معلاباليش علاش تقولوا المراة تغلي المهر

[وصال]

أهآ يعجبوني يقولك يغلّيو المهر يحسب بالألف فرنك لي يركب
بيهآ في التخونسبوغ يروح يتزوج حتى الألف مآ بقآتش تركّب
غير مع المعرفة خخخخ ... يضحكوني والله ...
صافي سيبالابان تحصلوها في المهر ههههههههههههههه
روح قيّم عرس لرآجل وعرس لمرآ تلقى تآع لمرآ أغـلى
بلا نحسبوآ برك تآع الجهآز و و و نشوفوآ برك لنهآر العرس
نشوفو برك لللآغوب بلونش كي تكريهآ والكوآفيغ والمآنيكير
والمآكيآج شهرية نوغمآل ... يقولك المهم لهنآء وي لهنآ صح
بصح مش بالبسآطة هذي كيمآ يحسبوهآ وحآيد سيغ تو
السلفيين يلعبهآلك معرف وآش وآحد مرة رآح يخطب وحدة
من عند بآبآهآ قآلوآ نمدهآ خمسين ألف مهر !!!!!
علآش نسآ روحو وآش من زمآن رآه فيه ؟ خمسين ألف
أنآ مآ تشريليش قرعة بآغفآن كون يزيدلي عليهآ 2 خلآف
ولآ يحسب في زمآن الخيمة والنآقة تتمآيل على جنبهآ والريح
يطلّع في الرمل كآن يحسب في زمآن أُحد معليـش ...
يقولك أي رآيحة تدي رآجل ! وهو وآش رآيح يدي ؟
رآيح يدي مرآ هي لي توكّل وهي لي تشرّب وهي لي تغسل
وهي لي تجيب لولآد وهي لي تربّي وهي لي تسهـر وهو وآش
يدير يخدم الصبآح ويجي يقرآ الجوغنآل عندهآ لعشية ويتفرج
لي مآتش ويتشرط فتبآ له مليح للرجآل كي تشرط عليهم لمرآ
ههههههههههه والله ضحكتيني ، هادي باباها سلفي ولا الراجل لي جا يديها ؟ اذا كان باباها فالراجل معندو علاه انا جامي شفت عريس يقول لبابات لعروسة شحال تمدهالي هههههه اهنا اسمحيلي نوليو صح في سوق هههه
مليح الشـد على فكـرة ولي مآ قآدرش عمرو لآ يتزوج ونقطة
انتـهى ...
اوااااااااااااه هكذا راكي تقولي المرفه يدنى والفقير يخاف ههههه
بآغدون قلبي معمّر من وحد اللقـطة ...
ومن السلفيين خآصة حآشآ لي مآ يستآهلش :down:
تبآ ’
​

معليهش فرغي قلبك حنونة متخليهاش تحرق برك ، صحيتي مرورك اسعدني جدا .

 

[وصال]

رآني معآك في هذي كآين بنآت يبآلغوآ بزآف بزآف
ومآ بيهم شي غير الشوفآت شوفوني وآش ديت ومن
بعد ديك اللبسة الكل تبقى على وجهآ تصولدي فيهآ
ومآ تتبآعش تصدقهآ ويقولولهآ قديمة بيغيمـي ...
أنآ نكره المبآلغة وبزآف حآجآت يبآنولي تآفهين ومجرد
كمآليآت وخسآرة درآهم اذا بدرآهمي حبيت نقلّش
روحي معليش هكآك ومآ شكيتش كي شغل طيشت ملآين
في بوبآلة حآشآك ... بصح تآني الرجآل يحسبوآ بزوج دورو
يتزوجوآ كي نتفكر برك التشرآط لي يديروه بعد الزوآج
نقول مليح ليهم الشرط لكبير ... مآكآنش كيمآ كل وآحد
يحط رجليه في اللرض ويدير عرسو على قد حآلو بلآ يطلع
للسمآء على وآلو ... ومآكآنش كيمآ زوج متفآهمين يسهلوآ
لبعض فآخرتهآ رآيحين يعيشوآ مع بعـض ويرجعوآ وآحد ...
فقط كآين رجآل يستفزوآ ومليح ليهم الشرط الغآلي ...
بآلآك يتربّآو ويتعلموآ من الضربة لي تجيهم للجيب ...
سلآمي ’
​

صحيتي هكذا قلتي واش راني حابة نقول والله فهمتيها سواسوة وكلامك صح في الصح صحيتي القصرة معاك حلوة .

تفكرت حآجة كآينة وحدة سهلت لرآجلهآ قد مآ قدرت
آخرتهآ رجع يعآيرهآ يقوللهآ انتي ديتك بلآش طيشوك دآركم
لبهيمة وغآلية وانتي مآ تسوآي وآلو طيشتي روحك عليآ !
وآحد كيف هذآ مليحة معآه الرحمة ؟
يعني كيمآ تدير مآ تصلح تشرطي غآلي يقولوآ تحسب بنت ملك
تسهلي وترحمي يقولوآ رخيصة ديتهآ بلآش ولمعآيرة من فوق
بالنسبة ليآ جنس الرجل مليح ليه الشد وبرك والرحمة مآ
تصلحش فيه ... إلآ من رحم ربـي ...
سلآمي ’
​

صح هادي كاينة بزاف ، انا واحدة نعرفها قاتلها عجوزتها جيتي طمع في وليدي ، وباباك شرط فيك الدار وشرط كذا وهي والله نهار راحت ليه ماكانت عارفة بلي الدار دارو ومشرطت حتى شئ ، الله يهدينا كاين شي عباد ميعرفوش يهدرو كيما يقولو يرمو وبرك .

كلام جميل من الكل ووتحليلات منطقية وكاين وكاين كاين صح عقليلت الي يقولك ديتك بالرخيس وولي مايقيمهاش وكاين الي قدر تعاونها وكاين
بصح الي نحب نقولو هو انو المرا في كل الحالات سواء كان المهر صغير والا كبير راح يرجعلو هي ضرك كي تدي دراهم المهر والا دراهم العطية راح تشري بيهم جهاز ليها ولدارها وراح يرجعو للراجل بطريقة اخرى اما عن اهل العروس سوا باباها والا امها الا تشرطو راهم راح يمدو قد ما طلبو والا اكثر المشكل انو الراجل ديما يشوف واش صرف واش مد وما يشوفش المرا واش زادت على واش مد يبقى برك معلق على واش مد وممكن المرا راهي صرفت اكثر منو وزيادة
ادا في كل الحالات انا براي انا المرا تخسر اكثر من الراجل وفي كل الحالات الراجل رايح في حين العروسة وبالخصوص الاهل يخسرو وما يربحو والو

في نقطة المرا تصرف على الراجل مرنيش معاك 100% بصح بالاك راني غالطة بويسك مسيييتش ههههه وصح نتاع الراجل يبازي غير على واش اعطى وزيدي حتى مصروف عرسو ويحسبوه على بنت الناس وهاديك الاخيرة صح الوالدين مساكن يربو ويتعبو ويزيدو يخسرو دراهم باش يزوجوها ويعطيوها للناس باش تولي بنتهم بصح هادي هي سنة الحياة واش تحبي انا نربي والناس تدي هههه.

:d
اختي مازال كاين البنات اللي فيهم الخير علاه تقولي هاكا ؟
كاين وكاين زاف خويا حسام

ومازالت الرحمة في القلوب ومازال كاين الخير ومازال كاين بنات الفاميليا والناس لملاح

ومازال كاين الرجال ...........غير الدراهم اللي ماكانش :d
الدراهم والله ما يسعاوها ، على هاديك الناس ولات يقولك الزواج ديراكتومو يقولك متفكرنيش المهر...و...و.

اختي الكريمة ..راح نقولك كلمة من اخ لاخت لااكثر ولااقل ونتمنى انك تفهميها بعقل مش بردة فعل ونرفزة

اذا تكلمنا على الزواج في ايامنا هاذي راح نبهوه بالسوق الشعبية
الاب هو البائع والزوج هو الشاري والمراة صارت السلعة المعروضة
في وقتنا الحالي كاينة ، بصح عند الناس الحابسين لي دايرين الزواج هو كلش ، تلحق بنتو لسن معين تلقاه يدلل بيها ، وهذا من عندي انسان جاهل .

مزاد علني يفتح كل صيف للي يدفع اكثر .. اذا المراة تقبلت هاذا الوضع بصدر رحب
الرجل راح يتقبل واقع انو يشري في سلعة مش يزوج من مرا

وزد على هاذا اللي ماعندوش ومايقدرش يزوج بمرا تاع 70 مليون ..ماتخافيش يشوف السوق يلقا تاع 20 و10 ملاين والبركة في القليل كيف يقولو
خويا حسام رجعتنا بقر هههههههههه صدقني شكون لي دار هاذ الشئ والله صح كاين شي عايلات بخسو بينا ولاو الرجالة يشوفو المراة سلعة.

بصح سلعة 100 اذا مالقاتش شكون يشري ..... راح تبقا عند باباها

انا والحمد لله ..مانامنش بهاد الواقع المرير اللي يعيشوه اغلب الاسر الجزائرية
والزواج عندي مش بيع وشرا لااختي سامحيني

المهر فرض وحق للزوجة
ومش عيب ولاحرام انو الانسان يدفع المهر اللي يقدر عليه لاابدا
اخي حسام بيناتنا هي المراة غالية ولوكان تجيبلها كنوز الدنيا مرحش تقدر تشريها ، وانا نظن انو الانسان ميهمش المبلغ قد يهم انو يعطي قيمة للمراة ،وقيمة المراة مرهيش كمية دنانير ، نهار تروح للعائلة تطلب بنتهم ، راح تطلب زينة الحياة الدنيا وربي جعلها مناصفة بين الرجل والمراة ، راح تكملك نصف الدين يا سبحان الله ،والمهر ماهو الا شئ رمزي والمتفق عليه هو ما يسدد ، وانا لحد الان مشفتش عايلة طلبت المهر الفلاني ، رانا كامل نمشيو مع العرف ، والاتفاق في كل العائلات ولي زاد فوق الشئ ، على حساب المقدور

لاكن انت في رايك اذا كل بنت راح تطلب مهر 50 مليون واكثر ..90 بالمية من الشباب ماراحش يزوجو
وهاذا يعني انو نسبة العنوسة راح تكثر وتزيد

وين الفايدة هنا ؟؟

الراجل اذا ماقدرش يزوج بمطلقة بارملة والا يزوج حتى من عزوزة
والمرا اذا مازوجتش وش تدير ؟؟

نقولك حاجة وصدقيها والا ماتصدقيهاش
انا واحد من الناس اللي كان المهر المطلوب اني ندفعو

60 حزب ... فقط
:regards01:
​

الله يبارك ربي يكثر من امثالها .شكرا اخي حسام على المناقشة .

السلآم عليكم وجمعة مبآركة ,,,
صبآح الخـير أخـي ... وعلآبآلي الخير مآزآلوآ في الرجآل
وفي النسآ وإلآ ربي رآه خسفنآ من زمآن من الفسآد لي صآير
كمّل أقرآ ردودي تفهـم وجهة نظـري ...
في المسألة هذي نقدروآ نطيحوآ في مقولة ...
إرضآء النآس غآيةٌ لآ تُدرك :
نعرف بنآت قآلوآ نحتآج لهنآ وبرك ومهرهم كآن سهـل
ومن بعد رجآلتهم رخسوهم وقآلوآ طيشتي روحك عليآ
ونعرف بنآت غلاّو مهرهم وتزوجوآ بصح مآ عآشوش هآنيآت
ونعرف بنآت غلآو مهرهم وتزوجوآ وعآشوآ سلطآنآت
ونعرف بنآت غلاّو مهرهم بقآو عند بآبآهم ...
مرآت كيمآ تدير مآ ينفـع ... أنآ حسب التحليل تآع الطفلة
لي فوق لي تدير في الديطآي وتقول الكسوة والجهآز و و
نقول هذي مبآلغة وأنآ ضد حوآيج بزآف بزآف يديروآ فيهم
على خآطر اسمو بدع وشوفآت وأنآ نكره الشوفآت تآع
نوخّد روحي ونوّخد بآبآ ونروح نخليه بالدين يآكل في سنيه
كآين أمور مآ زآدهم غير المجتمع والطمـع وكآين امور
صح لي نحتآجوهآ استغنينآ عليهـآ ... ردي السآبق لآ يعني
بالضرورة أنـي من جمآعة لي يحبوآ المهر العآلي عندنآ في
سكيكدة المهر يقيّم في المسجد وحآليآ رآه يدير في 11 مليون
أو 12 مليون والمهر يتبدل حسب غلآء المعيشة وتروح تسقسي
إمآم تآع مسجد يمدلك المهر لي مآ يظلم لمرآ مآ يوخّد الرآجل
بصح ردي كآن على بعض العقليآت لي تحط من قيمة المرأة
وقيمتهآ طبعآ لآ تقدر بثمـن بصح كآين بعض الرجآل
يحسبوآ رآيحين يجيبوآ ذبآنة ولآ معرف وآش يروح يخسّر
الهدرة مع الأب ويقول مآ حبش يمدلي بنتو وإذآ مدهآلو
مرة أخرى يعآيرهآ يقوللهآ بآبآك صدقك عليآ فتبآ لهذه
النوعية ... ورآني قلت في رد سآبق مآكآنش كيمآ زوج
متفآهمين يسهلوآ لبعض ويكون المهم عندهم أنهم يجتمعوآ
في دآر وحدة على سنة الله ورسوله بلآ يشوفوآ للأمور المآلية
لي حتى بين الخآوة تفسد العلآقآت كي يرجع التفكير منصب
عالدرآهم لآ على الحيآة لي رآيحين ليهآ ...
ونعرف بنآت كآن مهرهم مصحف لآ غير وعآيشين هآنيين
برحمة ربي سبحآنو ... فقط الإنسآن يكون عقلآني يخمم للأمور
من الجهتين مش كي تكون في بنتو يقول نحتآج كذآ وكذآ
ويضرب جيب السيد يخليه وكي توصل لأبنو ويروح يخطبلوآ
ويطلبوآ نفس الكذآ والكذآ لي طلبهآ في بنتو يقول وآش بيهم
هذو حآيبين يخليو ولدي ...
والمرأة تبقى عزيزة مهمآ كآن مهرهآ ...
جيسبآغ تكون فهمت عليآ تآني ووضحت أمور من ردي
السآبق ... لأنو ردي كلن على عينة مش بالإجمآع
وسلآمي ’

​

صحيتي والله تفكيرك صائب وعندك الحق كيما قتلك من قبل كاين شي ناس خسروها على ناس واحداخرين ، المهم في الاخير لهنا وراحة البال ، الحوايج يتقطعو وكلشي يخلاص ، تبقى غير الحياة الحقيقية لي راح تعيشيها اما هذاك المد والجزر مرهو غير تكسار راس ، وتطلاع لوطونسيو برك المهم ربي يجيب لي فيها خير .

ماكانش قد وحدة تكون بنت حلال و متفهمة
وتالي المهر مادا ماجاب الصح اكل في واش كاين مابيناتكوم
ربي يكون الخير و خلاص

بارك الله فيك

 

[أم أمين23]

في نقطة المرا تصرف على الراجل مرنيش معاك 100% بصح بالاك راني غالطة بويسك مسيييتش ههههه وصح نتاع الراجل يبازي غير على واش اعطى وزيدي حتى مصروف عرسو ويحسبوه على بنت الناس وهاديك الاخيرة صح الوالدين مساكن يربو ويتعبو ويزيدو يخسرو دراهم باش يزوجوها ويعطيوها للناس باش تولي بنتهم بصح هادي هي سنة الحياة واش تحبي انا نربي والناس تدي هههه.

وصال يظهرلي فهمتيني بالغالط انا ما قلتش المرا تصرف على الراجل انا قلت راهي تدي المهر وتزيدي عليه يعني الي تجيبو العروسة معاها ماهوش كامل من دراهم المهر والعطية برك ديما كاين زيادة من عندها باش تشري واش تشوف بلي تسحقو وزيادة كيما الراجل عندو مصارف العرس حتى المرا راهي ادير عرس وكاين بزاف رجال ممكن ما يديروش عرس بصح المرا في كل الحالات ادير عرس انا نهدر على عنابة لخاطر معلى باليش بالمناطق الاخرى

 

[alkateem12]

ياترى لو واحد مصرى بيحب انسانه جزائرية وهى بتحبوا بزاااف ممكن يتزوجها ممكن والا لا يا بنات الجزائر الشقيقة ...وعلى فكرة هيحطة فى عينه

 

[imy_amani]

اختي نقولك
صحيح كل منطقة تتغير فيها العادات والتقاليد
في ناس مسهلينها
وفي ناس مصعبينها
وهادي تاني كاينة في كل ولاية

انا بنت خالي خطبوها ودفعوا فيها 08
قالولها تروحي معانا نخيرو الذهب
قالتلهم اللي جبتوه راني قابلة بيه
هي حكاولها على الولد وهو ولد فاميليا
وتقولي انا مايهمنيش واش يعطيلي
المهم انه يحترمني
وقالتلي انا يهمني نعيش مع راجل
وماهادو الكل شكليات
وغدوا كي نتزوج اذا عجبتني حاجة مارايحش يشريهالي ؟؟ اكيد يشريلي

نقولك اختي الناس تحب تعاند وتحب ادير اللي صوالح فوق طاقتها
كل واحد يعيش على حسابه
المهم الهنا وراحة البال
والحياة السعيدة

تقبلي مروري
​

 

[alkateem12]

ليش مارديتوا يا بنات الجزائر الشقيقة واشكر الاخت لآلاء على الاعجاب بالمداخلة

 

[صبااح]

ساعات نقول ليما انا مندير لاحكاية التصديرة لا الصوف لاعرس تاع سمانه والناس طالعين هابطين عشى خفيف ونروحو نديرو فيها عمرة وتحويسة باهية تبقى تشوف معايا هك :s
قضية المهر حنا هنا تقريبا كامل يمدو ب 10 ملاين وكاين اللي يزيد الذهب
يعطيك الصحه ختي​

 

[alkateem12]

كل الداخلات تهدر عن المهر وغلو المهر والشروط وهادا الكلام الغير واقعى الى بيريد عروسة ويكون بحبة بزاااف وهى كمان كيف يستغلى عليها قد ما تطلب وبعدين وين بيروح ماهو كله راجعلة طالما شارى بنت الحلال لازم يا خوتى ويا خياتى ان احنا لسنا فى سوق للغنم احنا فى اهم قضية فى الحياة وهى الزواج والارتباط وبناء اسرة على اسس سليمة وعمر الدراهم ما كانت مشكل انتوا دايرين ان العريس لما يطلب عروس اهلها هيقولولو خلاص خدها وروح وبعدين الرخيص بيروح رخيص والغالى الانسان بيحافظ علية بزاااف وربى يفرحنا جميعا"

 

[امين 22]

ياووو بزاااااااااااف علينا سعدونا درك نزوجو كاامل وحد ما يبوور يااوو بزااف 20 مليون

 

[imy_amani]

كل الداخلات تهدر عن المهر وغلو المهر والشروط وهادا الكلام الغير واقعى الى بيريد عروسة ويكون بحبة بزاااف وهى كمان كيف يستغلى عليها قد ما تطلب وبعدين وين بيروح ماهو كله راجعلة طالما شارى بنت الحلال لازم يا خوتى ويا خياتى ان احنا لسنا فى سوق للغنم احنا فى اهم قضية فى الحياة وهى الزواج والارتباط وبناء اسرة على اسس سليمة وعمر الدراهم ما كانت مشكل انتوا دايرين ان العريس لما يطلب عروس اهلها هيقولولو خلاص خدها وروح وبعدين الرخيص بيروح رخيص والغالى الانسان بيحافظ علية بزاااف وربى يفرحنا جميعا"

اخي الكريم
كلامك كله صح
نحنا عندنا في موضوع الزواج مشكلة عند الشباب انهم يشوفو انو المهر غالي ومايقدروش عليه
والزواج لهاي الاسباب المادية
صار شي صعب
مع انو في اسباب اجتماعية
لكن اللي يهم في هاد الوقت عند اغلبية الشباب المادة
اما بالنسبة لك اخي الكريم
اذا كنت مقتنع انو هاي البنت رح تقدر تفتح معها بيت
وتكون لها السند والزوج والاخ وكل شي
فتوكل على الله
وتقدم الها وخلي تكالك عالرحمن
ربي يوفقك اخي
اهم شي اهتم فيها كثييييييييير
:regards01:
بارك الله فيك اخي
​

 

[وصال]

في نقطة المرا تصرف على الراجل مرنيش معاك 100% بصح بالاك راني غالطة بويسك مسيييتش ههههه وصح نتاع الراجل يبازي غير على واش اعطى وزيدي حتى مصروف عرسو ويحسبوه على بنت الناس وهاديك الاخيرة صح الوالدين مساكن يربو ويتعبو ويزيدو يخسرو دراهم باش يزوجوها ويعطيوها للناس باش تولي بنتهم بصح هادي هي سنة الحياة واش تحبي انا نربي والناس تدي هههه.

وصال يظهرلي فهمتيني بالغالط انا ما قلتش المرا تصرف على الراجل انا قلت راهي تدي المهر وتزيدي عليه يعني الي تجيبو العروسة معاها ماهوش كامل من دراهم المهر والعطية برك ديما كاين زيادة من عندها باش تشري واش تشوف بلي تسحقو وزيادة كيما الراجل عندو مصارف العرس حتى المرا راهي ادير عرس وكاين بزاف رجال ممكن ما يديروش عرس بصح المرا في كل الحالات ادير عرس انا نهدر على عنابة لخاطر معلى باليش بالمناطق الاخرى
في هاذي صح عندك الحق المهر ديالو ميجيش حتى في الذهب خاصة في الوقت الحالى راه الغلى وزيدي مصاريف العرس الله يكون في العون صحيتي اختي ام امين على المناقشة ربي يحفظك .

ياترى لو واحد مصرى بيحب انسانه جزائرية وهى بتحبوا بزاااف ممكن يتزوجها ممكن والا لا يا بنات الجزائر الشقيقة ...وعلى فكرة هيحطة فى عينه

علاش ماشي ممكن بالطبع مصري عربي مسلم شقيق ، حاجة واحدة رد بالك عليها وتهلانا فيها ،واذا راك تحبها اطلبها بالحلال من اهل بيتها ، وربي يتمم في الخير ان شاء الله .

اختي نقولك
صحيح كل منطقة تتغير فيها العادات والتقاليد
في ناس مسهلينها
وفي ناس مصعبينها
وهادي تاني كاينة في كل ولاية

انا بنت خالي خطبوها ودفعوا فيها 08
قالولها تروحي معانا نخيرو الذهب
قالتلهم اللي جبتوه راني قابلة بيه
هي حكاولها على الولد وهو ولد فاميليا
وتقولي انا مايهمنيش واش يعطيلي
المهم انه يحترمني
وقالتلي انا يهمني نعيش مع راجل
وماهادو الكل شكليات
وغدوا كي نتزوج اذا عجبتني حاجة مارايحش يشريهالي ؟؟ اكيد يشريلي

نقولك اختي الناس تحب تعاند وتحب ادير اللي صوالح فوق طاقتها
كل واحد يعيش على حسابه
المهم الهنا وراحة البال
والحياة السعيدة

تقبلي مروري
​

صح الدعوى كامل تعانيد على هاديك لعروسة ما لحقت ولعريس ثاني ،صحيتي الوءة على المشاركة

ساعات نقول ليما انا مندير لاحكاية التصديرة لا الصوف لاعرس تاع سمانه والناس طالعين هابطين عشى خفيف ونروحو نديرو فيها عمرة وتحويسة باهية تبقى تشوف معايا هك :s
قضية المهر حنا هنا تقريبا كامل يمدو ب 10 ملاين وكاين اللي يزيد الذهب
يعطيك الصحه ختي​

لوكان تولي عادة شحال حالة نتهناو من تكسار الراس ، شكرا لك على المداخلة

كل الداخلات تهدر عن المهر وغلو المهر والشروط وهادا الكلام الغير واقعى الى بيريد عروسة ويكون بحبة بزاااف وهى كمان كيف يستغلى عليها قد ما تطلب وبعدين وين بيروح ماهو كله راجعلة طالما شارى بنت الحلال لازم يا خوتى ويا خياتى ان احنا لسنا فى سوق للغنم احنا فى اهم قضية فى الحياة وهى الزواج والارتباط وبناء اسرة على اسس سليمة وعمر الدراهم ما كانت مشكل انتوا دايرين ان العريس لما يطلب عروس اهلها هيقولولو خلاص خدها وروح وبعدين الرخيص بيروح رخيص والغالى الانسان بيحافظ علية بزاااف وربى يفرحنا جميعا"
بارك الله فيك اخي الكريم على المداخلة والكلام الطيب ، المشكل كلنا مسلمين بالمهر لكن هناك من لايستطيع ان يؤمنه هذا هو المشكل ، واحنا كامل نعرفو ان المراة غالية ولا تقدر بثمن ، لكن الغلاء المعيشي صعب على الرجال اتمام نصف الدين ، شكرا وبارك الله فيك على المشاركة .

ياووو بزاااااااااااف علينا سعدونا درك نزوجو كاامل وحد ما يبوور يااوو بزااف 20 مليون

هههههههههههههههههههه روح شوف زوالية لي تفهمك ربي يجيب الخير ويهنيكم اجمعين .صحيت على المشاركة .

 

[رضوة الجزائرية]

الله يهدينا برك بلا تكسار الراس​

 

[المهندس عبد الوهاب]

ببساطة الذنب ذنب عاداتنا القبيحة البعيدة عن الشرع وعن التيسير

مُحِقنا البركة بسبب مَحقنا للشرع في هذه الامور


والنتيجة ما نحن عليه اليوم

..


شكرا

 

[TeNtOuNa]

السلاااام عليكم
راكى تحكى على ولايتك فقط
هنا المراة تطلب الذهب + المهر وهذاو اقل شئء 50 مليون
+ لازم تديلها كبش :d ب6 ملايين
+ تديلها حوايج اخرين 10 ملاين
+ مصروف العرس 40 مليون
+............
هذا عرس تاع واحد نورمال فى تبسة ماهوش غنى
وتقولى المراة ما تطلبش ؟
ربى يفرج


​

صح هادي كاينة في تبسة عندي اقارب لتم طابو باش ازوجو لافامي كامل تعاون وبالسيف باش درنا عرس مليح
وحاجة حبيت نقولها النسا تم يتبشقو بزااااف هوما ومواليهم وما يرضاوش باي حاجة
انا نعرف وحد الطبيبة خطبها طبيب نهار التهنية جابولها خاتم شوية صغير امها خلاتهم كملو كلش وروحو لمتلهم حوايجهم وقاتلهم كل واحد يروح في طريقو ودرك بنتها راهي في الخمسة وتلاتين ومزالت قاعدة بسبتها

ملاحظة ليك:لكان ماحبيتش تخسر بزاف اديها دزيريىة ولا جيجلية هاذو الزوج ماعندهومش الشروطات بزاف

 

[Ma$Ter]

صح هادي كاينة في تبسة عندي اقارب لتم طابو باش ازوجو لافامي كامل تعاون وبالسيف باش درنا عرس مليح
وحاجة حبيت نقولها النسا تم يتبشقو بزااااف هوما ومواليهم وما يرضاوش باي حاجة
انا نعرف وحد الطبيبة خطبها طبيب نهار التهنية جابولها خاتم شوية صغير امها خلاتهم كملو كلش وروحو لمتلهم حوايجهم وقاتلهم كل واحد يروح في طريقو ودرك بنتها راهي في الخمسة وتلاتين ومزالت قاعدة بسبتها

ملاحظة ليك:لكان ماحبيتش تخسر بزاف اديها دزيريىة ولا جيجلية هاذو الزوج ماعندهومش الشروطات بزاف

ايه كلامك صحيح اختى
ربى يجيب الخير
نصبرو لعل يعملو تخفيضات فى المهر فى بلادنا :d

 

[دزيري]

الحمد لله فاتح علينا ربي انا مادابية بنت تكون شابة متربية و ما تكونش مشات ولا خلاطة وو اذا تطلب مهر 100 مليون
درك حنا ماناش نحوسو على دراهم صح راه في بنت