مغترب تحت المجهر

سلام عليكم يا مغتربين

بناتا وشباب اليوم راح نحط موضوع للتعرف على المغتربين الموجودين في المنتدى كل على حدى يعني ندعو احد المغتربين وننتظر تلبيته للدعوة ونطرح عليه مجموعة من الاسئلة نتعرف فيها عليه في حياته ككل من مدة الاغتراب طريقة العيش وهكدا سيكون الموضوع متجدد مع كل اسم لدلك اطلب المساعدة من مشرفة القسم في تنسيقه

بانتضار موافقتكم قومو باقتراح اسم لبدء الحوار معه وخليونا نحركو قسمنا شوي ونعملو نشاط للمغتربين باش يتعرفو على بعض بطريقة اكبر وفي نفس الوقت يعرفو الناس الي ماش في الغربة حياة المغترب كيفاش تكون بالعموم

​

 

[lina-67]

اعجبتني الفكرة شكرا ليك و اول اسم اقترحه هو ام امين :d
​

 

[رنيم الغربه]

فكرة شابه راني معكم هههه

 

[SAMIRA25]

يعطيك الصحة ام امين على الفكرة هو كان فيه موضوع من قبل بصح قديم شوي
خلونا نبداو على بركة الله
و نعتمدو اقتراح djihad-17
و نرحبو بصاحبة الفكرة كاول عضوة مغتربة معانا ​

جوزي ام امين​

و اتفضلي بالصحة​

 

[ام الحلوين]

سلام
انا تاني راني معاكم وين ما تروحو .
تحياتي .

 

[أم أمين23]

يعني حليت الشبكة وطحت فيها بصح فرحتوني كي دخلتو ولقيت من الصباح للعشية على الاقل ثلاث مشاركات
وراني دخلت وقعدت وشربت القهوة وقاعدة نستنى في فرج ربي يلا شوي نشاط ما تخلونيش قاعدة وحدي ابدو صقصو والا نصقصي روحي
صح سميرة كون درتي دمج مالا واحيينا الموضوع والا اعطيني الرابط باش نشوف هوما واش مدايرين وانقلو عليهم شويه هههههه

 

[lina-67]

صباح الخير ضيفتنا ام امين و كامل لبنات
راني صبحت مبكرة عليك هههه شفتي ما خليتكش وحدك
جوزي تشربي القهوة

و دورك الاسئلة استعدي

**شكون هي ام امين

**كم سنة و انت مغتربة و اين

** الغربة في كلمات

**العيشة في البلاد احسن او في الغربة

**ما هي الصعوبات التي واجهتك في الغربة

جاوبي على هاذو من بعد نزيدك:d​

​

 

[SAMIRA25]

اهلا ام امين الحبوبة
انا و الله ما نحب نحرج الناس بالاسئلة انت واش حابة تشاركينا فيه
مثلا احكينا شوي على الغربة تاعك و المكان لي راكي متغربة فيه
و الجالية الجزائرية عندكم اذا فيه تواصل بيناتكم ....
و اذا امكن اذا امكن صور حية:d عن المدينة​

 

[fatouma2012]

أم أمين فكرة شابة وتخلي القسم نشيط ومتجدد إبداي على بركات الله راهم طاحوا عليك انتي الاولى

 

[أم أمين23]

صباح الخير ضيفتنا ام امين و كامل لبنات
راني صبحت مبكرة عليك هههه شفتي ما خليتكش وحدك
جوزي تشربي القهوة

ياه على الكرواسون شحال توحشتو هنا ما يشبهش خلاص يعمروه بالشكولا والا الكرام وانا نحبو ساك عييت نلقاه
و دورك الاسئلة استعدي
مستعدة وحاضرة

**شكون هي ام امين ام امين ام لولدين والثالث بالطريق مشغولة بيهم طول الوقت وكي تقلق تجي للنت تنحي على بالها بسيطة جدا ومعقدة جدا لا تفهم حتى نفسها هههه

**كم سنة و انت مغتربة و اين خمس سنوات وماشية للسادس مغتربة بايطاليا بالشمال الايطالي مدينة اسمها ترانتو

** الغربة في كلمات
توتر وقلق في البداية ثم تعود وألفة مع الزمن مع الزمن
**العيشة في البلاد احسن او في الغربة
ادا كان عندك بيت خاص وامكانية العيش في البلاد بسلام اكيد البلاد خير
**ما هي الصعوبات التي واجهتك في الغربة
اكثر شيء عدم القدرة على تعلم اللغة وايضا في النفاس والمرض والتربية لما تكوني وحدك صعيب الامر
جاوبي على هاذو من بعد نزيدك:d​

​

هاني جاوبت ومستنيا الباقي هههه

 

[أم أمين23]

اهلا ام امين الحبوبة
انا و الله ما نحب نحرج الناس بالاسئلة انت واش حابة تشاركينا فيه
مثلا احكينا شوي على الغربة تاعك و المكان لي راكي متغربة فيه
و الجالية الجزائرية عندكم اذا فيه تواصل بيناتكم ....
و اذا امكن اذا امكن صور حية:d عن المدينة​

وبيك حبوبة لا لا والله غير ما تحشمي سولي واش حبيتي واش حبيتي اكثر من هك نعرضك هههه
والله عادي في الاول كنت شوي مربوطة بالولاد صغار كنت ديما في الدار وما نخرجش غير مع المخلوق حتى الطبيب كون ما يدينيش ما نروحش لا انا ولا الولاد ومع الوقت كي كبرو شوي ودخلو الحضانة وليت نبوجي ونقضي اموري وحدي نديهم للطبيب للمدرسة وانا كيف كيف نروح للطبيب وحدي واصلا وين حولت ضرك تقريبا كل شيء قريب كلهم في الكارتيي
بالنسبة للجالية كاين بزاف عرب توانسة ومغاربة وجزائريين في الاول كان عندي برك زوج نسا صحاب زوجي
وضرك كي وليت نخرج تعرف على اخرين توانسة وجزائريين والتواصل يعني نتلاقاو هكا في كاش حانوت والا مارشي عندنا يديروه كل خميس وفي اخر مدة عملونا ملتقى جزائريين حكيتلكم عليه لمو فيه الجالية جاو البعض وكان لمة حلوة
المشكل ربما الي ما شي مليح هنا ما كانش حاجات العرب كاين جزار واحد تونسي يجيب شوي حاجات كيما الفريك السميد الخشين وكاين باكستانيين ثاني تلقاي عندهم حاجات نحتاجوهم للطبخ كيما التوابل وحوايج اخرى
صورة ضرك ما عنديش في الكمبيوتر العشية ان شاء الله والا غدوة نعقبهالك للكمبيوتر

 

[أم أمين23]

أم أمين فكرة شابة وتخلي القسم نشيط ومتجدد إبداي على بركات الله راهم طاحوا عليك انتي الاولى

ايه فطوم بصح لازم تنشطو انتوما باش ينشط الموضوع والقسم
استناو برك الي تجي بعدي نقتلها بالاسئلة ما نخلي حتى سؤال ما نصقصيهش وانتو ابقاو حاشمين هكاكا

 

[رنيم الغربه]

ام امين شحال عمرك

 

[أم أمين23]

اهلا رنيم يعني حيرك برك عمري ألالا غدوة ان شاء الله نكمل 33 سنة بالتمام والكمال
البنات نسيت نقول حاجة كل عضوة تستضاف تقعد سمانة يعني انا بديتو معايا البارح نبقى اللثلاثاء الجاية ومن بعد نختارو الجديدة مالا تحركو شوي ماشي ديما تلقاو واحد تصقصوه هههههههه

 

[lina-67]

راني جييتك انت راكي تحوسي نصقصوك دورك نكسرلك راسك بالاسئلة هههههه:d
ما اسماء اولادك و شحال في عمرهم (ربي يحفظهملك)
هل انت عاملة
ماذا درست فالبلاد
تعرفي تهدري الطاليانة بسهولة
هل تسوقين السيارة
لوكان نجي للطاليان تعرضيني عندك ههههه
مازال متهبطي للبلاد

نرجع ليك ما تخافيش منا للثلاثاء تقولي شكون قالي ديري هاذ الميضوع هههه

 

[أم أمين23]

راني جييتك انت راكي تحوسي نصقصوك دورك نكسرلك راسك بالاسئلة هههههه:d
يا اختي انا ما فهمتش يعني قابلين بالموضوع ويقولك يلا ومن بعد ما لقينا حتى سؤال المزية راكي هنا والا راني قعدت نحسب في الخطوط
ما اسماء اولادك و شحال في عمرهم (ربي يحفظهملك)
شوفي يا لالا عندي سي معاذ عندو 4 و8 اشهر وسي محمد الامين 3 سنوات وشهر ولالا الي في طريق ست اشهر ونصف مازالت ما خرجت راهي تستنى في الدالة
هل انت عاملة
ايه عاملة في البيت مربية وطباخة ومنضفة ههههه
ماذا درست فالبلاد
درست علم نفس
تعرفي تهدري الطاليانة بسهولة
اييه واش نقولك لبلب الطلياني ما يفهم والو معايا هههه لا لا شوي شوي برك نسلك راسي
هل تسوقين السيارة
لا لا ما عنديش برمي وما نحبش نسوق نحب الناس تسوق بيا
لوكان نجي للطاليان تعرضيني عندك ههههه
ما تتجي ما نحصل فيك اقعدي برك وين راكي راكي مليحة هههه اكيد حنونة بصح بشرط لازم تكون محجبة وراجلك مدين ماشي على جالتي بصح المخلوق تاعي راه ما يحبش المرا المتبرجة كي نقولو صاحبتي وتكوني بالحجاب ما يقولش
مازال متهبطي للبلاد
قصدك فاكونس والا نزول كلي الا فاكونس لا مع الحمل مستحيل اما النزول الكلي رانا مبروغرامين الترواح انا والاولاد اخر السنة والله اعلم

نرجع ليك ما تخافيش منا للثلاثاء تقولي شكون قالي ديري هاذ الميضوع هههه

لا لا ما نقولش الا بقينا بهاد الريتم نقول صح علاش درتو بصح من الكسل وقلة الاسئلة ماشي من كثرتهم

 

[مينة آلاء الْقُدُّوس]

السلام عليكم كامل يامغتربات ان شاء الله راكم لاباس

أم أمين يعطيك الصحة على الموضوع الزين بصح كنتي تحطيه في بيت المغتربين باش نشوفوه حنا نقصد الرابط ديالو
ر
راهم جبدولك عروق ماغرامان هههههه

انا تاني نقرعج

علاش راكم ناويين تهبطو ؟

كاين بزاف لي يقولو نخافو على الدراري تفسد عقليتهم كي يبداو يفهمو زعمة هادي هيا السبة ؟

 

[ام الحلوين]

ام امين
هل غلطتي و كليتي اكل ماشي حلال ؟
هل لديك بعض المواقف لي صراتلك مع اي واحد خاصة في الايام الاولى قبل تعلم اللغة يعني سألك و ماعرفتيش جاوبي ؟
و راكي هابطة وحدك للبلاد و لا مع زوجك يعني تعيشو كامل في البلاد و لا هو يبقى يخدم في الطاليان و يهبط مرة على مرة ؟
و شكون جاي عندك في النفاس ؟
و عندي طلب ماشي سؤال بوسيلي معاذ و محمد في الجبهة و قوليلهم هاذي بوسة طاطا ام الحلوين .
سلامي .

 

[أم أمين23]

السلام عليكم كامل يامغتربات ان شاء الله راكم لاباس

أم أمين يعطيك الصحة على الموضوع الزين بصح كنتي تحطيه في بيت المغتربين باش نشوفوه حنا نقصد الرابط ديالو
وعليك السلام الالا وشكون قالك ما حطيتش كيما نزلت الموضوع حطيت الرابط بصح ما ينتبهتيش برك
راهم جبدولك عروق ماغرامان هههههه

انا تاني نقرعج

وهاد المطلوب من الموضوع باش نعرف بعض مليح
علاش راكم ناويين تهبطو ؟
راح نهبط انا والاولاد برك لخاطر المخلوق تاعي قالك ولادي يترباو ويقراو في البلاد لخاطر بزاف هنا الي يعرفهم ما هبطوش ولادهم كي كانو صغار وكي كبرو ضاعو منهم وخصوصا الدين
كاين بزاف لي يقولو نخافو على الدراري تفسد عقليتهم كي يبداو يفهمو زعمة هادي هيا السبة ؟

بالظبط حنونة هاديك هي بالتمام

 

[أم أمين23]

ام امين
هل غلطتي و كليتي اكل ماشي حلال ؟
ايه مرة المخلوق تاعي جاب واحد البسكوي وانا قعدت نشرب في الحليب ومن عادتي نحط الباطة ونقرا بصح بعد ما ناكل وظهر مخدوم بالحلوف وهو ما تولهش
وفي السبيطار ثاني كليت اللحم تاع الديك الرومي بصح هاديك واحد يقول حلال وواحد يقول لا انا كليت وفي بالي راهي حلال
هل لديك بعض المواقف لي صراتلك مع اي واحد خاصة في الايام الاولى قبل تعلم اللغة يعني سألك و ماعرفتيش جاوبي ؟
انا في الايام الاولى كيما قلت ما كنتش نخرج وحدي والا هدر معايا كاش واحد نعقب الخيط فيسع للمخلوق ومرة كنت في الطريق وصقصاتني واحدة على حانوت المزية كنت تعلمت كلمة ما نعرف قلتها وسلكت راسي
و راكي هابطة وحدك للبلاد و لا مع زوجك يعني تعيشو كامل في البلاد و لا هو يبقى يخدم في الطاليان و يهبط مرة على مرة ؟
لا هابطة وحدي وهو يبقى هنا حتى على الاقل نشرو دار لخاطر راني راح نسكن مع العجوز حتى يلم روحو شوي
و شكون جاي عندك في النفاس ؟
حتى واحد انا ديما ننفس وحدي مرة قلت لمخلوق نجيب يما قالك صعيبة والورق وانا خدام ما عنديش الوقت مالا من التم ما عاودتش
و عندي طلب ماشي سؤال بوسيلي معاذ و محمد في الجبهة و قوليلهم هاذي بوسة طاطا ام الحلوين .
سلامي .

الله يخليك ويحفظلك وليداتك وصلت