كرهت زوجي ونفسي

[مشكلتي]

السلام عليكم
فات تقريب عام على زواجي وعشت لحظات سعادة ولحظت حزن كأي زوجة
لكن مؤخرا حاسة أنو زواجي رح يتدمر لظروف تافهة
زوجي حسيتو كل مرة يزيد يبعد عني رح نحكيلكم شوية على حياتي بالاك تفهمو الشي الي خلانا نبعدو
زوجي من النوع اللي يعطي الحق لأمو في كل شي حتى لو كانت ظالمة
في أول زواجي كنت حاسبة رح نعيش وحدي معاه وبعد مدة صغيرة انتقلت العائلة الكريمة للعيش معي
من يومها وانا نسيت الراحة حتى صلاتي ماوليتش نتهلا فيها
عجوزتي من النوع اللي يخلي الكنة تخدم مالازمش ترتاح وإذا شافتني غلقت غرفتي تجي تطبطب وتقولي كاين نسا تطلقو على جال الرقاد
كرهتلي حياتي بمعنى الكلمة وكي نقول أي كلمة لزوجي يبهدلني ويقولي النسا كامل يخدمو وساكتين وكأنو جابني جارية مش زوجة
أهلي ماقدرتش نقوللهم خوفا من خراب بيتي حبيت نحافظ على زواجي وقلت نصبر " اللي حبت تبني عش تحمل الغش"
بصح ماقدرتش خلاص تعبت
والشي الي خلاني نزيد نكره حياتي أكثر أني كي نمرض يجيبوني لبيت أهلي مالازمش يخسرو عليا فلس حتى مصروفي كزوجة ماكانش
والحاجة لي مرضتني تخيلو كي جيت لدار أهلي باش نعيد عليهم راحو يصيفو ي مدينة ساحلية وماقالوليش عرفت صدفة من أخت زوجي لي راحت معاهم قاتلي كون غير جيتي معانا :s
انصدمت وحسيت أني نكره العايلة هذي حتى زوجي
راني مقررة نطلب الطلاق لما يجو يدوني
قولولي هل قراري صائب وإذا لالا كيفاه رح تتصرفو لو جيتو مكاني
سامحوني على الاطالة

 

[راضية حامدة]

تم الاعتماد

لي عودة ان شاء الله

 

[السلطانة]

وعليكم السلام
اهلا اختي هادي مشاكل عادية وتصرى في اي عايلة جزائرية وخاصة في بداية الزواج
حسب كلامك انتي بدارك وحدك وعجوزتك هي لي جات تسكن معاكم
يعني هي الضيفة عندك ماشي هي ! ولا الدار تاعها ؟
اي عجوز راهي تحب تتصرف كي تلقى الكنة في دارها تتسلطن عليها وهادي راهي طبيعة بشرية في اي امرأة ومابالك تكون ام الزوج
لازم تديري حل ماجيتيش باش تخدمي عليها وكأنك خادمة
تخدمي صح لكن باش تولي هي تأمرك وحدة مترضاها
احكي مع راجلك قوليلو الحقيقة
تناقشي معاه
خليه يفهمك باه يكون عادل في الحكم تاعو
ويفرق بين حق امو وزوجته
وقرار الطلاق اترواي فيه
لأنو ماوش ساهل راح يكون الخاسر الوحيد أنتي
هو من غدوة يروح يخطب ويجيب وحدة خلاف وتمشي حياتو نورمال خمي في روحك انتي !
ربي يوفقك
الامور هادو لازمهم التفكير والتروي التسرع مايجيب ولاشي
​

 

[ماكانش]

هاذو مدايرينك خديمة عندهم ...

 

[alardo]

السلام عليكم و رحمة الله ....

رح نحكيلك حكاية اختي الكريمة ....
ثما مرا بنت فاميليا , خطبها راجل من عيلتهم و جاب منها صبي لما شفتو صدقيني قلت الزين و العين هذا خسارة فيه اب و ام كيفهم المهم ,,, الاب طلق مرتو على جال انها تشاجرت مع امو على جال " كوزينة " و وصلت بيه الجرأة انو رفع عليها القضة هروب من المنزل بدون إذن ,,, هههه
و درك راهي مطلقة و بصبي ,,,
شوفي نفسك هل الرجل تاعك جاب امو تعيش معاك لسبب انو حاب يكرمها و الا الدار هديك هي دار العيلة يعني انت و هو لي ضياف عند امو ... و على قضية الراجل ياخذ راي امو ,, هذي الاغلبية الساحقة فيهم القلية هذي يعني متعييش نفسك و تبحثي ,,, ايضا ,,, انت مدامك عايشة معاك راك مش خدامة ,,, يصيفو ميصيفوش عيشي حياتك ,,, هو باين انو امو عقليتها مش صح و هو وليد امو يعني يمشي على هدرة يماه و فقط ,,, يعني نهار لي يلقى نفسو غير انت معاه درك تشوف كيفاه يولي معاك ,,, قالهاش المصري " تمشيه على العجين ميلخبطوش"
النوع من هذا من الرجال ,, لازم تفوت عليه ازمة قوية باه يفيق و يعرف انو غير مرتو لي توقف معاه ,,
و الطلاق عمرو ما يجيب نتيجة الا اذا كان مهملك لا تاكلي لا تشربي لا تخرجي و زيد يقلك غير نشفي و سيقي و و و و و
و على امو باه تخدم معاك هذي غير فوتيها لانو من المستحيلات السبع ههههه تشوف مرت ولدها في الدار و تخدم يا حسرااااااااه ,,, نقلك اصبري و حاولي انك تكوني معاه وحدو و افهمي عليه ,, اجبديلو خيوط راسو و خليه يحكيلك علاه تغير و صار هكذا ,, و قوليلو اذا شاف انو غلط في المرا يقلك من الان قبل ما يكون فيه طرف 3 لي رح يخسر كل شيء مع الطلاق ,,

ربي يكون في عونك و ربي يسرلك امرك ان شاء الله

 

[Hydayete]

أختي إياك ثم إياك ثم إياك ان تفكري في موضوع الطلاق لان الخاسر الاول و الأخير هو انت و هذا الشغل الكثير و الاعمال الشاقة التي تقومين بها في بيتك و برغبتك ستقومين بها و ربما اكثر في بيتكم بعد طلاقك و العياذ بالله هذا زيادة عن الكلمات الجارحة و لقب المطلقة الذي سيلتصق بك مدى الحياة كوني اكثر قوة و صبر و لا شيء يبقى على حاله قومي بجميع أشغال المنزل و لا تتذمري و بيني لهم انك مستمتعة بخدمتهم هكذا يكفون عن استفزازك و تربحينهم و تربحين حب زوجك الذي. سيأتي يوم و يلاحظ تعبك و يتفهمك بإذن الله عودي الى بيتك و كان شيء لم يكن حتى ذهابهم للتصييف لا تحاسبيهم عليه اعلم جيدا انه صعب جداً ما أقوله لكن ما باليد حيلة عليك ان تكوني اكثر حكمة و ان بعد العسر يسرا

 

[largo19]

ربي يوفقك أختي و ييسر أمورك ٫٫٫٫ ما لقيت ما نقول ٫٫٫ الحل في يدّك ٫٫ لازم تتكلمي مع زوجك و تفهميه بالعقليّة و زيدي قولي لباباك يتكلّم معاه ٫٫ لازم تكون خطوط عريضة لا يتجاوزها أي واحد فيكم ٫٫٫٫ الغلطة منّك أنتي في بداية الزواج ما بيّنتيش خطوط حياتك و حدود حقوقك و واجباتك لزوجك ٫٫٫٫

إذا كانت عندك الشجاعة و الجرأة ٫٫ صارحي زوجك بأن ما تفعله أمّه ليس من حقوقها ٫ و هو ضلم و عدوان ٫٫٫ فهميه بلّي عندك حقوق مضمونة في الشرع و في القانون ٫٫٫٫ من أهم حقوق الزوجة في قانون الأسرة الجزائري هو حق الزوجة في المسكن المستقل و اللاّئق حسب قدرات الزوج طبعا ٫٫ و حقها في النفقة و العلاج ٫٫٫٫ هذه الحقوق يضمنها القاضي ٫٫ لو بيّنتي له بأنّك تعرفين حقوقك لكنّك لا تريدين إحراجه أمام الناس و أمام العدالة و أنك تفضلين أن تكون المبادرة منه شخصيا لأنك تحبينه و تحترمينه فسيفيق من سباته و ينتبه للظلم اللذي سلطوه عليك ٫٫٫

 

[stella.m]

ربي ييسر امورك ختي
ونقلك ماتتسرعيش وتطلبي الطلاق هذي مشكلة صغيرة بزاف ماشي حاجة
الام كي تزوج ولدها تحسو ضاع منها غيرة الام الله غالب كي تزوجي ولدك تفهمي
حاولي انك تتفاهمي معها بالعقالة واطلبي برك رضاوتها تتسقم الدنيا في وجهك
وكي راحو يحوسو وخلوك ماشي حاجة مع الصبر راكي نتي ثاني تعودي تخرجي تشمي هوا
وتحوسي
ماتكبريش الامور وماتخليش الشيطان يوسوسلك

وربي يهنيك ختي
​

 

[R@MA]

اولا السلام عليكم
يقلك الرزانة زينة العقل
حنونة ماتقلقيش روحك المشاكل الا وتكون
لكن حاولي تكون عندك شخصية قوية تفرض رايك
يعني تأثري لا وليتي غير تتأثري بواش يصرى
راح دمري روحك
ماتقوليش نطلق قولي عندي شروط مقابل الرجوع
..................
وخلي الباقي عليه يايقبل ياطبل ويضرب الزرنة
اما على العجوزة ربي يهديها كما تدين تدان راه عندها بنتها وربي يخلص
قالك يالي تربي تخاف من عقايب ربي
خليها جي من عندو مش من عندك وربي يفك همك
​

 

[اميرة في مملكة العلم]

السلام عليكم اختي الغالية ...
نتي ما فكرتيش ملول ...هاذ الحاجة وكان فكرتي فيها قبل الزواج ..بصح دروك صايي
لازم تصبري شويا ...و ما تنسيش طاعة خالقك ..مهما كانت الظروف فالصلاة واجبة ..
و طاعة الزوج ايضا واجبة فهي اولى من طاعة الوالدين ..
و انا انصحك قبل التسرع بطلب الطلاق ان تصلي صلاة الاستخارة

 

[Amira28]

السلام عليكم
يا اختي سهل جدا انك تخربي بيتك ولكن صعب جدا انك تعاودي تبنيها انصحك باعادة التفكيير في قرارك هادا باسكوا الطلاق ماشي حاجة مليحة وبالنسبة لمشاكلك هادي تعتبر عادية بالمقارنة مع مشاكل اخرى حكاولي عليها والله كاين بعض النساء صرا فيهم اضعاااف اضعااف واش صرالك وتحملوا وصبروا واليوم راهم بخير والحمد لله انت تاني زيد اصبري شوي وفكري مليح مليح اومبعد قري واش تدير باه في المستقبل ماتندميش
ربي يعاونك ويفرج عنك همومك

 

[فايزة1207]

اللي حكيتيه يصرا على كل حرة بشكل من الاشكال
لكن اللي يفوق الحد كيفاه مزوجك ويصرفو عليك اهلك وثانيا كيفاه يروح يحوس يلا مرتو والله غريبة جدا بالنسبة ليا

 

[ضيوف وسـنغادر]

يآ اختيــ هآدي خدمة النسا لعرايستهم كاين اللي طرح فيهم الخير كاين لالا
على حساب هدرتك حمآتك رآهي بزآف غآلطة وعام على الزواج بعد حب ومودة مارايحش يروح هكاك في مشكل صغير
صلي صلاة الاستخارة ادعي ربي يسرلك اموورك
صارحي زوجك بواش في قلبك ونفس الكلمات اللي كتبتيهملنا هنا وبينيولو بلي انت زوجة تع الصح بما تحمل الكلمة
واتذكري بلي ماش انت اول وحدة تتهمش هكا وقوليلو حط روحك في بلاستي يعني صارحي زوجك بواش في قلبك اذا هو قعــد بتفكيرو وماحبش يغير عقلو ودايرك بونيشة عندو وعند امو انتما كلآم اخر وان شاء الله مايكونش من هاد النوع ورديلهم على افعالهم بحسناتك وافعالك الراقية اللي يتقهروا منها , يجي نهآر ويعرفو بلاستك وينهآ حنونة​

 

[jijo7]

يا ختي واش نقولك ربي يكون معاك ويفرج عليك ......نقولك اصبري تقوليلي صبرت حتى خلاص ما قدرتش وعلابالي مايحس بالجمرة غير الي كواتو ختي واش نقولك ما تستعجليش حتى ما تندميش وتقولي دمرت بيتي بيدي خمي مليح واستخيري وافهمي منو علاش ما خبركش على البحر حتى مرة اخرى ما تقوليش انا على جال رحلة تطلقت ........ونقولك اكثري من الاستغار ربي يفرجها انشاء الله

 

[sarorita96]

اختي نصيحة مني ههاذه ليست مشكلة كبية
الصبر مفتاح الفرج
دوك تولدي وتجعي عجوزة وعدك كنة
ربي يعطيك لصبر
ويفرج عليك

 

[salma zayna]

عادي ديري روحك ماسمعتيش حتى حاجة

 

[حرفٌ يغنّي]

نقلك زوج كلمات أختي ..
أنعلي الشيطان وأرجعي لدارك ، واصبري ،
وينكم من نساء بكري ...!
​

 

[etmeriem]

rabbi m3ak khti matasra3ich matwaslihach ltla9 inchallah m3a lwa9t tetfahmou telgaw houloul w asobri w rabbi yfaraj ....

 

[Ľă Mîšš HîBă]

اللي حكيتيه يصرا على كل حرة بشكل من الاشكال
لكن اللي يفوق الحد كيفاه مزوجك ويصرفو عليك اهلك وثانيا كيفاه يروح يحوس يلا مرتو والله غريبة جدا بالنسبة ليا

mem ana hadi hiya li habstli rassi kivah yroh wy5ali marto einha l7arma wrjoliya ta33o:s:s:s

 

[بنت لبحر]

علاش اختي واش داك لطلاق

الفترة الاولى تاع الزواج ديما تصرىلمشاكل بين الازواج راكم في فترة تعارف ماشي كيما في الخطوبة تعرفو غير لحوايج لملاح مي كي تتزوج رايحة تعرفي حوايج اخرين

اعرفي كيفاه تكسبي راجلك اتناقشي معاه و دايما اقثليه باللسان الحلو