- إنضم
- 13 أفريل 2013
- المشاركات
- 14,618
- نقاط التفاعل
- 54,537
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلآم عليكُم يا ناس اللّمة الكرآم والأفاضل
إن شاء الله الجميع بخير وبصحة وعافية
أما بعد ، مرّ عليا وقت طويل ما تواصلتش في اللمة
واليوم رايحة نوضع أول موضوع بعد غيابي
وحسب هذا القسم ولي يشجعنا باه نفرغو واش كاين في قلبنا
رايحة نفرغ قلبي ونحكي على حاجة لي مر عليها تقريبا 10 اشهر ومازالت تحرق في قلبي
وما لقيت لمن نحكي من بعد ربي سبحانو غير للمتنا الغاليةو لأهلها الطيبين
وحسب العنوان لي هو "و راحت الغالية " يبين بلي فقدت شخص عزيز عليا
هاد الشخص هو جداتي الغالية ، لي فراقها للآن راهو يحرق في قلبي وكل ما نشوف صورتها ينزلو دموعي ، الناس لما يشوفوني يضحكو عليا يقولولي " هادي جداتك برك ودرتي هكا؟؟ " ، جداتي برك؟؟؟ هادي راهي " يما " قبل كل شي، بين يديها تربيت لدرجة نسميها "يما" وعمري لا قلتلها جداتي، هادي صاحبتي وختي ويما وجداتي وكل شي،
مازالني نتفكر نهار نتائج الباكالوريا بقات ساهرة حتى ما بعد 12 تاع الليل وهي تستنا غير باه تكون أول شخص يباركلي بالنجاح، ما زالني نتفكر لما تصعاب عليا حاجة تقولي " راني ندعيلك ليل مع النهار باه ربي يسهلك وربي مستحيل يخيبك يا بنتي" ، هادي ماراهيش جداتي لي نتلاقاه من عيد لعيد وموسم لموسم هادي راهي ختي لي كي نقعد معاها تضحكني وتحيكيلي على صغرها ، ما زلت نتفكر لما نلقاها في وسط الدار كي الشمعة وهي تغني وتقولي " أنا الحمد لله ديما زاهية" بصح وينك يا الغالية؟ ، مازلت نتفكر نهار هزيت الهاتف وسمعت بخبر موتها من شدة الصدمة ابتسمت لأنو حسيت أنها كذبة ولا راني في منام بصح من بعد دموعي بداو ينزلو وحدهم وصوتي بدا يعلا وحدو وقلبي ولا يحرق ما أمنتش كن نستنى في كاش واحد يجي ينوضني ويقولي راكي تحلمي، وينهم هادوك اليامات لما ندخل عليها وفي يدي الحلوى وتقولي بلعقل "يابنتي ياك أنا جداتك هيا نتقاسمو كيف كيف بصح ماتقولي لحتى واحد" نولي نضحك ونقولها راكي مريضة بالسكر ما نقدرش نمدلك بصح في اللخر تغيضني ونقسم معاها وناكلو بلا مانقولو لأي واحد، مازال نتفكر لما يبدا المسلسل وتقولي أرواحي نتفرجو كيف كيف وتقتلني بالضحك وهي تعلق على الممثلين ، كي تشوفني محتاجة حاجة تقولي نعطيك الدراهم وكي نشريلها هدية ولو بسيطة تفرح بيها و تلبسها وماتنحيهاش خلاص وتقول هادي "هدية من عند بنتي" ، حتى قبل ساعات من موتها وهي تسقسي علينا وحنا ماعلابالناش بلي الموت رايحة تخطفها منا، متمنية لوكان يولي الزمن للوراء ونحضنها بكل قوة ونفرغ هاد الحرقة لي في قلبي ، بصح الله غالب إنا لله وإنا إليه راجعون مازلت نتفكر لما سلمت على جبينها البارد لي فيه ريحة المسك وأنا نستنى منها غير تفتح عينيها وتضحك معايا وتقولي "يعطيك الصحة بنتي"، رمضان بلا بيها ظلمة وراني نخمم على العيد كيفاه يجوز وهي ماكانش ، كنا نتسابقو نهار العيد شكون يتصل بيه الأول ويقولها عيدك مبروك ،شكون لي رايح يقولي درك نعتي نشوف يديك إذا حنتك خير ولا حنتي خير ، شكون لي رايح يفرح مع يشوفني نهار لعيد ويوقلي ماشاء الله جاتك اللبسة هايلة، شكون لي رايحة نحكي معاه ونضحك معاه بعد اليوم؟ ، اسمحولي خاوتي طولت بزاف وحكيت بزاف ، لكن ماكانش مكان نفرغ فيه من غير اللمة الغالية ، ندعي ربي ان شاء الله يرحمها ويجعل مثواها الجنة ويلاقيني بيها في الحلم ، معليش حتى ولو نحضنها في الحلم يكفيني ، ربي يغفر لموتانا كامل ويوسعلهم قبرهم في رمضان هادا ويجعلو روضة من روضات الجنة ، ربي يغفرلنا أجمعين واسمحولي لا طولت عليكم وتقبل الله صيامكم وقيامكم وصالح أعمالكم
