مغترب تحت المجهر

سلام عليكم يا مغتربين

بناتا وشباب اليوم راح نحط موضوع للتعرف على المغتربين الموجودين في المنتدى كل على حدى يعني ندعو احد المغتربين وننتظر تلبيته للدعوة ونطرح عليه مجموعة من الاسئلة نتعرف فيها عليه في حياته ككل من مدة الاغتراب طريقة العيش وهكدا سيكون الموضوع متجدد مع كل اسم لدلك اطلب المساعدة من مشرفة القسم في تنسيقه

بانتضار موافقتكم قومو باقتراح اسم لبدء الحوار معه وخليونا نحركو قسمنا شوي ونعملو نشاط للمغتربين باش يتعرفو على بعض بطريقة اكبر وفي نفس الوقت يعرفو الناس الي ماش في الغربة حياة المغترب كيفاش تكون بالعموم

​

 

[joumane]

صباح الانوار سميره واقامه طيبه حببتي
قوليلي هل درت عمره بما انك قريبه من مكه
وشحال تسقاملكم عمره من تم بالدينار تاعنا
وهل عندك عائلتك تما والا لا
ودرتي صديقات جزائريات وخليجيات والا لا
وفي الخارج تلبسي غير العبايات والا تنوعي وبصحتكم العبايات راني نموت عليهم

 

[SAMIRA25]

السلام عليكم جماعة نسيتوني و الا كيفاش
شفتو كي راحو الاجوبة لي فاتو المهم راني هنا لي حابة تزيد تسال

 

[ام الحلوين]

سلام سمورة ان شاء الله بخير نتي و لولاد
الاسئلة تاعي راهي في الصفحة 38 .

 

[أم أمين23]

راني درت اسئلة وراحو ما نعرف وينهم ونسيتهم ضرك كيفاش راح نتفكر
المهم قولي عندكم التأمين الصحي؟
الطبا كل واحد وطبيبو كيما اوربا والا لا؟
وصقصيت على العبايات نذكرك قتلك شحال اديرو وتلسيهم انتو الا لا؟
وصوريلنا كاش موديلات تاعهم

 

[SAMIRA25]

راني درت اسئلة وراحو ما نعرف وينهم ونسيتهم ضرك كيفاش راح نتفكر
راه تمسحو الردود تع 24 /5 :d
المهم قولي عندكم التأمين الصحي؟
ما عندناش قلال الاجانب لي مامنين هنا
الطبا كل واحد وطبيبو كيما اوربا والا لا؟
حنا واين داوي داوي كاين الحكومي و كاين الخاص و نخلصو فيهم ل2
وصقصيت على العبايات نذكرك قتلك شحال اديرو وتلسيهم انتو الا لا؟
العبايات يا ام امين كاينين تاع الصين فيهم شوي رخاس يعني تلقايها ب 200الف تاع الجزائر و كاين لي متوسطة تا 300الف و كلما يكون القماش و ديزاين ملاح كلما تزيد في السعر و تلقاي تانيك تاع 36مليون :-o تتباع عادي عارضينها في المحلات .......
انا الحق اغلى وحدة شريتها 400 الف
وصوريلنا كاش موديلات تاعهم

ان شاء الله ام امين كي نخرج نصولك حتى و ما حطيتهمش هنا نحطهملك في مكان اخر

 

[joumane]

سميره بحال اسءلتنا راهي دور بدون اجابات محقكش حببتي لاشتا راحو عاودي جاوبي

 

[fatouma2012]

سلام سمورة معلبليش إدا مازال كاين مجال باه نسقسوك ؟ أنا أسلتي كلها راحت ونسيتها

علاه مkaach تامين صحي ، وحتى لي يخدمو ماعندهمش ؟ ولا لازم يكون موضف حكومي باه يدي التامين ؟

قلتي مرة انو تاني مكاش تقاعد ، هادا تاني قانون خاص بالاجانب فقط ؟

الجنسية عندكم ساهلة ، ولا كاين شروط ؟

وين تسكني كاين مولات ؟ يديرو تخفيضات على السلع المليحة ؟

تروحي للبلاد هاد الصيف ؟ باه داركم يشوفو الكتكوتة تاعك نشالله

رمضان عندكم صعيب ؟ أقصد الحرارة

 

[SAMIRA25]

سلام سمورة معلبليش إدا مازال كاين مجال باه نسقسوك ؟ أنا أسلتي كلها راحت ونسيتها
ما عليش حنونة زيدي اسالي
علاه مkaach تامين صحي ، وحتى لي يخدمو ماعندهمش ؟ ولا لازم يكون موضف حكومي باه يدي التامين ؟
شوفي كاينين شركات يامنو و شركات لا و الحكومي يامنه تاني و اهل البلاد طبعا عنهم تامين المقيمين ماشي كامل لانه هنا ما عندهمش الضرائب الراتب تديه كامل ماينحولكش منو

قلتي مرة انو تاني مكاش تقاعد ، هادا تاني قانون خاص بالاجانب فقط ؟

هيه التقاعد تاني مكانش غير للاهل البلد على حساب علمي
الجنسية عندكم ساهلة ، ولا كاين شروط ؟
ما كانش تجنيس لانه مالين البلد اقلية كون يفتحة مجال التوطين يصبحو هم الاقلية على حساب علمي ما نيش متاكدة مليح المواطنين راهم تقريب ملون نسمة و الوافدين 5 ملاين

وين تسكني كاين مولات ؟ يديرو تخفيضات على السلع المليحة ؟
ايهه هنا ما عندهمش اسواق مفتوحة بزاف تلقاي المولات اكثر شيء بسب طبيعة المناخ اغلب الوقت الجو حار
و التنزيلات يديرو في المواسم و الاعياد كيما درك مدايرين تاع نهاية الموسم يديرو حتى 60% تنزيلات

تروحي للبلاد هاد الصيف ؟ باه داركم يشوفو الكتكوتة تاعك نشالله

رمضان عندكم صعيب ؟ أقصد الحرارة

عادي لانه نعديوه في البيت و البيوت كامل مدايرين تكييف

 

[SAMIRA25]

جمانة انت تاني ما قريتيش الاجوبة ؟؟؟؟؟:d
دوك نعاود نزيد نجاوبك ما شي مشكل

 

[SAMIRA25]

صباح الانوار سميره واقامه طيبه حببتي
يعطيك الصحة
قوليلي هل درت عمره بما انك قريبه من مكه
ايهه درت عمرة فاتت كي رمش العين و دائما ننسى بلي رحت لاني ما شبعتش منها خلاص و دائما نحب نزيد نروح ان شاء الله ربي يزيد يكتبلي و لكامل المسلمين يا رب
وشحال تسقاملكم عمره من تم بالدينار تاعنا
على حسب الوقت في رمضان و الا شعبان و الا....و طريقة الذهاب يعني برا و الا جوا مرات تلقاي عروض تصل حتى 5ملاين 10 ايام في فندق عادي و سفر برا في الحافلة وهل عندك عائلتك تما والا لا
لالا ما عنديش
ودرتي صديقات جزائريات وخليجيات والا لا
عندي صديقة وحدة برك
وفي الخارج تلبسي غير العبايات والا تنوعي وبصحتكم العبايات راني نموت عليهم

نوع مرات عبايات مرات تركي
واسمحيلي كل مرة نجي نجاوب نقول بلاك راهم قراو الردود من قبل

 

[SAMIRA25]

صباح الورد سميرة
و دوك جا دور ام الحلوين ربي يحفظهم و ينورهم
ــ كيفاش تنادي لوالدين زوجك ؟ربي يخليهم .
عمي و عمتي
ــ زوجك كيفاش ينادي لوالديك ؟ربي يطول في عمارهم.
عمي و خالتي
ــ ما نوع حجابك ؟
كل مرة زي عبايات حجاب تركي جيببب .... نلبس برك
ــ هل تتحجبي قدام اهل زوجك ؟
كنت بصح بادن الله ناوية ما نزيدش
ــ هل عندك دارك في البلاد ؟
ما زال
ــ ماهو فارق السن بين اولادك ؟ الله يحفظهملك .
ثلال سنوات
ــ ماهو فارق السن بينك و بين زوجك ؟
8سنوات و شوي
ــ هل زوجك قسنطيني ؟

نعم يعطيك الصحة نورتيني

 

[ام الحلوين]

سلام سميرة سمحيلنا خربطناك معانا راكي غير تجاوبي و تعاودي و حنا نسينا الاسئلة تاعنا .
عندي شوية اسئلة .
ــ ولادك ربي يحفظهم كيفاش يعيطولك نتي و باباهم ؟
ــ كيفاش علاقتك مع ناس راجلك ؟
ــ هل سبق و جات عندك عجوزتك ؟
ــ شكون يجي عندك في النفاس ؟
ــ هل ناوية زيدي لولاد ؟
و سمحينا مرة اخرى و الله راني حاسة تعبناك و اذا امكن اختمي الاجوبة اليوم واختاري العضوة لي بعدك .
و انا قرعاجة اي وقت جي حاجة في بالي نسقسيك هههههه.
سلامي حبيبتي .

 

[أم أمين23]

تاع ام الحلوين وجمانة الي جاوبتي عليهم سبق وقريتهم انا زادو تعاودو معليش حنونة تعبة كتيبة برك هههه
صور من اماكن وين تسكني
رايك في المنتدى في الموضوع وفي العضوات تاع البيت تاعنا برك و

وخلاااااااااااااااااااااااص

 

[SAMIRA25]

سلام سميرة سمحيلنا خربطناك معانا راكي غير تجاوبي و تعاودي و حنا نسينا الاسئلة تاعنا .
اسماح حنونة و كيما يقولو تعبكم راحة
عندي شوية اسئلة .
ــ ولادك ربي يحفظهم كيفاش يعيطولك نتي و باباهم ؟
ابي و امي و الاخرى صغيرة ما زالت
ــ كيفاش علاقتك مع ناس راجلك ؟
عادي و الحمد لله
ــ هل سبق و جات عندك عجوزتك ؟
لالا
ــ شكون يجي عندك في النفاس ؟
ننفس وحدي هد المرة برك جات امي
ــ هل ناوية زيدي لولاد ؟
ان شاء الله لي من عند ربي كامل مليح
و سمحينا مرة اخرى و الله راني حاسة تعبناك و اذا امكن اختمي الاجوبة اليوم واختاري العضوة لي بعدك .
سماح اختي و راه عجبتني القعدة ناوية نزيد نضيف
و انا قرعاجة اي وقت جي حاجة في بالي نسقسيك هههههه.
مرحبا بيك في اي وقت
سلامي حبيبتي .

يعطيك الصحة ام الحلوين و ربي ينورك

 

[SAMIRA25]

تاع ام الحلوين وجمانة الي جاوبتي عليهم سبق وقريتهم انا زادو تعاودو معليش حنونة تعبة كتيبة برك هههه
صور من اماكن وين تسكني
ان شاء الله نصورلك
رايك في المنتدى في الموضوع وفي العضوات تاع البيت تاعنا برك و
ما شاء الله وحدة تنسي في الاخرى وربي ينوركم كامل و يعطيكم على قد قلوبكم

وخلاااااااااااااااااااااااص

اهلا ام امين ربي ينورك

 

[أم أمين23]

حقا تفكرت احنا في اوربا باين اللغة وانت ولادك لتم في المدرسة يهدرو معاهم خليجي والا فصحى ؟
وحافظين كلام خليجي والا لا؟
المدرسة نضام مجاني والا خاص؟
ونفس الشيء للحضانة واجباري والا لا؟

 

[SAMIRA25]

حقا تفكرت احنا في اوربا باين اللغة وانت ولادك لتم في المدرسة يهدرو معاهم خليجي والا فصحى ؟
المدرسين اغلبهم سوريين و فلسطينين و مصريين
يحكيو عربي فصحى
وحافظين كلام خليجي والا لا؟
لالا
المدرسة نضام مجاني والا خاص؟
كلهم بالدراهم الحكومي تدفع شوي اقل عن الخاص
ونفس الشيء للحضانة واجباري والا لا؟
الحضانة تقصدي بيها الروضة الروضة 2 اجباري لانهم يتعلمو حوايج يحتاجوهم في السنة اولى

من المفروض خلصو دراهمي هنا دوك نضرب طلة و نشوف شكون لي نعرض من ورائيي
يعطيكم الصحة البنات كامل و ربي يعطيكم كامل واش متمنيين و يجزيكم كل خير

 

[أم أمين23]

مشكورة سميرة على التفاعل الطيب ولو ان انغلاق المنتدى ما خلاناش نركزو مليح مي بيننا الايام نتعرفو اكثر هههه
يلا نستنو العضوة الجديدة

 

[SAMIRA25]

لبنات كنت حابة نحطلكم الصور لي طلبتهم ام امين قبل ما نحط عضوة بعدي و سامحوني ما قدرتش نصورلكم اليوم ان شاء الله نحطهم حتى في بيت المغتربين راكم تسالو
دوك نعلن على العضوة التالية هي


رنيم الغربة
بالتوفيق حنونة​

 

[ام الحلوين]

سميرة الله يخليك حبيبتي و يحفظلك كل عزيز و يشفي الوالد و ما يشوف شر و ينورلك طريقك و يحققلك واش راكي متمنية و شكرا على الاجابات و سامحينا على خربطة الاسئلة
سلامي