وش ندير معاه ؟؟

[مشكلتي]

السلام عليكم

أنا عضوة فاللمة عمري يتراوح ما بين 16- 19 سنة

البروبلام تاعي يكمن في أنو واحد حاب يجي يخطبني لكن البروبلام أني حسب سني هذا مزالني صغيرة في نظر المجتمع

الطفلة الي تتزوج في وقت كيما هكا مريضة بالزواج ومتقدرش تتحمل المسؤولية و خلي وخلي

بصح أنا في رأيي أنو أمر عادي وعلاش يعني نحبو ويحبني و مش حاب يدخل من الطاقة حاب يجيني من الباب

الحلال برك ناويه و مايحبش هذيك العلاقات والحمد لله مام أنا منحبش ذيك العلاقات

بكن نظرة المجتمع خلاتني نرفض حاليا و بعدها هو ماقدرش يصبر و كمل معايا كصديق لكننا بصراحة نقدر نقول بلي مناش أصدقاء لأننا معترفين لبعضنا البعض معنتها أننا نحبوا بعضنا ولأننا مش حابين ذيك العلاقات نخذعوا في أنفسنا كي رانا نقولوا بلي مجرد أصدقاء

أما بش نخمم نخليه الى أن يوصل الوقت تع الصح صدقوني شحال من مرة نحاول نديرها ونقولوا هو يوافق

ويقولي صح لازم نصبروا ونجيبوها شحال هكا منحكيوش سمانة ولا ومبعد منقدروووووش ونرجعوا يقولي نحكو ديفوا و 5 دقايق ولا نبداو نحكيو بالشوي بش نوالفو ومبعد نحبسوا زعما ومنقدروش

بش نوصفلكم حبو ليا منقدرش كون نقول أح برك يتقلق مليار نقوللو بلي والو ما صرالي يبقى مخلوع هههه

صدقوني انسان هايل وبش نخمم نخليه مستحيييييييل

حنين عليا واقف معايا فكل صغيرة وكبيرة أمه وأختو علابالهم بلي ناويني أنا

شحال مرة يحب يروح يحكي مع خويا كي يشوفو وميقدرش يبقى حاصل بين كلمة نروح ولا منقدرش

ديما يخزر في خويا و يحب يروح يهدر معاه بصح ميقدرش ومبعد يحكي معايا تقول حاجة حاصلة في رقبتو يقولي مقدرتش نحكي معاه

آااااه يا ناس فهموني ياك كل شخص فهذي الدنيا يحب يكون عندو شخص يفهمو و يحس بيه ويخاف عليه

أنا هذا هو تاعي بصح وش ندير دوك لازم نلقى حل لازم نتهناو

الله يستركم يا مشرفين متفاصيوش موضوعي لأني صح حابة نلقى حل

وقتاش يوصل وقت الزواج؟؟ كيفاش ندير؟؟ نقبل؟؟ منقبلش؟؟ نصبر؟؟ نحاول نبعد مهما يصير؟؟ نبقى معاه مدامو ناويني صح للحلال؟؟​

 

[راضية حامدة]

تم الاعتماد
الزواج يا بنتي ما عندوش عمر محدد
كل واحد و مكتوبو
ما قلتيلناش اذا تقراي و لالالا
و هذا الشاب ثاني وش يدير
عموما اذا ناويك للحلال علاش راه يلقى في الاسباب يتكل على ربي و يالله

 

[السلطانة]

وعليكم السلام

أهلا أختي

مادامو ناويك للحلال كيما قلتي
يتقدم لأهلك
واذا كنتي تقراي يسناك وين حابة توصلي وخلاص
عمرك بين 16 -19 سنة
يعني يخطبك عام عامين تديرو العرس ماشي مشكلة خلاص
ربي يوفقكم

 

[*amina*]

السلام عليكم
يا اختي الوقت هدا الحب مكانش منو في رأيي الشخصي الا حاب يتزوج بيك و ناويك كيما قلتي قوليلو يجيك من الباب ماشي من الطاقة بصح لازم تعرفي بلي الزواج مسؤولية و حياة جديدة مغايرة للي في داركم
يعني تلقاي دار غير داركم و كلش يتبدل عليك خاصة المسؤولية
انا الا تاخذي برايي قوليلو يحط عليك الكلمة وهو يلهى بخدمتو و انتي لهاي بقرليتك الا تقراي حتى يلحق مكتوبكم و يجمعكم ربي سبحانه تحت سقف واحد والله ديك الهدرة تاع التلفون ما تدي ما تجيب غير تضياع وقت و هدرة زايدة يعني خرطي في خرطي​

 

[بنت الـ25]

السلام عليكم

هدرة الناس ما تدي ما تجيب والسن اللي راكي فيه مناسب للزواج
الناس راهي تهدر ديما ،، اللي تتزوج صغيرة يقولك هابلة على الزواج واللي تكبر وما تتزوجش بايرة
ايمالا متديريش على عقلية الناس اذا كنت قانعة ومتيقنة بلي هدا هو الانسان اللي رح يسعدك
وانك قادرة تتحملي انتي وياه مسؤولية دار واولاد ممبعد علاش التأخير
كل تأخير يعدبك انتي وهو ، مش الناس اللي تتعدب
مالا الحل المنطقي والشرعي هو الزواج مدام السيد ناويك مفهمتش وين راه المشكل؟


​

​

 

[الخليـل]

المسؤولية الزوجية كبيرة جداً وليست مستحيلة ...
إذا كنت تُحبينه وبعلم والديك وعلاقتكما عفيفة طاهرة ، ووالداه يعلمان وهو صاحب أخلاق كما ذكرت ويحبك كشريكة لحياته ، وكانت له وظيفة أو عمل قار .... ماذا تنظرين إذن ؟
شاوري أهلك : الأم والأب وإخوتك وأخواتك
وتوكلي على الله .....

لا تعيري إهتماماًَ لكلام المجتمع
فلم يعد ذلك المجتمع الذي نثق فيه ونعول علىيه
مبروك مبروك مبروك

أتمنى لكِ التوفيق
​

​

 

[Hakan]

انا نقلك صراحة المشكل انو انت مدايرة في نفسك بلي راكي صغيرة وانا نقلك الصغر في الراجل ماشي في المراة لانو عمر الفتاة يتحدد بشطارتها مي عمر الراجل يتحدد بمالو وسلطانو مالا غير ما تخليش الشيطان ويااختي زيد حاجة اخرى ياك الخطبة ماشي زواج خليه يجي يخطبك ومن بعد تحبو تزوج كي يكون في عمرك 100 المهم هادي نتاع اصدقاء غير فوقيلها باسكو هذي من الشيطان زرعها في قلوب الجاهلين بالدين بابكم فيه 2/1 مالا غير يجي يطبطبق والقاطو من عندي سلام.​

 

[أم عبد الله]

المسؤولية الزوجية كبيرة جداً وليست مستحيلة ...
إذا كنت تُحبينه وبعلم والديك وعلاقتكما عفيفة طاهرة ، ووالداه يعلمان وهو صاحب أخلاق كما ذكرت ويحبك كشريكة لحياته ، وكانت له وظيفة أو عمل قار .... ماذا تنظرين إذن ؟
شاوري أهلك : الأم والأب وإخوتك وأخواتك
وتوكلي على الله .....

لا تعيري إهتماماًَ لكلام المجتمع
فلم يعد ذلك المجتمع الذي نثق فيه ونعول علىيه
مبروك مبروك مبروك

أتمنى لكِ التوفيق
​

​

رايي من راي الاخ
يعني كوني صريحة مع اهلكـ ولي فيه الخير يقدمو ربي وكلام النـآس مايقدم مايوخر غلاتي
هذا مستقبلكـ انتـ وليس العالم لكي تهمكـ رؤيتهم للامر
وياسيدي زوجة اخي كان عندهـآ 18سنة كي جبناها العام لي فااتـ وعادي ههههه راهي ام ضركـ هههههه
يعني واش حبيتـ نقولكـ الزواج ماشي سياحة الا راكي قادرة ع المسؤولية وو تقدري تبداي بالخطوة الاولى انت وهو بخطوبة شوي مطولة بعام او عامين لتتاكدا م مشاعركما اكثر
وربي يجيب لي فيه الخير
سلامي​

 

[آمِيْرَتُه]

السلام عليك
السن لي راكي فيه نتاع زواج
اذا شفتي روحك قد المسؤولية توكلي على ربي و قوله يتقدم
اذا كنت تقري يخطبك و يستناك حتى تخلصي و اذا قاعدة في الدار يخطبك و يديكبلا مطولو في الحكاية
ربي يهنيكم و يجمعكم في الحلال

 

[red rose]

ربي اوفقك اختي

 

[¬Đỉaмơŋđ ✿]

وعَليكمْ السَلآم ورَحمَة اللهِ وبركآتهْ

صغيرَة فالسنْ لكنْ إذآ إنتِ شآيفةْ روحكْ قآدرة على تحَمل المسْؤولية وإنتِ في هذآ السنْ عآدِي
مآدآم تقُولي نآويك للحلآلْ قآدرْ يجِي يطْلبكْ من أهلكْ وعآم تآع خطوبةْ ولآ عآمينْ،إذآ رآكي تقرآي تكَملي قرآيتكْ وتتزوِجي وإذا مآكثة في البيتْ علآش التعْطيلْ
نصيحتِي لكِ فقطْ تجَنبي كثرةْ الكلآم في الهآتف قبلْ مآتربَطكمْ علآقة تآع حلآل
ربي يوفقكْ أختِي ويسهلْ أموركْ
​

 

[التائب الخاشع]

أنا نوافق أخواني الي تكلموا قبلي وبالخصوص الي قالك أن الزوااج ليس له عمر صحيح المسؤولية تكون بالادارك الحقيقي للواقع الي نعيش فيه ميش بالسن أمر احق ان يقال ثااني حاولي تكلمي مع أهلك حول هذا الشااب وحاولي تقنعيه بااه يجي يخطب ولو انكم تتزوجو بعد عاام أو اقل بدون اي تطوال نتمنالك التوفيق في حيااتك التائب الخاشع يحيييييييييييييكم

 

[fanina]

نصيحة

بابا ميخلينيش نخرج نتعلم في الستاج لختش مزير ونا مليت

 

[stelllo]

ماشاء الله الأعضاء كل واحد عطاك رايه وكل الآراء راح تستفيدي منها اذا طبقتيها صح
كوني واضحة مع نفسك يا ايه يا لا
اما ان تكونوا صحاب وتهدروا ووو فهذا شي حرام للأسف... شوفي الطريق الصحيح وربي راح يسهلك الأمور

 

[meriem1988]

السلام عليكم و رحمة الله
هاذي في رايي ما شي كامل مشكلة اذا كان تجمعكم المحبة ربي يلاقيكم في طاعتو
المشكل انو في هاد السن لي راكي فيه تبالك الدنيا كامل انت و هو و بس ولكن الحقيقة كبيرة بزاف
انا شخصيا عقليتي تاع 19سنة و تاع ضرك 26 سنة ماعلاقاش
الطموح تبدل الاولويات تتغير الاهداف بان تكون عندي شخصية قوية كبرت و الحمد لله كونت روحي
وبنيت شخصيتي حتى مواصفات رجل احلامي تبدلت
المهم انا ننصحك باش تصبري شوية هاداوين راكي جاية للدنيا و الدنيا صعيبة و ماشي ساهلة
ان شاء الله ربي يكتبلك الخير و استخيري الله و ارضاي بواش كتبلك ربي
​

 

[RoseBonbon]

خليه يجي يخطبك

واتزوجو كي تشوفوا نفسكم مستعدين

وواش راحلك في المجتمع ؟

المهم داركم يكونو موافقين هذاك هو الصح

ومدام يحبك ومتمسك بيك

خليه يجي للدار خير ملي يكره وتخطبلو يماه وحداخرا

 

[NASRO DZ]

السلام عليكم
هدرة الناس ما تدي ما تجيب والسن اللي راكي فيه مناسب للزواج
الناس راهي تهدر ديما ،، اللي تتزوج صغيرة يقولك هابلة على الزواج واللي تكبر وما تتزوجش بايرة
ايمالا متديريش على عقلية الناس اذا كنت قانعة ومتيقنة بلي هدا هو الانسان اللي رح يسعدك
وانك قادرة تتحملي انتي وياه مسؤولية دار واولاد ممبعد علاش التأخير
كل تأخير يعدبك انتي وهو ، مش الناس اللي تتعدب
مالا الحل المنطقي والشرعي هو الزواج مدام السيد ناويك مفهمتش وين راه المشكل؟
+1

 

[jereve]

عجب !!!!!!!!!!!!!!!!!!!!!!!!!!!!!!!
ا بنت الناس خلي الراجل يجي يخطبك وتزوجي مدمتي تحبيه وخليك من العباد رايحين يتزوجو معاك ؟ وش بيه السن تاعك راهم يتزوجو حتى في سن 14 ويولدو في 15 واكيد انت اذا متقدريش تتحملي مسؤولية الأولاد متجيبيهمش بكري
المهم ربي يجمع بيناتكم في الحلال

 

[الباندي]

خليه يجي يخطب هذا هو السن تاع الصح اذا معلبالكش ....فيقي هههه

 

[امونة الشاوية]

بزاف بنات يتزوجوا العمر هاذا في هاذ الوقت
ودجا راح تخطبوا عام وعام تتزوجو والاهم تكون عقلياتكم كبار وتقدروا تحلو الدار
كاين اللي كبار في العمر وهوما صغار في العقلية والعكس تاني