تجربتي في نوم طفلي

[ام منصف]

رد: تجربتي في نوم طفلي

hadda0425
معاناة صح لما يكون الصغير ممراض وخاصة السخانة تخوف ولازم الواحد يوقفلها والا توصل لحوايج لا يحمد عقباها
بخصوص التبول الليلي ولي كوش راهو عندهم موضوع خاص بيهم
خبي خبي ياحدة تجاربك للمواضيع القادمة
نحتاجوك معانا
شكرا لمداخلتك وتعقيبك حدودة
​

 

[أم رزق الله]

رد: تجربتي في نوم طفلي

السلام عليكم و بارك الله فيكم على هاد المواضيع القيمة و المفيدة للامهات
اما في ما يخص تجربتي مع رزق الله الحمد لله ما عذبنيش بزاف في الثلاتة شهور اللولين كان يبات مقعدني على خاطر ما كانش يشبع حليبي و انا ما فقتش بحكم اول مولود ليا ما نعرف والو اومبعد كي عطيتلو لبيبغون ولا يرقد حتى لصباح لحد الان و الحمد لله وشنو عندو حوالي عام ولا ما يحبش يدير لاسياست صافي يعيا بزاف فالنهار و فالليل يطيح كاو كيما نقولو بصح كي يكون مريض كيما هاد السمانة ما يرقدش مليح مالسعلة تفطنو و انا نبات نعس فيه و تاني مازالو يرقد معايا فالشمبرا بصح فالبونك تاعو ما نقدرش نبعدو عليا على خاطر يتقلب بزاف و يعري روحو مع البرد نبات نغطي فيه و هادا ماكان هادي تجربتي البسيطة مع ابني نتمنى الامهات يزيدو يفيدونا

 

[امونة الشاوية]

رد: تجربتي في نوم طفلي

بالمناسبة امونة الف مبروك الحمل اختي
ربي يتمملك بكل خير
​

الله يخليك اختي ام منصف ويرزق كل وحدة حابة تزيد

 

[امونة الشاوية]

رد: تجربتي في نوم طفلي

امونة الشاوية
تجربتك رائعة وتستحق التطبيق
امالا ما عليكم غير اللي راهي بالحمل تقرا تجربة امونة وترجعلنا الخبر
فكرة المنشفة مليحة كلحتي بيها صغيرك مسكين :up:
بخصوص نوم الاطفال مع الوالدين فهذا امر محرج شوية عليها لازم كل ام تولف ابنائها النوم في شمبرتهم الخاصة
شكرا لمرورك الطيب
​

شفتي ام منصف راهو اختراع عن طريق الصدفة والله والله عمري ناضت بنتي في الليل غير في ايام المرض
وتاني بزاف من اهلي قلتلهم على هاذ الطريقة واعتمدوها وتاني تنجح غير للي يعتمد الرضاعة الطبيعية لان الصغير يكون مرتبط بزاف بامو وبريحتها وراني ناوية ان شاء الله نتبع نفس الطريقة مع بنتي الجاية
باش نرقد ونصبح هه كلشي كلشي ولا الرقاد

 

[امونة الشاوية]

رد: تجربتي في نوم طفلي

امونة ربي يكمل حملك بخير و يعطيك وقفة ساهلة

بارك الله فيك اختي ام الحلوين ربي يرزقك واش تتمناي

 

[حاملـة المسك]

رد: تجربتي في نوم طفلي

السلام عليكم

مكاش عندي مشكل مع اطفالي في النوم غير كيمرضو
حتى مرضهم قليل و الحمد لله .. و السبب الرضاعة الطبيعية و الاعتناء الجيد بالطفل
مثال: كيبكي متزربي تروحي ترفديه حتان تتأكدي أنو مشي خداع هه
متتباطئي نيشرد من البكا لانو كثرة البكاء يولي منو عصبي و تاثر عليه في النوم

قد أعوووود ​

 

[راضية حامدة]

رد: تجربتي في نوم طفلي

السلام عليكم
امونة طريقتك مليحة
نصحتني بيها واحد الطبيبة قاتلي اعطي للطفل حاجة من حوايجك فيها ريحتك في الليل باش ما ينوضلكش

على فكرة مبروك الحمل ربي يتمملك بخير

 

[راضية حامدة]

رد: تجربتي في نوم طفلي

ام منصف
كيما قلتي كاين فرق بين الاولاد و البنات

و انا في الحقيقة البنات هوما لي عذبوني
خليل كان ماشاء الله يرقد معايا في الليل و ينوض معايا
عمرو ماناض في الليل الا في وقت المرض الاسنان و ما شابه
و كي ينوض صباح ما يبكيش شحال من مرة كنت نلقاه نايض و يلعب او يلاغي حتى نسمعو لكن ما يبكيش
تربى بصحتو و هادئ جدا الله يبارك
و دوك هذاك العقل ولى طيارة

 

[راضية حامدة]

رد: تجربتي في نوم طفلي

اما زهرة فحدث و لا حرج
هي زيادتها كانت بالفوغسابس و دارولي تخدير عام
لما فطنت و جابوهالي جابوها تبكي
و الليل كامل لي بيبي راقدين و هي قالبة السبيطار
الممرض لي كان داير لاقارد ما خطانيش دقيقة
المخلوق ربي يحفظو رفدها معايا و يقلبها
راح شرالها بيبرو و حليب لانها ما حبتش ترضع
كي حضرلها البيبرو ماحبتش ترضع منو ثاني
زاد راح شرالها العسل تع الشفاء علبة صغيرة و قالي ادهني بيه في الحلمة و شوفي ربما ترضع
و هي والو تبكي برك
لما يسمعها سيقسيني اذا رضعت انا نقولو والو ما رضعتش
للصباح هبطلها السكر و جا اخصائي الاطفال كان الممرض هذاك خلالو رسالة بلي البيبي فلانه ما رقدتش و باتت تبكي
و عملولها تحاليل و راديوات ووو وكل شي عادي
و خرجت من السبيطار بعد 4 ايام غير على جالها و بقات على حالها
و في الدار خلاص انا و امي و بابا دايرين عليها الدالة واحد يشدها و لخرين يرقدو
كي درت الاربعين رحت لداري و هناك كانت الكارثة
ما عندي حتى واحد نتكل عليه انا و راجلي فقط

صدقيني خطرات الجيران كي يسمعوها تعيط في الليل يجو يطبطبو عليا يقولو اراجلي وش بيها الطفلة ربما انا ما عرفتش كيفاش نديرلها لاني كنت وقتها صغيرة شوي كان عمري 21 عام

كانو ساعة ساعة تجي العجوز جارتي في الليل على جاهل تدهنها بالزيت و تعمللها رياضة شوي و تستناها ترقد و تروح

و بقات هكاك حتى دارت 9 اشهر كي بدات تحبي خلاص ولات ترقد كيما الكبار و الحمد لله
بصح انا كنت خلاص
كنت نبات معاها في الليل قاعدة و الصباح نرفد محفظتي و نروح نخدم
و تقدري تتخيلي حالتي مصفارة و ضعيفة لي يشوفني ينخلع
و الحمد لله فاتت و فات معايا بزاف امور

 

[راضية حامدة]

رد: تجربتي في نوم طفلي

اما هاجر كيف كيف ما ترقدش الا و ترجعني نهدر وحدي
تكون نعسانة لكن ما ترقدش تبدا تبكي و تعيط حتى خلاص ترقد
و انا وليت نكره الليل لانو راني عارفة وش راه يستناني

هذا شهر شوي راهي ترقد شوي لكن بعد صراع كبير المهم كي ترقد ما تنوضش

حنا نحتسبو صبرنا لله رب العالمين و ان شاء الله تكون في ميزان حسناتنا يا رب
فحقيقة التربية مش لكل الناس و مش اي حاجة
الحمد لله و ربي يقدرنا

 

[ام الحلوين]

رد: تجربتي في نوم طفلي

سلام بنات
نسيت لي قالت على (نجمة لرض ) لواش مليحة ؟؟؟؟؟
انا نعمل كمون و زريعة البسباس برك و ماشي كل يوم
سلامي كاااااااامل لوليداتكم و ربي يحفظهم

 

[راضية حامدة]

رد: تجربتي في نوم طفلي

ام الحلوين
نجمة الارض يقولو مليحة ترقد الطفل لما يشربها تيزان
بزاف لي جربوها و الله اعلم

 

[hadda0425]

رد: تجربتي في نوم طفلي

شفتي ام منصف راهو اختراع عن طريق الصدفة والله والله عمري ناضت بنتي في الليل غير في ايام المرض
وتاني بزاف من اهلي قلتلهم على هاذ الطريقة واعتمدوها وتاني تنجح غير للي يعتمد الرضاعة الطبيعية لان الصغير يكون مرتبط بزاف بامو وبريحتها وراني ناوية ان شاء الله نتبع نفس الطريقة مع بنتي الجاية
باش نرقد ونصبح هه كلشي كلشي ولا الرقاد

امونة طريقتك كانو يعتمدوها النسا تع بكري لي كانو عندهم لمناسج والخدمة تع برا هههه
كانو يديرو هاد الطريقة تع تشمخي كتانة بالحليب ولا يحطولهم حاجة من حوايج امهم ويكلحو بيها صغيرهم وهما مساكن يظلو يخدمو هههه وهذاك الصغير ماينوضش حتى يسحس بالجوع تع الصح الصح
​

 

[hadda0425]

رد: تجربتي في نوم طفلي

اما هاجر كيف كيف ما ترقدش الا و ترجعني نهدر وحدي
تكون نعسانة لكن ما ترقدش تبدا تبكي و تعيط حتى خلاص ترقد
و انا وليت نكره الليل لانو راني عارفة وش راه يستناني

هذا شهر شوي راهي ترقد شوي لكن بعد صراع كبير المهم كي ترقد ما تنوضش

حنا نحتسبو صبرنا لله رب العالمين و ان شاء الله تكون في ميزان حسناتنا يا رب
فحقيقة التربية مش لكل الناس و مش اي حاجة
الحمد لله و ربي يقدرنا

نسرين سوفريتي تع الصح ما تقوليش كي لبنات كي الذراري كامل يتعبو ممكن كي تعباتك زهرة بزاف وكانت هي الاولى ومكيش مالفة وخليل جا شغل ساهل ما سحستيش بيه
يقولك ما يجي يكبر راس حتى يشيب راس
​

 

[ام الحلوين]

رد: تجربتي في نوم طفلي

شكرا حبيبتي راضية ان شاء الله نحوس على نجمة لرض هنا اذا لقيتها نجربها لبنتي