حكاية فتاة حائرة ، ساعدوني بالحل الأنسب

[ROUAKIMOURAD]

رد: حكاية فتاة حائرة ، ساعدوني بالحل الأنسب

بسم الله الرحمان الرحيم

السلام عليكم ورحمة الله وبركاته

بدون مقدمات ، أنا شابة في العشرينات من عمري انهيت دراستي الجامعية هده السنة
من فترة تعرفت على شاب يكبرني بعامين ، أنهى دراسته الجامعية العام الماضي
وحاليا بدون عمل مستقر يعني خدام في بيرو شاد يده
هو شاب خلوق متربي يحبني و يخاف عليا في كثر من الاحيان نحس به خويا
من كثر مايخاف علي وميرضاليش حاجة مش مليحة
مند تعرفي به ولا مرة تلاقينا وقعدنا عادي بحكم هو من ولاية غير ولايتي
ولما يحب يشوفني يجي لجامعتي يشوفني من بعيد ويرجع
وفي كثير من الأحيان يجي يشوفني وانا بدون علم حتى يرجع باه يقولي اني جيت اليوم وشفتك
كنتي في هداك المكان قاعدة ولبسة هكا وهكا
لكن مشكلتي بدات من فترة قصيرة
لما كنت فالجامعة كانو يتقدمو بزاف عرسان وكنت نتحجج بالدراسة
وبعدما أنهيت دراستي واستمرو العرسان فالتقدم لي لكن هذه المرة بقيت اتحجج بالعمل
حتى نخدم باه نتزوج ، كلما نقوله على واحد تقدم لخطبتي يسكت ونحس ماباليد حيلة
واخر خطرة قلتله على عريس تقدملي قالي شوفي يابنت الناس انا منيش نتمسخر بيك
ولا نلعب بيك نيتي لما هدرت معاك اول مرة الحلال وانتي تكوني مرتي قدام ربي وعباده
حاليا ظروفي متسمحليش ندير خطوة ونتقدملك رايح نتلقى الرفض قطعا من عائلتك
لا خدمة مستقرة ، لا ظروفي المادية تسمح ندير هدي الخطوة
ومؤخرا ظهر مشكل اخر هو مشكل الخدمة الوطنية ، لكنه غير رايه قالي
نقدر نقنع أهلي ونجو نحطو عليك الهدرة باه قدام الناس هادرين عليا ، لبين ميخلص
خدمته العسكرية ويفتح مشروع صغير على قده يقدر يوفرله مدخول مليح ونديرو عرس باذن الله
الصراحة حرت ، من جهة أهلي نعرفهم يرفضو الفكرة تماما من مبدأ أبي
أخطب من هز من ، هكا صرات مع خياتي 3 لي قبلي ، ومن جهة ثانية نخاف من غدر الزمان
والفتاة تكبر بسرعة نستنى بدون مقابل
ومن الجهة ثالثة واثقة فيه جدا ، نحبه ونحس معاه بالامان وعلبالي يحبني من قلبه
يخاف علي ونويلي الخير
وواثقة في قدراته لطالما كانت عنده أحلام ومشواره الدراسي كان ممتاز

حائرة جدا ومشوشة أفكاري في اتخاد القرار المناسب صليت ولم يظهر شيء
فلم أجد الا كتابة مشكلتي بينكم علني أجد حل واراء تريح بالي
وتوصلني الى القرار الصحيح

وأخيرا أرجو منكم عدم وضع ردود جارحة لاني بغنى عنها خاصة في مثل هذه الفترة
​

​

وعليكم السلام ورحمة الله
اختى الحائرة اعلمى ان كل شىء بمكتوب الله لا يتحرك شى الى باذن الله
اترك الامر بيد الله ولا تعلقى امال كبيرة تعدى الحياة تسير وان كان هذا الرجل مكتوبك فهو لك

 

[lilia mess]

رد: حكاية فتاة حائرة ، ساعدوني بالحل الأنسب

أختي الكريمة

السّلام عليكم

أولا أحييك على الصراحة ديالك

انت راك في حيرة من أمرك: من جهة راك حابة تكملي حياتك مع هذا الشاب
و من جهة خايفة من الرّفض تاع الاهل ديالك
ومن جهة خايفة منو يخذلك بعد طول الانتظار

حنا كي يكثر علينا التخمام نروحو ربي سبحانو
و نصليو و ندعوه بأن يكون الفرج و الخيرة من عندو سبحانه
و تعالى و انت صليتي كيما قلت
و ما ظهرلك والو

في حد علمي و العلم لله...اننا لمّا نصليو صلاة الاستخارة يلزم ما تكونش عندنا احكام مسبقة
يعني ما نكونوش خيرنا من قبل و نروحو ربي نستخيروه

توكلي عليه و صلي مرات و مرّات حتى تطمئن نفسك للأمر امبعد تيك
القرارلك في حسم الموضوع

-أنا من رأي كلّمي ماماك و اشرحيلها كلش
بلا ما تخبي بلا ما تحشمي كلّميها كأنها صديقتك
و الام خير صديق ناصح

-خلي أهل الشاب يجيو للدار
لعلّ و عسى يعجب الاهل بأخلاقوا كيما راك تهدري

الشاب يا اختي ما كدبش عليك في والو
الشي لي وعدك بيه هو مكالمة الاهل و راهو ناوي يديرها على حساب
حكايتك

خلي الأمور تمشي كيما حب ربي
و ربي ما يخيبكش ان شاء الله
و اذا كان من مكتوبك أتأكدي حتى قوة في العالم
ما تقدر تبعدو عليك
و اذا كان العكس
فالخيرة في ما اختاره الله

ربي يوفقك...و يهنيك حبيبتي

​

 

[*أوراق أمل *]

رد: حكاية فتاة حائرة ، ساعدوني بالحل الأنسب

أنآا أتفق تمآامآا مع َ الصَّديقة
lilia mess
فهي محقَّة عندمآا قآالت أنه يجب عليك ِ مصآارحة ُ أمِّك و التحدث ُ معهآا
كآانهآا صديقتك ْ

كآانت اجابتها كافية حقيقَة ً ليس لدي مآا
أضيفه على كلآامها

:regards01:
​

 

[Moha le sage]

رد: حكاية فتاة حائرة ، ساعدوني بالحل الأنسب

قريتك كلامك عجبني و شفت فيك انسانة عاقلة و تحسب صح ....

و عندك الحق كي طرحتي السؤال هذا لانو صعيب و واعر ...

في نفس الوقت واحد فينا ما قادر يساعدك .. لان القضية قضية مستقبل ... و علمها عند ربي سبحانو ..


عندك بزاف حلول ... اللي من بينها طبعا انك تعفسي على قلبك و تقبلي واحد تشوفي فيه صفات مليحة و تاع مسؤولية و يخاف ربي سبحانو ...

و تقدري تستناي هاذ الانسان بشرط واحد هو يجي للدار و يعطي عليك الكلمة ... بصح المشكل الكبير حتى هاذي و مش مضمونة ... قادر بعد عام و لا زوج يقلك راني ماقدرتش ندبر دراهم و رايح نسافر للخارج و يسمح فيك نورمال ... و قادر تعجبو وحدوخرى و يبدى يميل ليها .. و قادر يروح للارمي و يسحروه لثم و يتزوج في بلاد بعيدة .. و قادر يصرالو مشكل في الدار و قادر يموت و الموت حق ( بعيد الشر ) وقادر يزوجوه فورصي و قادر عايلتو متحبش و قادر عايلتك ترفضو ....وقادر و قادر ............. و القادر ربي سبحانو ..

شكون اللي يضمن انو يولي ... و زيد بعد شهر ولا شهرين .. ولا عام ولا عامين ؟؟!!

راكي تقولي خلص القراية و رايح للارمي .. و زايد بعدها راح يدير بروجي و يتسلف صوارد و يبدى .. و يقدر ينجح و يقدر يدير الدين و يبدل الميتيي .. و في جميع الاحوال كون نحسب مليح لقضيتك هاذي نلقاها تحكم ربع سنين على الاقل ..هل قادرة تستناي نتي ربع سنين ؟؟؟؟؟

انا منيش نقلك خليه ومانيش نقلك في نفس الوقت ارقدي على مخدة و راه جايك ...راني نقلك احسبيها صح ... باسكو الخاسر مش هو و لكن نتي ... الراجل في ربعين يتزوج .. و المرا بعد ال25 و بلاك قل ..يسمى راهي كبيرة ( هاذو حسابات المجتمع تاعنا .. مش رايي )


تفكرت كنت نقرى في الجامعة كانو زوج مع بعضاهم طول 4 سنين و خلصو من الجامعة و قالها نجيك بعدما ندير مستقبلي ...راني نحكيلك على زوج حبو بعضاهم و عرفو بعضاهم اكثر من ربع سنين .. و مكانش واحد يتخيل انهم يتفرقو .. المهم بعدما تخرجنا كامل ..السي خونا يقلها اليوم غدوة اليوم غدوة .. و هي تستنى فيه ..من بعد طلع لفرانسا و سمح فيها و كانت ربما ضروفو مش مليحة ...


قعدت عامين و هي تستنى فيه ..من بعد تزوجت من وحداخر و راحت قصتها و 6 سنين من عمرها باطل ...



نعطيك حل ما تلفي ما تدوري و خوضي رايي راني مجرب و شايف و عايف ... ما تفورصيهش وما تضغطيش عليه بصح اعطيه ديلي ... قال بعد 3 اشهر ارواح اخطب باسكو في الدار حابين يزوجوني ولا عفسة هكذا ..ما تبينيلوش بلي نتي لي راكي متحيرة ...

اذا قالك ما نقدرش نجي ذرك .. احسبي في راسك و ديري مدة محددة زعما عام ... قوليلو اذا فات هاذ العام و ما جيتش ما تلقانيش ... و هو اذا كان يحبك صح و فحل راه يجي و يخطب ... و السهال ربي سبحانو .....

​

 

[علي الفاضلي]

رد: حكاية فتاة حائرة ، ساعدوني بالحل الأنسب

نصيحتي لك باختصار بعد قراءتي لردود الاعضاء الافاضل.

اذا لقيتي رجل صالح مناسب قادر على روحو ... لا تضيعي الفرصة.

وخلي ولد الناس يروح في حالو ما تزيديش عليه .. اللي فيه كافيه ... مع مشاكلو ويحل امورو بالتدريج.

المرا يخطبو 100 قادرين ويديها واحد ...فما بالك بهذا حاصل في روحو ...

والعواطف والحب مشاعر عابرة سحابة صبف ان لم تكن مبنية على اسس صحيحة وسليمة ..

كي نجيو للواقع ... ما يبقى غير الصح.

والسلام

 

[~ غيث ~]

رد: حكاية فتاة حائرة ، ساعدوني بالحل الأنسب

لا إله إلا الله
ربي يفرج على عبادو والله المستعان.
صارحي والدتك أختي وهي تنصحك بإذن الله ، والدعاء الدعاء
ومن ثم عليك الابتعاد وقطع الكلام معه لأنه لا يجوز شرعا والله المستعان ، ولعل هذه التعطيلات بسبب هذه المعصية !

ربي يغنيكما بالحلال عن الحرام أختي و ييسر لكما الحلال الطيّب تيسيرا,

 

[YAHIA S]

رد: حكاية فتاة حائرة ، ساعدوني بالحل الأنسب

السلام عليكم
ايه واش حنقولوا اختي
اذا كاين مكتوب
ربي اهني سعيد بسيعدة
موفقة باذن الله
تحياتي

 

[فاستبقوا الخيرات]

رد: حكاية فتاة حائرة ، ساعدوني بالحل الأنسب

فتح الله عليكما ويسّر الله لكم فتحاً بالحلال الطّيب
المبارك الّذي يحبه ويرضاه ويرضى به عنكما
أكثرا من الدّعاء وأخلصا النّية لله تعالى والله سبحانه وتعالى
هو من يتولّى بفضله ورحمته الرزق والإعانة والتّوفيق والتّسديد،
جمع الله بينكما في خير وعلى خير ورزقكما الله من فضله آمين.
​

 

[ouissi]

رد: حكاية فتاة حائرة ، ساعدوني بالحل الأنسب

ربى يجمعكم فى الحلال

 

[عاشقة رضا الله]

رد: حكاية فتاة حائرة ، ساعدوني بالحل الأنسب

انصحك بعمل استخارةو بالتوفيق

 

[zagane]

رد: حكاية فتاة حائرة ، ساعدوني بالحل الأنسب

السلام عليكم

ساهلة يجيب اهله ويخطب ثم يعقد عقد شرعي وعقد اداري كضمان لصحة كلامه امام والديك دون ان يمسك ويتركك في لبيتكم ويدهب الى الخدمة العسكرية ويكون الزواج بعد دلك ان كان صادق وان لم يكن صادق فستتركيه وتاخدي كل حقوقك

 

[هاجر K]

رد: حكاية فتاة حائرة ، ساعدوني بالحل الأنسب


استخيري الله عز وجل هادا الشيئ الوحيد والاساسي لي تقدري ديريه
استخير الله ثم شاوري ناس تاع ثقة و راي سديد وربي راح يقدم مافيه الخير ليك وماتدريش وين راه مكتوبك
ولا وين راهي سعادتك الحقيقية
وربي يهنيك ان شاء الله و يسرلك امورك و يرضيك بما قسم لك