ناس الريف خيرمن ناس المدينة .....

[وصال]

رد: ناس الريف خيرمن ناس المدينة .....

عليكم السلام ورحمة الله وبركاته

صباحكم سعيد
صباحك اسعد
الناس تاع المدينة يتاثرو بلامود اكثر
انا نظن بلي في الوقت الراهن مولاش فرق بين المدينة والريف في جانب لامود بصح كاين عفايس ولاد الريف متحفظين فيهم اكثر من اولاد المدينة صوا رجال ولا نساء

اما من ناحية التدين الفتاة المتدينة راح تخاف ربى سواء كانت فى الريف او فى المدينة
في هاذي منختالفوش صح لي متدين متدين يالوكان تحطو في الماريكان ،بصح على حساب واش رانا عايشين نلقى انفلات كبير لفئات ومن كل الاعمار في المدينة اكثر من الريف ، واثناء تجولي في احدى المناطق الريفية لقيت حضارة مختلفة تماما مرنيش نحكم على الناس ملاح ولا ماشي ملاح كيما يقولوا احكم على الناس بما تراه واترك الباطن للخالق .
وهذا راجع لهداية الله اولا ثم تربية الوالدين وعوامل اخرى
تربية الوالدين صدقني بالرغم من ان المسؤولية تقع على عاتقهم بصح مرهيش معيار ابدا كاين وين الاب ولا الام ما يقصرو في حتى شئ والاولاد يخرجو منحرفين .
شكرااااا على مواضيعك المميزة فى هاذ القسم
​

لاشكر على واجب ، بارك الله فيك على المشاركة الطيبة .

 

[وصال]

رد: ناس الريف خيرمن ناس المدينة .....

افضل الريف على المدينة لان فيه البساطة و المناظر الخلابة

لكل ميزاته الخاصة ، اما من جانب البساطة والراحة اوافقك الراي تماما . شكرا على المشاركة

اللي خبيث خبيث .... كون يسكن حتى في مكة ..

و اللي طيب طيب كون يسكن حبس ...
صح كلام منطقي 100%

ولد البلاد بالعقلية مش بالبلاصة .... كون تسكنيه في نص الصحرا يبان ..

و اللي قشطي قشطي (جبري ) .. كون تحطيه في السونطرفيل ....

اللي متدين متدين كون تشوفيه في البار ....

و اللي فاسق فاسق و الله و يلبس الف قميص ( القندورة السلفية )

هذا كلامي مش اقتباسات ...............................
​

كلامك صحيح وراني معاه 100 % وفي موضوعي مقصديش بلي ناس الريف متدينين وناس المدينة لالا حبيت نحكي علاش بيناتنا دوك كاش مرة رحت للبلاد في الصيف وصبت نساء لابسين ديكولتي والجيب الميني .... انا دوك هدرت على النساء لانو الرجل يجوز له في اللبس مالايجوز للمراة وراك عارف قصدي يعني ، مثلا نصيب ولد لابس شورت نورمال بصح نصيب بنت لابسة كيما ولد يعني شورت سيقانها كامل باينين انورمال فهمتني


عندنا فرق بين الهدرة في سطيف و دزاير ... حنا ولد البلاد = وليد la ville ...

و اللي خارجين علي المدينة نقولولهم يسكنو الـ الدوار ولا الـ village .. ولا ليزنفيرون ( les environs )
معليه خويا نتاع الصح تختلف المفاهيم من بلاصة لبلاصة
كاين ناس يطيحو بولاد البلاد مع احتراماتي بصح الواقع ورانا عايشين فيه وشحال من واحد ولا وحدة من ناس المدينة تجيهم هوما متحضرين على ولاد البلاد بصح انا راني نشوف العكس ، مثلا يضحكو على اللبسة يشوفو امراة حجابيست يقوللها الحاجة ، وبيناتنا كاين لي مقصدوش احترام يحب يطيح بيها وهاذ الامور شفتهم بزاف ، خاصة اذا كانت واحدة صغيرة في اللاج هذا مجرد مثال يعني دوك نعرفو خيرمن ربي .


عنوانك يحكي ختي وصال على ناس الريف و المدينة ونتي داخل الموضوع تحكيلنا على النسا الحيجابيست و السيفيليزي .... و كاين فرق كبير ... كون بدلتي العنوان و كتبتي بنات المدينة و بنات الريف ...

كل بلاصة فيها المليح و الحاير ... المدينة فيها حوايج ملاح و فيها مظاهر مش ملاح .. و الريف ثاني ... عندو محاسنو و عيوبو ... و كون نبدى نحكي راني نكتب عشرين صفحة ..psk المقارنة لازم تقيس حوايج بزاف .. النمط المعيشي و المظاهر العامة و الاداب و البيئة و امور كثيرة ... بصح منيش هنا باش نعبر .........


نولي لموضوعك ( على السترة تاع البنات بين المدينة و برا ) ماشي ( ناس الريف و المدينة ) ... نقلك les apparence sont souvant tranpeuse ... ما تحكميش برك على الحجاب و لكن على le tout ..

و كي تشوفي بزاف دايرات الحجاب مش معناها راهم جايين من مكة ... ياما تحت السواهي دواهي ....

تلقاي الكثير من الخبيثات و الفاسقات و اللي خارجات طريق دايرينو ... و تلقاي بنات يتبعو لامود بصح قلبهم صافي ...

تلقايها في دوارها دايرة الحجاب و كي تروح للجامعة تنحيه و كي تلحق للاقامة تخرج بالبيجاما و الشعر مطلوق .. الدوران في الحوانت .. و اللي فاسقات راهم يركبو مع الرجال في الطوموبيلات و يريوحو للحانات لابسين الحجاب و من بعد ينحوه ....

و حاجة اخرى هي شكون لي قالك هاذو المتعريات مهمش جايين من ليزونفيرون و الدواور ... وحدة قاعدة عند خالها و لخرى جات ضيفة و لخرى غير كيف رحلو ..و تعمرت بيهم المدينة ...

كنت نعطيك في مجرد امثلة ... متقدريش تقولي هذيك متدينة باسكو لبست حجاب و هذاك متدين باسكو دار قميص و طلق لحية ... متقدريش تقولي هذيك تحشم باسكو ساترة روحها ..باسكو تقدر في دقيقة تركب مع واحد قدامك و تروح للبيتزيرا و تنحيه ... و تقدر لي تشوفيها سيفيليزي و تقولي خارجة طريق ..يبروفوكيها واحد تحط راسها و ما تجاوبوش و تكمل طريقها للدار .... ..

الدين + الحشمة + الاخلاق ..راهم داخل العبد ..لازم تخالطيه قبل ما تحكمي عليه و تقولي هذاك خير و لاخر خير ... و الباقي كامل اكسيسوارات و ديكوراسيون .....

و كل شاة تتعلق من راسها ....................

الكلام لي قلتو راني معاك بالنسبة للعنوان بالاك صح كون درتو كيما قلت انت خير
زيد واش راك تهدر انا ما كانش قصدي فيه بالاك الهدرة ديالي في الموضوع كنت لازم نقول فيها هذا مجرد مثال معليهش رانا هنا باش نتناقشو
بالنسبة لواش قلت نتاع الصح مرحش نحكم بلي الحجابيست جات من مكة ولا السيفيليزي قريش يااخي نحن نعنى بالمظاهر والباطن يعلمه الله .
بصح دوك نعطيك مثال وقولي ، باش تعرف بلي الانسان مسلم بلا ما يقولك واش مالحاجة لي تقدر تعرفو بيها ، الراجل مرحش نعرفو ( الا اذا كان لابس قميص ملتحي ) راح يجيني بالاك مسلم
المراة حيجابيست راح نقول ديراكت مسلمة (سنة ولا شيعة)
المراة سيفيليزي تقدر تكون من اي ديانة
فهمتني انا قلت بلي علاش 80 % لي ميطبقوش الدين تلقاهم كامل متمركزين في المدينة اسكو حضارة هاذي ولا انفلات
نتمنى فهمتني واش حبيت نقول وتعاود تناقشني في الموضوع بغض النظر على الحكم على الناس وعلى علاقتهم مع ربي هذا امر لا يعلمه الا الله.

شكرا جزيلا اخي محمد والله النقاش معك مثير اتمنى عودتك للتعقيب على الرد .



​

 

[وصال]

رد: ناس الريف خيرمن ناس المدينة .....

Ya khti hadouk annass li fahmou atta9addoum ba3oug
Fahmou al3oura wa attachabouh balgharb mina attahaddour
Wallahi ana tani sa9ssatni wahda firanssia 3lah nasskoum moutahajibatt ou loukhrin bla hijab ou fahmatt bali hada tana9oud fi din alisslam ou machi gir hia sa9ssaouni bazaf walhamdoulillah kont nal9a alijabatt li inahiou hadou achoubouhat 3la addin dialna

بارك الله فيك اختي والله فهمتي قصدي مليح شكرا معندي ما نعقب .

الاخ موحا لوساج قالك كلش بارك الله فيه وفيك اختي على طرح الموضوع

معناه موضوعي مفهمتوهش كيما كنت حابة المهم واش محمد شافي كافي صح 100% بصح لا بنطبق على موضوعي وفيه خروج لشئ اخر . المهم شكرا جزيلا وتمنيت لوكان نسمع رايك .

أمر محزن فعلا طريقة تفكير البعض

المهم لكل من ظلم أقول له ربي يخلف عالشجرة مايخلفش على قصاصها

لم افهم شيئا صراحة شكرا جزيلا على المشاركة .

السلام عليكم

الاعراب اشد كفرا ونفاقا ناس برا
الله اكبر

رغم اني ضد ما يحدث في المدينة ولكن ما يحدث في الارياف رغم العادات والحجابات فهو امر وامر لوجود الخلاء الواسع خاصة النساء في الريف
ورغم دلك هناك الماصلات في الريف ولكن قليلات واستسمحهم

قليلات هادي هي صلب الموضوع
شكرا على المشاركة

قلت ما نريد قوله ...
شكرا

انت ايضا لم تفهمني لكن لا باس المهم المشاركة بارك الله فيك .

 

[وصال]

رد: ناس الريف خيرمن ناس المدينة .....

السلام عليكم ورحمة الله وبركاته ...

أولا ..أطلب من الأخ الذي استحضر آية " الأعراب أشد كفرا ونفاقا .." ، أن لا يوظف الآيات في غير موضعها ولا محلها ...

(فهذه الآيات لم تعمم على جميع الأعراب ...فهي كقوله تعالى " وكان الإنسانُ كفورا " ، فهل يعني هذا أن كل إنسان كافر ..؟؟!!


ثانيا..ندخل في صلب الموضوع ...


الأخت أرادت أن تبين وجهة نظرها وفقا لما تراه...كما أنها تتكلم بشكل عام ..وبالصفة الغالبة ..عادة ...وفقا لما تراه أيضا ...

نعم ..أنا معكم في أن (الأصيل أصيل أينما وضعته ..)

لكننا نتكلم هنا (بشكل عام ) عن الفرق بين نشأة الريف ..ونشأة المدينة ...

فلا شك أنها هناك اختلاف ...والبيئة لها دور ..(ولايقولنّ أحد ليس لها تأثير ...لأن لها تأثير ..وإلا لما قال عليه الصلاة والسلام " كل مولود يولد على الفطرة فأبواه يهودانه او ينصرانه ........" )

المغزى من كلامي ...أن ما أعنيه بـ البيئة ..كل شيء فيها ...الوالدان ...الناس ...حتى المكان ومافيه ...


وبما أنه ( في الغالب ) ..ناس الأرياف لم يصل إليهم ذاك (الانفتاح )..فهم لازالوا على فطرتهم ..بل ربما أكثرهم يعرف( العيب ) على أنه (عيب ) أكثر من كونه (حراما )..

أي أنهم قد تطبعوا على مثل هذا ..حتى صارت عادات وتقاليد ...وربما إن سألتهم عن حكم هذا أو هذا ...ما أجابوك ...لكنهم يعرفون (إن ذاك يجوز ..وذاك لايجوز ..وفقا لما تربوا عليه ..."


نعم ..ليست كل محجبة صادقة في حجابها ...وأيضا ليست كل مسفرة تخلع لباس الحياء والأخلاق والدين ..



هناك محجبات ...تقول في نفسك لو تخلع حجابها (أحسن لها ..)، ...وهناك مسفرات ..تقول في نفسك (لا ينقصها إلا الحجاب )..


لكن....هل يعني أن نتخذ هذا مسوغا ..نتعذر به عن (المسفرة ..)!! ونقول لها لابأس فالحجاب ليس كل شيء، أهم شيء الأخلاق ..!!

(إننا بهذا ..نشجعهن ونشجع غيرهن على أن يحذون حذوهنّ ...خاصة أن المحجبة شوهت سمعتها تلك التي تدعي أنها محجبة ..)


الكلام هنا يتشعب إلى أكثر من موضوع ..لكن نعود للمحور الأساسي ...


لو سألك أحدهم ..ماهي السمة الغالبة لأهل الريف ...؟؟ وماهي السمة الغالبة لأهل المدن ..؟؟ (بالتأكيد لن تقول له ..على حسب ..والبيئة مالها تأثير ...والأصيل أصيل أينما وضعته ..والسيء سيء ..أينما وضعته ...وأن هناك محجبات ولسنّ محجبات ...وأن هنا مسفرات أفضل من المحجبات ...)


يا أخي ...كل بلد لا يسلم من هذه وتلك ...وكل فئة لا تسلم من هذه وتلك ...(كما أن الخير لا ينعدم لا في هذه ولا في تلك ...)


لكننا نتحدث فقط عن الصفات العامة لكل منطقة ....وإلا فنحن نعرف إن ذلك ليس مقياسا نقيس به مدى إيمان وأخلاق كل شخص ..


(كما لو أنك تريد التحدث عن عادات شعب من الشعوب ....فانك حين تتكلم ..تتكلم بشكل عام ...وإلا فهناك دائما استثناءات ...)


........................



شكرااا جزيلااا لصاحبة الموضوع ...


وعذرااا إن أطلنا عليكم ....


دمتم في أمان الله وحفظه ...

شكرا جزيلا لانك فهمتني واعطيت الموضوع حقه من الرد ولتعقيب على باقي الردود كفيت ووفيت ، وشرحت ما كنت بصدد شرحه لانه صراحة الموضوع اخذ منحى اخر غير الذي سطرته المهم نحن هنا لنتناقش وليست مشكلة بالعكس فتح المجال لمعرفة اراء الاعضاء في الفرق بين ناس المدينة وناس الريف .
شكرا مرة اخرى باركك الرحمن .

 

[وصال]

رد: ناس الريف خيرمن ناس المدينة .....

السلام عليكم
وعليكم السلام ورحمة الله تعالى وبركاته
من خلال قرأتي للموضوع تبادرت الى ذهني مجموعة من الصور وكانني رايت مارايتي
اضن ان صاحبة الموضوع تريد اصال فكرة عن حياة المدينة وكيف تعيش بعض النساء هناك في الحقيقة ماقالته الاخت وصال هو حقيقة يوجد هذا النوع من النساء في المدينة تجدهن مع الرجال تصافحهم تسلم اربعة عادي جدا وتجدها في البيت خوها او ابوها او امها متقلهمش صباح الخير.. تجد فتات تمشي مع مجموعة من الشباب تلعب تجري عادي جدا على الطريقة الغربية وهذا لا يستطيع احد انكاره وكلنا راينا باعيننا في نظرهم انفتاح و حضارة وتقدم وازدهارولي ميكونش كيفهم متخلف في نظرهم حتى في الكلام تجد الفرنسية
هذا هو موضوعي بالذات انا لم اقل ليس هناك متحجبات فانا متحجبة وحجاب شرعي واسكن في قلب المدينة وصدقني هناك من لا يعجبه حجابي يقولولي وليتي متخلفة
اسمحولي بالاك معرفتش نوصل الفكرة برك
شكرا اخي الكريم فهمتها وهي طايرة بارك الله فيك .

وفي اشارة الى للغتهم التي يتحدثون بها
قال الشافعي -رحمه الله- :
( ما جَهلَ الناسُ ، ولا اختلفوا إلا لتركهم لسان العرب ، وميلهم إلى لسان أرسطو طاليس )
قال الفرنسي لويس ماسينيون :
( اللغة العربية هي التي أدخلت في الغرب طريقة التعبير العلمي ، والعربية من أنقى اللغات ، فقد تفردت في طرق التعبير العلمي والفني ) .
شكرا على الموضوع

يعطيك الصحة .

 

[وصال]

رد: ناس الريف خيرمن ناس المدينة .....

موضوع مليح
يعطيك الصحة
انا قبل كنت ممكن نكون معاك انو ناس الريف محافظين اكثر وانهم متمسكين ربما بالدين اكثر بصح حاليا ولاو كامل كيف لخاطر العم غوغل والتلفاز غزى الجميع ولى ما يسمى التحضر ماكلنا كامل والعباد ولات كامل تحب اديري كيما ناس لهيه وناسيين بلي احنا سلمين عندنا عاداتنا وعندنا الحلال والحرام وانو الغرب ما يحترمش ابدا هاد الناس الي حاسبين رواحهم مسلمين وهوما ما يطبقو في حتى شيء من دينهم وابسطها الحجاب
وكيما يقول الي ما يحترمش روحو وما يتمسكش بمبادئو حد ما يحترمو وعمرو لا يدير شيء يصلح واحنا المسلمين للاسف ولينا نسبيو اكثر ما نحكمو في الي لينا ونروحو ديما للي خاطينا على بيه كل البلدان تقدمت واحنا ماشيين ونرجعو للور نطورو برك في التسيب والانحلال والتحراميت

صح كلامك التكنولوجيا كان ليها التاثير السلبي وثاني مازلت متمسكة برايي انو في المدينة اكثر من الريف .راكي عارفة علاش بويسك كيما قالت الاخت الافق البعيد ناس الريف مزالو يشوفو العيب عيب يعني اصبحت عادات الدشرة كيما نقولو ميقدروش يزيحو عليها والتمرد يكون من واحد ولا زوج وبالخفية ، اما في المدينة معلاباليش كاين حاجة مكاكانش هديك المحاسبة نتاع النفس ونهار المصيبة تعم تخف ، تلقاي اب مربي اولادو احسن تربية ويعيش في وسط كله عفن الطفل يولي يحس روحو في القمة حتى وان كان في الحضيض الاسفل يعني الرؤية تكون مقارنة مع ناس اخرين بالاك راهم تحت الصفر فهمتيني .
شكرا جزيلا اختي ام امين على المشاركة القيمة .

 

[Moha le sage]

رد: ناس الريف خيرمن ناس المدينة .....

يا ختي وصال وش نقلك ..وقت مخلط و مجتمع مخلط ..

مكانش حتى حاجة ثابتة فيه تقيسي بيها ..

تلقاي امام خبيث .. و يفتي على جال صلاحو ولا باش يعطوه سكنى ... و تلقاي واحد سكارجي فيه الخير و كي تطيح بيك يهزك و يوصلك حتى في الليل ...

في دنيتي جربت كلش ... عرفت اني نتوقع كلش في كلش .. حتى هذوك الفاسقات و الخارجات طريق نلقاي فيهم طريق .. و يديرو لي جاست لي ما يديروهمش اللي طول موسطاشهم ميطرا ...

وقت تعلمت فيه لي نحطو موسى يطلعلي فرعون ... و فرعون مكانش خبيث و يضرب في الظهر ..كان نتحبر و خارجها عيني عينك ...


حوايج بزاف شفتها كسبت منها حاجة .. وهي ديما ندير قراراتي لروحي و ما نتبعش الغاشي الراشي كي يحكم على الناس ... باسكو يتخدعو بالمظاهر و الامور المتداولة .. les stéréotypes et préjugés ... زعما نقلك سكان البلاصة هذيك مش ملاح و ما يتخالطوش ... ولا اللي يلبس كذا معناها كذا ... هاذو كامل احكام مسبقة و ناس بزاف تامن بيها ... اللي يدير نواظر متفتح و اللي يدير سنسلة voyou .. و اللي يدير وشم راجل .. و اللي تدير حجاب شرعي معقدة و اللي تطلق شعرها حابة تخرج و اللي تدخل للنت مش متربية و اللي مريحة في الدار تاع زواج ... و اللي تلبس الموv تفهم في الستيل و اللي تلبس القهوي خاطيها .......... وحوايج بزاف خرطي في خرطي و يامن بيهم العامة من الشعب وما نسميهمش شعب ..باسكو كي نقول شعب راني نحكي على ناس تعرف حقوقها وواجباتها وواعية ..نسميهم غاشي راشي يتعاندو و يتابعو و عشرة من الناس معندهمش راي تاع واحد .......

نتي قلتي في الريف ساترين رواحهم ... مهوش معيار تاع حشمة ولا تاع دين ..الريف الناس تعرف بعضاها و المدينة طاق على من طاق ... الحجاب جزء من حاجة .... في المرا الكاملة ... يجي معاه العقلية و التربية و الدين و الضرافة و السيرة و الفاصون تاع الهدرة و و و و .............كنت في الجامعة نشوف في بنات في ال1ere annee تاعهم و الدوزيام داخلينها سهرات و les booms و les galas ... طالعين مع واحد هابطين مع واحد .. راكبين في طوموييل و جايين في وحدو خرى .. و في عاهم لخر يديرو الحجاب ولا يحكمو بلاصة و ما يخالطوش .. باش يقولو عليهم تاع زواج ........ شفت متزوجات يروح راجلهم منا يديرو مجامع مع رجال منا ... شفت خرين كي يجي خطيبهم يذبلولو عينيهم و يلبسو نورمال ... و ليامات لخرين التبياش و الماكياج و الصوت العالي و الضحك العالي ........

و bien sur شفت فئة حاكمة قدرها و متربيات و وين تحطيها تلقايها ...



مهيش حكايو حجاب ولا طرف قماش .... حكاية معدن ..حكاية اصل ..حكاية دخلاني ............

تعلمت اني ما نحكم على حتى واحد وحتى و حدة حتان نخالطو وقت ........ و تعلمت ما نامن حتى واحد كون يجبدلي يدو خضرة من الجنة .......... et c'est rar que je me trompe




​

 

[dodo1]

رد: ناس الريف خيرمن ناس المدينة .....

السلام عليكم

الاعراب اشد كفرا ونفاقا ناس برا

رغم اني ضد ما يحدث في المدينة ولكن ما يحدث في الارياف رغم العادات والحجابات فهو امر وامر لوجود الخلاء الواسع خاصة النساء في الريف
ورغم دلك هناك الماصلات في الريف ولكن قليلات واستسمحهم

وعليكم السلام انا قبل مانشوف هذا الرد خممت فيه .............هذا هو ردي نفس رد الاخ ...وان شاء الله يهدينا جميعا
​