هاني رجعتلكم من جديد
ان شاء تكونو كامل بخير
علبالكم قلبي وجعني صح
رح نحكيلكم لحكاية مباشرتا
و انا في الخدمة جاني زبون باه نديرو فاكتور بروفورما تاع عمي لونساج
الي ره كل الشعب الجزائري طامعين فيها
الشعب المغبون
المهم هذا الراجل أب لزوج بنات
تخايلو معلبالوش حتى واش هو المشروع الي رح يديرو المهم قالي الفاتورة متوصلش المبلغ كذا..... و خلاص
قلتلو مي لازم تعرف واش رح تدير باه نعرف واش راح نحطلك انا ثانيك
قالي معلباليش
:-o:-o
المهم انا يمدولي دراهم مش طامع في لبروجي طامع غير في دراهم
قالي عندي زوج بنات وحدة انا نربيها ووحدة مديتها لأهل زوجتي يربوهالي
الله غالب مقدرتش نعيشهم في زوج
ثم تنصعقت انا
معرفتش نتشوكا من لبروجي الي معلبالوش واش رح يدير فيه
ولا ذوك لخيات الي فرقوهم و هوما صغار
قولولي درك كيفاه رح يترباو بعاد من بعض؟
واش من اخوة هذي ؟
و هذا كامل و حنا في 2014 و ريحين من غدوا نزيدو
نشوفو مستقبل لبلاد كيفاه رح تتطور
و وين رح يوصل بينا التطور مثل هذا
صح انا مرضني هذا الموقف
و درت روحي في بلاصت البنت هذيك الي شايفة ختها مع باباها و يماها
و هي مرمية عند جداتها كلي درت غلطة كي جات لهذي الدنيا
كانت معاكم mlina4algeria
