حضري طعامك ... الشتـــاء قــــادم

[حاملـة المسك]

بسم الله الرحمن الرحيم
السلام عليكم و رحمة الله و بركاته

مرحبا بكم عضوات اللمة زوارنا الكرام

من عادة جداتنا الاستعداد للشتاء و للايام القصار بتحضير المؤونة من توابل فريك مرمز حبوب فول ووو..
و المعجنات من رشتة.. تريدة العيش و الطعام...
اليوم راح نوجد برفقتكم الطعام او البربوشة او النعمة و كل منطقة كفاش تسميها .. جلسة طيبة

الطعام لراح نفتلوه الخشين

على بركـة الله نبـدأ

المقاديــــر:

دقيق ابيض ناعم ـ ـ ملح ـ ماء ـ نشاء أو فرينة

المستلزمات

غرابل ـ قصعة

غربال رقم:1

غربال رقم: 2

غربال رقم:3

الطريقـــــــــــة:

نضع قليل من الدقيق نبلله بقليل من الماء و نخدمو بصباعنا..نكرر مرتين ثلاث حتان يطلع نفتحوه في الغربال رقم 2

ثم بنفس الغربال2 نطرق خفيف نعزل الاحرش على الارطب

و نسقي بالماء و نبربش بالاصابع و نضيف الدقيق لعزلناه و نكمل في العمل نزيد نسقي و نضيف الدقيق
تكرار التسقية بالماء يكون على حسب نوعية الطعام لراح تفتليه
انا فتلت خشين سقيت ثلاث مرات
و اضافة الماء يكون لما تحسي الطعام نشف بين صباعك لانك لو زدتي سقيتي بلا مانشف راح يتعجنلك

ابرمي برمة خفيفة وارفديه في الغربال رقم 1

الطعام لصيرتيه طميه بجنب والكرابع الاخيرة لقعدتلك ذري عليها شويا دقيق و حليها بلطف عكس عقرب الساعة و حلي ببطن اليد ثم البونية هه ( معرفتش نسميها) مع الاستعانة باليد الاخرى أسفل الغربال

نعاود الكمية نحلها بنفس الغربال لتأكيد تساوي الحبات
و كما تلاحظي فيه فرق بين الحلة الاولى و التانية
لعلى الجنب الايمن و الايسر متساوياتان

و في كل مرة كتري الماء و الدقيق باش يكترلك الطرح
الصور الاولى انا كنت في البداية .. هنا شويا تضاعفت

نبرم برم خفيف و نرفد في الغربال رقم 2

لما نجمع قيس 3 فتلات تقريبا او أربع نرجعهم للقصعة نذر عليهم المايزينة و نبرم 2 أو 3 برمات أنتي و قفازتك و حرصك على الجودة العالية

نرفد في الغربال رقم 3 و نخبط مليح
هنا كصفيتتو رديتو للقصعة باش توضح أكثر

لما قريب نكمل من الفتيل نكتر الماء في الفتلة و نقص الدقيق باش نطمو الطرح
لاحظي في هد الصور الطرح طميتو

لما ننتهي من الفتيل نفور طعامنا بكميات متوسطة و نفتحو في الغربال رقم 1

و بالصحــــة و الهنــــاء


الملاحظات:

ـ معروف في الدقيق أنواع الطراح يعني قد ما تفتلي تنحي غير كمية قليلة و الكرباع عندو الحل اما اضافة المثلجات للماء أما الحل الاكيد و الفعال أنك تفوري شويا دقيق و تخلطيه مع العادي...
ـ حاولي متعتمديش على الدقيق الاحرش كتري الاطراح يكون افضل .. الطعام يجي أرطب
سيدتي أنستي أفتلي مغمضة العينين :-h
ـ الطرح لما تحليه في البداية في الغربال رقم 2 يساعدك انك تتحكمي في خشن الفتلة يعني مشي من المرة الاولى تخرجلك وحدة كبيرة و لخرى متوسطة
ـ حلان الطعام عكس عقارب الساعة الهدف منو حــل
ـ و في اتجاه عقارب الساعة بريم
ـ الافضل عند كل 3 فتلات نبرم .. اولا الطرح ليطيح نضيفوه لخوه و تاني قبل ما ييبس الطعام لانو لو بدا ينشف الحبة متخرجش مبرومة مليح
ـ الطرح الاخير تقدري متعبيش روحك معاه خبيه في الثلاجة و في عجنة مطلوع أو خبز ضفيه للعجنة بصح تكوني نقعتيه في الماء من قبل
ـ يمكن الاستغناء على المايزينة في البريم لكن عن تجربة و جدتها تساعد و تاني تمد بياض ناصع للطعام
ـ تقدري متفوريهش انتي و رغبتك
ـ لما تنشري الطعام اتفداي التسوية بالمسطرة لانها تمنع تغلغل الهواء ..استعملي أصابعك
ـ من الافضل نشر الطعام في مكان عالي .. الاسرة مثلا
ـ ليلا طمي طعامك و غميه بالغطاء لنشرتيه عليه لتفادي الحشرات
ـ اذا كنتي وحيدة أقسمي الفتيل على 3 أيام .. اعطي لنفسك راحة
ـ اذا عندك جنينة أفتلي في الهواء الطلق و متعيي ناظريك بالاخضرار و سمعك بزقزقة العصافير

و بسورة البقرة فانها تجلب البركة

جمعة طيبة للجميع تقبل الله منا و منكم صالح الاعمال

​

 

[حاملـة المسك]

رد: حضري طعامك ... الشتـــاء قــــادم

و غنايتنا كنطيبو السفة .. بسومة ​

 

[fatima der]

رد: حضري طعامك ... الشتـــاء قــــادم

ماشاء الله عليك والله شاطرة الله يبارك حنا ما ناكلوش الطعام بزاف مرة على مرة​

 

[ام رحاب]

رد: حضري طعامك ... الشتـــاء قــــادم

الله يبارك

انا فتلت قبل رمضان 25 كيلو بزاف عليا
​

 

[أمونة المتألقة]

رد: حضري طعامك ... الشتـــاء قــــادم

ماشاء الله باين عليك فحلة

شكرا على الموضوع حبيبتي​

 

[مسلمة وافتخر]

رد: حضري طعامك ... الشتـــاء قــــادم

طرح راااااااااائع وشامل للموضوع اختي حاملة المسك والله فحلة تاع الصح ربي يبارك عليك
ياريت كون سميتيلنا الغرابل والله بغيت نخوض التجربة ونتعلم الفتيل خخخ شجعتيني يا القافزة

 

[oumsif]

رد: حضري طعامك ... الشتـــاء قــــادم

بارك الله فيك رغود حرة بنت لحراير كنت انا وحماتي نحطوا شكارة انتاع الخيشة 50كيلوا انتاع بكري نفتلوها ونفورها ونسقطوها ما تكون الربعة انتاع العشوة نطبقوا في كل شي ودرك في فرنسا عدت نشري انتاع الكيلو كسكس داري او سفينة
اختي مسلمة وافتخر الغرابل رقم 1 سيار انتاع الزرع
و الثاني السقاط
والثالث التناي وكاين الرقيق اسمو الدقاق وكل واحد كيفاه يسموهم[ /COLOR]

 

[حاملـة المسك]

رد: حضري طعامك ... الشتـــاء قــــادم

فطوم راكم ملاح كتاكلوه مرة على مرة كاين لميحبوهش بتاتا :s بوركت اختي

اهلا أم رحاب حمد لله على السلامة
بصحتكم حنونة و تلسلم الايادي .. أنا بديت بالخشين هولتنا السفة و بومفور هههه
تسلمي للمرور الجميل

يعني راح نكون افضل من المتألقة .. امونة بنت سطيف العالي
نورتي أختي


سيي ختي مسلمة راه ساهل في التطبيق ا لانك راح تتكلي على الغرابل في التغطية ههه
اما التسمية تامني بالله كنت نعرف و نسيت .. كاين سلاك الوحلين .. الزراع خخخخ نسيت :$
نورتي اختي متصفحي


سلكتيها في الاسامي سمورة :up: انا نهار شريت الغرابل العشاب قاعد يقلي 1..2..3 بالنوامر ..حكمت فيا هههههههه
منين كانت المعونة كانت ما تجي الوحدة يكمل الفتيل و تاني جملة الغدا تكون من الفتلة للبراكة وينهي دكا
جوزيتي خيرا لمرورك ​

 

[بنت الجسور المعلقة]

رد: حضري طعامك ... الشتـــاء قــــادم

حـــــــــــــــــــــــــــــــــــــــرة كون جيت منعرفكش نقول عليها خدمة نتاع واحدة عجوز
ربي يباركلك في صحتك حنونتي
مفرك ومفتول يسخف كل حبة وحدها
أرسليلي كمشة طراش :d هههههه
واش نحب البربوشة المفتولة كي غير وتبدا تفور و تطلق واحد الريحة والنسمة تهبـــــــل ♥
مشكورة على الموضوع المميز
تقبلي مروروي ​

 

[ibtesem]

رد: حضري طعامك ... الشتـــاء قــــادم

لي عودة للموضوع راهي 11 عينيا تغمضو
هوما مفتوحين نعمل اخطاء ياه هوما بداو يتغمضو خخخ
​

 

[حورية الجزائر]

رد: حضري طعامك ... الشتـــاء قــــادم

يعطيك الصحة

تاكليه بالصحة والهناء

 

[bellafoufa]

رد: حضري طعامك ... الشتـــاء قــــادم

طرح رائع ، والله الفتيل لازم له الصحة و المعاونة و طبعا المعارة اليدوية

 

[hadda0425]

رد: حضري طعامك ... الشتـــاء قــــادم

رغودة جبتيلهم خدمة تكسر الظهر ههههههه
ما عندناش بزاف ملي فتلنا بربوشة العرس
فوتنا نهار تع حرب شياخة النسا وحس ولولاد
هههه الواحد يروح يجب شكارة من الحانوت ويهني روحو
رغم اني ما نحبش بربوشة الحانوت نحب تع الدار

​

 

[hadda0425]

رد: حضري طعامك ... الشتـــاء قــــادم

طرح راااااااااائع وشامل للموضوع اختي حاملة المسك والله فحلة تاع الصح ربي يبارك عليك
ياريت كون سميتيلنا الغرابل والله بغيت نخوض التجربة ونتعلم الفتيل خخخ شجعتيني يا القافزة

شوفي يا مسلمة اذا حابة تكسري راسك بالبربوشة وسيايرها وتعبها هههه طرطقي وذنيك مليح :d
كاين سيار الزرع لي محلول خلاص حنا ما ننستعملهوش في لفتيل
سيار السقاط هذا لي تبداي بيه تسقطي بيه البربوشة
كاين سيار لمعاودي ك تخلصي من السقاط تعاودي فيه
وكاين الرفاد هذا ترفدي بيه بربوشتك لي استخرجتيها
كاين البرام لي طيحي بيه الطرح بعدما تبرمي بربوشتك كي تبغي تفوريها
وكاين الدقاق هذا تغربلي بيه الدقيق وتنحي الدقيق لرطب خلاص
كش ما فهمتي ههههههههههههه
رغود راك وسوستي الطفلة ههههه
​

 

[حاملـة المسك]

رد: حضري طعامك ... الشتـــاء قــــادم

حـــــــــــــــــــــــــــــــــــــــرة كون جيت منعرفكش نقول عليها خدمة نتاع واحدة عجوز
ربي يباركلك في صحتك حنونتي
مفرك ومفتول يسخف كل حبة وحدها
أرسليلي كمشة طراش :d هههههه
واش نحب البربوشة المفتولة كي غير وتبدا تفور و تطلق واحد الريحة والنسمة تهبـــــــل ♥
مشكورة على الموضوع المميز
تقبلي مروروي ​

منحكيلكش طعام بالكابويا مفتول جديد ..... ويا مّامّا
لعندك وين تنشري نباصهولك بكل مشي غير كمشة
لا يغلى عليك يا حلوة اللمة
​

 

[حاملـة المسك]

رد: حضري طعامك ... الشتـــاء قــــادم

لي عودة للموضوع راهي 11 عينيا تغمضو
هوما مفتوحين نعمل اخطاء ياه هوما بداو يتغمضو خخخ
​

وشمن اخطاء ابتسام راح تعمليهم راني بينتلك الغرابل بالارقام ..
راكي تتهربي من الفتيل و المعاونة :very_mad:​

 

[حاملـة المسك]

رد: حضري طعامك ... الشتـــاء قــــادم

يعطيك الصحة

تاكليه بالصحة والهناء

طرح رائع ، والله الفتيل لازم له الصحة و المعاونة و طبعا المعارة اليدوية

لمشي متعود على الفتيل يتعب ..و اكيد المعاونة تهد جبل

شكرا لمروركما ..نورتوني​

 

[حاملـة المسك]

رد: حضري طعامك ... الشتـــاء قــــادم

رغودة جبتيلهم خدمة تكسر الظهر ههههههه
ما عندناش بزاف ملي فتلنا بربوشة العرس
فوتنا نهار تع حرب شياخة النسا وحس ولولاد
هههه الواحد يروح يجب شكارة من الحانوت ويهني روحو
رغم اني ما نحبش بربوشة الحانوت نحب تع الدار

​

راني نحرك في المنتدى حدة :p

اششششش وشمن ظهورنا بلاك معانا كبرات هنا قليلي جيبي الصاكة لخرى :thumb_up02:

ههههه تخيلتكم حدة ... ياولد بعد على الطعام
حدة بنتي نضي سوي النعمة مسوها
يدراري العبو بالبالون بعيد ههههه

خروج على النص ..مشي كون تنفعينا بكش استوس من عند الشاوية مدكرتوش :d​

 

[حاملـة المسك]

رد: حضري طعامك ... الشتـــاء قــــادم

شوفي يا مسلمة اذا حابة تكسري راسك بالبربوشة وسيايرها وتعبها هههه طرطقي وذنيك مليح :d
كاين سيار الزرع لي محلول خلاص حنا ما ننستعملهوش في لفتيل
سيار السقاط هذا لي تبداي بيه تسقطي بيه البربوشة
كاين سيار لمعاودي ك تخلصي من السقاط تعاودي فيه
وكاين الرفاد هذا ترفدي بيه بربوشتك لي استخرجتيها
كاين البرام لي طيحي بيه الطرح بعدما تبرمي بربوشتك كي تبغي تفوريها
وكاين الدقاق هذا تغربلي بيه الدقيق وتنحي الدقيق لرطب خلاص
كش ما فهمتي ههههههههههههه
رغود راك وسوستي الطفلة ههههه
​

ههه انا شو دخلني مسميينو هكدا وقيلا رقم 1
خطراش كيتكربع الطعام وش يسلكو خخخخخخخخخخ
فيه تشابه كبير في التسميات ​

 

[hadda0425]

رد: حضري طعامك ... الشتـــاء قــــادم

ههههههههه مليحة تع رقم واحد يا كابتن خخخخخ
سيايركم درتولهم الرتبة متخرجين من طفراوي ههه
​