرور والردّ​

 

[أم راضية ~_]

السلام عليكم
الشيطان والهم مين يعمي الانسان يولي يخلط برك ويحصل

وعليكم السلام
والله ما فهمت ردك !!!
مادابيك تفهمني ​

 

[نسومر الاوراس]

:up::up::up:اولا راح نقولك يعطيك الصحة على الموضوع راه روعة :regards01::regards01::regards01:
اختي لعزيزة انا ثاني يحبس دماغي من هاذ لحوايج واش يعني زينة ولا عندو الدراهم ولا باباه حاجة ولا اميمتو فور انا خلقني ربي والحمدلله وكنت مانيش زينة ولا فقيرة شكون يسالي وهادو الي يقعدو يطلعو ويهبطو مليح ما هوش مليح بغيت نقوللهم راكم قاعدين تقللو في ادبكم على ربي لحنين راهو عيب عليكم رانا كامل ولاد تسعة او واحد ما اختار باباه ولا اميمتو واذا كاين ناس تموت على الدورو نقوللهم راهم وسخ الدنيا ويجيو ويروحو انا نتمنى نخسر الدراهم وما نخسرش عبد
والي يقعدو يساميو فالناس الي اعطاهم ربي نقوللهم واش شايفين ارواحكم ما تبانوش حتى يجي ليكم واحد فور باش يعطيكم الفرصة تبانو يا خي عقلية ياخي ياو كاينين عباد بانو وطلعو ودارو تاويلهم وهوما ولاد الفقراء والي عطاه ربي راهو يعطيه في قلبو وتربيتو ما شي في جيبو وفي الاخير شكككرااا:up:

 

[Selma 30]

وعليكم السلام ورحمة الله
هادوك عباد الله غالب عليهم مساكن تع مظاهر وناقصين في شخصيتهم برك
الواحد مايديرش عليهم ومايديرهمش حساب
المشكل كي يجرحو العباد لخرين بكلامهم ولا بتصرفاتهم:down:
لتم الواحد لازم يسمعلهم واش يلزم باش يترباو شوية
ربي يهدينا ويهديهم
​

 

[أم راضية ~_]

:up::up::up:اولا راح نقولك يعطيك الصحة على الموضوع راه روعة :regards01::regards01::regards01:
اختي لعزيزة انا ثاني يحبس دماغي من هاذ لحوايج واش يعني زينة ولا عندو الدراهم ولا باباه حاجة ولا اميمتو فور انا خلقني ربي والحمدلله وكنت مانيش زينة ولا فقيرة شكون يسالي وهادو الي يقعدو يطلعو ويهبطو مليح ما هوش مليح بغيت نقوللهم راكم قاعدين تقللو في ادبكم على ربي لحنين راهو عيب عليكم رانا كامل ولاد تسعة او واحد ما اختار باباه ولا اميمتو واذا كاين ناس تموت على الدورو نقوللهم راهم وسخ الدنيا ويجيو ويروحو انا نتمنى نخسر الدراهم وما نخسرش عبد
والي يقعدو يساميو فالناس الي اعطاهم ربي نقوللهم واش شايفين ارواحكم ما تبانوش حتى يجي ليكم واحد فور باش يعطيكم الفرصة تبانو يا خي عقلية ياخي ياو كاينين عباد بانو وطلعو ودارو تاويلهم وهوما ولاد الفقراء والي عطاه ربي راهو يعطيه في قلبو وتربيتو ما شي في جيبو وفي الاخير شكككرااا:up:

ويا بنت الاوراس
بردتيلي قلبي باينة قلبك معمر كيما انا
واحد ما خير اسمو ولا زينو و لا باباه ولا يماه ولا فاميلتو
و واحد ما خير أصلو و نسبو
و واحد ما خير القدر تاعو
مالا وعلاش نلوموه و نوزنوه بحاجة مادارهاش هو؟؟؟؟؟؟؟؟!!!!!!!!!!!!!!
دوك مادام رانا متفاهمين كيفاش نقدرو نتعاملو معاهم ؟؟؟
هادا هو المفيد والمهم
صحيتي على المرور والردّ​

 

[بنت الـ25]

#2
:up:
​

 

[أم راضية ~_]

وعليكم السلام ورحمة الله
هادوك عباد الله غالب عليهم مساكن تع مظاهر وناقصين في شخصيتهم برك
الواحد مايديرش عليهم ومايديرهمش حساب

كيفاش ما نديرولهمش حسااب و حنا وين نروحو نلقاوهم
واحد الله غالب عليه و هوما طايحين عليه بالتمسخير و والتمييز في كلش , كلش . كلش .. ​

المشكل كي يجرحو العباد لخرين بكلامهم ولا بتصرفاتهم:down:
لتم الواحد لازم يسمعلهم واش يلزم باش يترباو شوية
ربي يهدينا ويهديهم
​

كاين ناس ما يقدروش يهدرو ويرجعو الهدرة من كتر ما مال ظهرهم من الشعور بالدونية و من كتر ما ناضو من وسط الجمايع يا حليلهم
ربي يهدينا اللهم آمييييييييين
صحيتي أختي على المرور والردّ
​

 

[أم راضية ~_]

#2
:up:
​

:$
حشمتيني وقتلتيني بالقدر :$
يعطيك الصحة على كل مجهوداتك :regards01:​

 

[عاشقة الكرة]

سلام أختي
والله هاذي هي معيشة الناس دوكا الانسان الفقير ماولاش يعيش والغيبة والنميمة مدايرة حالة أنا والله وحدة من الناس حاشاكم يوجعني قلبي من (التعلاق) ياك كامل خلقنا ربي وكامل أصلنا واحد والتكبر علاه خلي نشوفو غدوا وشكون يتكبر
ماعلينا غير ندعيولهم كامل بالهداية
تحيـــــــــــاتي اختي​

 

[zagane]

اقتباس

المشاركة الأصلية كتبت بواسطة zagane

السلام عليكم
الشيطان والهم مين يعمي الانسان يولي يخلط برك ويحصل

وعليكم السلام
والله ما فهمت ردك !!!
مادابيك تفهمني ​

السلام عليكم
هادا هو المقصود
عندما يسيطر الشيطان على عقول بعض الجهال يجعلهم يحكمون ويقررون بما دكرت من امثلة في الموضوع
اما الهم فيجعل المهمومين يصدقون كل مايقال

وبهادا تعمى البصيرة
وبدالك يكون الفقراء والفقيرات ضحيا هدا الظلم في الاحكام المسبقة

اظن الان اتضح الفهم

 

[ĂÝǾΰb]

السلام عليكم
موضوع في الصميم
كاينة هذي كاين صحاب يحكمو واحد ما يفهمش يبداو يشرو ويتغامزو ويضحكو عليه ... و المسكيــن لا خبر
يرغموك باش تهدر يهدرو لي ميهدرش حقارا و الحقار يموت ذليل
الحمد لله بلي كاين رب ينظر الى التقى وليس الغني
شكرا على الموضوع

​

 

[nanoche]

يعطيك الصحة اختي على الموضوع واللي تكلمتي فيه كله صحيح و ربي يهدينا ان شاء الله و يبعد علينا امثال هاذ الناااس