بكري يقولك روح اشكي للمير ، واليوم ؟

[Only me]

صباح الخير عليكم ناس اللمة العزاز

جمعة مباركة على الجميع

عندي مدة مادخلتش لهنا واليوم جيت وجبنلكم معايا موضوع نشوفو من خلالو رايكم في واحد الظاهرة

كيما علابالكم انا نسكن في البرج وفي بلدية اليشير ، نهار دارو الانتخابات البلدية ربح واحد السيد 7 مقاعد وهاذ الانسان بالمقارنة مع الاخرين نقولو ماشاء الله اذا مادارش لي تنفع مايديرش لي تضر

المهم الاعضاء الاخرين ماعجبهمش الحال تفاهم ودارو تحالف وجمعو 8 مقاعد ومدومهم لواحد فيهم وياليتهم لم يفعلو

هاذ السيد راه داير الباطل وراه غير يعس في الغاشي ويحاسبهم على حوايج تافهين

والكارثة الاخيرة لي دارها ، هاذ السمانة عرس وليدو واليشير راهي مقلبة راهم سمعونا من سطيف

ليلة الحنة نهار الاربعاء السي خونا جاب الشابة يمينة بايتة تغنني والبارح كي جابو لعروسة جابوها بالخيل وهاذوك البدويين تاع الجلفة لي يشطحو نايلي واليوم لحزام جاب واحد الفرقة تاع لي جان راهم دايرين فوضى بالغنا تاع الستاد والراي

والمشكل الكبير انو قدام الدار جنازة السيد دفنوه نهار الاربعاء قبرو مزال مانشفش

بكري كي الشعب كي ينزعج من حاجة كيما هاذي يروح يشكي للمير ولا الوالي ، تعيشو قولولي لمن يشكيو ؟؟؟

 

[حفيد هواري بومدين]

رد: بكري يقولك روح اشكي للمير ، واليوم ؟

تبدل كلش
وافقت على الموضوع

 

[aminatizi]

رد: بكري يقولك روح اشكي للمير ، واليوم ؟

iiiiih yachir ra7et bekri w koul 3am raha tzid tetbedel almhm rabi m3a acha3b pcq hadou eli rahoum ya7ekmou had le3wam mayreb7ouch????

 

[Only me]

رد: بكري يقولك روح اشكي للمير ، واليوم ؟

شكرا أخي على الاعتماد

 

[أوصاف الصافي]

رد: بكري يقولك روح اشكي للمير ، واليوم ؟

بسم الله الرحمن الرحيم

السلامـ عليكمـ ورحمة الله تعالى وبركاته

ياك راكي تحكي على دزاير .............. وهذا كامل راه صاري في الدزاير :d

ماكنتش عارف بلي دزاير عمله كها ............. لو كنت نعرف كنت نقول لجدي السابعـ:yahoo01:

لجاء مع الفوتحات الأسلامية .....................يشوفنا بلاصه خلاف .. نستوطنوا فيها :bye01:


يا بنتي ولاا كلش عادي في بلادي:smile02:

انتي في الجزائر الوا واق : كل شيء لا يطاق:tongue02:

حنا نقول تحيا الجزائر ومازلنا واقفين وخلاص:down:
قبل ما ننسى يو راني سمعة الحفلة نتاع وليد مير من بوفاريك:d

صوة راه يلحق للعنا شابة يامينة الله لا تربحه شيب وعيب عندها قرجومة قاسحه:d​

 

[Only me]

رد: بكري يقولك روح اشكي للمير ، واليوم ؟

بسم الله الرحمن الرحيم

السلامـ عليكمـ ورحمة الله تعالى وبركاته

ياك راكي تحكي على دزاير .............. وهذا كامل راه صاري في الدزاير :d

ماكنتش عارف بلي دزاير عمله كها ............. لو كنت نعرف كنت نقول لجدي السابعـ:yahoo01:

لجاء مع الفوتحات الأسلامية .....................يشوفنا بلاصه خلاف .. نستوطنوا فيها :bye01:

واش هذا عمو شعر ولا خاطرة مافهمت فيها والو

نديرو برك كي كمال بوعكاز نولو لعهد هارون الرشيد ههه

يا بنتي ولاا كلش عادي في بلادي:smile02:

انتي في الجزائر الوا واق : كل شيء لا يطاق:tongue02:

حنا نقول تحيا الجزائر ومازلنا واقفين وخلاص:down:
قبل ما ننسى يو راني سمعة الحفلة نتاع وليد مير من بوفاريك:d

صوة راه يلحق للعنا شابة يامينة الله لا تربحه شيب وعيب عندها قرجومة قاسحه:d​

والله قرجومة صحيحة ، هي قالتلهم مسلخير عليكم سمعتها من دارنا سختلي يما لي قالتها هههه


يعطيك الصحة عمو على رايك

 

[NASRO DZ]

رد: بكري يقولك روح اشكي للمير ، واليوم ؟

الله غالب اختي الدنيا تغيرت

 

[شجـ الروح ـون]

رد: بكري يقولك روح اشكي للمير ، واليوم ؟

السلام عليكم ورحمة الله تعالى وبركاته
الشكوى لربي من بكري يا وخيتي
كان غير جات الحكاية حكاية غناية وعرس.....
ربي يفرج ان شاء الله
ربي يهدينا ويهديهم​

 

[Only me]

رد: بكري يقولك روح اشكي للمير ، واليوم ؟

وي خويا نصرو عندك الحق مي لعباد لي تبدلو ماشي لعباد

 

[Only me]

رد: بكري يقولك روح اشكي للمير ، واليوم ؟

شجون الروح كلامك صح 100 في 100

ربي يهدينا ان شاء الله

 

[عفيفة الحبوبة]

رد: بكري يقولك روح اشكي للمير ، واليوم ؟

هادي هيا حالة لالجيري
الله غالب راهي رايحة و تزيد تخسر
ربي يهدينا كيما يقولوا
الشكوى للعبد حشومة
الشكوى لربي هي الاولى​

 

[Only me]

رد: بكري يقولك روح اشكي للمير ، واليوم ؟

الشكوى لغير الله مذلة هاذيك هي

يعطيك الصحة أختي

 

[كافيري]

رد: بكري يقولك روح اشكي للمير ، واليوم ؟

لحال تبدل وعاد هذا ياكل في هذا
ولي يهرب بجلدو راه سلك على خير
لمهم لواحد مايكونش من هاذو ناس لي في لوجه مراية وفي ضهر مقص:s
​

 

[Only me]

رد: بكري يقولك روح اشكي للمير ، واليوم ؟

ya3tik, esa7a kafiri 3la lcmnt elbahi

 

[ريانة]

رد: بكري يقولك روح اشكي للمير ، واليوم ؟

gchakwa ni lalmir ni lelbey kima gel kamal lgalmy lchakwa lraby walchikaya lirayr alah madala raby yahdina wyoltof bina .

 

[Only me]

رد: بكري يقولك روح اشكي للمير ، واليوم ؟

عند الحق اختي الشكوى لغير الله مذلة

مي الذل لي دارو هاذو أكثر وراني نحكي على المير لي من المفروض يرعى شؤوون الناس ويخمم عليهم اصبح هو الخطر الاول عليهم